رواية مهلكتي من جزء 1 : 18

الجزء_الثامن (الحلقه الاولى ) ( أول الحكايه ) 💔💔

................
ف الجزء السابق :_
سلمى : انا معرفتش معنى سلمى غير لما عرفت احمد
هلاكى ومهلكى وملاكى ومملكتى .. حبيبى ومُحبي وصغيرى وابنى ... بخاف عليك اكتر من اى حد ف الدنيا .. وبخاف عليك اكتر ما بخاف على نفسي
انا مستعده اعيش قصاد عينك العمر كله ( بتطبطب على شعره . وبتبوسه من خده )
هتقوم يا بابا صح ..؟
انا عارفه انك هتيجى الصبح هنلاقيك صحيت وبتدور عليا وبتقول فين سلمى . صح ؟
بس انت بتاخد نفسك م الدنيا شويه عشان هى تعبتك الفتره اللى فاتت وجات عليك
استريح ..! استريح يا قلبي شويه وخلى قلبك يستريح
بس عاوزاك لما تقوم تقوم واقف على رجلك وماسك بندقيتك من تانى
عشان مش هنسيب حقك ولا هنسيب اللى اتجرا وعمل كده مهما كان اسمه
انا مستنياك بره مش همشي ... حتى لو هقعد العمر كله
ف ماتطولش ف غيبتك وماتهربش منى ف غيبوبتك ... انا مستنيااااك ..
................. ( الاولى ) ❤
ام احمد : ( بتبوس ايد ابنها )
الممرضه : يلا يا جماعه بعد اذنكوا .. نسيبه يستريح شويه
................
ابو سلمى : ساره ! فين ارقام العربيه اللى خدتوها
ساره : سلمى اللى حافظاها يا عمو
ابو سلمى : طيب هى طلعت اهى ... خير يا بابا احمد عامل ايه
سلمى : ( بتعيط ) مابيتكلمش ومش معانا خالص ....مش دارى بالدنيا
ابو سلمى : اهدى يا حبيبتى ... ان شاء الله ربنا هيلطف بيه وبينا ... بقولك ايه حفظتى الرقم بتاع العربيه اللى خبطته ؟
سلمى : اه . حافظاه وكتبته ف ورقه ... ف العربيه
ابو سلمى : طب فين عربيتك ؟
ساره : موقفاها قريب من ستانلى يا عمو لان سلمى كانت جريت مع الاسعاف
ابو سلمى : طيب تعالى يا ساره نجيب الرقم ونرجع تانى
مالك : خليك يا عمى انا هاخد ساره ونروح نجيب الورقه
ابو سلمى : طيب يا حبيبى .... بسرعه وخلو بالكو من نفسكو الفجر قرب ياذن
مالك : ربنا يستر .. تعالى يا ساره ...
ابو سلمى : خد معاك واحده كمان . روحى يا ديدا معاهم
فريده : حاضر يا عمو ..
................
( الساعه 8 الصبح )
( الشباب نايمين ف اوضة جنب بعض وع الكنب )
( ام احمد صاحيه هى وابو سلمى )
( البنات نايمين ف اوضة استقبال العنايه المركزالمجاوره لغرفة احمد )
ابو سلمى : الو ! ازي حضرتك يا سمير بيه
سمير : ( عميد شرطه ف ادارة مرور اسكندريه ) اهلااا ازي حضرتك يا غالي واحشنى والله
ابو سلمى : انت كمان والله معلش انى بطلبك بدرى كده
سمير : انت تؤمر يا حبيبى . وبعدين احنا بنصحى م الساعه 6 مانت عارف
ابو سلمى : ربنا يعينكو . انا بصراحه قاصدك ف خدمه
سمير : تؤمر .. اؤمرنى
ابو سلمى : حبيبى .... فيه ارقام عربيه اتسببت ف حادث امبارح ل حد من معارفى غالي عليا اوى ... وكنت عاوز اكشف عليها . تبع مين ولا بإسم مين . لان العربيه فص ملح ودابت
سمير : مافيش شرطه جاتلك ؟
ابو سلمى : جم امبارح وسالو الواد اللى كان معاه وقال انه مره واحده لقى حد دخل فيه .. وبنتى هى اللى كانت لقطت الرقم لانها كانت ماشيه وراهم لانهم اصحاب يعنى وكانو رايحين يتغدوا ... ف لما جت الشرطه امبارح بنتى ماكنتش مجمعه ولا كانت مركزه ولا اتكلمت من اساسه ..انا لما جيت قولت اتصل بحضرتك الاول
سمير : ابعتلى الرقم .. ملاكى اسكندريه هى ؟
ابو سلمى : اه .. الرقم 43556 ملاكى اسكندريه
سمير : طب ادينى دقيقتين بس هبعتهم ل حسام يكشف عليها وهكلمك تانى حاضر
ابو سلمى : حبيبى يا سمير بيه
سمير : حبيبى يا غالي
......
