رواية مهلكتي من جزء 1 : 18

الجزء_الثالث_عشر ( الحلقه الخامسه ) ( ليله كامله ) ❤ ❤

................
( ف الحلقات السابقه )
ام احمد : طيب اقعدى يا ماما ! ومال عينك معيطه ليه كده . فيه ايه هو لحق يزعلك تانى ؟ عملك ايه وانا اللى هربيهولك بجد المرادى
سلمى : معملش حاجه .. هو جوه مش كده ؟
ام احمد : ( بتبص لاوضة احمد وبتبص ل سلمى اللى بتصعب عليها ) اه يا حبيبتى جوه ... هعملك عصير لمون يروقك شويه
سلمى : متشكره
................ ( الخامسه ) ❤
( سلمى بتفتح باب الاوضه على احمد اللى بتلاقيه واقف جنب السرير )
احمد : لو قربتى منى هحدف نفسي م الشباك
سلمى : ( بتبصله وبتبدا عنيها تدمع )
احمد : ( بيبصلها وهى بتبكى ) ملعون ابو اى حاجه تخلى دموعك دى تنزل ( بيروح يحضنها ) ماتزعليش ! حقك عليا .. انا بنى ادم حمار وغبى انى بضايقك وبخلى دموعك دى تنزل .. وحياتى عندك تبطلى عياط انا مابستحملهاش والله .. مابستحملش اشوف عنيك كده يا سلمى .. عشان خاطرى
سلمى : ( بتبدا تتنهنه ف البكا بشحتفه )
احمد : خلاص بقا ! خلاص اهدى ... لو مسكتيش هرمى نفسي م الشباك والله وبتكلم بجد
سلمى : ( بتكلبش ف قميصه وبتحضنه )
احمد : اقعدى ! اقعدى هجيبلك حاجه تشربيها
سلمى : ليه يا احمد ؟
ليه عاوزين ياخدوك منى ! ليه مش سايبينى اتهنى بيك شويه
هو انا وحشه ؟ هو انا ماستاهلش قلبى ده يهدى شويه .. ليه لما احب حاجه وأبقي مش عاوزه غيرها من الحياه دى كلها الدنيا تستكترها عليا ؟
قولهم يا أحمد يبعدوا عنك .. قولهم ان ليك واحده هتموت لو حست ان حد مشاركها فيك بنظره او بلمسه او حتى بكلمه
قولهم ماتقربوش منى انا لسلمى .. ولسلمى هى وبس
انا مابستحملش حد يتكلم عليك
بغير من اصحابك انهم شايفينك طول الوقت
بغير من مامتك واخواتك انك بيتقفل عليك بابك وهما معاك وشايفينك
بغير عليك من هدومك من أكلك من شربك من كل حاجه
انت مش فاهم انت تبقي ايه ليا وعندى
انا مستغنيه ... مستغنيه عن الدنيا باللى فيها بس تبقالى انت
هو انا بطلب حاجه صعبه ؟ بطلب مستحيل يعنى ؟
ليه الغباوه دى معايا .. يعنى هو انا ملاحقه على اللى هنا عشان تجيلى واحده من زفت المانيا دى تقول انه يبقي خطيبى ؟
اعمل ايه تانى طيب عشان يسيبوك ويبعدوا عنك
قولى يا احمد !
طب قولهم انت ! قولهم انك مش هتكلم حد غير سلمى
قولهم انك مابتحبش حد غير سلمى
قولهم ان محدش هيحبك قد ما بتحبنى سلمى
قولهم انى مستغنى زى منا مستغنيه عن الدنيا ما عدا سلمى
( بتعيط وهى بتتكلم )
احمد : وحياة دموعك هقولهم ان ماليش غير سلمى .. ومش عاوز اكلم ولا اشوف حد غير سلمى ... وان الدنيا كلها بالنسبالى هى عيون الست سلمى
سلمى : بجد هتقولهم ؟
احمد : انا حلفتلك بنقطة ضعفى ! وانتى عارفه ان حياتى دى كلها باتساعها ماليش فيها نقط ضعف غير دموع عيون حضرتك
سلمى : ( بتتكسف ودموعها بتبدأ تختفى ) ماشي
احمد : عسل وانتى مكسوفه .... بقا القمر ده يبقي زعلان بسببى يا جدعان ..مش بقولك انى غبى !
