طوبى الجزء الاول

تابع

# طوبى "شارع القهوة"
#جمان_فريد
#الجزء_العشرين"20ابريل الاخير"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
صوت دق قوي ع الباب سمعاته صفيه وهي في الكوجينه..
سيبت اللي في يدها وطلعت تجري للباب الفاصل وهي تقول بقلق:يالطيف مني اللي يطق هكي!؟
وصلت في الباب الفاصل وفتحاته .
خشت سدرة وهي تقول:معليشي خالتي..
صفيه استغربت هلبه وهي تشوف في سدرة كيف خاشه مندفعه..وتبان معصبه..
خشت للكوجينه..
وصفيه وراها تقول:شن في ياسدرة..!؟
طلعت سدرة من الكوجينه وهي تنادي؛حسين...
فتحت اميمه باب دارها وطلعت لسدرة وهي خايفه تقول:سدرة حبيبتي ماكانش قصده..
سدرة:بالله اميمه حبيبتي اطلعي منها..
ع جية حسين من المربوعه وهو رافع حاجبه ويقول:خيرك شن تبي!؟
قدمتله سدرة ونزلت ع وجهه بكف قريب خلعت رقبته..
صفيه شهقت وعضت ع شاربها..
واميمه شبحت لخوها بوجع..
حسين شبحلها وقال:لأنك اختي الكبيره بنفوت..
سدرة برفعة حواجب:لاوالله علاش كان مافوتش شن بديرلي!؟ بتحبسني ولاتقتلني..اني اختك الكبيرة ونضربك واني مجبور تقبل وفمك مسكر وخشمك في اللبز..
اما طوبى لا...طوبى مش اختك بش تمد يدك عليها..
انصدمت صفيه وهي تشوف لولدها..
سدرة وهي تحط في ايديها ع كتافها:انت هالرتبه اللي لابس نجومها ع كتافك خلوك معاش تشوف حد قدامك ونساتك في هلبه حاجات..وخلاتك بكل وقاحه تمد يدك على طوبى..
طوبى...
هو اللي كان مغير عيونه عنها وين يسمع اسم طوبى قلبه ينعصر عصر ويجي قدام عيونه الموقف..
وهو يتسائل في نفسه بعدم استيعاب..
اني كيف درتها بس!؟
بس اللي سمعه بعدين من سدرة وهي تقول فيه وخانقتها العبره خلاه تمنى لو مات ولا دار اللي داره..
سدرة والعبرة خانقتها:طوبى اللي كنت نأمن فيك عليها واني نعرف انها معاك نطمن...طوبى اللي كانت تشوف فيك حاجه كبيره هلبه...اليوم خليتها تقول..كان مختار قاعد معانا راهو ماخلى حد يوصل فيا...
نزلوا دموع اميمه..
سدرة ودموعها في عيونها بحده قالت:لكن في وراها خير من خوها اللي خلاها..وولد عمها اللي هانت..وربي مانخلي بنادم يوصل فيها وينزل منها دمعه الا وهو نادم اشد الندم..
من هاللحظه ياحسين معاش نبي نشوفك تفوت من جنبها ولاتشبحلها بعيونك..واني تنساني بالمرة...
ولفت بتمشي..
جت قدامها صفيه وقالت؛بالله ماتقولي لبوك بنتي..
سدرة؛مش حنقول خالتي مش حنقول..
ومشت طلعت من حداهم...
صفيه شبحت لولدها بغضب وقالت:شن هالعمله اللي درتها!؟
حسين لف ومشي بسرعه وهو في قمة الغضب والحزن..
شبحت صفيه لأميمه وقالت؛علاش ضربها!؟
اميمه وهي تمسح في دموعها؛هي راحت منا في الملاهي ولما لقيناها حسين ضربها كف..
صفيه:علاش يضرب فيها علاش..عاركها وخلاص كيف يمد يده حي كان يسمع جدك وبوها حي عليه...
اميمه بألم؛من خوفه عليها ياماما...
صفيه:مالاش حق يمد عليها مالاش حق..صدقت سدرة لما قالت هالرتبه نساته هلبه حاجات..
ومشت للكوجينه وهي معصبه..
واميمه تنهدت بحزن ومشت خشت لدارها...
☘في نفس الوقت..
خشت سدرة لحوشهم وهي تنادي:طوبى..
طوبى طلعت من الدار وجتها تجري..
