طوبى الجزء الاول

الخامس والعشرين

# طوبى "شارع القهوة"
#جمان_فريد
#الجزء_الخامس_والعشرين"محفور فالقلب غلاك2"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
الثامن من ذي الحجه...
الموافق 25 من شهر الحرث..11 عام 2009..
الساعه 12:00ظهرا..
في الطريق..
عيونها تشوف في الروشن وتسمع في هدرزة سلفها وراجلها..
عمر:مرة هكي ومرة هكي..
طاهر:شد حيلك قعدك العام هدا بس..
عمر بإبتسامه؛يستر الله..
نجاة:عمر انت تخصصك طيران..
عمر:ايه مرت خوي..
نجاة:تعرف لو تطلع لبريطانيا او قطر خيرلك..
عمر؛والله يامرت خوي في بالي اللي قلتي عليه..
نجاة بإبتسامه:خليك ماشي صح..
طاهر بضحكه:يعجبوها الناس الطموحه..
نجاة بإبتسامه:مانحبش اللي ديما يقعد واقف في مكانه نحب اللي يطور من نفسه ومن حياته ديما..
عمر بإبتسامه:بتعبك هادي راهو.
طاهر؛قداش ليها..
نجاة بضحكه:لاعمر مااتفقناش على هكي خليك صديق..
طاهر بضحكه؛تحالف معاها بسرعه..
عمر بضحكه؛بشرط نخدموا مصلحة بعض..
نجاة بضحكه:فهمت عليك..
طاهر؛حي انقبلتوا عليا انتم الزوز!؟
ضحكوا عمر ونجاه...
وقعدوا يهدرزوا طول الطريق ويبصروا ويضحكوا..
وعمر عجبه جو نجاة وتقبلها هلبه..
وصل بيهم لحوش العيله..
نزلوا من السيارة وهو نزل شناطيهم...
وخشوا للحوش..
استقبلوهم مغليه وخديجه ونسرين..
مغليه ونسرين كانوا يزغردوا ..وخديجه واقفه تشبح لنجاة من فوق لتحت..
ونجاه وطاهر واقفين مع بعض وهما مبتسمين  بفرح لإستقبالهم هالآستقبال الحلو..
مغليه:مرحبتين مرحبتين..
وحضنت طاهر وهي تقول؛حمد لله ع سلامتكم..
طاهر:الله يسلمك خالتي..وباسها ع راسها..
نسرين وهي تسلم ع نجاة بالاحضان..
نسرين:حمدلله ع سلامتكم..
نجاة:الله يسلمك..
مشي طاهر سلم ع خديجه..
وهي حضناته وقالت:حمد لله ع سلامتك ياغالي..
طاهر:الله يسلمك..
مغليه وهي تحضن في نجاه:مرحبتين بكنتي مرحبتين..
نجاة:رحب بيك ياعمتي..
وبعدين طاهر سلم ع نسرين..
ونجاه سلمت عليها خديجه بالخد من فوق نفسها..
نجاة حست بيها بس تجاهلت..
وبعد السلام..
مغليه:هي خشوا خشوا..
ورفعتهم للصاله ودخلتهم..
وقعمزوا مع بعض يهدرزوا..
كانت نجاة تبان حمل وديع..طيبه..ومؤدبه وع نياتها..وتتحشم..
شويه ناضت نسرين بتجيبلهم الضيافه..
ع جية المهدي...
وقف في الممر وقال:طاهر..
"تعال يامهدي تعال"
هو قال:ياالله..
وخش عليهم الصاله..
ناضله طاهر..
والمهدي سبقه قبل ليجيه..
سلموا ع بعض بالأحضان..
بعدين ناضت نجاه صافحها وقال:حمد ع سلامتكم مرت خوي.
نجاة:الله يسلمك..
طلقها ووخر خطوين وبعد الكبوط بإيديه وحطهم في نص وقال:كيف كانت رحلتكم..
طاهر:الحمد لله مشت تمام..
نجاة:تشردنا هني بس..
هز المهدي راسه وقال؛طبيعي..ايه قوللنا شن داير معاك هدا..
ضحكوا خديجه ومغليه..وطاهر شبح لنجاة بإبتسامه..
نجاة وهي مبتسمه؛لاالحمد لله طاهر مافيش منه..
خديجه؛اكيد مافيش وربي يحبك اللي طيحك فيه..
ابتسمت نجاة ابتسامه مزيفه ومن داخل تسحن عليها سحن..
