طوبى الجزء الاول

تابع

محمد بإبتسامة عتب:غير خيره بوي ياحناي بس..يجيك كل يوم ولا مايجيش؟!..وكل مايخش ايديه معبيات..
مرات يجيك ويقولك البسي جلابيتك وهي نطلعوا..وامي الطلعه معاه تطلبها طلبه..والله ماريت واحد يحب امه ويدلل فيها زي بوي..
مغليه عقدت حواجبها وهي تضحك قالت:ووااك من لسانك وااك..مانقدر عليه ياولد عويشه..
محمد المهدي بضحكه:ربي يحفظها ويحفظك ياعسل..وباس راسها..
تشجعت هلبه اميمه باللي داره محمد..
خدت نفس وخشت عليهم وهي تقول:السلام عليكم..
ناض محمد وقف وهو يقول:وعليكم السلام..
ومغليه ردت من فوق نفسها:وعليكم السلام..
قدمت اميمه وهي مبتسمه لعزوزتها..
وصلت فيها وطبست عليها وقالت:كيف حالك عمتي..وكبت راسها...
مغليه؛من ربي في خيار خيري..
محمد حس ان في كلام مش حلو حينقال فأنسحب وهو يقول؛خل بنركب تتغدى ونقيل..سلام..
ومشي خدي شنطته وطلع من الدار وحناه تقوله:بالسلامه ولدي..
اميمه:سلام..بعدين شبحت لعزوزتها وقالت:اسفه ع اللي صار امس..مش قصدي نرد عليك الكلام..بس تمنيتك ياعمتي انتي بس اللي حاسبتيني..
اميمه:خديجه حماتك الكبيره وزي اختك سدرة بالزبط..وكلامنا معاك امس عتب وخوف عليك...مش نحاسبوا فيك..البلاد وضعها يخوف تروحي في الليل بروحك والطريق طويله تندري شن يصير فيك!..راك امانه عمر عندنا..
اميمه:كلامك مزبوط عمتي هدا علاش اتفقت اني وخوتي يروحوا بيا لما نكمل خدمة في الليل.
مغليه في نفسها"غير يروح عمر تو نتفاهم معاه"..
هزت راسها وقالت:باهي بري خودي جهاز قياس الضغط وقيسي ضغط عمك تعب شويه اليوم..
اميمه بقلق:خيره لاباس..
مغليه:داخ في المحل اليوم وروحوا بيه طول هني..
اميمه؛علاش مارفعوشي المصحه اللي هني؟!
مغليه؛عمك مايحبش المستشفيات ومايجي منهم..
اميمه بأسف:لاحول ولاقوة الا بالله..
مغليه:هونا جهاز القياس ع المدخل..
ناضت اميمه وهي تقول؛باهي..
ومشت طلعت من حداها..
مغليه تنهدت تهكما..
☘خدت اميمه الجهاز ومشت بيه للمربوعه..
وفي المربوعه يدور نقاش محتدم..
بين محمد شنيبه ونضال..
محمد:راني مريض ماتزيدنيش على مابيا ياولد!
نضال:اني علاش ماتبيش تقتنع بكلامي..علاش ماتبيش تفكر اني مفكر في الموضوع بجديات ونبي ندير حوش وعيلة زيي وزي خوتي..
المهدي اللي كان يسمع بصمت من البدايه قرر يدخل؛بوي..مزبوط نضال مشاغب شويه وعنده الطقه..لكن راجل يتحمل المسؤوليه هو قدام عيوني اغلب الوقت ونشوف فيه شن يدير..تبي تسمع مني..ممكن الوحيد اللي تزوجه وانت مطمن عليه ع الأخر نضال..
نضال وهو مندهش:تدوي جديات ولاتتسهوك!؟
محمد اشر عليه وقال:هاه هو بروحه ماصدقش كلامك..
المهدي:حمار..حشى السامعين..
نضال بضحكه؛مش هكي بس المهدي مايعرفش يشكر حد..وين جي شكر حد شكرني اني هدا علاش ماصدقتش ياحاج..المهم كلام صح..اسمع منه ان شاء الله تتزوج فيروز اسمع..
المهدي:من فيروز!؟
نضال:فيروز..نحنا والقمر جيران..بيتوا خلف تلالنا..شبح لبوه وقال خلف تلالنا ياحاج...فوت توا..المهم اني زوجني قبل ودير مايحلالك ع اقل تكون ضامن مايكونش في ضحايا تشتت اسري..
المهدي بضحكه؛بوي..نسحب كلامي..
محمد ضحك وقال:اني هدا وين اقتنعت.
نضال بصدمه:اقتنعت بشنو؟
محمد ابتسم وقال:من هي اللي حاطها في بالك..
اتفاجئ المهدي.
اما نضال كان فاهم ع بوه ضحك وقال:ياودي مافيش لاقبلك ولابعدك ولازيك في الأبهات..اللي نبيها ياغالي تعرفوها زين زين منا وفينا..
محمد:كيف قصدك من العيله؟
نضال:ايه..بنت بنت..الحاج لطفي الواعر..
تغير لون وجه محمد شنيبه وقال:اي بنت تانيه حاضر لكن وحده تانيه تخص الحاج لطفي لا..
المهدي عقد حواجبه وهو مركز ع بوه..
نضال بإستغراب شديد؛علاش..
محمد:اني مش عارف كيف بنطلع من الوحله الاولى نلحقها بالتانيه..
☘هني اميمه كانت جايه للمربوعه ولماقربت توصل فيها سمعت محمد يقول..
"مش قادر نرقد واني نفكر كان انكشفت حالة الجالي لمرته شن دير؟"
نضال:ليها معاه شهر لتوا ماصار شي الجالي بادي يتحسن بوي..
المهدي:حتى اني شايف هكي مافيش داعي تخاف..
محمد؛خوك مابراش من مرضه يامهدي لو يصير له ضغط نفسي ولامشكله تنوض عليه الحاله..
المهدي بصدمه:كيف!!؟
ونضال قعد ساكت بضيق..
محمد:شن يعني مش عارف يامهدي!؟
المهدي وهو مصدوم؛اللي نعرفه ان زمان كان تجيه هلبه نوبات مع العلاج خفت وحتنتهي....
يعني اللي كان ياخد فيه من الاصل مش علاج !؟...
محمد شنيبه قعد ساكت وهو مضايق..
والمهدي يشوفله وهو يتفكر في كلام سدرة..
🍃لو عرفت سدرة يالمهدي حتمسحك من حياتها..🍃
نضال بضيق:ماليش علاقه بحد..اني عليا في نفسي والبنت اللي نبيها يابوي..نبي نخطبها ونقرا فاتحتها..بوي كان وقفتلي فيها قسما بالله العلي العظيم..فكرة الهجرة اللي خلتوني
نحولها من راسي نرجع نحطها فيه... قسما بالله البلاد هادي مانقعد فيها دقيقه...
🍃اميمه اللي كانت مصعوقه وهي تسمع في كلامهم..
وخرت خطوه..
بعدين لفت وقعدت تمشي وهي ترعش مع بعضها ودموعها في عيونها..وقلبها موجوع ع بنت عمها هلبه..
طوبى الطيبه البريئه كيف  يصير فيها هكي!؟كيف يديروا فيها هكي!!!؟
وقفت مفجوعه لما سمعت صوت الرعد..
غمضت عيونها بشده..بعدين فتحتهم وهي تسمع في نبضات قلبها المتسارعه..
فجأه...
حست بحد واقف قدامها..
شبحت قدامها..
بمسافه اربعه خطوات...
كان واقف سلفها....
الجالي...