رواية مهلكتي من جزء 1 : 18

الجزء_الثامن (الحلقه الثالثه ) ( ع الهادى يا زبادى ) ❤ ❤

................
ف الحلقة السابقه :_
سلمى : احمممد
احمد : نعم
سلمى : نويت على ايه ...؟ انت بجد هتخرج النهارده زى ما مصطفى قالى ؟
احمد : اه
سلمى : طب ناوى على ايه ؟
احمد : كل خير يا سلمى . بس هاخد حقى
................. ( الثالثه ) ❤
سلمى : يوووووه انت قاصد توترنى ! فيه ايه يا احمد ماتقولى اللى ف دماغك انا مش هسمحلك انك تعمل اللى بتفكر فيه بقالك اسبوعين
احمد : محدش يعرف انا بفكر ف ايه بقالى اسبوعين
سلمى : طب قولى انا عشان خاطرى . يا أخى خلينى ف ضهرك على الاقل
احمد : يا سلمى انا اللى ف ضهرك العمر كله بس خلينى اصلب طولى .. انا حاسس انى عجزت الفتره اللى فاتت وانا قاعد مش قادر اتحرك ولا اشوف اهلى وناسي ... ما صدقت انى عرفت امشي على رجلى امبارح وتمام الحمد لله . وبكره ولا بعده هعدى على المستشفى عشان افك الجبس
سلمى : تعرف ان الحادثه دى على قد ما شقت قلبى نصين من خضتى عليك على قد منا عرفت وفهمت حاجه وبسطتنى جدا
احمد : حاجة ايه
سلمى : ان اللى يراهن عليك عمره ما يخسر ... وبعدين حاجبك اتشحور كده ومخربش وشكله بقا حلو . يا خلاثي ههههههههه ايه ده ورينى كده الاجنده دى
احمد : مالكيش دعوه بالاجنده دى
سلمى : اممممممم ليه بقا ان شاء الله كاتب فيها ايه
احمد : اهو كاتب اللى كاتبه مالكيش فيه
سلمى : يا بابا هشوفها بس اشوف خطك حلو ولا نص نص
احمد : خطى حلو .. ماتشوفيش حاجه
سلمى : طب على الاقل هقرا اول صفحه . المقدمه بس وحياتى وحياتى
احمد : المقدمه بس ؟
سلمى : والله المقدمه بس
احمد : اتفضلي
سلمى : ( بتبدا تقرا بصوت عالي )
" إنه ف يوم السبت الموافق الحادى العشر من نوفمبر عام 2006
قررت أنا / أحمد أكتب وأسرد روايه قد تكون خياليه للبعض
قد تكون مُلهمه للبعض الآخر
قد لا تتشابه احداثها في كثير من حياة البعض
لكنها حق ..
أكتب كل يوما ما يُقارب ال 5 صفحات وهى عباره عن مذكرات
احداث يوميه حدثت
عسى ان ياتى يوما وتكون نقطه مضيئه في عالمى

" مش مجرد روايه هتقراها وتمشى ... أكتر من كده "
احمد : كفايه كده .. هاتى الاجنده
سلمى : والنبى والنبى اول صفحه والنبى والنبى . عشان خاطرى
احمد : سلمى ! هاتى الاجنده بقولك .... لو فتحتيها هزعل منك
سلمى : يوووه ! انت رخم بقولك عشان خاطرى
احمد : ماهى مكتوبه عشان خاطرك
سلمى : اححححم ! طب اقرالى انت بصوتك اول صفحه
احمد : لا ومش عاوز شغل مرقعه ... وقومى شوفى ماما بتعمل ايه زمانها خلصت الاكل اصلا .. قومى يابت
سلمى : طب انت مش هتحط عنوان للروايه دى
احمد : محطوط من زمان .. بس مش هكتبه غير ف اخر الروايه ..