مغليه بضحكه؛بتبدا بجو الحموات..
ضحك طاهر وقال؛لابد منه شوره..
المهدي؛انشدني اني...المهم مادامك انتي وياه متفاهمين خلاص..
نجاة:وين عيشه؟
المهدي:في الخدمه ماشي نروح بيها توا..ماتبوا شي..
مغليه؛سلامتك ولدي..
مشي المهدي طلع وعيون نجاه معاه..
وخديجه لاحظتها..
شبحت نجاه جيهتها لقتها تشوفلها ابتسمتلها..
وخديجه ردتها وهي رافعه حاجبها ومازال تشوفلها..
ونجاه غيرت عيونها عنها وقعدت تسمع في هدرزة طاهر ومغليه..
ع خشة نسرين بالضيافه..
☘☘☘☘☘☘
وفي حوش الجيران..
جي الشامس بش يتفاهم مع مطيرة ويردها..
ومالقاش حد موجود وقتها كان يوسف..
واقف معاه في جنان حوش عمه..
ومطيرة وسدرة واقفات حدا الباب يسمعوا..
الشامس:انت غير ضبحلي عليها نتفاهم اني وياها..
يوسف:المراة مريضة ومش حمل نقاشات ياعمي شامس..
الشامس وهو يحاول محاولات يائسه:انت غير خش قوللها الشامس طلق مرته التانيه ومستحيل مازال يردها ولاياخد عليك مرة تانيه..
عكرشت مطيره وجهها وشبحت لسدرة واشرت بصبعها برت بمعني سمعتي!؟
وسدرة مطت شورابها للأسفل بإزدراء وحركت راسها يمين ويسار 
يوسف:من الاخير ياعمي الشامس وخود مني الكلام اخرتك بطلقها لأن عمتي مسكرة راسها ع الطلاق لو طلع الروح قدامها مش حتوليلك..
مطيرة رفعت صبعها الابهام اعجابا بكلام يوسف..
وسدرة تراجي في الرد..
الشامس عصب ع الآخر وقال:واني مش مطلق وخليها تقعد معلقه..
يوسف:شن تحسابها سايبه ماوراها حد!؟
الشامس:اني راجلها واني نحكم فيها وامرها في يدي اني..
لبست مطيره الشبشب في رجليها وطلعتله..
سدرة:حي نهار احرش!؟
وطلعت وراها تجري..
مطيرة:شن تقول انت شن تقول!؟
هو لما شافها فرح وقال:مطيرة!
هي جاته مندفعه وقالت:يعطيك دنحيرة..وبدت تخبط فيه ع كتفه وع ذراعها هدا اللي قدرت تلحقه بعد بعدها يوسف وشدتها سدرة..
الشامس:يامطيرة البنادم يغلط وربي غفور رحيم علاش انتي تسامحيش..
مطيرة:حول انت وياها..
وتلاحقاته وضرباته ع صدره وقالت:معاش نبيك معاش نبيك افهم معاش نبيك.
يوسف وهو يبعد فيها ويتلقى في الضرب:اااي..استهدي بالله ياعمتي مش هكي..
وسدرة مش شادتها كويس كانت ترخي فيها وين توصل فيه بش تضربه..
مطيرة وقفت وهي داهشه:اسمع جاي..اني لو يربطوك في رجلي نقصها ولوبوي جبرني عليك نقتل روحي قبلها فاهم..
الشامس بتحدي:طلاق مانيش مطلق يامطلق وحتقعدي معلقه طول عمرك..
هي قعدت تشبحله وهي داهشه ..
وهو يشوفلها بنفس نظرات التحدي.
حولت شبشبها..وطبست لوطا..
هو طول هرب يجري فتح الباب  وطلع..
والشبشب جي الباب..
مطيرة:تفي..
ومشت خشت داخل..
يوسف شبح لسدرة وهو مصدوم:من امتى عمتي هكي!؟
سدرة:هادي المراة الحقانيه وين تنجرح يابابا تولي زي لبوة وين طيرلها..تقتل الاسد حتى القتل..
ومشت خشت وخلاته مصدوم وهو يفكر في كلامها..
"زعمه السوريه ديريلي هكي!؟"
🌻🌻🌻🌻🌻🌻
"اني اليوم لامه الجيران كلهم بش يشوفوا كنتي الجديده"
نجاة وهي متفاجئه:جديات!؟
طاهر:بس ياخالتي مروحين من سفر وتعب..
