رواية مهلكتي من جزء 1 : 18

الجزء_التالت (الحلقه الثامنه ) ( ف نفس المكان ) ❤ ❤

................
ف الحلقه السابقه :_
ايمان : هههههههههههه مش مستييحالك يا منه
منه : هههههههههههه ماتكلمتش ولا حاجه
اسراء : ايه فطرتو ولا لسا
منه : لا لسا لما نكمل بقي . الواد احمد لسا ماجاش
اسراء : احمد مين !
منه : احمد بتاعنا .. حمو !
اسراء : حمو ايه .. حمو هنا م الساعه 7 الصبح اساسا
................. ( الثامنه ) ❤
سلمى : اومال هو فين ؟ بنرن عليه تليفونه مقفول ومش ظاهر يعنى
اسراء : عادى تلاقوه هنا ولا هنا وتليفونه فاصل شحن
منه : طيب نفطر احنا ولا ايه
سلمى : اوكى . هاتو فطار واعملو حسابي انا شويه وجايه
فريده : رايحه فين ؟
سلمى : مافيش . شويه وجايه بس هتصل على بابا
.........
( سلمى ماشيه بتدور عليه ف كل مكان )
...........
( بعد الضهر )
مالك : قاعد كده ليه يابنى ؟
مصطفى : مافيش كنت بشرب شاى . المحاضره خلصت ؟
مالك : محاضرة ايه هو احنا بنحضر عشان المحاضره هههههههههه محدش كان مركز اصلا . البنات متنحين ومسهمين واحنا كنا بنلعب كوتشينه ههههههه .. الواد احمد لسا مظهرش ؟
مصطفى : لسا . منا مستنيه . قلقان مش عارف ليه
مالك : يا اخى انا ساعات بغير من صحوبيتك انت واحمد . مافيش كده ف الدنيا . لو حد غاب عن التانى ساعه التانى بيتجنن
مصطفى : ده مش صاحب يا مالك .. ولا أخ .. ده أب .. الوحيد اللى عوضنى عن شعور كتير اتحرمت منها ... وحياة امى منا عارف انا ليه قلبي واكلنى عليه . اللى قلقنى ف الموضوع كلام اسراء لما قالت ده كان هنا من بدرى
مالك : اه والله انا بردو قلقت ... طب يا حب ماهو ممكن يكون مشى لحاجه ضرورى يعنى .. امه كويسه طيب ؟
مصطفى : منا خايف اتصل بيهم ف البيت اقلقهم اكتر وهما من اقل كلمه بيقلقوا على احمد
مالك : طب وبعدين ! هنفضل مستنيين كده يعنى . ماهو كمان قافل تليفونه يعنى قمة القلق اللى ف الدنيا
مصطفى : ربنا يستر
.................
منه : وبعدين يا جماعه ف اليوم الممل ده .. الواد مش ناوى يظهر بقي ابو شكله عودنا عليه بشكل غبى
فريده : معاكى حق .. بقولكو ايه انا هقوم اروح مش داخله اخر محاضره دى . الجو ممل .. هتروحى يا سلمى
سلمى : هه !
منه : سلمى مش معانا خاااالص .. انا بردو عاوزه امشى بس قلقانه على احمد والله مش عارفه ليه .... انتو خدتو بالكو من كلام اسراء
فريده : ماهو ده اللى مجننى . لما هو كان هنا من بدرى ايه اللى مشاه ولا راح فين
سلمى : انا ماشيه يا بنات بقي خلو بالكو من نفسكو .. مروحه يا ساره
ساره : اه
سلمى : طيب تعالى ف سكتى هوصلك .. سلام يا بنات
منه : سلام يا لوم
.......
ساره : هتروحى يا سلمى ؟
سلمى : اروح ايه بس انا مش على اعصابي يا ساره والله احمد انا حاسه انه فيه حاجه مش عارفه ليه .. استنى ! مش دى اسراء اللى هناك دى
ساره : اه هى .
سلمى : طب تعالى !
سوسو ! اسرااااااء
اسراء : اهلا ! ازيكو يا بنانيت عاملين ايه . ثوانى وجايالكو
......
