Game Changer

Day 3: Confused

[Day 3: Confused]

From: Kylie
Ohayo, babe! It's so cold!! Kagabi pa umuulan. Sarap nga ng tulog ko, eh. Ayaw ko pa sanang bumangon kaya lang may pasok pa. Tss! Btw, suot ko nga pala ngayon ang jacket na niregalo mo sa akin noon. Pakiramdam ko, yakap mo na rin ako. Hihi.
Received: 6:42am

From: Kylie
Babe, nakakainis! Papasok na ako ng school nang biglang may dumaang sasakyan sa harapan ko. 'Yung tilamsik tuloy ng tubig-ulan sa daan napunta sa akin. Buti na lang suot ko ang jacket mo. Naisip ko tuloy na kahit wala ka sa tabi ko, you're still protecting me.
Received: 6:58am

From: Kylie
Babe, classroom na ako. 'Pag hindi na ako naka-text, that means, may klase na kami.
Received: 7:08am

From: Kylie
Babe, pasensiya na kung maghapon akong hindi nakapag-text. Sobrang busy, eh. Nangako ako sa 'yo na mag-aaral ako nang mabuti 'di ba? Kaninang umaga, puro kami discussion. Pagdating naman ng hapon, may PE kami at naglaro ng sports kaya hindi ko masingit ang pag-text. Sorry, babe.
Received: 6:58pm

From: Kylie
Babe, huwag kang magtampo 'pag hindi ako nakakatext, ah.
Received: 7:00pm

From: Kylie
Babe, kain lang ako.
Received: 7:05pm

From: Kylie
Babe, katatapos ko lang kumain ng dinner. Balak ko sanang manood ng tv nang maalala kong kailangan kong mag-sulat ng tula para sa Filipino subject namin. Any theme daw basta may tugma, tatlong saknong at apat na taludtod. To be present tomorrow in front. Ano kayang isusulat ko?
Received: 7:21pm

From: Kylie
Mamaya na lang, babe. Susubukan ko munang gumawa ng tula.
Received: 7:22pm

From: Kylie
Babe, I made it! Hindi ko akalain na makakagawa ako ng tula. Gusto mo bang mabasa? Sige, wait lang.
Received: 8:40pm

From: Kylie
Nangungulila sa mga yakap mo
Hinahanap ang presensiya mo
Ang isip ko ay nalilito
Kailan ka babalik sa piling ko?
~
Ako'y naguguluhan at nalulumbay
Hindi makuntento at mapalagay
Pakiramdam ko'y wala akong buhay
Gusto ko nang mahawakan ang iyong kamay
~
Kahit anong mangyari ay mamahalin kita
Kaya bumalik ka na at magpakita
Handa akong intindihin at pakinggan ka
Maghihintay ako sa pagbabalik mo sinta
~
Ano, babe? Okay na ba 'yan? Tungkol 'yan sa 'yo kasi wala akong ibang maisip kundi ikaw. Sobra-sobrang miss na talaga kita.
Received: 8:43pm

From: Kylie
Bahala na. 'Yan na ang tula ko. Kapagod mag-isip, eh. Alam mo naman na tamad rin ako minsan. Haha.
Received: 8:45pm

From: Kylie
Babe, matutulog na ako. Gusto kong maagang matulog ngayon. Sakit kasi ng katawan ko dahil sa PE kanina. Gusto na rin kitang mapanaginipan.
Received: 8:47pm

From: Kylie
Sa panaginip na lang kasi kita nakakasama, nayayakap at nahahagkan. Oo, babe. Nasa panaginip kita lagi kaya gusto ko nang matulog. See you in my dreams! Mahal kita. Good night.
Received: 8:50pm

TROY'S POV

Napabuntong hininga ako matapos mabasa ang huling message ni Kylie sa araw na ito. Pinatong ko sa bedside table ang cellphone at saka ako nahiga sa kama. Napatitig ako sa kisame at nag-isip.

Sobra namang mahal ni Kylie ang boyfriend niya at base sa mga kuwento niya, mukhang mahal din siya nito. Pero nakakapagtaka lang kung bakit kaya tatlong linggo na itong hindi nagpaparamdam sa kanya? Ano kayang nangyari dito? Posible bang may nangyari sa kanila kaya hindi na ito nagpakita?

Mariin akong napapikit at tumagilid sa pagkakahiga. Ano kayang mangyayari kapag nalaman niyang hindi na ang kanyang boyfriend ang nakakatanggap ng message niya? Magagalit ba siya sa akin? Kung i-text ko na kaya siya?

Hays. Nagtatalo ang puso at isip ko. Dahil nakokonsensiya ako, tinutulak ako ng isip kong i-text na siya at sabihin ang totoo pero todo pigil naman itong puso ko dahil parang natutuwa ito kapag nababasa ang message niya. Naguguluhan na ako! Ano bang dapat kong gawin?