نجاه:لاعاد نركبوا نرقدوا ساعتين تلاته اصلا رقدنا في الطيارة..
مغليه:خلاص والمزينه تجيك بعد العصر تمكيجك..خطيوه هي الباب في الباب..
نجاة:ع هكي مع المغرب..
مغليه:بعد المغرب..
طاهر:ياودي خلاص اللي يريحكم ديروه..
نجاة؛عادي عمتي نقول لخواتي يجوا؟
مغليه بضحكه:اني عزمتهم..
نجاة بإبتسامه:ربي يحفظك ياعمتي ذوق قمة الذوق..
مغليه بإبتسامه:تسلمي بنتي..
"يام"
طاهر:خش يالجالي خش..
شويه وخش عليهم الجالي وهو يقول:السلام عليكم..
وجي لطاهر سلموا ع بعض بالاحضان ..
الجالي:حمد لله ع سلامتكم..
طاهر:الله يسلمك..
وقفت نجاه..وهو شبحلها وسلم عليها مصافحه وقال:شن الامور..
نجاة:تمام الحمد لله...
طلق يدها وطاهر قال:هدا زميلنا اللي حكيتلك عليه.
نجاة:حكالي عليك طاهر هلبه وقال شاطر وعندك طموح..
الجالي:الانسان مايعيش من غير طموح..
صفقت نجاة وقالت:صحة ليك عيلة كلها طموحه..
وكان واضح انها تلقح ع طاهر اللي ماكانش زي خوته..
وهو كان يتصنع في الابتسامه وساكت..
الجالي بضحكه:بارك الله فيك..هي اني نستأذن..حمد لله ع سلامتكم مرة تانيه..
الزوز قالوا:الله يسلمك..
ومشي الجالي طلع..
مغليه:هي حتى انتم بروا لجناحكم ارتاحوا..
طاهر ابتسم وقال:تسلمي خالتي..
نجاه:بالسلامه توا..
مغليه:بالسلامه..
وخدي طاهر يد نجاه ومشي بيها لمكان الجناح..
كان في الدور الأول بس بعيد عن باقي الديار..
خشوله...
انبهرت نجاة باللي شافاته..
ماكانش دار نوم بحمامها بس..
كان في زي الصاله الصغيرة جايه ع التركينه فيها صالون حرف L
نجاة:واااو وااو..روعه..
هو سكر الباب وقال:عجبك؟
نجاة:يجنن..ذوقك؟
طاهر:لا ذوق خديجه..مازال كان تشوفي الشقه..
نجاة:لا عاد هديكا ذوقي..
طاهر بضحكه:نحكي ع كبرها..
نجاة بإبتسامه:اها..
بعدين مشت لشنطتها وقالت:خل نشوف اما قفطان نلبس بعدين..هو صح الجو صقع بس حنلبس مفتوح..يولعوا المكيف ع الدافي..
وهو مقعمز ع السرير يحول في شخشيره ويتفرج عليها وهو مبتسم...
🌻🌻🌻🌻🌻🌻
بعد العصر..
طلعت فايزة من حوشها ومشت لحوش شنيبه..
استقبلوها نسرين وخديجه ضيفوها حاجه ع السريع لين يطلع طاهر.
وبعد طلع رفعوها للجناح..
خشولها..
وهي استقبلتهم..
نجاة:اهلا اهلا..
فايزة بإبتسامه؛مبروك عليك..
نجاة:الله يبارك فيك..وعقبالك..
تلاشت ابتسامة فايزة..
خديجه:فايزة ارمله..
انحرجت نجاه هلبه وقالت:سامحيني اسفه والله ماكنت نعرف.
ابتسمت فايزة بمجامله وقالت:ولايهمك..هي خل نبدوا من توا معاش في وقت..
نسرين؛خلاص نخلوكم..
وخديجه طلعت قبلها بعدها نسرين..
نجاة؛سامحيني مرة تانيه بس شكلك بان عليا شكل بنيه..
فايزة بإبتسامه:معاش تتأسفي خلاص هي وريني شن بتلبسي...
⚘⚘⚘⚘⚘
وطبعا اليوم وكأنه مناسبه فرح في حوش شنيبه حتى المنظومه شغلوها ..
واكثر من كان متحمس للمشيه عواطف..
بتلبس وبتمكيج بش تبان مراة متزوجه زي اغلب اللي حيحضروا..
