رواية مهلكتي من جزء 1 : 18

الجزء_التالت (الحلقه السابعه ) ( 7 الصبح ) ❤ ❤

................
ف الحلقه السابقه :_
اميره : عقدتنى يا اخى يخربيت ابو كده هههههههههههههه ههههههههههههههههههههه
احمد : ( بيبص حواليه بيلاقى الكورنيش كله ملموم عليهم وبيتفرجوا ومبسوطين )
احححم ! طب قومى انتى وهى من سكات احنا اتفضحنا الله يحرقكو بجاز دنا اتجرست ف اسكندريه كلها
البنات كلهم : ( ضحك هيستيرى بشكل غبى وصوت عالى )
مالك : ( بيكلمه من فوق ع الكورنيش ) ولا يا حموووووووو مش انت اللى هناك ده يااااااض
احمد : اتفضلى ياستى اهى كملت ..
................................. ( السابعه ) ❤
( ع القهوه )
مالك : ادخل قدامى ادخل !
احمد : امرك يا سراج بيه ههههههههههههه عاو زايه ياض
مصطفى : ايه يا جدعان مالكو
مالك : البيه مش المفروض كان مروح , والمفروض ان الهوانم اللى احنا كنا متفقين نخرج معاهم تعبو فجأه وكنسلو الخروجه ؟؟ قفشتهم كلهم قاعدين ع البحر قُرب ستانلى كده ومزقططين وبيغنوا وطايرين . حصل ولا لا يابنى انت وهو
احمد 2 : حصل ههههههههههههه دانت قفشتك هباب ياض ياحمو
احمد : ياعم اقعد . دى البت فريده هى اللى كانت بتموت وتقريبا كنا بنفذ وصيتها . قالت شممونى هوا البحر شويه قبل ما اموت ... نخليها تفطس يعنى
مالك : ههههههههههههه لا صايع يا ولاه , صايع يا حيلتها
احمد : هههههههههه ااااااه يا دراااااعى
مصطفى : دراعك ؟ دانت بارد ههههههههههه خرجتو روحتو فين ياض
احمد : ولا حاجه ! اهو وديتهم شويه ع البحر . خروجه كانت زفت اصلا
مالك : هههههههههههه عليا النعمه كداب ابن كدابه دانتو كنتو مزقططين .. دانتو شوفتونى وشكو قلب ألوان
احمد : طيب منا روحتهم بيوتهم وجيتلكو اهو يا حبايب قلبي هو انا اقدر استغنى عنكو
مصطفى : دانت واطي يالا وااااااطي .
احمد : ياعم اجرى بقي
.....................
( بيت احمد )
سالى : ماما !
ام احمد : ايه يا سوسو
سالى : احمد اخويا مبسوط اوى يا ماما . اول مره من زمان اشوف وشه مبسوط كده .. رجع يغنى ف اوضته تانى زى زمان
ندى : وبيغنى ف الحمام وهو بيستحمى كمان يا ماما ههههههههههه
سالى : ههههههههههههه
ام احمد : انتو لسا صغيرين ولما تكبروا شويه هتعرفوا هو بيغنى ليه
سالى : لا ياستى احنا كبار وفاهمين . عشان البنت اللى بيحبها دى صح
ام احمد : صح يا قلبي بس الحكاية مش حكايى بنت بيحبها .. لا ده شايف فيها نفسه . البنت بتحبه اوى وهو حاسس بكده وعشان كده هو متطمن ف حبه ...
سالى : عارفه يا ماما ! انا ساعات بالليل كده بروح انام جنبه بلاقى حضنه دافى مابحسش بالامان واتطمن الا وهو حاضنى كده واحنا نايمين
ام احمد : ههههههههههههه ماهو ابوك دلوقتى يا سولى ... وبعدين يلا قومى حضرى العشا هو زمانه جاى
سالى : زمانه جاى ايه الساعه 12 بالليل وشكله هيسهر بره
ام احمد : لا زمانه جاى وهييجى جعان
سالى : طيب نعمل ايه طيب
ام احمد : انا خابزه اورصتين . اعملى شويه بيض وشاى وفيه جبنه قديمه جوه بتحبوها كلكو
سالى : طيب لما ييجى بقي
ام احمد : يابت قومى على ما تخلصى هيكون جه
.......
احمد : ايه ده ايه اللى مسهركو لسا مش وراكو مدارس بكره ولا ايه
سالى : مدارس ايه انت ف البلاله خالص
احمد : بلالة ايه وحياة امك ههههههههههههه شايفه بنتك
سالى : اه بلاله عشان بكره الجمعه يا استاذ .. ولا انت مش معانا خالص
احمد : احيييييه بكره الجمعه بجد ؟ دنا كنت خلاص هقوم الصبح اروح الجامعه ...