سلمى : ( بتمسح دموعها ف قميص احمد ) المهم بقا
احمد : خير
سلمى : انا نسيت اصلا كنت جايه ليه ؟
اه افتكرت ... ( بتمسكه من شعره ) الست زفته هانم كانت بتعمل ايه هنا الصبح وايه اللى جابها .. رد بدل ما ارميك م الشباك
احمد : ياريت ترمينى هرتاح .. والله العظيم هرتاح
..................
ام احمد : احححححم ! انتوا يا عيال .. تعالوا افطروا معايا بما اننا لوحدنا
سلمى : ( بتبتسم ) ياريت ! عشان جعانه .. وابنك منكد عليا من امبارح
ام احمد : تعالى نفطر انا وانتى وسيبك منه الواد ده
احمد : ياسلام ! هو مين فينا اللى ابنك ياست انتى .. وبعدين انا جعان بردو مفطرتش حلو الصبح مع البنات عشان كنت عامل حسابى اروح الجامعه
سلمى : يلا يا طنط ! يلا نعمل فطار لينا احنا ونسيب الناس دى هنا
احمد : ناس مين ! بقولكوا جعان !
سلمى : تعالى اعمل الشاى
....
( ف المطبخ )
ام احمد : هتعرفى تحطى البطاطس ف الزيت يا سلمى ؟
سلمى : انا اساسا تخصص بطاطس ..
احمد : ايوه ايوه .. افشرى علينا افشرى ..
سلمى : وانت مالك انت اساسا ! حد كلمك ؟ دى ناس غريبه جدا
ام احمد : مالكيش دعوه بيه يا لومه وحطى البطاطس بالراحه
سلمى : طب ما تحطيه انتى . لاحسن يطرطش عليا ولا حاجه
احمد : بنات اخر زمن ... ماشوفتيش امى انتى .. دى بتتوضى بالزيت بتاع البطاطس ده
ام احمد : هههههههههه كلنا كنا كده يا موكوس واحنا بنات .. بس واحده واحده هتعرفى تعملى كل حاجه
احمد : امرعيها امرعيها ... بكره لما نتجوز هتقعدى جنب الحيط وتقولى ياريتنى ما نفخت فيها
سلمى : ( بتتفاجأ بالكلمه وبتبص ل احمد اللى اساسا مابيكونش واخد باله انه قالها )
ام احمد : ( بذهول ممزوج بابتسامه عريضه على وشها بتبص لابنها )
احمد : ( مش واخد باله اصلا من الكلمه اللى قالها .. قالها بعفويه جدا ) فيه ايه ؟ بتبصولى كده ليه ؟
سلمى : انت قولت ايه دلوقتى ؟
احمد : قولت ايه ؟ قولت بكره لما نت.... ( بياخد باله ) كده البراد كان هيقع .. لابخانى انتى ... البطاطس هتتحرق خلى بالك ... ( بياخد البراد والكوبايات ومكسوف من الكلمه اللى قالها وبيطلع بره وبيسيبهم ) انا هخرج اصب الشاى على ما تجيبو الفطار بقا
.....
( ام احمد وسلمى ف المطبخ لوحدهم )
سلمى : ( واقفه الدنيا مش سايعاها ومتلهوجه والكوبايات والحاجه اللى على المطبخ بتقع منها وبتفرك ف ايديها )
ام احمد : ( بتاخد بالها ) سيبى سيبى الطاسه يا سلمى خلينى انا اطلع البطاطس ... افتحى التلاجه بس هتلاقى فيه طبق فيه جبنه طلعيه
سلمى : ( من لبختها بتفتح الغساله ) انتى قولتى ايه ؟
ام احمد : ( بتبصلها وبتضحك بصوت عالى ) طلعى الهدوم اللى عندك وحطيها عشان نفطر يلا
سلمى : ( بتضحك بشكل هيستيرى ... بتروح تحضنها ) انا بحبك اوى يا طنط
ام احمد : وانا يا روح طنط ... يلا بقا احنا جوعنا وبطلى سرحان شويه
سلمى : حاااضر .. هاتى يلا الصينيه
ام احمد : لا انتى خدى الصينيه دى افطرى انتى واحمد لوحدكوا وانا هبقي
سلمى : لا هنفطر كلنا .. عاوزه اقعد معاك ومعاه على سفره واحده ...