ابو سلمى : افطرى يا ام احمد
ام احمد : ومين يجيله نفس يا ابو سلمى
ابو سلمى : لا هتفطرى وتخلصى الاكل ده . عاوزه ابنك لما يقوم يقول اننا ماخليناش بالنا من امه ولا ايه
ام احمد : بس هو يقوم بالسلامه
ابو سلمى : هيقوم والله ... ابنك ده له معزه ف قلبي محدش يعرفها
ام احمد : انت حضرتك قابلته قبل كده
ابو سلمى : اه يبقي هو ماقالكيش ع الاتفاق اللى بينى وبينه
ام احمد : اتفاق ؟ اتفاق ايه ؟
ابو سلمى : لما هو يقوم بالسلامه يبقي يقولهولك هو
ام احمد : ربنا يقومهولى بالسلامه
ابو سلمى : ربنا يقومهولنا كلنا ... اتفضلى حضرتك بقي افطرى ... سلمى صحيت اهى . تعالى يا سوسو افطرى مع طنط
سلمى : ماليش نفس ... لسا مافيش جديد . احمد ماصحاش ؟
ابو سلمى : شويه كده والدكتور هيدخله وهيطمنا عليه
سلمى : طيب عاوزه اشوفه
ابو سلمى : لا مش هتشوفيه الا بشرط ...
سلمى : عاوزه اشوفه بجد يا بابا
ابو سلمى : لما تقعدى تفطرى مع طنط الاول
ام احمد : اقعدى يا سلمى انتى مكلتيش حاجه من امبارح ... تعالى نفطر وهندخل انا انتى سوا
سلمى : ( بتاخد منها سندويتش بتاكله وهى واقفه )
................
( بعد 20 دقيقه )
سمير : الو !
ابو سلمى : اهلا يا سمير بيه مع حضرتك
سمير : العربيه بإسم واحد اسمه لطفى السيد عامر .. وساكن ف المنشيه
ابو سلمى : طب حضرتك ثوانى .. خليك معايا ... سلمى هاتيلى ورقه وقلم ضرورى من اى حته )
سلمى : ( بتجرى على الاستقبال بتجيب ورقه وقلم وبتيجى )
ابو سلمى : معاك يا سمير بيه . ملينى العنوان الله يكرمك
سمير : اكتب عند حضرتك ... ( بيمليه العنوان بالظبط )
ابو سلمى : متشكر جدا يا حبيبى ... معلش انا عطلتك النهارده
سمير : ماتقولش كده انت عارف غلاوتك بس انت ناوى على ايه ... خليلى انا الموضوع ده وانا هشدهولك القسم ونشوف اللى وراه ... هبلغ المديريه وهما هيتصرفوا
ابو سلمى : لو احتاجت اعمل كده هكلمك والله بس انا عاوز الموضوع افهمه بس الاول وبعد كده هبلغك نعمل ايه
سمير : تمام يا غالي .. مستنيك تكلمنى
ابو سلمى : حاضر
سمير : ف امان الله
ابو سلمى : ف امان الله يا حبيبى مع السلامه
سمير : مع السلامه
....................