سلمى : لييييه ؟
احمد : لسا النهايه مفتوحه يا سلمى .. ومين عارف اخرها هتبقي ايه
سلمى : ( بتتكسف ) اكيد البطل هيتجوز البطله وهيعيشوا سوا وهيتهنوا ببعض .. لانهم تعبوا سوا
احمد : ياريت ! هو انا اكره
سلمى : مانت اللى بتكتب . خلى النهايه سعيده . مابحبش القفلات الغبيه
احمد : انا اللى بكتب ! لكن مش انا اللى بسير الاقدار .. انا بكتب اللى حصل مش اكتر
سلمى : انا اقدر اكتبلك النهايه من دلوقتى
احمد : بجد ؟
سلمى : تحب اكتبلك اخر حلقه ف الحدوته
احمد : دى روايه مش حدوته
سلمى : ما علينا .. تحب اكتبلك اخر حلقه ؟
احمد : لا !! اكتبيلى اخر جمله انتى شايفاها منطقيه
سلمى : طب ناولنى القلم اللى جنبك ده
احمد : اتفضلى ... افتحى اخر صفحه ف الاجنده .. واكتبي الجمله ف اخر سطططططططر خالص
سلمى : حاضر ! ممكن تخبى وشك بقي عاوزه اكتب مع نفسي
احمد : بس من غير خم وتفتحى تبصى ع الكلام المكتوب .. بجد هزعل منك
سلمى : لا حاضر والله مش هفتح ... بص الناحيه التانيه بقي هكتب
احمد : اهو
سلمى : ( بتكتب ف اخر سطر ف اخر صفحه جمله )
احمد : ورينى كتبتى ايه ؟
سلمى : اممم اهو ... اقرأ بصوت عالى
احمد : خطك وحش على فكره
سلمى : فشر هههههههههههههه دنا خطى محدش يعرف يكتب زيه
احمد : بجد ماشاء الله .. استنى بقي هشوف انتى كاتبه ايه
سلمى : بصوت عالى
احمد : ( بيقرا بصوت عالى )
" اصبحت متيقنه بان للحياه نبض كلما غفوت برأسي على صدره متكئةً علي قلبه يقوم بعدها بمداعبة خصلات شعرى المنثور ,, كم هو جميل الحُب حينما ياتيك الهلاك متجسدا في هيئة إنسان يُشبه روحك إلى حد مُخييييف , أنا الآن أنعم بكل ماهو جميل في هذه الحياه لا أُريد اكثر من هذا "
ايه الكلام الحلو ده يا سلمى
سلمى : عجبتك النهايه بتاعتى ؟
احمد : هههههههههههههه كلام جميييييل جدا ... يارب تبقي النهايه فعلا هى النهايه دى وماتتغيرش
سلمى : مش هتتغير ! ولو اتغيرت هقتلك
احمد : مش جاى ناحيتها .. قومى بقي انا جوعت شوفى ماما بتعمل ايه
سلمى : طب بقولك ايه . بما اننا لوحدنا كده ماتخلينى اخطف بوسه
احمد : قومى يا رخيصه
سلمى : ههههههههههههههههههههه يابنى والله انت ما مقدر النعمه اللى ف ايدك دنا نص شباب اسكندريه بيجروا ورايا
احمد : اه تلاقيكى مسجله خطر على راي اللمبى .. قومى يا وليه .. وبلاش الكلام ده لافتح نافوخك والله
سلمى : يابااااى هو الواحد مايفكش معاك بكلمه كده ياساتر
.................
( بالليل على القهوه كل الشباب متجمعين )
( احمد ومصطفى داخلين عليهم . احمد ماشي على عكاز ومصطفى مسنده )
مالك : اهوووو اهووو وصل وصل بالسلامه
كريم : حمد الله ع السلامه يا كبيييييييير الف سلامه
احمد : حبيبى يا كيمو .. الحجر بتاعى والنبى انا بقالى شهر ما دوقتهاش
حسن : تعالى تعالى .. هما عملو فيك ايه يا بوحه
احمد : لا بقولكو ايه ... *** الحفله هتبقي عليا . عليا النعمه اربطكو واعلقكو هنا
مالك : ياعم اقعد بقا انت ولا تقدر تعمل حاجه دانت عاوز اللى يعملك ...