قربتلها سدرة وشدت وجهها وحركاته ع جنب وقعدت تشوف في خدها قلبها تقطع وهي تقول:ااه ياروحي غير شن بنقول عليك بس ياحسين ياحقير.
طوبى دموعها نزلوا..
وجهت سدرة وجه اختها ليها وقالت:تجيني بس اسبوع ولااسبوعين تقوليلي سامحت حسين نقددك..خلاص حسين هدا من اليوم مسحته وانتي امسحيه..لحوش عمي عبدالمطلب وهو قاعد معاش في مشي فاهمه...
طوبى هزت راسها وقعدت ساكته..
سدرة:دايراته خوكم اني نقول ربي عوضنا بيه وبيوسف ينوض يدير هكي..
غرفه جت وقفت حداهم وقالت؛انتي شن درتي بش هو دار هكي!؟
طوبى بضيق:وحني في الملاهي ركبوا هو واميمه في لعبه متاع اللويده هادي اني نخاف منها قعدت واقفه نتفرج عليهم..شويه سمعت صوت بنيه تبكي مشيتلها سألتها قالت تبي بوها وامها عرفتها رايحه خديتها ودورنا عليهم لين لقيناهم وخدوها..
اني نعترف..اني غلطت لما ماعطيتاش علم..
غرفه؛معناها عنده حق خاف عليها مسكينه..
سدرة بحده:لا ماعنداش حق..يهزبها يعاركها لكن يمد يده عليها لا...طوبى مافي حد ليه حق انه يضربها حتى اني..ماعدا بوي..بوي بس..اللي بيمد يده ع طوبى مرة تانيه نقطعله يده من منبتها حتى لو كانت يدي..
بلعت غرفه ريقها وهي خايفه وتمرر في نظرها عليهم..
سدرة شبحت لطوبى وقالت؛بري طوبى بري بنتي ارقدي وتريحي..
طوبى هزت راسها وهي في قمة الحزن ومشت للدار وخشت وسكرت عليها..
سدرة بقهر:بتخليني ندعي عليك ياحسين..
غرفه؛لامش لهالدرجة سدرة..
شبحتلها سدرة بحده وقالت:سكري فمك انتي..
سكتت غرفه ولفت ومشت للصاله..
شويه سدرة سمعت تليفونها يرن مشتله طول...
وغرفه قعمزت قدام التلفزيون وشدت الريموت وهي تقول:محلاها الحاجه وين تجيك ع البارد المستريح..
وضحكت نص ضحكه.بمكر..وقعدت تغير في القنوات...
☘وحسين هديكا الليله..
لم حوايجه ومشي طلع من الحوش..
ماقدرش يقعد بعد اللي صار...
كانت نادم اشد.الندم ومتحسر ع اللي داره وحس ان غلطته هادي حدفعه الثمن غالي..
🌻🌻🌻🌻🌻🌻
وفي حوش جيرانهم...
عيلة الصيد.
كانت خديجه مقعمزة في الصاله مع حمواتها يتفرجوا ع مسلسل..
نجاح كانت تصلح في كراسات الطلبه اللي تقري فيهم..
وعواطف عيونها ع خديجه وهي تتفرج..
شويه قالت؛تتفرجي ع مسلسلات تقولي يبالغوا في قصص الخيانه تجي ع ارض الواقع تشوفي العجب بعيونك..
نجاح وهي تصلح في كراسه؛تي قولي كوارث..اللي يخون فيها مع صاحبتها واللي مع جارتهم واللي مع صاحبة بنته..ايييه خليني ساكته..
خديجه:الرجاله مايملى عينهم الا التراب..
عواطف؛صدقتي ياحنه..خدوجه بنسألك تو انتي الوحيده المتزوجه بيناتنا..كان هاه كان..فرض يعني...لو عرفتي ان خوي يخون فيك شن ديري..
شبحت نجاح لعواطف وحست ان السؤال مقصود مش عفوي..
خديجه؛بعدين يابنتي نقربعها ع راسه وراسها ونخليه يندم ع اليوم اللي جي فيه للدنيا..
فنصوا الزوز وهما يشبحولها...
هي ابتسمت وقالت:لكن محي مايديرهاش راجل عينه معبيه..
عواطف هزت راسها وقالت؛صح..حي تمت الدعايه..وغلت الصوت..
رجعت خديجه تفرجت..
نجاح قعدت تشبح لعواطف لين شبحتلها..
سألت بالاشارات "شن في"
عواطف بهمس:شي..
نجاح رفعت حاجبها وهي تشوفلها بشك..