ام احمد : طب يلا .....
...............
عمر : ايه يا زميلى ... وصلت لفين مع سلمى ؟
حاتم : الروايه بيتكتب نهايتها على نار هاديه ههههههههههههههه النهارده او بكره بالكتير هجيب ضلفها .. وهتبقي عاليها واطيها
عمر : لسا بردو مراهن على منه انها هتقول ل سلمى
حاتم : انا ومنه بينا عامل مشترك ... هى عاوزه الواد وده مايمهنيش تشبع بيه .. وانا عاوز سلمى ... ومن مصلحتى ومصلحتها انها تقول لسلمى .. سلمى طبعا واستحاله لانى عارفها وعارف شخصيتها استحاله هتكمل معاه او هتطيق تبص ف خلقة أهله بعد ما تعرف انه كان مع غيرها ! أقوم ايه بقي .. اقوم انا داخل بتقلى ياسطا .. كأنى المنقذ .. وهتودد ليها بهداوه من غير غشوميه بردو . هحاول اطيب خاطرها اللى الواد ده يا عينى هيكون كسره هههههههههههه وواحده واحده هاجى اقولك انا وسلمى خطوبتنا الاسبوع الجاى
عمر : تتوقع اللى بتقوله ده هيحصل بنسبة كام ؟
حاتم : 100 % ... واراهنك ان النهارده او بكره هتبدا بداية النهايه ...
عمر : لو حصل الموضوع ده عاوزك توصلنى للبت فريده .... البت دى طالعه من نافوخ أهلى . يخربيت جمالها .. عاوز اوصلها بأى شكل .. البت جامده
حاتم : سلمى تيجى بس وهتلاقى البنات دول كلهم ف جيبك ...
عمر : يا مسهل
.................
سلمى : هما البنات هيطلعوا امتى من مدارسهم
ام احمد : ع الساعه 2 كده !
سلمى : طب انا عاوزه اسالك سؤال هيموتنى كده والفضول قاتلنى اساله لحضرتك
ام احمد : خير يا حبيبتى
سلمى : ( بتبص ل احمد ) اتعرفتى على عمو إزاى ؟ وكنتوا بتحبوا بعض ولا اتجوزتوا كده زى ناس زمان
احمد : هههههههههههههه إوعى تقوليلها يا ماما لاحسن مش هتصدق اقسم بالله
ام احمد : هههههههههههه هى من ناحية مش هتصدق ف هى مش هتصدق
سلمى : ليه ؟ هى حاجه إعجاز يعنى ؟ الف ليله وليله
احمد : مش الف ليله وليله ولا حاجه . بس لو عاوزه تعرفى ابويا وامى اتعرفوا على بعض ازاى بصى للسنه اللى فاتت من عمرك وانتى تعرفى .. وهو ده اللى مخلينى مش على بعضى من ساعة ما شوفتك ههههههه
سلمى : ايه الألغاز دى ... ماتقولو يا جماعه . قولى يا طنط والنبى
ام احمد : كنا انا وهو قد بعض ف السن ! بس كنا ف مدارس مختلفه ! كنت ف تانيه ثانوى ! وكان مدرسته عامله زياره لمدرستنا زى حاجات زمان دى ! ولما شافنى فضل يدور عليا لانى كنت توهت منه ف الزحمه ... قلب عليا المدرسه بتاعتى كلها .. لغاية ما دخل عليا الفصل والمُدرسه كانت بتشرح وقالى قدام العيال كلهم انتى اسمك ايه ؟ طبعا المُدرسه هزأته ههههههههههه وطردته بره الفصل وقالتله لو مامشيتش هناديلك ناظر المدرسه .. وفعلا طلع بره الفصل واستنانى على اول الطرقه ف الفسحه .. لما شوفته فضلت اضحك عليه وعلى شكله وهو قاعد مستنينى .. لكن لما دققت ف ملامحه لقيتنى زى ما يكون شوفته قبل كده .... اول ما قربت منه لقيته بيقولى انا على فكره لابعاكس ولا بتوع معاكسه وعارف اننا لسا صغيرين ع الكلام ده بس ادينى رقم البيت عشان انا عايز اتجوزك