( الدكتور يوسف بييجى هو وهدى .. ولوكا وباقى البنات مروه واميره واسراء وايمان )
هدى : ( داخله بتعيط وبتكلم سلمى )
يوسف : ازي حضرتك يا ابو سلمى ..
ابو سلمى : اهلا ازي حضرتك يا دكتور ...
يوسف : ازي حضرتك يا مدام ... انتى مامت احمد
ام احمد : اه يا دكتور
يوسف : انا عميد الكليه .. بالنسبه لامتحانات ومستقبل ابنك ده ف رقبتى . يقوم هو بالسلامه وهستثنيه وهخليه يمتحن لوحده . اتطمنى خالص
ام احمد : يقوم هو بس يا دكتور وكل حاجه متعوضه
يوسف : ان شاء الله هيقوم وهيبقي كويس .. دعواتكو انتو بس
ام احمد : يارب
يوسف : لو سمحت يا ابو سلمى . عاوزك دقيقتين بس
ابو سلمى : اه طبعا .. اتفضل
....
يوسف : عرفت مين اللى عملها ؟
ابو سلمى : عرفت اللى نفذ ... بس لسا النهارده هتأكد مين اللى كاريه ع الواد
يوسف : تفتكر ممكن يكون معتز ؟
ابو سلمى : هو . انا متأكد . انا روحتله الشركه بتاعته النهارده . وكلمته وقولتله ان لو الموضوع ده له علاقه بيه انا مش هرحمه
يوسف : كان رد فعله ايه
ابو سلمى : كان مهزوز ومتوتر ... هو اللى عملها . انا ابن سوق وعارف وفاهم اللى بيحصل حواليا ... اتأكد بس من الواد اللى خبطه عشان اكون متطمن 100 % ان معتز السبب .. وساعتها وحياة بنتى ما هسيبه . ده طاره معايا انا دلوقتى
يوسف : انا معاك قلبا وقالبا ... مش هنسيب الواد الغلبان ده لوحده قصاد معتز المرشدى
ابو سلمى : تسلم يا حبيبى ...
........................
منه : ( صاحيه وقاعده على الكنبه وبتعيط )
فريده : ( بتصحى على عياط منه وبتقوم مخضوضه مفكره ان فيه حاجه حصلت ) فيه ايه يا منه خير فيه ايه
منه : اتطمنى يا فريده مافيش لسا .. لسا ماصحاش
فريده : خضتينى . اومال بتعيطى ليه
منه : صعبان عليا الواد ده
فريده : ومين سمعك .. امبارح كنت حاسه انه فيه حاجه وعماله اقولكو احمد متغير احمد فيه حاجه . زى ما يكون حاسسس ان فيه حاجه هتحصله .. بيقوم من تعب يدخل ف تعب تانى ... ف اقل من 4 شهور يعمل حادثتين ؟ غير الحديد اللى كان وقع عليه وكسرله دراعه ..
ساره : ( نايمه على السرير اللى قصادهم .. بس صاحيه سامعه كلامهم )
منه : عارفه يا فريده !