كانت تراجي امتى تجي مناسبه قريبه بس تعيش هالشعور..
لبست قفطان قنين وجابت مزينه دارتلها تسريحه ومكيجتها..
اما نجاح فزي قبل دير مادير فيه اي بنيه لما تمشي مناسبه..
••عواطف؛شن رايك نجوحه..
نجاح في نفسها"مبالغ فيه:حلوة تهبلي..
عواطف بإبتسامه حماس:جيبيلي العبايه..
نجاح؛حاضر..
وبعد لبست العبايه طلعوا الزوز مع امهم ومشوا لحوش شنيبه..
خشوا للحوش لقوا الدنيا مقلوبه بالمنظومه..
استقبلتهم خديجه..
وين حولوا عباياتهم انصدمت في منظر حماتها عواطف..
هي كانت قنينه بس مبالغ فيه هلبه اللي داراته..
وهادي كانت نظره كل الناس ليها وين خشت عليهم..
هي كانت فرحانه بروحها..وعايشه شعور اني واخيرا حتى اني درت راجل وعشت شعور المتزوجات وقعدت نلبس ونتأنق.
بس للأسف ولت محط سخريه الحاضرات..
وامها واختها كانوا ملاحظات هالشي..
☘☘☘☘☘
نجاة:يحط ايدياتك في الجنه ماشاء الله عليك..
فايزة وهي تلم في حاجاتها:القالب غالب..
نجاة:تسلمي حبيبتي..
فايزة:ربي يهنيكم..
نجاة:تسلمي وبالله سامحيني مرة تانيه..
فايزة بضحكه:قتلك انسي..هي سلام توا..
نجاة:سلام..
مشت فايزة طلعت من الجناح..
شدتها مغليه وبعتت معاها في حافظات عشاها وعشي بناويتها..
شكرتها هلبه..ومشت طلعت من الحوش..
وين وصلت للجنان لقت الجالي برا..
كانت تبي تتجنبه..
بس هو..
الجالي:كيف حالك فايزة .
فايزة بدون ماتشوفله:الحمد لله..
الجالي قدملها وقال:راك وخيتي الكبيرة يافايزة ماتخليش كلام المرضى يأثر عليك.
ع خشة صابرين ومروه خوات نجاح للحوش..
الزوز قالوا:السلام عليكم..
ردوا عليهم فايزة والجالي..
وصابرين قعدت مركزة في فايزة ثواني..
بعدين مشوا خشوا داخل..
فايزة شبحتله وقالت:هل نتقوا الشبهات سلم وخيي راهو اهل احمد في نفس الشارع.
تنهد الجالي وقال:عندك حق..سامحيني..
فايزة؛حتى انت سامحني..
ومشت طلعت من الحوش..
وهو راجى شويه بعدين طلع بعدها...
🌻🌻🌻🌻🌻🌻🌻
"الله يبارك شن هالزين"
نجاة بإبتسامه:عيونك الحلوات..
صابرين؛المكياج تحفه...
نجاة:دارتهولي مزينه صاحبة نسرين تسكن في نفس الشارع..
صابرين:طلعت من عندك توا؟!
نجاة:قبل لانتم تخشوا بشويه..
صابرين:اها لقيناها واقفه ع سلفك ويهدرزوا..
نجاة:اما واحد فيهم..
مروة:واحد هكي شكله زي الممثلين الهنود..
صابرين:خطر عليا سلمان خان..
نجاة تفكرت المواصفات هادي لمني:هدا سلفي الجالي..
فجأة دق الباب..
وانفتح خشت نسرين وقالت:هيا عروسه..
ابتسمت نجاة:وقالت هيا..
نسرين؛والله ماشاء الله طلعاتك فايزة احلى من مكياج عرسك عندك علم..
هي وخواتها صمتهم كلامها..
صابرين بضحكه:لامعليشي ماجبتيش فيها اختي مشت لفاطمة شعيب..
نسرين بضحكه؛نعرف ماهو المزين هديه مني بس مش كل مزينه مهما كانت شاطرة ومشهورة تعرف طلع العروسه بيرفكت..
نجاة:هي اذواق في النهايه اللي يعجبني مش ضروري يعجب غيري..
نسرين بضحكه:مزبوط هي اطلعي اطلعي..
ومشت طلعت..
مروة؛حمواتك رافعات خشومهم هلبه..
صابرين:من جمالها هالعفشوكه..