سلمى : يا قلبي هههههههههههه وبعدين ؟
ام احمد : اديته رقم تليفون البيت وخلى ابوه يرن على التليفون بالليل واتكلم هو وبابا .. ولما ابويا خلص المكالمه بصلى وقالى فيه ضيوف جايين بكره المغرب .... جهزوا نفسكوا
واتخطبنا ... واول ما خلصنا الثانويه اتجوزنا ههههههههههه
سلمى : ايه قصة الحب الجامده دى هههههههههههههه شوفت باباك ؟ ياريت تتعلم منه شويه ... ما صدق وتبًت فيها بايده وسنانه واتقدملها على طول
احمد : اومال لو قولتلكوا بقا وده اول مره هتسمعى منى الكلام ده يامه لانه كان مأمنى ومستأمنى عليه وقالى ماتقولوش لامك طول منا عايش
ام احمد : كلام ايه يا واد ؟
احمد : السبب اللى خلاه يجرى وراك ويدور عليك ف وشوش الناس وما يصدق انه يشوفك ويطلب ايدك انه حلم بيك قبل ما يشوفك زى منا حلمت بالابله دى
ام احمد : نعم ؟
سلمى : نععععععععععم ؟
احمد : ورحمة ابويا حصل ههههههههههههه عرفتوا ليه انا متبًت ف سلمى
ام احمد : ( بتبدا تعيط وبتفتكره ) الله يرحمه .... الله يرحمه كنت عايشه ف خيره عمرى كله .عمرى ما هونت عليه ف يوم .. عمرى ما سابنى زعلانه ساعه على بعضها ..
حتى وقت زعله وغضبه منى .. كنت بحب اوى اللحظات دى لانى كنت بتأكد من غلاوتى عنده ...
كان يقولى . انا ممكن ابقي زعلان منك وممكن ابقي مش طايقك عادى .. لكن اللى مش عادى إنه
احمد : إنه اخليك تحسي بنقص وقت الزعل ده ... ولو ماحستيش انك دُرة الدنيا دى كلها وان الكون ده كله بيلف حوالين منك يبقي العيب فيا انا .. انا اللى مقصر ف حقك
ام احمد : ( بتبتسم وهى بتبكى ) فاكر كلامه اهو
احمد : فاكر ؟ عُمرى ما نسيت كلمه قالها
سلمى : هههههههههههههههه انا عرفت انت عارف الكلام ده كله ازاى .. أتاريك شارب من باباك ...
احمد : ليا الشرف ..
سلمى : قعدتكوا حلوه اوى . ماتخلونى اعيش معاكو هنا
احمد : ياريت .. ماتفضيلها الاوضه دى يامه
ام احمد : قوموا يا شوية مهزاين اغسلوا الاطباق دى وشوفوا هتروحو فين .. هوونا يلا مش عايزه لمه هنا
سلمى : هههههههههههههههه
...............
( ع الكورنيش )
احمد : تاكلى ايس كريم ؟
سلمى : بالشوكولاته بقا
احمد : على فكره امى طرقتنا وطردتنا عشان زمانها عماله تعيط دلوقتى ...