اسراء : ايه يا قمرات مروحين ولا ايه
سلمى : اه بفكر اروح بقي اليوم ممل من غير صاحبكو
اسراء : احم احم قصدك مين ها . حمو ؟
سلمى : هو فيه غيره ههههههههه انتى مش شوفتيه الصبح يابنتى اومال راح فين
اسراء : مش عارفه والله يا سلمى انا كنت داخله بالصدفه اصلا عشان كنا رايحين مشوار انا وايمان وكنت داخله اشربلى كوباية شاي ومستنياها .. اتكلمت معاه كلمتين وبعدين مشيت وسيبته
سلمى : طيب ايه ! كان مبسوط زعلان فيه حاجه ولا عادى
اسراء : لا كان عادى الصراحه زى كل يوم
سلمى : طيب يا حبيبتى خلاص . احنا هنمشى بقي .. والنبى يا اسراء لو شوفتيه ابقى عرفينى رنلى بس
اسراء : حاضر يا قلبي ! خلو بالكو من نفسكو
سلمى : بايباي
اسراء : باى .. باى يا سرسور
ساره : باى يا اسراء
...........
( ف عربية سلمى )
ساره : هتروحى على فين ؟
سلمى : هروح المطعم
ساره : المطعم اللى بيشتغل فيه ؟ يابنت الجنيه .. كانت تايهه عننا فين دى
سلمى : ربنا يكرم بس ونلاقيه هناك . اختفائه ده مش مريحنى
( على بوابة الجامعه حاتم بيلمح سلمى وساره بيركبو العربيه وبيركب عربيته وبيمشى وراهم )
...........
فريده : بت يا منه . ايه رأيك نروح نشوف احمد ف المطعم اللى بيشتغل فيه
منه : يابنت الجنيه ... تعالى .. بس انا مش عارفه مواعيد شغله هناك امتى ؟
فريده : ياستى تعالى وهنسال
مالك : ايه يا مزز ماشيين ولا ايه
منه : اه الجامعه دمها تقيل النهارده هنمشى
مالك : ايوه ياسيدى .. مش عارف انا الواد اللى مجنن الجامعه دى كلها . ماحنا حلوين اهو ومسمسمين بردو ههههههههههههه
فريده : يا اخى اتنيل . امشى امشى روح شوف انت رايح فين
مالك : ههههههههههههه اه يا جزمه ماشى ماشى
..............
مالك : بقولك ايه ياض يا مصطفى ! عندى فكره
مصطفى : ايه ؟
مالك : انت طبعا عارف بيت احمد
مصطفى : يا عم اخلص .. اكيد عارفه
مالك : انت هتجيب نص كيلو حلويات مشكل وتروح البيت
لو لقيت احمد هناك هتعمل انك رايح تزوره
ولو مالقيتوش هتعمل ان احمد هو اللى باعتها البيت عشان هو مشغول ورايح مشوار .. منها عرفنا هو هناك ولا لا ومنها ماقلقناش امه واخواته
مصطفى : يابن اللعيبه . مانت شغال اهو اومال وشك مايبانش عليه انك ذكى ليه
مالك : يا اخى اتنيل . احنا ف التكتكه مالناش زي ...
مصطفى : طيب يلا
مالك : طب مش هنستنى باقى العيال
مصطفى : هكلمهم ف التليفون يحصلونا ع القهوه
مالك : يلا
................
( المطعم )
عمرو : اهلا وسهلا يا فندم
سلمى : اهلا هاااااى ! ازيك ؟
عمرو : بخير والله تؤمرو بإيه ؟
سلمى : زى المره اللى فاتت بس هو سؤال بس .. الشيف اللى هيعمل الاكل النهارده هو هو نفس الشيف ولا واحد تانى
عمرو : لا والله الشيف احمد لسا ماجاش بس اللى موجود كويس ويسد ماتقلقوش ههههههههههههههههه
سلمى : هههههههههههههه اكيد طبعا كل اللى هنا مايحتاجوش وصايه المطعم كويس . بس هو اللى اسمه ,,,,,,, احمد بييجى امتى ؟ بيشتغل امتى يعنى
عمرو : هو بييجة من الساعه 3 للساعه 9 . 6 ساعات يوميا واحيانا بيشتغل متأخر من 9 ل 3 بالليل .. حسب الشيفتات يعنى
سلمى : طيب الساعه 2 ونص اهى .. ممكن نفضل قاعدين لغاية ما ييجى ولا ايه
عمرو : اه طبعا يا خبر . تنوروا المكان . تحبو تشربوا حاجه ؟
سلمى : اتنين فريش بعد اذنك
...............
( ع القهوه )
مصطفى : بقولك ! خليك هنا ...
مالك : مستنيك .. لو لقيته فوق رنلى نطلع نرنه علقة محترمه ههههههههههههههه
مصطفى : بس هو يطلع فوق
...........