وعواطف رجعت تتفرج ع المسلسل...
🌻وفي الحوش اللي في جنبهم..
كانت مقعمزة مغليه مع كنتها يهدرزوا..
عائشه:ماهو ياعمتي مرات الناس وسامحيني فيها تعيب عليك انتي..ويقولوا خداته من امه..
مغليه:وشن تبيني نديرلها نمشيلها نترجاها تسامح ولدها..
عائشه؛وشن فيها سماك سعيتي في خير..
مغليه:هدا.اللي مازال اني نمشي لهديكا وقعدت نترجى فيها!؟
عائشه؛اني ع خاطرك انتي ياعمتي بش ماتجيكش الدوة..
مغليه وهي متنرفزة؛مايجيني شي..هني روحك انتي بس ومعاش تدخلي في شي مايخصكش حدك كنه راهو ماتعطيش روحك اكبر من حجمك ايوه..
وناضت ومشت طلعت من حداها..
وخلت عائشه موجوعه هلبه من كلامها..
ناضت وهي طابه بنتها في غمرها ونادت ع ولادها جوها..
ومشت ركبت بيهم لشقتها....
☘☘☘☘☘☘
"اهي يام نجاة جاتك بروحها"
نجاة:والله ياعمتي فرحتي كانت ناقصه في غيابك..ماتجيش الحق كيف في بياني ماتجيش ام خطيبي..
لطفيه؛هدا علاش اتصلتي بيا وكلمتيني واعتذرتي..
ناضت نجاة باست راسها وقالت:سامحيني غير يومها وجعتني منك كيف كلمتيني حسيتيك ماتبنيش لطاهر..
باس طاهر يد امه وقال:خلاص يام عاد بالله عليك...
تنهدت لطفيه وقالت؛باهي اقعدوا خل نمشي نديرلكم عشي..
نجاة:لا والله اني نديره عمتي..
لطفيه:شن تعرفي فيها كوجينتي..
نجاة بضحكه:تعالي معاي وريني..
ناضت لطفيه وهي تقول؛باهي تعالي معاي ومشت..
ونجاة وهي لاحقتها شبحت لطاهر وغمزتلها..
وهو قاللها بحركة الشفايف..
"نحبك"...
شدت ضحكتها ولحقت عزوزتها..
وطاهر تنهد براحه واتكى ع سنادة مندار الصاله...
~~~~~~~~~
"وهكي اللي صار حيوصل عيلة طاهر من بوه وتخيلي شن يقولوا عليا"
صابرين:مرات ياحبي مغليه تاخد منك موقف..
نجاه بإبتسامه ثقه:تؤ..هادي بالذات حتحبني هلبه..
صابرين وهي لاهيه بتليفونها:ان شاء الله..
نجاة لاحظتها وقالت:معاشك مشي في الرصيد..
ضحكت صابرين:عينك..طحت في واحد اهبل يعبيلي في الكروت واحد ورا التاني..
نجاة:من هو هدا!؟
صابرين؛واحد تعرفت عليه في المستشفى جايني طايح ع منقاره..مش عارفه وين شايفني..
نجاة بلامبالاة؛كسدي ياحنه كسدي..واني خليني نرقد..
رقدت نجاة...
وصابرين كملتها مسجات هي ومحي الدين..
🌻🌻🌻🌻🌻🌻
تاني يوم...
بعد مادارت اميمه امتحانها طول روحت للحوش..
وعمر هالمرة ماقدرش يتبعها لانه حتى هو عنده امتحانات ولاهي..
هي طبعا تحسابه من هداكا اليوم معاش جي..
ماتندريش عليه انه يوميا وراها وين ماتمشي...
بعد ماروحت..
صلت الظهر ورقدت لوقت الغدي..
نوضتها امها تغدت معاها...وبعدين غسلت الماعين..
وبعد ماكملتهم خشت للحمام توضت وطلعت لدارها وقرت سورة البقرة لين كملتها.
هي كملتها من هني العصر آذن من هني..
ناضت صلت..
وبعد الصلاة خدت اكياس الحوايج اللي خدتهم وطلعت بيهم من الحوش ومشت لحوش عنها..
وصلت في الباب..
قعدت ادق عليه برجلها..
شويه وانفتح الباب واللي فتحت غرفه..
تجاهلتها اميمه تمام وخشت بكياسها..
وغرفه تشوفلها من فوق لتحت وسكرت الباب بقوة..
واميمه تمشي وتنادي..طوبى
ع طلعة سدرة من الدار وهي لابسه حجاب وعبايه..