سلمى : قصة حب حلوه بردو ما بين باباك ومامتك ... عشان كده طالع بتفهم وطالع حبًيب ياخويا ومش ملاحقه
احمد : قوليلى بقا عملتى ايه ف الجامعه النهارده
سلمى : اسكت ! انا زعلت الناس كلها .. كل اللى كان بييجى قدامى كنت بديله ف وشه
احمد : هههههههههههه انا الواد مصطفى قالى اوعى تيجى ... سلمى بتاكل العيال
سلمى : وكلمت مصطفى ازاى ؟
احمد : كنت قاعد مع الواد سيف ع القهوه
سلمى : سيف ؟ مش ده اللى ف شرطه ؟ واللى مابتكلموش ولا بتلجأله غير لما يكون فيه مصيبه ؟ انت ناوى على حاجه يا احمد
احمد : ماتشغليش بالك يا سلمى ... انا عودتك انك مالكيش دعوه ف الدنيا دى غير بحلاوتك وبدلعك وجمالك بس .. أما الدنيا بمشاكلها بقرفها انا كفيل اقوم بيها لوحدى !
سلمى : بس من حقى اخاف عليك
احمد : حقك طبعا ! بس الخوف ده انا عاوز يتقلب ل فخر مش لخوف ممزوج لجُبن .. وانتى عارفانى وعارفه انى مش جبان وعُمرى ما سيبت حقى
عُمر المختار وهما خلاص بيعدموه قال جمله للناس لسا لغاية دلوقتى الناس بترددها ...
قالهم " كُن عزيزا وإياك أن تنحنى مهما كان الامر ضروريا ! فربما لا تأتيك الفرصه كى ترفع رأسك مره أخرى "
وانا عيشت عمرى كله راسي مرفوعه .. مش هييجى حتة كلب بلطجى يخلينى ادفس راسي ف التراب زى النعام واقول منه لله ....
اه منه لله بس وانا واخد حقى منه الاول ... وكلها كم يوم وهاجى تحت شباكك واقولك الولا حمو خد حقه يا ست لوم
سلمى : هههههههههه حلوه اوى الست لوم دى ...
احمد : ست الدنيا كلها والله
سلمى : لما بقعد معاك لوحدينا بحس ان الدنيا دى كلها زى القمر هههههههههههه مش عاوزه اشوف حد مش عاوزه اشوف المهزأين اللى بيعكننوا علينا دول .. ايه الناس دى
احمد : هههههههههههههه مالكيش دعوه بحد ! خليكى معايا انا وبس ... هو انا مش كفايه ؟
سلمى : كفايه ؟ دا كفايه وكفايه وكفايه ... مش عاوزه الوقت يخلص عاوزه اخلينى جنبك كده . اشم ف ريحتك ! البرفيوم ده نوعه ايه
احمد : لا دا كارمن جايباهولى هديه من ألمانيا وهى جايه
سلمى : ( بتبصله وعنيها هتتحول )
احمد : هههههههههههههههههههه ( بيشد رقبتها على صدره ) بهزر معاك .. دى برفان عادى بيتباع ب 10 جني ع الرصيف هههههههههه حلو ؟
سلمى : ممكن ماتجيبش سيرة الزفته دى لا بهزار ولا بجد ؟ عشان مطينش عيشت أهلك ؟
احمد : ممكن ياسطا .... عيونى . وبعدين انتى لسا هتطينى عيشت اهلى اكتر من كده ؟ دانتى ناقص تكهربينى .. منك لله ! دا لسا البوكسين معلمين ف وشى ... الواد سيف بيقولى وشك معلم ليه انت اتخانقت .. قولتله لا دنا كنت بحلم وانا نايم ..
سلمى : هههههههههههه تستاهل .. يا بصباص يا ابو عيون زايغه
احمد : المهم بقا نيجى للمهم
سلمى : خير
احمد : إحكي !