احمد : مش انا اللى يتقالى كده يا مالك .. هعلقك صدقنى
مالك : قدها وقدود يا كبير ... بقولك ايه . عندكو مكان ف الشقه لضيفتين كده هييجو يقعدو معاكو يومين
احمد : ضيفتين مين
مالك : امى واختى ملك ههههههههههههههههه جايه تسلم عليك وتقولك حمد الله ع السلامه
احمد : يا حبيبى داحنا نشيلها على دماغنا . طب وانا . انا هتنيل فين
مجدى : هههههههههههههههه هتيجى تقعد معانا انا ومالك .. وبما اننا ف اجازه ف هتبقي السهره صباحى للصبح والشباب كلهم معانا اهو
مصطفى : اه والنبى هتبقي احلى اجازه ...
احمد : ( بيفكر لثثوانى )
مصطفى : ايه سرحت ف ايه دلوقتى
احمد : امك هتيجى امتى ياض
مالك : بكره
احمد : حلو اوى ... عشان انا عاوز اخلع م البيت اليومين دول .. عاوز ابقي بره ومش عاوز امى تشوفنى
مصطفى : نويت ؟
احمد : نويت على ايه ؟
على : ولاه ! ماتصيعش ع اللى خلفونا ... نويت ؟
احمد : ايوه انوى على ايه مش فاهم ؟
احمد 2 : ولا ولا بقولك ايه . احنا ف الحكايه معاك ...عليا النعمه هتبقي بزعله . واتجدعن كده ونلاقيك واخد وائل معاك وسايبنا
احمد : وحياتك ولا وائل ولا غير وائل ... وفككو من الحوار ده دلوقتى
مصطفى : احلى حاجه عملها ابو سلمى ان خلا الواد وابوه دول مايعرفوش يسافروا ... الواد مختفى نهائي .. ابوه بيروح شغله كل يوم طبيعى جدااااا
احمد : اه منا عرفت
مالك : عرفت منين يا حيلتها وانت مخرجتش م البيت بقالك اسبوعين
احمد : وانت مالك .. وبعدين طارق ده محدش هيعرف اراضيه غيرى هههههههههههههههه ما قولنا فككو من الحوار ده
مصطفى : احمممد . انا بشهد الناس كلها اللى قاعده دلوقتى عليك .. لو عملت حاجه من غير ما نكون معاك فيها هتبقي زعله كبيره ومش هكلمك تانى
احمد : قدرت تنطقها يا بغل ؟ اسفوخس عليك
حسن : ههههههههههههههههه عشان دى مش حكايتك لوحدك . لينا فيها
احمد : ومين قال انكو مش فيها . انتو فيها ونص ... هات يا كريم الحجر يا كريم ...فيه حد اغلبه عشرتين طاوله ؟
مالك : خش عليا
مصطفى : صحيح الدكتور يوسف قالك هتمتحن امتى ولا لسا
احمد : اه اخر الشهر ده .. امتحان استثائي غير اللى انتو امتحنتوه . ماعدا اول امتحان اللى انا امتحنته معاكو
مصطفى : يا مسهل عشان نبدا حكايتنا
احمد : لا دى هتكون خلصت هههههههههههههههههه ماتقرصش ف الزهر يا ابن الجزمه هو مصطفى علمك النصب ... ايه القرف ده .. ده تانى دوش يجيلك
................
صالح : الو ! ايوه يا معتز بيه
معتز : ايوه يا صالح فيه جديد ؟
صالح : اه يا فندم . الواد خرج النهارده وقاعد مع اصحابه .. بس مافيش ف دماغه حاجه تقريبا . بيضحك وبيشيش معاهم وبيهزروا كلهم
معتز : طب تمام . خلي عينك عليه بكره كمان .. ولو حسيت بحاجه غريبه بلغنى .. لو حسيت انه خلاص مافيش ف دماغه حاجه سيبك منه بقي
صالح : تمام يا ريس
...........
سيف : اهلا . ازيكو يا شباب
احمد : ايه يا ابو السيوف فينك يابا
سيف : لسا طاقش مع ابويا . نزلت قولت افك جو شويه
احمد : اه تلاقيه طرقعلك
سيف : والله ابدا . فيه واحد لوا مكلمه وقاله ان ابنك بيتدلع ف الكليه ومش بتاع شرطه ده
احمد : واحد لوا ؟ يابنى اسمه سيادة اللواء جاتك نيله
مصطفى : صحيح هترجع المطعم امتى
احمد : اما اكمل شهر ... غاده كلمتنى وبلغنى اكمل شهر اجازه وارجع .