نجاة:خلاص هيا تعالوا معاي..
ومشت طلعت وهي من داخلها تسحن وخواتها معاها..
وقفتها خديجه اللي كانت فم الصاله..
اشتغلت اغنيه معينه للعرايس..
خديجه:خشي..
خدت نجاة نفس وخشت ع الصاله....
كل الحاضرات عيونهم عليها..
كانت جميله ومبهوره وفستانها حلو بالمراة..
قعدت تدرج..لين وصلت في الكرسي الكبير اللي دارهولها..
قعمزت عليه..
ومروة مشت تسلم ع حاضرات..
وصابرين قعدت جنبها..
ع جية عائشه وهي مبتسمه مجامله..
عائشه:مبروك..
نجاة:الله يبارك فيك..وينك بكري راجيتك..
عائشه:انشغلت بالصغار ومافضيتش ننزل..
نجاة:اها..
وصابرين تشبحلها من فوق لتحت بغيره..
عائشه:طلعاتك حلوة هلبه فايزة..
صابرين:اختي من يومها حلوة.
عائشه بضحكه:اكيد حبيبتي اكيد بس مافيش مقارنه بين مكياجها توا ويوم الحفله..
نجاة:لهالدرجة مش حلو!؟
عائشه:لاهو حلو بس ماطلعش جمالك الحقاني انتي مازال اجمل زي مابنتي توا..
نجاة:ممكن بالحظ هي..
عائشه:صح..بتحضرا معانا العيد ولا؟
نجاة؛اكيد..
عائشه:تمام حتلاقوا هلبه ونهدرزوا..ربي يهنيك..
نجاة:سلمك..
مشت عائشه وصابرين قالت:مثقل دمها كيف عاش معاها السنين هادي كلها..
نجاة وهي دور بعيونها:اني هي مش هامتني نبي نشوف صاحبتهم سدرة المنتهى..
صابرين:من تكون هادي!؟
نجاة:هادي حبيبة المهدي اللي قريب هبل عليها..
صابرين بغيره:مش تزوجت..
نجاة شبحت لصابرين وقالت؛مقرية فاتحتها بس..
صابرين؛اللي هو ع ذمة راجل..
نجاة:شكلها ماجتش..
جو عيون صابرين ع عواطف وقالت:هدا شن!؟
شبحت نجاة وشدت ضحكتها وقالت:حي ع العار!؟
صابرين؛بالك هادي سدرة!؟
نجاة بضحكه:مستحيل! معقوله!
صابرين:القلب ومايهوى..وبعدين اكيد جايتهم هكي بش تغيظهم..
نجاة:حي والله صدقت انها هي..
صابرين بضحكه:عشعش فيها الهون..
وقعدوا الزوز يضحكوا بكتمان..
🌻🌻🌻🌻🌻🌻
مطيرة:الليله سحوركم مبكبكه بالدجاج حارة جاريه دفي عظيماتكم..
سدرة؛معاها البيتزا والخبزة المحشيه اللي قعدوا من الغدي..
طوبى بحماس:شن بديروا غدوة فطور..
مطيرة:رز بالخلطه..وسريبه..ومبطن ومحشي..
طوبى بحماس:ملهوفه للعيد الكبير قداش تحبه..
سدرة:بنعلمك غسل الدوارة العام هدا..
طوبى انطفي حماسها وقالت:خلاص معاش نحبه..
ضحكوا عمتها واختها..
وفي الصاله غرفه تتفرج ع مسلسل تركي..
وبوها يقرا في القرآن في داره.
ولاهو ولاالحاج علي يندروا ع جية الشامس واللي صار فيها...
🌻🌻🌻🌻🌻🌻
وحفله حوش شنيبه لكنتهم الجديده كاتت مقيومه..
بالذات عواطف ماقعمزتش بكل..
نجمه:حشمتني اختك حشمتني..
ونجاح قعدت تشبح لأختها وهي متوترة..
وماقعمزت كان لما جابوا العشي..
☘☘☘☘
تعشوا الناس ..
بعد العشي..ناضت مغليه ومشت خدت علبة مجوهرات من ع الطاوله..
وجت لنجاة بنتها...وصابرين تشوفلها بعيون تلمع..
ونجاة قلبها يدق بقوة..
فتحت مغليه العلبه لقوا فيها طقم ذهب خيالي وقالت؛هادي هدية عمك ليك..
خويها وبري دوري ع الحاضرات ووريهم..