ابتسمت وقالت؛اهلا ميمو..
اميمه بإبتسامه؛شن جو سدرة..
سدرة؛تمام..
اميمه:طوبى وين..
"تعالي ميمو"
مشت خشت اميمه بالكياس وقالت؛تعالي سدرة شوفي شن شريت..
خشت سدرة وراها وقالت:ترا ورينا..
وغرفه قعدت واقفه في الباب...
شبحت اميمه للباب شافتها..
حطت الكياس ومشت سكرت في وجهها الباب..
وولت للكياس بش طلع منهم الحوايج..
ولاسدرة ولاطوبى آخذوها ع الحركه اللي دارتها عندها حق...
شويه طلعت القفطان متاع البيان وقالت؛وهدا اللي خديته للبيان..
وين طلعاته تنطرت منه ورقه..
اميمه؛هدا شنو...
طوبى خدتها وفتحتها وضحكت:رقم اللي يبيع في المحل..
سدرة بضحكه:انخبط شكله..
اميمه بإزدراء:دمه مبرده..
سدرة بضحكه؛ع العموم القفطان فضيع فضيع تقول دايرينه ليك انتي..
اميمه بضحكه؛ذوق طوبى..
سدرة:مايطلع منها هالرتيله..
طوبى قعدت تضحك...
وقعدت توري في اميمه باقي حوايجها لسدرة وكلهم عجبوها..
بعدين عرت راسها وورت شعرها لسدرة هبلت عليه...
وغرفه مقعمزة برا تسحن..بتموت وتعرف اميمه شن واخده..
شويه وطلعت سدرة من الدار وخلت اميمه وطوبى مع بعض..
ومشت بطريقها للمطحن..
خشتلها وشافت العمال الليبين اللي يخدموا في المطحن كيف مشيين الشغل..
وشافت حركة البيع وكانت راضيه عنها...
دارت اتصالات تخص الخدمه ومع قرب المغرب ولت خشت للحوش..
وعيون المهدي من المطحن متاعهم عليها..
كان حاس روحه قاعد يموت بالبطيء..
ورغم قرب وجودها..الاانها توا عنده وكأنها قاعده في ابعد نقطة في العالم....
🍀🍀🍀🍀🍀🍀
وتمر الايام..
ويجي يوم الميلود..
في جنان حوش الواعر نصبوا خيمه كبيرة...
دارو فيها كراسي صفوف صفوف..
ودارو كوشه كبيره وحلوة...
وع تركينه كان في مكان للمنشطه اللي جاية تقيم حفلة البيان...
سدرة في المزين...
اما باقي العيله فكانوا في الحوش بالدور عند فايزة ..
تمكيج فيهم وحده ورا التانيه..
ومن ابداع فايزة واتقانها ماخلتهمش يتشابهوا بكل..
لامطيرة ولاصفيه..ولافردوس ولاغرفه...
اما اميمه بش مايشوفها حد كيف بتطلع..كلمت مزينه دلتها عليها بنيه تقرا معاها..
حتها للحوش دارتها مكياج وتسريحه بناتيه...
اما البنات الصغار..
لبسوا قفاطين زي بعض..
طوبى واريج وآلاء...
وبنات فايزة لبستهم امهم زي بعض حتى هما..
الاء:حاسه روحي بيبي ماحبيتش..
اريج:انتي ديما ماعاجبك شي ديما..وعجبت عليها وهي تقول..ماحبيتش..
الاء قلبت عيونها وقعدت ساكته..
طوبى؛متلهفه نشوف سدرة كيف بتطلع..
اريج بحماس:حتى اني...
شويه والناس بدت تجي..
واولهم..
حوش شنيبه...
مغليه وبناتها وكنتها..
بعدين باقي الجيران والاقارب..وخالاتهم اللي يشوف فيهم في المناسبات فقط..
المنشطه كانت مقعمزة والعة المنظومه وتراجي في سدرة..
☘والمهدي اللي قعد ماصغاره كان عايش في جحيم..
يحاول يشغل نفسه مع ولاده ينسى..
وهو مقعمزين يلعبوا في بلاستيشن..
المهدي:ايوه بابا يزن هيا كمل..
محمد؛بوي معاش تساعده..
المهدي؛نوري فيه بس..
محمد:مساعده..
المهدي:خوك صغير مازال مايعرفش..
محمد:لاتعلمها بوي خليه..