سلمى : أحكي ايه بالظبط
احمد : الحلم يا ماما اللى قولتى عليه وانتى بتصحينى
سلمى : انت لسا فاكر ؟ انا افتكرتك نسيت
احمد : مقدرش انسي كلمه قولتيها ... ها بقا احكي
سلمى : بلاش . هو اساسا حلم مش مفهوم وحاجه لخبطيطه كده ههههههههههههه مالوش معنى
احمد : مش مشكله . قوليه بردو
سلمى : بصى يا سيدى ... الحلم كان فيه اربع اشخاص بس
انا وانت والبت منه والبت فريده
كنا على يخت كبير ف نص البحر .. كنا ف رحله بقا ولا ف فسحه معرفش . المهم اننا كنا ف اليخت ده
وكنا على السطح فوق وبنتكلم وبنهزر وبنضحك ..
بعدين البت منه جابتلى ازازه ميه وقالتلى ارميها على احمد .
انا طبعا قولتلها لا لاحسن تعوره ولا حاجه قالتلى مش هيتعور ..ارميها بس خلينا نشوف هيعمل ايه ...
أخدت الازازه منها .. ولسا برميك بيها ... كنت انت بصيتلى ورفعتلى حاجبك وقولتلى بلاش يا سلمى ... عشان خاطرى بلاش
كنت هبله وأصريت انى ارميك بالازازه .. خبطتطك هنا ( بتمشي ايديها على قلبه ) هنا بالظبط ... لقيتك مسكت قلبك وقومت واقف مكانك كأنك هتفقد وعيك ... لسا بجرى عليك انا ومنه وفريده عشان اتطمن عليك .. لقيت فيه حتة سمكة قرش بنت كلب أأأأأأد كده نطت من الميه وخدتك ونزلتوا ف الميه ....
احمد : اعوذ بالله ! ومالك كنتى منشكحه وانتى بتقوليلى اصحى انا حلمت بيك
سلمى : ههههههههههه ماهو عشان دقيقه بالظبط ولقيتك طالع اليخت تانى ومعاك راس السمكه وبتقولنا بقي ده اسمه هزار ده . ههههههههه قرد انت بردو .. قطعتها ازاى ؟ قطعت راسها ازاى يا قادر
احمد : هههههههههههههه دى اقل حاجه عندى
سلمى : استنى بس ! وانت بتطلع ... فيه سمكه اصغر من الاولانيه بشويه نطت وكانت لسا هتقرب من فريده وتاخدها معاها بس انت ضربتها بحديده كانت جنبك وموتتها ... وبعدين انت جريت على دفة اليخت ورجعتنا تانى ع الشط ...
احمد : ايه الاحلام دى ؟ هو اى هيصه وخلاص
سلمى : اهو اللى حصل بقا .. وبعدين اه دى احلام . انت يعنى بتحلم بإيه انت ؟
احمد : انا ؟ لا انا احلامى ماينفعش تتحكى هههههههههه وماتحاوليش تقوليلى احكى عشان بجد مش هحكي ... خلصانه
سلمى : دانت بايخ ... احمد هو انا ممكن اسالك على حاجه .. ولو مش عاوز تجاوبنى عليها ماتجاوبش
احمد : حاجه ايه ؟
سلمى : فاكر اليوم اللى افتكرت فيه ورجعتلك ذاكرتلك ؟
احمد : اه
سلمى : ماجيتليش ليه انا اول واحده تشوفها ؟
وليه لما جيتلك البيت حضنتنى وقولتلى حقك عليا وسيبتنى ومشيت ... بس رجعت بعدها بكم ساعه تصالحنى وتقولى انه خلاص الحمد لله وفضلت تصالحنى ؟ ايه اللى كان يومها جواك ؟
احمد : ( بيبصلها ) مافيش يا سلمى ! افتكرت زعلى منك ! بس بعد كده ماهونتيش عليا ورجعت اصالحك
سلمى : ( بتبتسم ) انا كنت عارفه ان هو كده فعلا ... ماتجيب بوسه
احمد : احترمى نفسك . الناس حوالينا ... ماتقومى نروح الجامعه ؟ دا بعد اذنك يعنى ..
سلمى : والله لو عاوز تاكل علقه حلوه هناك والناس كلها تتفرج عليك يلا بينا
احمد : لا خلينا قاعدين . الجو حلو هنا . بلا جامعه بلا كلام فاضي
سلمى : بالظبط ... قوم بقا هاتلى كوبايه ايس كريم تانيه
................