نجاة خدت العلبه وهي تحاول دير روحها عاديه ومن داخل دايرة مهرجان من فرحتها..
ومشت للحاضرات وقعدت توري فيه..
~~~~~~~~~
"خيال ياطاهر خيال"
طاهر وهو راقد ع السرير:عادة بوي هادي..
نجاة:جديات اهلك ناس ذوق..خديجه خدتلي خاتم..نسرين خاتم وحديده..خوتك الولاد كل واحد فيهم خدالي ساعه..زوز فضه ووحده ذهب من المهدي..وخوك الصغيرة جاب تعليقه فضه..
ابتسم طاهر..
نجاة؛جديات محلاهم عيلة حلوة هلبه..بس حقه..امك علاش ماجتش..
طاهر؛امك من يوم 8عند خوالي تعيد غادي..
نجاة:ايه صح نسيت..
☘☘☘☘☘☘
"انت شن رايك فيها"
المهدي وهو يلبس في شخشيره؛شن شن رايي فيها مراة مازال مانعرفهاش ولانعرف خيرها من شرها مانقدرش نقول رايي فيها..
عائشه:باهي انت شن رايك نخلي علاقتي بيها عادي ولاسطحيه..
المهدي:بينكم نساوين في بعض مانخشش فيها الامور هادي..تصبحي ع خير..
تنهدت وقالت؛وانت من اهله..
وكل واحد فيهم رقد وهو عاطي ظهره للثاني وراحو في نوم عميق..
فهالنومه...
المهدي شاف منام..
كأنه واقف في ارض واسعه...مليانه طلع من هالضباب واحد راكب فرس وبجري بيها..
هو لما شاف الفرس عيونه دموعه وقعد معاها لين اختفت هي الفارس متاعها في الضباب..
هو ضاق صدره هلبه وقعد يوزع في نظره ع الارض هادي زي التايه اللي مش عارف شن يبي..
فجاة سمع صوت جري..
شبح لمصدر الصوت..
شاف الفرس نفسها واقفه بس بدون فارسها..
فرح هلبه...وقعدت يتأمل فيها..
وين جي بيقيم يده يحطها ع وجهها..
☘فاق من من المنام..
قعد يشبح للسقف هلبه وهو يتفكر في الحلم..
بعدين غمض عيونه ورجع فتحهم..
ناض قعمز..خدي نفس عميق..مسح وجهه بعدين حول الغطا ونزل من السرير..
ومشي للروشن وقف فيه وحول الستار وقعد يشوف لحوش الواعر..
🌻فهالوقت..
كانت سدرة تشوف في منام يختفي عن منام المهدي كليا..
كانت تشوف في طوبى اختها..
محبوسه في دار معبيه افاعي..
وفيها ثعبان واحد..
محاصرينه ودافع عن روحها بعصا في يدها وكانت خايفه..
جي صوت امها وردة يقول..
"طوبى ياسدرة..طوبى..طوبى"
لين طلعت افعى من جهة وثعبان من جهة والزوز وصلوا فيها ولذغوها لين ولى مكان اللذغه الدم..
وطوبى تتألم لين الدم طلع من عيونها ع هيئة دموع..
انتفضت سدرة لما فاقت من الحلف.د
قعدت تشبح حواليها..
بعدين ناضت ومشت طلعت من دار المعيشه ومشت لدارهم..
فتحتها وخشت عليهم وجت لسرير طوبى.
لقتها راقده بهدوء وراحه..
قعدت تشوفلها بألم ودموعها ينزلوا وقالت بهمس..
"يارب ماتوريني فيها سو..يارب مانشوف فيها مكروه يارب"
☘☘☘☘☘☘☘☘
والمهدي معاش جاه النوم..
نزل من شقته..لحوش بوه..
خشله..لقاه مظلم وهادي..
شويه وسمع اصوات هدرزة وريحة ماكله تتسخن.
تبع مصدر الصوت لقاه الكوجينه..
كانت شاعله فيها الأضويه الخافته بس..
خشلها..
لقي خوته واقفين ع الرخامه وفيها طاجين معبي ماكله فاضله من العشي..
المهدي:تو ماتسحتروش..
هما انفجعوا والتفتوا شبحوله..
نضال:الشتي يبي تلاته سحاوير وياالله..
طاهر:حتى هو داروه بكري الساعه واحد والشتي يجوع.
جاهم وقف خداهم تخدي طرف كفتة لحم وقعد ياكل..