سالى : بلاله ولا مش بلاله بقي
احمد : بلاله ونص ( بيجرى وراها ) تعالى يابت هنا هاتى بوسه وانتى عسل كده وخدودك عاوزه تتاكل
سالى : ( بتجرى منه ) ههههههههههههههه لاء مش هتعرف
احمد : يابت تعالى ... ( بيمسك ندى اخته وبيقعدها على رجله )
ندى : عاوز ايه يا عم
احمد : انتى مالك انتى .. واحد معجب
ندى : طيب
احمد : بتعملى ايه بعد اذن سيادتك يعنى
ندى : بذاكر انت مش شايف
احمد : ربنا يوفقك يا قلبي فعلا رابعه ابتدائي السنادى هتيجى صعبه .. بيقولوا بيبقى فيه حالا اغماء عندكو ف الامتحانات صح
ندى : طبعا ! رابعه ابتدائي دى اصعب سنه ف سنين الدراسه كلها
احمد : طبعااااا
ندى : رخمه كده وبايخه ودمها تقيل وتخليك تتجنن
احمد : اوماااااال ( بيعضها من خدودها )
ندى : ما بالراحه ياعمى
احمد : هههههههههههه يخربيت لماضة أمك .. على فكره انا واقع م الجوع . واااقع ونفسي مفتوحه ... خدى يا سالى
سالى : جايب ايه !
احمد : جايبلك ياستى جبنه تركى اللى بتحبيها وجايب كيسين فول وعجينة فلافل ولانشون . دخلى بس الاكياس دى ف المطبخ وانا هقوم اتعامل
سالى : هتتعامل ازاى بدراعك ده
احمد : يابنتى ماتقلقيش اخوك شيف قد الدنيا
سالى : ياعم اجرى هو انت بتعرف تقلى بيضتين اصلا
احمد : هههههههههههههه طيب ,, حطيهم بس ومالكيش دعوه
........................
ساره : منورين يا بنات
منه : احلى حاجه عملناها النهارده اننا نيجى نسهر مع بعض كلنا عند سلمى
سلمى : منورينى يا حبايبى
فريده : هههههههههههههه اما حتة سهرة . الواد ده دماغه بنت جنيه بس عسل
سلمى : سبحان الله !
منه : ايه يا سلمى بتسبحى على ايه
سلمى : يعنى ! احنا بالذات ماقابلناش النوع ده خالص قبل كده
فريده : وحياتك ولا هنقابله تانى . ده بيبقى نازل منه قطعه واحده والمصنع بيقفل على كده هههههههههههههه بس احكيلكو حاجه حسيت بيها النهارده
سلمى : حاجة ايه
فريده : النهارده واحمد بيحكى عن باباه انا جسمى كله اتنفض ... حسيت ان فيه بركان ثاير جوه صدره هو قادر ومتحكم فيه ومش مبينه لينا ولا لحد
كنت هقوم اطبطب عليه واحضنه وكتاب الله .. شوفتو الدمعه اللى كانت واقفه محشوره جوه عنيه ومش عاوزه تنزل طول ماهو بيحكى ... يخربيت كده وابو كده ........... بس موضوع انه طلع الشيف بتاع النهارده كانت مفاجأه حلوه بالنسبالى بمعنى الكلمه لانى ماكنتش قادره اساعده ازاى بعد موضوع دراعه ده واحنا كلنا عارفين ظروفه .. بس لما عرفت انه بيشتغل ف مطعم بالجمال ده فرحت من قلبى والله ....
منه : احمد مايتخافش عليه يا ديدا ... عارفين احنا كلنا وانا أولكو متعلقين بيه ليه
ساره : ليه
منه : لاننا متحاميين فيه . دايما وراه مش قدامه ! فكرة انك تبقى ملزومه من حد دى عمرها ماحسيناها . لا دايما كانت السلطه والنفوذ هى اللى بتحكم .. لكن لا ده هو صاحب الكلمه واحنا نستنى ههههههههههههه انا بصراحه بحب كده . عاوزه احس انى بنت انا .. بنوته رقيقه تتدلع وبس ورا اخوها او جوزها او صاحبها او حبيبها . اكل ومرعى وقلة صنعه . اهو انا كده مع احمد ههههههههههههههه النهارده كنت مهيبره اوى واول مره اطلع من سقف العربيه واول مره اجرى اسابق اميره ع الكورنيش
واول مره نتصور انا وساره بالشكل ده وقدام كل الناس .. اول مره انطلق كده وانا مش خايفه
ساره : يالهوووووووووى لما كنا رايحين انا وهو وسلمى السينما
سلمى : احححححم احححححححم
فريده : ايه يا عنيا ! بتقولى ايه ؟ سينما ايه وامتى ده
منه : لا دنا شكلى هتغابي دلوقتى علي امك انتى وهى ..