( بعد المغرب ع القهوه )
مصطفى : ابو شكلك عيل معفن .. بقا تسيب البت تهزأ اللى خلفونا ف ام الجامعه وف الاخر تقول انك كنت قاعد معاها طول اليوم ع الكورنيش ...
احمد : ولااااه .. لما تتكلم عن الست سلمى تحترم نفسك وماتشوحش بايدك وانت بتتكلم .. لاعلقك
مصطفى : ايوه ايوه ! إنفش ريشك علينا هنا ....دانت كنت مبلول طول اليوم . ياعم اتنيل
احمد : ايه ده ؟ هو انا بقت سمعتى وحشه اوى كده ياض يا على
على : الصراحه ! دانت بقيت ولا الست كوريا اللى ف فيلم عسكر ف المعسكر ... بلح
احمد : ملحوقه ... احكولى بقا مين اللى انضرب النهارده ... والبت كارمن اتشلوحت ازاى ؟
مصطفى : ااااخ ! دا كان حتة يوم ! انا كل ما افتكر اقع على الارض من كتر الضحك وف نفس ذات الوقت احسس على وشي اللى خد حتة قلم كان بينور هههههههههه
احمد : مش مكسوف على دمك وانت زى الطور كده وتاخد قلم على وشك ؟
مصطفى : ( بيحط رجل على رجل وبيشرب شفطه من القهوه ) مش أحسن من اللى خد بوكسين ف وشه وانضرب بالمقشه واتسحب منه تليفونه
احمد : ( وشه بيحمر ) مين ده ؟ مين اللى بتقول عليه ده ؟
مصطفى : اهو واحد كده ههههههههههههههه
احمد : هى علبة التونه ... صح ؟
مصطفى : هههههههههههههههه صح .. دى جرست أهلك ..
احمد : وحياة امى لمربيك يا بت يا ساره .... ماهو اعمل فيها ايه ؟ حتة علبة تونه اد كده اعمل فيها ايه يعنى ؟؟ المهم يعنى قالت لمين
مصطفى : يا لهووووووووووى
احمد : وحياة امك دى بقا هروح فيك ف داهيه انت وهى .. قالت لمين تانى ؟
مصطفى : لا لا ماتخافش .. احنا بس
احمد : حلو
مصطفى : ومنه
احمد : زفت
مصطفى : وفريده
احمد : اطران على نافوخك
مصطفى : وايمان واسراء
احمد : جاتك داهيه
مصطفى : وكان فيه شلة بنات كده ماشيين قالتلهم هههههههههههه
............
سلمى : الو !
ساره : عايزه ايه ؟
سلمى : ههههههههه زعلانه يا بيضا لسا ؟ انزلى يلا عشان تروحى معايا يإما هطلع هاخدك من وسط اهلك ... يلا بقا
ساره : مش طايقاك على فكره ... بقا تقوليلى امشي وابعدى عنى الساعادى ؟
سلمى : معلش ... مانتى كنتى شايفه اللى حصل
ساره : ايه اللى جد يعنى خلاكى مبسوطه ... داهيه لاتكونى قتلتلى الواد
سلمى : بعد الشر ههههههههههه انزلى وانا هفهمك هناك يلا
ساره : اتحايلى عليا شويه
سلمى : يلا يابت الجزمه
ساره : هههههههههههه عيونى
............
( ف العربيه )
ساره : انتى رايحه على فين ؟ مش هنروح ولا ايه
سلمى : لازم اشوف منه !
ساره : اشمعنى !
سلمى : منه قالتلى كلمه النهارده وانا بتخانق خلتنى اضربها ساعتها
ساره : كلمة ايه ؟
سلمى : قالتلى ماتعمليش كده يا سلمى محدش يستاهل اللى بتعمليه عشانه ده ... وانا وانتى عارفين انها استحاله تقول كده على احمد
ساره : عادى هتلاقيها كانت عايزه تهديك بس لما كنتى متعصبه
سلمى : مش منه اللى هتقول على احمد كده .. وانتى فاهمه وانا فاهمه ... الكلمه اللى قالتها دى محسسانى انها متضايقه من احمد ف حاجه .. او فيه بينها وبين احمد حاجه ومزعلها مثلا
ساره : لا انتى مخك راح لبعيد اوى
سلمى : منا رايحالها عشان افهم .. هتخليكى انتى ف العربيه خمس دقايق على ما اجيلك
.............