المهدي ربع رجليه وقال:باهي اهو خليناكم كملوا لعب..
فجأة..
سمع اصوات الكلاكسات قلبوا شارع القهوة..
وانطلقت معاهم الالعاب الناريه..
المهدي كان حاس وكأن ضلوعه اطبقوا ع قلبه..
قعد يبلع في ريقه وخلاص..
ومايبيش يتخايلها كيف طلعت..حرام عليه..المراة ع ذمة راجل...
🌻وهي طلعت غايه في الجمال ببساطتها..
طلتها كانت ناعمه ومهيبه في نفس الوقت..
سدرة الواعر..برغم انوثتها اللي بهرت الجميع الاانها مازالت هي هي..قويه الطله والنظرة والشخصيه..
والمنشطه استقبلتها وقعدت تغني مع الاغنيه اللي دارتلهالها عليها..
وصفيه ومطيره يمشوا فيها لين وصلوها للكوشه وقعمزوها وقعدوا يساووا في فستانها..
زغردوا عليها مطيرة وصفيه..
ونزلت مطيرة وبدت ترقص والمنشطه معاها..
والكل يشوفلها ويضحك كيف كانت تهيج..
لكن عيون مغليه وبناتها ع سدرة...
حست مغليه بحسرة كبيره..كانت تبي سدرة للمهدي هلبه..
وفي داخلها ندمت ع اللي داراته وتمنت لو صبرت لهاليوم..
راهو ولدها توا كان اسعد انسان في الدنيا..
شويه وناضوا عائشه ونسرين ومعاهم فايزة ومشوا لسدرة..
فايزة:شن هالقمر ياناس تهبلي..
سدرة بضحكه؛جديات!
فايزة:وتسألي..
ضحكت سدرة..
عائشه بإبتسامه:الله يبارك عليك سدرة طلعتي فضيعه..
سدرة بإبتسامه؛تسلمي عويشه..
نسرين؛نتخيل في الفاندي لما يجي بعدين ويشوفك شن يدير..
فايزة؛يقول مرتي ووصلتني تصبحوا ع خير..
ضحكوا البنات..
ع خشة اميمه للخيمه..
كانت تمشي وهي تحاول تكون عاديه بدون خجل..
اول ماخشت العيون توجهت عليها..
كانت وكأنها لعبه "باربي" في طلتها وجمالها..
امها وين شافتها ابتسمت..
مطيرة:مموشتي ياعيوني الله يبارك!!؟
المنشطه وين شافتها بدت تغني..
"هذا شنو..هدا منو..."
ضحكت اميمه بخجل وبدت تسلم ع الموجودات اللي تعرفهم..
والعيون بتاكلها..
مغليه:لا والله مادخلني نبيها كنتي..
خديجه بضحكه:ماتفكريش تحاولي في الجالي..
مغليه؛وشن مهناك كان الجالي خيره عمر من شن يشكي كبر ماشاءالله وراح راجل..ومن الكليه عامين ويتخرج..
خديجه:والشقه واتيه..بس زعمه يرضى!؟
مغليه:اني تو نكلمه ونقنعه...
وصلت فيهم اميمه وسلمت عليهم وهما يلحقوا فيها بعيونهم..
وعيون تانيه تشوفلها بحقد وحسد شديدين كان تلقى تخفيها من الوجود..
قعدت تشبحلها كيف مشت سلمت ع سدرة وصاحباتها..
سدرة بمزح؛غطيتي عليا..
اميمه:اسفه والله ماقصدي..
ضحكوا البنات.
عائشه:تبصر عليك خيرك..
حكت اميمه حاجبها وقالت بضحكه:اصلا مايقدر حد يغطي ع سدرة..
سدرة:ياعمري ربي يفرحني بيك..
اميمه بإبتسامه:تسلمي يارب..مبارك عليك مرة تانيه..
سدرة:الله يبارك فيك..
اميمه مررت نظرها عليهم بإبتسامه بعدين مشت قعمزت جنب عواطف و نجاح وعيون غرفه عليها..
عواطف:شن جو اميمه الله يبارك عليك فكرتيني بالاميرة ديانا..
نجاح:والله حتى اني خطرت عليا لما شفتها..
ضحكت اميمه بخجل وقالت:تسلموا..حتى انتم طالعات الله يبارك..
هما الزوز ابتسموا وقالوا مع بعض:عيونك الحلوات..
وبدت الحفله مزبوط والمنشطه قلبت الخيمه..
رقصت العيله كلها..