مالك : ايوه يابا مين قدك . عليا النعمه غاده دى فورتيكه . بطل ههههههههههههه
احمد : نقى ملافظك يا حمار انت عيب .. بس تصدق صح بطل ههههههه هى حلوه الحقيقه والاحلى فيها ان روحها حلوه . دى حتى هتجيب البنات وهييجو بكره .. ايه ؟ نهار اسود احيييييه دى لو سلمى عرفت هتجبسلى رجلى التانيه ..
مالك : ههههههههههه مبلووووول . عليا النعمه انت بتتبل لما بتيجى سيرة سلمى
احمد : هششش اخرس انت .. مابخافش يا حبيبى . يا حبيبى مش انا يا حبيبى
مصطفى : بس على فكره سلمى مابتضايقش غير من سيرة اللى اسمها هايدى دى
مالك : البت الحلوه دى كابتن الصاله ؟ اوووووووف البت دى عيون امها حاجه تهبل وعينيها منك يابن المحظوظه
احمد : يارب ارحمنى هو انت قرطاس يالا قاعد للساقطه واللاقطه جاتك نيله تاخدك فيه ايه انت حايح كده ليه ماتنشف
مالك : هههههههههههههههههههه بص ! انا واحد بيقدر الجمال ياعم انت زعلان ليه . وبعدين مانت كفايه عليك سلمى دى برقبة اى بنت تانيه ف البلد كلها ..
احمد : وانا مالى انا ادخل اشقط ياخويا اللى انت عاوزه بس خليك تقيل كده ايه الناس دى
على : لا بس البت هايدى دى ملبن . عليا لنعمه ملبن
احمد : انتو مالكو يا جماعه ؟ فيه ايه انا اغيب عنكو اسبوعين ارجع الاقيكو كلكو بقيتو حمدى الوزير كده ؟ فيه ايه جاتكو ستين نيله تاخدكو . حتى الزبله اللى اسمه على انحرف اهو
احمد : وانت يا استاذ حسن . رأيك ايه ف الحوار
حسن : مانت عارفنى انا ماليش ف جو المحن والارتباط ده .. انا مركز مع البت رانيا زميلتك ف المطعم هههههههههههههه فورتيكه بردو تصدق . بص هما كلهم فراتيك
احمد : انت عملت ايه ف الناس دى يا عم كريم . العيال دى مالها ؟
كريم : هههههههههههه مزعلينك ف ايه بس يا كبير
احمد : العيال انحرفت خالص
مالك : اجازه بقا وكل سنه وانت طيب . وربنا يخليك لينا
احمد : اخرسوا بقي . ستكو بترن
مالك : طب احححم . رد
احمد : هههههههههه عليا النعمه اللى هيعمل نمره عليا لنا معلقه .. هششش اخرسوا
الو !!
سلمى : احمد انت فين وبتعمل ايه
احمد : ماتاخدى بطاقتى بالمره فيه ايه . ايه الدخله دى . مالكو ؟ مش انا يا كلاب اللى تعاملونى المعامله السوده دى
سلمى : هههههههههههههه معلش نسيت .. مساء الخير يا استاذ
احمد : اهلا ياختى مساء النور
سلمى : انت فين وبتعمل ايه ومع مين بقا بسرعه ..