اوقات كتير بحس انى عاوزه اخده ف حضنى واطبطب عليه
اقوله تعالى اهرب من الدنيا دى ليا . لجنتى انا وسيبك من نار الدنيا دى
انا قادره اشيل وجعه وتعبه وكسرته
هكون قادره الملم اللى باقى منه واجبر بخاطره
بس هو رافض حد يقرب منه
رافض ان حد يمدله ايده ومصمم يكمل لوحده ويكبر لوحده
فريده : احمد كرامته غاليه عنده يا منه ... اللى زي احمد لو تخلى عن كرامته او كرامته دى اتهزت ممكن يموت او ممكن يبعد نهائي
والله العظيم والله العظيم انا اول مانتى كلمتينى امبارح قولتيلى البسي بسرعه احمد عمل حادثه وهننزل نروحله انا حسيت انى انطفيت . مش انا . حاسه انه مش انا . حاسه ان روحى اتسحبت منى
انا بحب احمد بجنووووون وافديه بعمرى زى ماهو قال لمامته عنى انى ممكن افديه بعمرى ... دى حقيقه . البنى ادم ده من اغلى الناس على قلبى وهعمل كل اللى هقدر عليه انى اكمل حياتى كلها جنبه وتحت أى صفه
منه : قومى البسي عشان نخرج . انا سامعه صوتهم من بدرى .. عشان عاوزه اشوفه النهارده ولازم ادخل
فريده : هغسل وشى وهاجى البس ونخرج . صحى ساره
منه : ساره هتلاقيها صاحيه وسامعانا من بدرى دى بت سوسه
ساره : ( بتتلفت تبص ل منه ) مالك ب ساره يابت
منه : قومى يا سوسو يلا مش قادرين نضحك ولا نتكلم . قومى يلا اغسلى وشك والبسي نخرج معاهم بره عاوزين نشوف الواد )
ساره : ايوه قايمه اهو . سلمى خرجت ؟
منه : اه سلمى بره من شويه . وشكل هدى وباقى البنات بره
ساره : يارب يكملها على خير
................
( الدكتور بيخرج مبتسم لأول مره من اوضة العنايه المركزه )
( بيجرى عليه مصطفى ومالك وسلمى .. وام احمد بتقوم وبتروح للدكتور )
(باقى الشله كلها بتتلم حواليه )
مصطفى : خير يا دكتور فيه ايه ؟ طمنا ابوس ايدك
الدكتور : الحمد لله يا جماعه .. ربنا وحده بس أعلم باللى حصل النهارده ... الحمد لله انه مدخلش ولا طوًل ف الغيبوبه ... استرد وعيه الحمد لله ... هو صاحي والمفروض انى مادخلش حد عليه خالص لمدة كم ساعه بس هو اللى أصر انه يشوفكو ... عشان خاطرى هما 10 دقايق بس مش اكتر ومن غير كلام كتير ... طبعا مش عاوزين عياط جوه ولا حد يبكى قدامه .. بالعكس حاولو تضحكوا قدامه عشان هيفرق ف نفسيته ... طبعا رجله الشمال مكسوره .. والحمد لله مافيش غيرها اتكسر ودى معجزه الحمد لله ... اتفضلوا
سلمى : ( بتبكى فرحاااااااا )
ام احمد : ( بتتشاهد وعينيها بتبكى فرح )
باقى الشله كلهم : ( بيحضنوا بعض من الفرحه )
مصطفى : روح يا شيخ ربنا يكرمك رديت فينا الروح .. تعالى يامه . بيمسك ام احمد وبيدخل هو وهى الاول .. بعدهم سلمى اللى ردت فيها الروح وباقى الشله معاهم )
( بيدخلو كلهم بيلاقوه نايم ومفتح عينه ... عينه متعلقه ب 3 اشخاص . أمه وحبيبته وصاحبه مصطفى .. ومش بيتكلم )
مصطفى : ( أول ما بيشوفه بيعيط بحرقه وبيجرى يحضنه ) عامل ايه يابا عامل ايه يا حُب
احمد : بالراحه يا مصطفى انا مفشفش
مصطفى : ( بيبوس دماغه وبيبتسم ) تسلم من كل شر .. قوم يلا عشان ورانا حكايه
ام احمد : نورت قلبي يا كل قلبي
احمد : كنت خايف اروح واسيبك يامه ... سالى وندى فين
ام احمد : ف البيت عند غاده ... ماخليتهاش تقولهم حاجه
احمد : خير ما عملتى يا حبيبتى . تعالى احضنينى يامه شممينى ريحتك
ام احمد : ( بتبكى وبتتنهنه م البكا )
سلمى : ( بتقف قدامه عينيها لامعه جداااااا من كتر الزعل والدموع واقفه خايفه تنزلها قدامه .. وبتمسك ايده وبتضغط عليها )
احمد : ( بيوشوشها وهى واقفه قدامه ) انا كويس يا سلمى ماتبكيش ,,, قولتلك ماليش نقط ضعف غير دموعك
سلمى : حاضر ... ( بتلملم دموعها بايديها وبتقف جنبه )
منه : ( عينيها بتخونها ).. سلامتك يا اغلى الناس انشالله انا ,, وانت لا
احمد : بعد الشر يا ام عيون زرقا .. انا كويس
ابو سلمى : قوم يا احمد وشد حيلك ... اجمد كده
احمد : انت جيت بنفسك يا عمى ...!