( ف بيت منه )
ام منه : لووووومه ! وحشتينى يا بنت ! فينك مش بشوفك ليه
سلمى : يا قلبى والله وحشانى ! ماستغناش عنك يا ست الكل انتى بس انتى عارفه بقا الاجازه وصداعها
ام منه : طيب يا روحى .. تتعشي معانا ؟
سلمى : ولا اقدر والله ! انا جايه اشوف منه بس شويه ونازله على طول . هى جوه ؟
ام منه : اه يا روحى ادخليلها ! على ما اخليهم يعملولك عصير
سلمى : تسلم ايدك يا قلبى .. عن اذنك
................
( ف اوضه منه )
سلمى : ( بتدخل على منه بتلاقيها قاعده على السرير ماسكه رجليها ف قعده حُزن ) ايه القعده دى يا بت
منه : سلمى ؟ تعالى يا حبيبتى ... ايه هديتى ولا لساك شعنونه زى الصبح
سلمى : ههههههههههه لا هديت ... انا جايه اتطمن عليك انتى واصالحك واقولك ما تزعليش على القلم بتاع الصبح هههههههههههه
منه : لاااا منا اتعودت منك على كده من زمان .. مجنونه انتى
سلمى : وبردو جايه اسألك على حاجه كده
منه : حاجه ايه ؟
سلمى : انتى ليه قولتيلى النهارده وانا بضرب البت الجديده دى محدش يستاهل تعملى كده عشانه ؟
منه : ( بتقلق وبتتوتر ) ايه ؟ لا عادى ..كنت بحاول أهديك بس
سلمى : منه ... ! انا صاحبتك من اكتر من 12 سنه .. وافهمك بسهوله جدااا .. مش انتى اللى هتقولى على احمد كلمه وحشه سواء ف وجودى او حتى ف غير وجودى او حتى بينك وبين نفسك . لانى عارفه ومتأكده انك بتعزيه زى منا بعزه واستحاله هنقبل انه يتقال عليه كلمه وحشه من حد غريب ما بالك بقا بينا احنا .... منه شوفتى ايه من احمد وحش خلى الكلمه دى تطلع منك
منه : مافيش يا سلمى
سلمى : منه ... قولى .. انتى عارفه انى مش همشي غير لما اعرف
منه : خايفه تغيرى نظرتك عنه او انك تتصرفى تصرف تبعده هو عننا .. انتى عارفه اننا كلنا ملمومين على حسه وان وجوده ف حياتنا الفتره اللى فاتت كان اشبه بحلم جميل كلنا عيشناه . انا وانتى وفريده وساره وكلنا بلا استثناء .. خايفه اقولك حاجه تخليه يبعد
سلمى : ( بتتوتر وهى بتبصلها ) كملى يا منه ! ايه الموضوع
منه : فاكره اليومين اللى احمد زعل مننا فيهم وراح اشتغل مع الراجل البلطجى ده ومكنش دارى بالدنيا .. وكلنا قولنا ان من حقه انه كان يضعف
سلمى : اه ! ايه اللى جد يعنى ف الموضوع ؟
منه : اللى جدً إن ال......
سلمى : اخلصى وكملى
منه : كان فيه واحده عند الراجل ده .. اسمها غزال .. احمد عمل معاها علاقه كامله .. ليله كامله كان معاها
............
الي اللقاء في الحلقه القادمه

كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels

لينك الكاتب
https://www.facebook.com/profile.php?id=100010381862587

لينك بيدج/ هو و هي
https://www.facebook.com/howa.weheyaa/

لينك بيدج/ stories and novels
https://www.facebook.com/StoriesAndNovels2020