بعدين نزلت سدرة ورقصتها حتى هي..
وحواليها صاحباتها وخواتها..
دارو عليها دائره وهي قعدت ترقص في نصها مع طوبى وحركاتهم وهما يرقصوا كانت متناسقه عجبوا الحاضرات هلبه...
بعدين خشوا بنات فردوس حتى هما ورقصوا معاها...
وفي الاخير..
رقصت مع صاحباتها..
وهما يرقصوا المنشطه قالت :بنفد طلب لوحده قالتلي نبيك تشغلي اغنيه عندي معاها ذكريات..
فايزة شدت ضحكتها..
والمنشطه شغلت الاغنيه..
وكانت"مكارينا"
سدرة ونسرين وعائشه قعدوا يضحكوا من قلوبهم..
فايزة بضحكه:تتذكروا..
التلاته اشروا عليها وقالوا:انتي!؟
هي هزت راسها وقعدت تضحك بعدين قالت:هيا هي...
وقفت سدرة جنبها ونسرين وعائشه جو وراهم..
وبدوا يرقصوا في رقصة الاغنيه..
اللي اول ماطلعت في بداية التسعينات ياما رقصوا عليها..
وعائشه ماكانتش تعرفها لولاهم وياما رقصت معاهم عليها..
واليوم الاربعه استرجعوا ذكريات..
دار سدرة وخواتها..
دار فايزة..
صالة حوش شنيبه اللي كانوا لما يفضي الحوش.
يتلاقوا فيها..ياما رقصوا ماكرينا غادي..
الحاضرات كانوا يتفرجوا ومستمعات ع الاخر..
وضحكوا في النهايه وين جو نقزوا الاربعه..
بالسيف..لأن اوزانهم ولت ثقيله..
ماعدا سدرة اللي اعاقها القفطان...
🌻🌻🌻🌻🌻
غطى ولاده بعد رقدوا..
وطفي عليهم الضي وطلع من دارهم..
ومشي لدار النوم دار طلة ع سدرة بنته..
وهو يشوفلها تنهد من وسط قلبه وقال:ياريتني مكانك...لانعاني في هم ولاغم..ولانعرف شن هو الحب وشن هو عذابه...
اه يابنتي لو من يدلني كيف نقدر ننساها بس...
وبس يزيد عذابي اضعاف جيتي انتي وتسميتي عليها..
تقول ربي مايبنيش ننساها..
مسح بيده ع وجهه وقال:استغفر الله العظيم واتوب اليه..
غمض عيونه..
وين سمع اصوات كلاكسات...
الفاندي واهله جو....
كانت اصوات منبهات السيارات عنده سيوف تخش لمسامعه وتطلع..مش متحملها...
وياريت وقفت عليها هي بس..
الفاندي جاب معاه زكرة...
قلبت الشارع قلب...
والشباب يغنوا..
"يالعين يالعين انتي هنى والغالي وين"
المهدي مشي وقف في الروشن وقعد يتفرج...
ويشوف في قهرته بعيونه...
دموعه محبوسه مش قادر يطلعها..
المهدي دموعه شحيحه وهدا اللي زايد عذابه..
لو ينزلوا راهم خففوا عنه حتى شويه...
بعد نص ساعه وقفت الزكرة..
ومعاش انسمع الا حس شتاوات النساوين..
"حصلتيه ولد متساوي لايسكر لايخش قهاوي"
"يابراني تستاهلها الريم اللي طلقوها هلها"
"لاتبكي لاتقولي بابا حصلتيه غزال صحابه"
"الودة راهي بنت عرب تخش العيله ماتخرب"
"وهوبه وين قالوله سمي..قال السدرة عسل ففمي"
وخر عن الروشن ومشي للسرير..
خشلها وحط راسه ع المخده وغمض عيونه...
لحظات..
وحول المخده من تحت راسها وغم بيها وجعه وصاح صيحه  كتمت صوتها المخده ...
بعدين عض المخده وبدي يبكي واخيرا....
وباهي اللي قدر يبكي ومايكمدش في نفسه ويحمل قلبه فوق طاقته..
☘☘☘☘☘
واقفه في الصاله بروحها وهي لابسه القفطان اللي جابوه اهل راجلها..
ع خشته هو...
الفاندي:السلام عليكم..
التفتت وشبحتله كيف طالع انيق بالبدله السودا ابتسمت..
هو قدملها وابتسامه حلوة ع وجهه..