( على باب شقة احمد )
مصطفى : ازيك يابت
سالى : عايز ايه ياض
مصطفى : هههههههههههههههه ابو شكلك لمضه زى اخوك .. خدى اخوك باعتلكو دى
سالى : وهو ماجاش ليه
مصطفى : هيتأخر ف الشغل شويه ووجع دماغنا ياستى ادوا الحاجه دى لاخواتى . مش عارف بيحبكو على ايه يعنى ههههههههههههههههههه
سالى : مالكش دعوه ( بتطلعله لسانها )
مصطفى : دخلى لسانك يا بقره بدل ماديك ف وشك .. بقولك يا سولا هو اخوك نازل من امتى
سالى : ماهو بيوصلنا المدرسه انا وندى كل يوم وبينزل معانا وبعدين بيطلع ع الجامعه
مصطفى : ااااااه صح نسيت بينزل معاكو يوصلكو .. ماشى . خدى ياختى الحاجه .. بيقولك ابقى سيبيلو حته
سالى : هههههههههههههههههههه ورينى كده ! مابياكلش البسبوسه دى اصلا .
مصطفى : يبقى يشترى لنفسه بقي . يلا سلام وسلميلى على طنط
سالى : لا ( بتطلعله لسانها )
مصطفى : هههههههههههههههههه يابنت العسل طالعينله عيله هبله
..................
مالك : ايه يابا لقيته
مصطفى : لا ! انا اتعكننت
مالك : طب ماتيجى نشوفه ف المكان بتاعه اللى بيروحه
مصطفى : والله فكرتنى تعالى ..
..................
( ف المطعم )
حاتم : اهلا ! ازيكو يا بنات
سلمى : انت ايه اللى جابك هنا وعرفت منين انى هنا ؟ انت بتراقبنى ؟
حاتم : اراقبك ايه ياسلمى . واراقبك ليه انا متعود اجى هنا بعد الجامعه . فيه ايه انتى عصبيه من ناحيتى ليه
ساره : طيب يا جماعه عن اذنكو انا داخله الحمام
سلمى : حمام ايه خليكى احنا قاعدين انا وانتى هو اللى ماشى
حاتم : طيب افهم بس ليه المعامله دى . احنا قرايب يا سلمى وانا مش عاوز منك حاجه غير ريق حلو بس
سلمى : ريق حلو ده ف البيت لما تيجى تزورنا او نيجى نزوركو .. لكن غير كده وبره البيوت احنا مانعرفش بعض .. فيه ايه ؟
حاتم : انسه ساره ممكن ثوانى بعد اذنك بس
ساره : احححم اه طبعا . عن اذنكو ثوانى . عن اذنك يا سلمى معلش رايحه الحمام وجايه
...
حاتم : ايه يا سلمى مالك ؟ قافشه عليا ليه وعشان ايه ده كله انا مش طالب غير الود والمعامله الكويسه ... ابوكى ماكلمكيش عننا
سلمى : نعععم ؟ عننا اللى هو ازاى يعنى ؟ وبخصوص ايه ؟ وانت مالك ومال ابويا .. حيالله ابوك هو اللى شريك ابويا وانت بتاخد فلوسك وتصرفها هنا وهنا زى منا بعمل بالظبط ...
حاتم : افهمينى بس ! يا سلمى انتى الاول كان وشك ألطف من كده لما كنتى بتقابلينى . وكنتى ذوق جدا معايا وعمرك ما كسفتينى قدام حد بالشكل المهين ده وقدام صاحبتك
سلمى : كنت ذوق معاك يا حاتم عشان انت كمان كنت ملتزم بالمسافه اللى بينى وبينك لكن تتعداها لا . هو بالعافيه ؟ انا مش فاهمه والله ايه ده
حاتم : طب ممكن اعرف مين الشاب اللى انتو ملمومين عليه اليومين دول وليه بتخرجو سوا معاه وبتقابلوه ؟
سلمى : ( بتزعقله وسط المطعم بصوت عالى ) انت اتجننت ف نافوخك ؟ انت مالك اساسا وتحت اى صفه بتسالنى سؤال زى ده .. انا غلطانه انى خليتك تقعد معايا هنا . اتفضل يا استاذ ..... اتفضل ومش عاوزه اشوف وشك تانى لا هنا ولا ف البيت ..... )
( منه وفريده بيدخلو على الخناقه )
حاتم : يعنى هو ده اخر كلام يا سلمى
سلمى : وماعنديش غيره .... اتفضل لو سمحت .. حاجه تحرق الدم
منه : ايه يا جماعه فيه ايه بالراحه وطو صوتكو
حاتم : ( بياخد النضاره والتليفون من على الترابيزه ) مافيش حاجه . اسالو صاحبتكو . انا ليا تصريفه تانيه ..