طاهر؛شن نوضك؟
المهدي:الجوع شكله..
عمر:والله من عز نومي نوضني..
الجالي:اني مارقدتش من اصله نزلت بناكل لقيت نضال قدامي بيسخن وياكل بعدين لحقنا عمر وبعده طاهر..
المهدي قعد ياكل وهو ساكت..
وهما كملوا ماكله وقعدوا يهدرزوا..
لين تم الطاجين..
نضال:هاتوا خل نغسله وفكوني من لسان مغليه..
ومشي يغسل فيه وخوته يعلقوا عليه..
قعدوا واقفين حداه يهدرزوا..
المهدي:العيد هدا استغفر الله ماخاطري نشوف حد..
الجالي:بالذات ولاد عمامك.
طاهر بضحكه:حتى اني ماقبلتهمش..
عمر:فيهم الباهي وفيهم البارد..
نضال:كلهم باردين..
المهدي:خلاص فكونا الليله ليلة مباركه..
فجأة...رن تليفون نضال كانت نغمته...
"ماعندكش مشكله"
المتصل بنت..
وهو تخزرط قدام المهدي اللي كان يشبحله..
سكر طول..
وخوته شادين ضحكتهم ويوزعوا في نظرهم عليه وع المهدي..
المهدي:علاش فصلت..
نضال بربكه؛غالط..
المهدي:كيف عرفت انه غالط..
نضال:رقم غريب واني مانردش ع الارقام الغريبه..
وخوته بيضحكوا خلاص..
المهدي:قتلي ماتردش..
نضال هز راسه بإيجاب..
هز المهدي راسه وهوساكت..
وهما ساكتين..
شويه غنى المهدي..
غير عليا رن..
ضحكوا وردوا عليه:ماعندكش مشكله..
المهدي:امتى تبي رن..
هما:ماعندكش مشكله..
طاهر: رن ولاتهتم..
هما ؛ماعندكش مشكله..
طاهر:كلمتي كلم..
هما:ماعندكش مشكله..
عمر:بالرنه نفهم.
هما:ماعندكش مشكله
عمر:كان رصيدك تم..
هما:ماعندكش مشكله
الجالي؛نعبتلك رصيد
هما:ماعندكش مشكله
الجالي؛كانك تبي نزيد
هما:ماعندكش مشكله
نضال؛كلمني ياريد
هما:ماعندكش مشكله
نضال:ياغير تكلم..
هما:ماعندكش مشكله
نضال؛يؤبرتي جوكم..
وشغل الاغنيه في تليفونه..
وبدوا يرقصوا كلهم..
بمهديهم وبطاهرهم وبعمرهم وبجاليهم..
ونضال عاد يحمس فيهم..
وهما يردوا وراها..
ماعندكش مشكله..
اكثر زوز هبلوا المهدي وطاهر..
كانوا زي بعض في الحركات..
وعمر وهو يرقص شاد حركه وحده..
ياخد في طرف ماليته وكأنه يكد فيه..
اما الجالي ونضال بروحهم كل واحد خدي ساقم شكل ودايرينهم زي السيوف ويضاربوا وهما يغنوا..
وع هالاجواء المشتعله..
بخش الحاج محمد شنيبه..
قعد واقف في مكانه يتفرج عليهم..
وهما مش حاسين بشي..
وزع نظره عليهم وثبتهم ع المهدي وهو مصدوم فيه..
شوبه وانتبه الجالي لبوه انخلع ووقف في مكانه وقال:بوي..
كلهم جمدوا في مكانتهم..
بالذات المهدي مش قادر يحط عينه في عين .
بوه..
نضال طول سكر الاغنيه وهو متفلوش..
وبوهم حط ايديه ورا ظهره وهو يشبحلهم بصمت..
المهدي ووجهه احمر..حك رقبته من الخلف وقال؛تصبحوا ع خير..
ومشي بسرعه من غير مايشوف لبوه وطلع من حداه..
طاهر بإرتباك؛تصبح ع خير بوي..ومشي حتى هو طلع بسرعه..
الجالي:تصبحوا ع خير..
وجي بيمشي..
جبد منه عمر الساقم وحطه ع الرخامه...ومشوا ورا بعض وين وصل في بوه قال بسرعه:تصعخير..
وقعد نضال بروحه..
وبوه يشبحله..