وين وصل باس جبينها بعدين قال:الله يبارك الله يبارك...شن هدا يالسدرة شن هدا..نحبك يابنت الناس والله العظيم نحبك..
سدرة بضحكه:غير علاش تحلف عارفه..
قرصتها من انفها وقال:تعرفي صار..
قعدت تضحك وهي تتحسس في خشمها.
ع خشة امه وخواته وخالات وعماته..ومطيرة معاهم...
والمصورة..
عطوها يلبسها الدبله والمصورة تصور فيهم..
بعدين مالبسها باس جبينها مرة تانيه.
بعدين عطوه يلبسها الطقم..
لبسها..وعاود باسها ع جبينها..
والكل يزغردوا....
بعدين طلعت كلهم..
وقعدت هي وياه ومعاهم المصورة تاخدلهم في صور..
كملت المصورة شغلها..
وقعمز هو وياها ع كراسي.
جابتلهم مطيرة العشي..وفرقوا حتى ع المعازيم اللي برا..
الفاندي:كان تنادي طوبى نبي نهدرز عليها شويه..
ديما نشوف فيها من بعيد..
ابتسمت سدرة ونادت ع عمتها تناديلها ع طوبى..
وشويه وخشت عليهم طوبى وهي لابسه حجاب.
ابتسمت وقالت:مبروك..
الفاندي:الله يبارك فيك..شن حالك ياطوبى..
طوبى بإبتسامه:الحمد لله..
الفاندي:شن دايرة في القرايه؟
طوبى:الحمد لله ماشية تمام..
الفاندي:تمام..شوفي ياطوبى اختك كان شرطها الوحيد بش توافق اني ناخدلها حوش في شارع القهوة يعني وين نتزوجوا نقعدوا فيه قريب عليكم..
شبحت طوبى لسدرة لقتها تشوف لإيهاب..
طلع ايهاب ورقه من من جيبه ومدها لسدرة وقال:والحوش وشريته جنبكم بالزبط لجيرانكم اللي حولوا من فترة..
سدرة وهي متفاجئه:انت شريته حوشهم!..
ابتسم وقال:ايه...وتوا ولى حوشك...
هي شبحت للورقه بإندهاش وخدتها وقعدت تقرا فيها..
سدرة:علاش تبكتب فيه بإسمي.. الفاندي:هدا شرطك انتي يعني الحوش مفروض يكون ليك..وهكي تقعدي جنب طوبى...وشبحلها بإبتسامه..
طوبى ابتسمت وهي تحاول تخفي ضيقها..
حست ان حياة اختها واقفه عليها..
حست وكأنها قاعده دور في فلكها..
وقاعد عندها خوف من ان اختها تخسر سعادتها للمرة التانيه بسببها..
سدرة؛جديات مش عارفه شن نقول..
الفاندي؛مانبيك تقولي شي..نبيك تكوني مرتاحه بس..
ابتسمت سدرة وقالت؛ماعرفت الراحه كان معاك.
طوبى بضحكه:هي اني توا مع السلامه..وقعدت تحي فيهم بحركة اليد.
وهما قعدول يضحكوا..
ولفت ومشت تجري وطلعت من حداهم تضحك...
🌻وعدت هالليله اللي كانت من اجمل الليالي اللي تمر عليهم ولاتنسى...
🍀🍀🍀🍀🍀
ودور عجلة الايام وتمر..
وفي شهر 3ياما صار..
اليوم اللي جي بعد يوم بيان سدرة..
توفى خو محمد شنيبه...
والعيله كلها مشوا قعدوا في حوش العم ع خاطر العزي..
وتكمل عندهم مغليه شهر كامل ....
فهالشهر..
موضوع عمر تأجل وماانفتحش معاه نهائي..
وهو عايش في حالة من العذاب ماتوقعش يعيشها في حياته..
خصوصا وان اميمه تغيرت هلبه من جميع النواحي..
وكل ماله يزيد يغرق في حبها..
واسامه عايش حالته...بس اللي مهون عليه ان علاقته بأميمه كزملاء قوت..بس مازالت حاطه حدود بأسلاك شائكه بينها وبينه وبين كل الشباب...
همها الوحيد قرايتها وبس وحاطه نصب عيونها حلمها وتواقه جدا لتحقيقه..
اما بنت عمها فكانت ماشيه تنحو الهاويه من ناحية مستقبلها الدراسي..وع قد مادارت فيها اختها وكله من غير فايده..
اما اختهم الكبيره..
انجبر راجلها ياخد قرض..