اميره : هههههههههههههههه اخصصصصصص . اخص ع الصحوبيه
سلمى : لا دى ساره دى مجنونه هو معقوله يعنى هنخرج من غيركو يا قلبي انتى وهى
منه : قلبك انتى وهى . ( بتكتف سلمى وبتنيمها ع السرير )
فريده : ( بتكتف ساره وبتنيمها ع السرير بردو )
فريده : انطقى يا جزمه انتى وهى روحتو امتى وحصل ايه
ساره : اااااااااااااه سيبى شعرى يا بنت الجزمه ...
فريده : وحياة امى لو مانطقتى لنا قاصاهولك يا ساره ..
ساره : روحنا لما خرج من المستشفى .. لقيناه بيتصل على سلمى وبيقول انا زهقان عاوز اخرج ودراعى شادد عليا
منه : لا هو مابيتصلش على حد . انتو اللى شكلكو اتصلتو عليه يا شوية رمم هههههههههههه
سلمى : ( ( بتزق منه وبتيجى فوقها هى ) فرضا يعنى اننا خرجنا معاه ده يزعل معاليك ف ايه
منه : ( بتزق سلمى وبتيجى فوقها هى ) لا يا حلوه مافيناش من لعب بالديل لاحسن ويمين الله هتلاقونى لازقاله كل يوم بخرج معاه ومش هخليه يعبركو يا كلاب
سلمى : ( بتزق منه ع السرير وبتيجى فوقها ) ابقى ورينى يا منه ... ابقى ورينى هتعمليها ازاى ... وانا هعلم عليك وعليه وعليكو كلكو )
اميره : هههههههههههههههه شلة المجانين
فريده : بس يابت الجزمه انتى كمان مانتى كنتى بتحلمى بفستان الفرح يا عبيطه يابنت العبيطه .. صح ولا لا .؟
اميره : انا عارفه اصلا انكو شويه بنات مهزأه وهتمسكوهالى ... انا غلطانه
ساره : هههههههههههههه طب انا جوعت والله يابنات عندكو اكل ايه يا سلمى
سلمى : تعالو ندعبس ف المطبخ بقي كل اللى ف البيت نامو
....................
( يوم السبت جوه الجامعه الساعه 7 الصبح )
( احمد قاعد على الارض بيشرب شاى )
اسراء : ايه اللى جايبك بدرى ياض
احمد : ازيك يا سوسو ! تعالى اقعدى
اسراء : ايه ياحمد اللى جايبك بدرى
احمد : مافيش . منا بصحى بدرى مانتى عارفه . تشربي شاى
اسراء : لا شويه كده البت ايمان جايه وامانى رايحين نشترى شويه حاجات كده
احمد : حاجات ايه
اسراء : حاجات لاخت ايمان عشان هتتجوز كمان اسبوعين خلاص
احمد : ااااه بسمه ..
اسراء : ايووووون بسمه .. بسمه اللى كانت بتبعتلك جوابات مع ايمان ههههههههههههههه عليا النعمه حوت كبير ياض طول عمرك
احمد : ههههههههههههه يلا يا رمه وبعدين انا مالى انا . كنا احنا ف تالته اعدادى وبسمه ف اولى ثانوى .. دنا كلت سندويتشات على حسها يانهار اسود هههههههههههههه
اسراء : اه منا عارفه منا كان بينوبنى من الحب جانب . مانت ياما طفحتنى معاك
احمد : هههههههههههههه ايه رأيك . على الله يطمر
اسراء : طول عمرك يا حمو نعم الصحاب ونعم الاخوات ... يابنى انت اكبر نعمه ربنا أنعم عليا بيها ف حياتى .. ولو هستكفى بيك صاحب وأخ يبقى مش عاوزه حاجه تاني خلاص
احمد : حبيبتى يا سوسو وانتى والله وربنا يعلم
اسراء : اخبار سلمى ايه
احمد : اشمعنى بتسالى عن سلمى يعنى
اسراء : ولاااه ! اتظبط دنا أمك هههههههههههه واللى مربياك
احمد : بردو ايه اللى خلاكى تسالى عن سلمى بس
اسراء : ههههههههههههه مافيش ! بس اهو قولت يمكن تكون عارف حاجه ولا حاجه ... اه يا احمد نسيت اقولك حاجه حصلت امبارح
احمد : هتلاقيه موضوع اهبل زيك كده هههههههههه
اسراء : هههههههههههههه لا والله ده بجد
احمد : خير !