ابو سلمى : هو عندى اغلى منك أجيله ؟ قوم يلا قوم ورانا حكايه هنعملها
احمد : دى حكايتى انا
ابو سلمى : قوم ياواد الاول واصلب طولك ولينا كلام ...
يوسف : حمد الله ع السلامه يا ابو حميد ... ربنا يكتبلك الخير ف حياتك دايما يابنى
احمد : يارب يادكتور .... واقفين بعيد ليه يا جماعه .. ماتعيطوش صاحبكو عمره ما هيتكسر طول مانتو جنبه بالشكل ده .... بطل عياط يا حسن
حسن : غصب عنى يا غالى
على : يا اخى احنا اتهزينا من جوه .. انت غاوى تخضنا يا احمد ؟
احمد : الحمد لله .... تعالى قرب يا مالك .. خايف من ايه
مالك : ( بيعيط بشكل هيستيرى .... لأنه بيفتكر أبوه وهو ف نفس الموقف قبل ما يموت )
احمد : ياض تعالى ماتخافش مش هموت دلوقتى .. افتكرت ابوك صح ... كنت هروحله وكنت هشتيكله منك ومن عمايلك
مالك : ( بيتهنه من البكا بحرقه ) حمد الله ع السلامه يا غالي
مجدى : حمد الله ع السلامه يا اغلى وارجل بنى ادم شوفته ف حياتى
احمد 2 : يا اخى انا حسيت انى ضهرى اتقطم لما سمعت الخبر ... حرام عليك والله اللى عامله فينا ده
احمد : حرمت عليك عيشتك انت بتدعى عليا وانا مفشفش ياض
( كلهم بيبتسموا )
عماد : حمد الله ع السلامه يا احمد .. حمد الله ع السلامه يا غالي ( بيمسح عينه بايده )
احمد : ايه يا بنات واقفين بعيد ليه ... تعالو عاوز اشوفكو
( كلهم بلا استثناء عياط وماسكين بؤهم بايديهم )
احمد : انا سامع الدكتور من بره بيقولكو بلاش عياط وحاولو تضحكونى .... جاتكو ستين نيله تاخدكو
مالك : لا داحنا نقول حمد الله ع السلامه بجد بقي
فريده : انشالله يارب ماتشوف شر ف حياتك كلها
ساره : والله العظيم ماتخضيت كده ف حياتى
هدى : وقعت قلوبنا يا احمد كده ينفع
اسراء : ( بتعيط ) قوم يا اخويا بقي قوم هتسيبنا لمين
احمد : حاضر هقوم اهو . وسعو يا جماعه اما اقوم
( الجميع بيبتسموا ابتسامة رضا ان احمد رجعلهم بالسلامه )
ايمان : حمدالله عيا سيامتك يا غايي .. انا ف حياتى ماتخضيتش كده عيا حد ,, انت الوحيد اللى بحس بيك وبخوفك عيا وبحس انى وحيده من غييك يا قيبي
احمد : انا شكلى هدخل ف غيبوبه تانى قبل ما افهم انتى بتقولى ايه ..
.................
الي اللقاء في الحلقه القادمه

كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels

لينك الكاتب
https://www.facebook.com/profile.php?id=100010381862587

لينك بيدج/ هو و هي
https://www.facebook.com/howa.weheyaa/

لينك بيدج/ stories and novels
https://www.facebook.com/StoriesAndNovels2020