وبهالقرض دار صيانه للحوش زي ماتبي هي..
وهي كانت فرحانه بطير...ومش مهتمه لنفسية راجلها وحالته..همها كله ان رغباتها تتنفد وبس...
وفي من كانت رغباتها تتنفد قبل لتطلبها...
وكانت عايشه في سعاده وهميه اشبه بالمخدر يعطيلها فيه راجلها بش يأمن نفسه..
الكلام..عن خديجه ومحي الدين..اللي يجري في جرة صابرين وهي شايفه روحها ومخلياته وراه زي.
ان تحمل عليه يلهث وان تتركه يلهث..
ومع الخيانه..
كانت متعايشه نسرين ومش مدورة ومبرده قلبها ع الاخر..
ومازالت مهمله وماتعدلش...ومهما تسمع يخش من وذن يطلع من التانيه...
عكس فايزة..
اللي كانت مراة قد المسؤوليه بمعنى الكلمه..
امرأة عامله لكن تأدي في واجباتها اتجاه حوشها وراجلها وصغارها ع اكمل وجه...
☘☘☘☘☘☘
"احمد كم التاريخ اليوم"
احمد وهو يفك في تاكو سخانة الكوجينه قال..
20 اربعه..
عدلت التاريخ في تليفونها وحطاته في الشحن ومشت للكوجينه وهي تقول:يهبل التليفون حمودي ربي مايحرمني منك..
احمد بإبتسامه:ولامنك..
فايزة وهي تشوف فيه شن يدير:فوتها احمد ماعندنا مانديروا بيها الصيف بيخش..
احمد:مازال عليه الصيف بتقعدي تغسلي بميه مصقعه لين يخش عليه..
وطلع خيوط الضي متاعها..
فايزة تنهدت وقعدت ساكته وهي تشوفله..
وهو يشدة روس الخيوط بإيديه..
فجأة..
قعدت تشوف في الراجل يخض قدامها..
فايزة بفجعه:احمد.!!
واحمد نسي يفصل الضي من التاكو عن السخانه بدي يصلح فيه طول بدون مايركز عليها من كثر المواضيع اللي شاغله باله..
فايزة طلعت تجري للتاكو بش تطفي الضي ع السخانه.
وين وصلت فيها ماعرفتش اما وحده..
قعدت تعيط وهي تقول:احمد..وطفت وحده..
ومشت تجري للكوجينه..
لقت الميه تنزل عليه من السخانه وهو يزيد يخض..
فايزة بعياط؛لاياربي لا..
ومشت تجري مرة تانيه للتاكو وهي تعيط وتقول..
"احمد"
انذهبت شيرتها وماكانتش اصلا تعرف في التاكو شي..
قعدت تطفي كل مرة وحده زي المهبوله وتولي تشوفه في الكوجينه الراجل خلاص انتهي..
مشت تجري وهي تعيط وتقول:ياربي ياربي الا احمد الا احمد ياربي..
وصلت في التاكو..
وبإيديها الزوز نزلتهم كلهم والحوش كله ظلم الا من انوار شمس العشيه اللي خاشه من الرواشن
وسمعت صوت ارتطام حاجه ع الارض..
مشت تجري للكوجينه وانضرب وعترت في كذا حاجه لين وصلت في الكوجينه..
بان عليها احمد طايح..
وهي ترعش مع بعضها قعدت تنادي:احمد..احمد..
ولاحياة لمن تنادي فعلا..
قريت منه كان ضي الشمس عاكس ع وجهه اللي رقد الرقدة الاخيره..
نزلت عليه وقعدت تنوض فيه وهي تخبط في وجهه:احمد نوض احمد باالله عليك نوض احمد..
بدت تخبط ع وجهها وهي تقول بعياط..نوض نوض..لمن بتخليني..لمن بتخلي بناتك..نوض يااحمد نوض..ماتكسرش ظهري نوض..نوض..ماتهدش حيلي نوض..نوض..احمد مانقدرش عليها الدنيا من غيرك يااحمد ..
"ماتعوزنيش حتى فيك انت يااحمد"
وصرخت ع طول حسها وهي تقول..
"احمد"
والجيران اللي سمعوا عياطها جوها من كل شقه وقعدوا يدقوا ع بابها وينادوا فيها وهي ماتسمع في شي..
غير في صوت عاصفه حزنها الكبير..
ع السند اللي كانت متكيه عليه بكل جهدها..
وخداه منها الموت....

#عشرين_ابريل
#طوبى

....يتبع...