اسراء : امبارح فيه واحد جه وسال على سلمى وكان شكله غنى اوى ونضارات وحركات وشايف نفسه زياده عن اللزوم .. وصوته ناعم كده عارف انت العيال دى
احمد : عارف اخلصى .. وبعدين
اسراء : بس ! صباح الخير يا بنات . لان كانت معانا منه ف هو ممكن يكون عارفها . ف دخل قال صباح الخير وازيك يا منه اومال فين سلمى
احمد : ايوه .. وبعدين هى قالتله ايه وعمل ايه
اسراء : ولا حاجه .. قالتله لسا ماجيتش ومشي ... بس شاف سلمى عند الكافتيريا البت ارتبكت ووشها احمر واصفر وخدته ومشيوا .. كان باين انها واخداه وبتوزعه مش عاوزه حد يشوفه
احمد : ( بيسرح )
اسراء : ايه يابنى روحت فين
احمد : اسراء ! الكلام ده بجد ؟ يعنى متأكده ؟
اسراء : عيب ياعم هو انا هقول حاجه كده ولا كده . بس انا حبيت تعرف معرفش ليه
احمد : لا كويس اوى انك عرفتينى . متشكر يا مزه
اسراء : طب هقوم انا بقي عشان ايمان بترن عليا مستنيينى بره
احمد : ماشى خلو بالكو من نفسكو
اسراء : ماتقلقش يا حبيب اختك
................
( الساعه 9 )
فريده : العيال هناك اهم تعالو
سلمى : صباح الخير يا جماعه ...
مالك : صباحكو فل يا قمرات اسكندريه
مصطفى : صباح الخيرات على اجمل عسليات ف البلد كلها
منه : ماتبطلو بكش بقي يالا انت وهو مش لايقه عليكو .. اومال فين الفنان
مالك : ههههههههههههه مش عارفين . جينا مالقيناهوش وبنرن على تليفونه مقفول . زمانه جاى
مصطفى : هتلاقوه بيجب فطار ولا شاى ولا حاجه احنا لسا داخلين قبليكو ب 5 دقايق
سلمى : ان شاء الله خير
فريده : اما كانت خروجه امبارح
سلمى : احححم
مالك : بتكحى ليه يا سلمى سيبيها تحكى سيبيها تحكى
فريده : مانت قفشتنا قفشه سوده انت والواد احمد التانى هههههههههههه يانهار الوان
مصطفى : ههههههههههههه كان منظركو زباله .. احمد جه اهو
سلمى : ( بتبص وراها بسرعه ) ده احمد التانى ياعم هو وعماد
احمد 2 : صباح الجمال على عيونكو
سلمى : اهلا صباح الفل يا ابو حميد ازيك ؟ ازيك يا عماد
عماد : ازيك انتى يا ست البنات . ازيك يا فريده ازيك يا منه . فين بقيتكو
فريده : ساره مشيت مع اميره راحو يجيبو مروه وجايين . موجودين يعنى ماتقلقش
سلمى : ماترنو على حمو يا جماعه تانى كده مش باين ليه ده كده حاجه تقلق
مالك : برن عليه من بدرى والله اول ماجينا وتليفونه مقفول . الظاهر لسا ماجاش من اساسه
اسراء : يا صباااااااااح الحلويات على احلى شله ف الدنيا كلها
سلمى : يا صباح الفل يا سوسو . اخبارك ياقلبي وحشانى
منه : سرسور وحشانى والله .. ازيك يا ايمان
ايمان : هههههههههههه مش مستييحالك يا منه
منه : هههههههههههه ماتكلمتش ولا حاجه
اسراء : ايه فطرتو ولا لسا
منه : لا لسا لما نكمل بقي . الواد احمد لسا ماجاش
اسراء : احمد مين !
منه : احمد بتاعنا .. حمو !
اسراء : حمو ايه .. حمو هنا م الساعه 7 الصبح اساسا
............................
الي اللقاء في الحلقه القادمه

كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels

لينك الكاتب
https://www.facebook.com/profile.php?id=100010381862587

لينك بيدج/ هو و هي
https://www.facebook.com/howa.weheyaa/

لينك بيدج/ stories and novels
https://www.facebook.com/StoriesAndNovels2020