هو ابتسم بربكه وقال:حويج كان جيت تاكل الماكله..وقعد يأشر بالساقم وقال..بح..تمت..رفع حواجبه وقال:نقليلك دحية؟
مازال بوه يشبحله بنفس التعابير..
هو قال:ماتبيش..تمام..
التفت حط الساقم في اللاونيدينو..
فجأة تليفونه رن بنفس الاغنيه..
انخلع انطلس منه النقال حاول يشده بس طاح ع الارض ومازال يغني..طبس قامه وهو مخلوع شاف البنت نفسها تتصل قال بهمس:بري ادمدري دمدار..
وفصل عليها..
وشبح لبوه..بلع ريقه وابتسم وقال:تصبح ع خير ياحاج..
ومشي طلع من حدا بوه بسرعة البرق..
التفت بوه قعد يشوفله وهو طالع يجري..
وقال:من صغيركم لكبيركم مافيكم واحد بعقله..
المشكله الليله ليله مباركه ناس تقيم فيها بالذكر وهما يتراقصوا مع الشياطين...خزي..
وخدي طاسه صب ميه من الطرمس.
وشرب بعدين طلع من الكوجينه وهو يقول..
لاحول ولاقوة الابالله..
🌻🌻🌻🌻🌻
تاني يوم..
كان عند الليبين بس يوم عرفه..
في هلبه ماقدروش يتقبلوا هالشي نهائي..
واختاروا يصيموا اليوم اللي بعده موافقه مع السعوديه..
ويضحوا معاها..
وفي من خاف...ودار ماتبي الدوله وزعيمها هداكا الوقت زي لطفي وخوه عبد المطلب وحوش شنيبه...
اما اول الناس اللي ماباش يوافق الدوله ماتبي .
علي الواعر...واظهر موفقه جهارا نهارا..برغم وضح حسين الحساس...ومادور حد ع قد ماتجدوه صغاره من خوفهم..
عكس بعض الناس اللي داروها بالدرقه..
المهم عيد هداكا العام المخالف..مااستمتع بيه حد ولاحسه حد....
☘☘☘☘☘☘
وفي الاسبوع اللي بعده...
سدرة وهي تتكلم بالتليفون:إنا لله وإنا إليه راجعون..
"اني توا طالع لو اتصلتي بيا في الطريق مرات تلقيني خارج التغطيه ماتنشغليش عليا تنقطع التغطيه في نص الطريق"
سدرة بقلق؛باهي اتصل بيا لما توصل..
"نحبك"
سدرة؛ربي مايحرمني منك..
"ولامنك...سلام"
سدرة؛سلام..
وسكرت ومشت خشت داخل..
مطيره وهي ضم في الكوجينه؛خيره شاميه؟
سدرة: صاحبه بوه توفى مش لحقه لبني وليد..
مطيرة:لاحول لاقوة الا بالله..ربي يوصله سالم..هي خل نمشوا لحوش عمك نوتوا معاهم الحلوات..
سدرة:حاضر.
ومشوا كلهم لحوش عبد المطلب..
وقعدوا لاهيين بالحلوات ويحطوا فيهم في باكوات مزينه..
وسدرة طول الوقت القلق كان مرافقها..
ناضت وهي تقول:خل نكلم الفاندي نشوفه وصل ولامازال..
طلعت من حداهم واتصلت بيه..
عطاها مقفل..
قلبها انقبض..
سدرة بقلق:هو قالي كان لقتيني خارج التغطيه ماتخافيش عليا مش مقفل..
قعد دور في الجنان وتمشي وتجي وتتصل وتعاود..
حست في جوفها نار ولعت من الخوف..
فتحت الباب الفاصل ومشت لحوشهم..
لما جت بتخشله سمعت اصوات يوسف وبوها..
لطفي بصدمه:لاإله إلا الله!
يوسف ودموعه في عيونه:فاجعه بمعنى الكلمه لتوا مش مصدق..
لطفي :لاإله الاالله لااله الا الله..كيف بنقول لسدره!
يوسف:الله غالب..مسح دموعه وقال..نقولولها راجلك توفى وخلاص اولها عن اخرها بتعرف..
"كيف!!؟"
بوها شبحلها بألم..
وهي جت ليوسف شداته من ذراعه بقوة ودموعها بدوا يصبوا:خيره الفاندي خيره!...ايهاب خيره!؟
يوسف بألم..
"دار حادث في طريق بني وليد وتوفى"

#محفور_في_القلب_غلاك
#طوبى

....يتبع...