احمد : لا اله الا الله .. قاعد مع العيال ع القهوه
سلمى : هتروح امتى
احمد : يعنى شويه كده . احنا ف اجازه يا سلمى
سلمى : احنا ف اجازه . انت لا .. قوم روح ذاكر
احمد : نعم يامه ؟ اذااكر ايه دنا اروح فيكو ف داهيه . لا انا خدت الاجازه معاكو
سلمى : طب ينفع اطلب منك طلب
احمد : خير . طلب ايه
سلمى : هتكسفنى ؟
احمد : يابت قولى طلب ايه
سلمى : خلص سهرتك وقعدتك مع اصحابك وتعالى . عاوزه اقعد معاك شويه ع البحر ف المكان بتاعنا .. هعمل سندويتشات جبنه تركى ونسكافيه وناكلهم سوا
احمد : خلاص ماشي ... وانا جاي هرنلك
سلمى : والله حبيبى ياناس . يا خلاااثي ع الواد العسل ده
احمد : اقفلى يا سلمى عشان فيه شويه عاهات بيبصولى ومتنحين
سيف : هههههههههههههه هموووووت
سلمى : اه صح احنا زودناها وهما عيال رخمه اصلا ربنا معاك ههههههههههههه
احمد : سلام ياختى
ايه يا كلب انت وهو بتبصولى كده ليه
على : ( بينزل على فخاد احمد بيعضها ) ربنا يجعلنا من بركاتك ياحاج ... دانت شليت اللى خلفونا . وشك بينور وانت بتكلمها ههههههههههههههههه
حسن : هههههههههههههههههههه
احمد 2 : انا بتعلم اقسم بالله من الاتنين دول ... بتعلم بجد
مالك : كازانوفا القرن الواحد والعشرين . مش نوفا واحده . لا دانت كذا نوفا
احمد : ايه خلصتو ؟
مصطفى : هههههههههههههه اه خلصنا
احمد : ( واخد باله ان فيه حد متابع الحوار من بعيد ومراقبهم .. وعامل مش واخد باله وساكت .... وبيحاول يوصل رسايل للى بيراقبه بشكل غير مباشر )
الواحد يمتحن من هنا ويروح يلف شويه ف كذا حته .. نروح القاهره عند مالك . ويومين ف المنصوره عند الواد الاهبل ده
احمد 2 : ياريت والله . بلدنا حلوه وهاديه .. تبقي نايم والناموسه ااااد كده تدخل تاكل ف لحمك وعضمك ههههههههه بس اليومين دول يومين برد مافيش ناموس
حسن : طب وبالنسبه يعنى انت بتقول هتسافر وتروح هنا وهنا . انت كبرت دماغك ولا ايه م الموضوع اياه
احمد : يا حسن يا حبيبى احنا نمتحن ونشوف حياتنا . كبر مخك ربنا يسهل لعبيده
مصطفى : ( بيبص ل احمد وعارف انه بيحور عليهم او بيتوه ف الكلام ) والنبى يا كريم غيرلى الحجر ده انا كمان
كريم : عيونى يا هندسه
.........
احمد : بقولكو ايه . انا رايح افك الجبس
مالك : ماتستنى ياعم يومين تلاته كمان .. انت لسا بتزك عليه
احمد : لا مالوش لازمه عاوز اتحرك بحريتى اليومين دول .. وانت يالا . امك هتيجى امتى بكره
مالك : العربيه هتطلع من هناك الضهر كده . هييجو مع خالى عشان هو اصلا كده كده جاى ع اسكندريه يومين وماشي . هييجو معاه ويرجعوا معاه
احمد : طيب ييجو بالف سلامه يارب ... يلا انا رايح عندى مشوار كده
على : روح ياخويا روح ماحنا كلنا عارفين انت رايح فين . يا كذانوفا على راي الواد مالك . سلملى عليها
احمد : ماتعرفكش اساسا
مصطفى : هتفك الجبس ؟
احمد : اه خليك انا هعدى على الواد هانى ف الصيدليه يفكهولى .. يلا سلام
........
احمد : الو ! انتى يا ابله . نمتى
سلمى : نمت ايه . انت اتأخرت ليه انت
احمد : طيب هاتى نسكافيه وتعالى
سلمى : انت تحت ؟ . دقيقتين وهكون عندك
احمد : يلا
( بيرمى عينه الناحيه التانيه بيلاقى عربيه واقفه الناحيه التانيه من الطريق وواحد بيبص ناحية احمد ومتابعه من ساعة ما مشي )
( بيكلم نفسه : ع الهادى يا زبادى عشان اللى جاى أحلى وأحلى )
......
( بعد 10 دقايق سلمى بتنزل ومعاها سندويتشات ونسكافيه )
سلمى : انت يا كابتن
احمد : تعالى يا روح الكابتن اقعدى . مش بردانه كده ؟
سلمى : لا ... ايه ده فكيت الجبس .. كنت استنى شويه يا احمد
.......................
الي اللقاء في الحلقه القادمه

كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels

لينك الكاتب
https://www.facebook.com/profile.php?id=100010381862587

لينك بيدج/ هو و هي
https://www.facebook.com/howa.weheyaa/

لينك بيدج/ stories and novels
https://www.facebook.com/StoriesAndNovels2020