فريده : ايه ده ماله ده يا سلمى
سلمى : ( متعصبه بشكل هيستيرى ) مش عاااااارفه .. مش عاااااااااارفه عاوز منى ايه موترنى وضاغط اعصابي
منه : موترك ليه يا سلمى اهدى بس . انتى فين يا ساره سايبه سلمى ليه مع البنى ادم
ساره : معلش ! اهدى يا سلمى مافيش حاجه ل ده كله خلاص غار ف داهيه
سلمى : عرفتوا احمد فين ولا لسا
فريده : لسا والله ! كلمت مصطفى واحنا جايين وقالنا انه مش ف البيت
سلمى : ام التوتر اللى انا فيه ده .. انا قاعده مستنيه هنا بقالى نص ساعه والويتر بيقول ان شغله المفروض بيبدا 3 .. الساعه كام ف ايديكو
فريده : 3 اهى ... اهدى يا ماما بس وروقى اعصابك واشربي العصير اللى جنبك ده وان شاء الله هنلاقيه داخل دلوقتى
...............
مالك : ولا هنا كمان يا مصطفى . الواد فين ياض
مصطفى : ياعم انت اللى موترنى الله يحرقك جاتك ستين نيله تاخدك . غور من وشى يا اخى
مالك : الله ! اعملك ايه ابو شكلك . مانت اللى عارف الاماكن اللى بيروحها
مصطفى : طب اخلص بقي . خلينا نرجع ع القهوه ... رن عليه كده شوف تليفونه
مالك : استنى ! ( بيرن على تليفونه ) لسا مقفول
مصطفى : اشوف فيك وفيه يوم يارب عشان انا اعصابي تعبت
مالك : ياعم هو صغير . ان شاء الله خير وانا متأكد انه هيبقى كويس او هو اساسا كويس بس تلاقيه مشغول شويه
مصطفى : عارف لو دراعه سليم . هقولك بيشتغل هنا ولا بيشتغل هنا . ولا تلاقيه جاتله شغلانه مع الواد طارق ف اى حته بس ده مش هيعرف لا يشيل ولا يحط ولا يعرف يشيل ورقه اصلا دلوقتى .. يبقى ايه
مالك : خير يا مصطفى ان شاء الله ... اهدى بقي وتعالى نرجع .. انت بتحبه كده ليه ياض ؟
مصطفى : ياعم انت متخلف .. بقولك ابويا .. ده ابوياااااااااااااااا خلصنا بقا من ميتين ام ده سؤال على ميتين ام دى شغلانه . انا قايم مروح هشوفه ف ضواحي البيت كده ف السايبر اللى جنبنا ..
.......................
( المغرب )
فريده : مش يلا يا بنات ولا ايه احنا قاعدين بقالنا 4 ساعات ولسا ماجاش ولا شكله جاى اصلا
منه : ايوه يلا يا سلمى مش هييجى
سلمى : طب تعالو نروح البيت عنده نساله
فريده : لا بلاش مش عاوزين نقلقهم وعلى الفاضى ان شاء الله .. وبإذن الله مايكونش فيه حاجه من اساسه وزى ما قال مصطفى لو روحنا نسال عليه هناك هنقلقهم ع الفاضى وهما من اقل كلمه بيقلقوا .. خليها ماشيه كده زى ماهى وربك يسهل
منه : انا اول مره اخاف كده من زمان ماخوفتش الدنيا خنيقه من غيره
سلمى : ماتبس بقا انتى كمان هى ناقصاك . ما كفايه بقي انا قايمه متزفته ماشيه ابو اشكالكو عيال رمم
منه : فيه ايه مالك يابت !
ساره : معلش يا منون هى متوتره شويه النهارده بسبب موضوع الزفت اللى اسمه حاتم ده معلش
منه : عارفه يا ساره ومقدره .. الحقيها بس خليكى معاها واحنا احتمال نجيلكو البيت عند سلمى كمان ساعه كده ولا حاجه
...............
( ف العربيه )
ساره : سلمى ! اهدى شويه وانتى سلمى ( بتبص لعيون سلمى بتلاقي فيه دموع محبوسه والكحل سايح )
يا نهار الوان . انتى بتعيطى
سلمى : ( بتوقف العربيه على جنب وبتعيط بشكل شَرِه وبتتكلم )
هو راح فين يا ساره
راح فين وسايبنى كده زى اليتيمه
زعلان من مين ؟ زعلان منى ولا من غيرى ؟
طب يقولى ! يضربنى ! يلجمنى !
لكن مايبعدش
مايعملش فيا كده
هو عارف ان اليوم والساعه اللى هيعدوا عليا من غير ما اشوفه فيهم هيحرقونى ويكونى بنارهم ..
اسراء قالت انه كان موجود من بدرى
طب مشى ليه ..
طب قفل تليفونه ليه ؟ طب مش عاوز يطمنى انا عليه لييييييه ؟ انا من حقى اعرف هو فين ؟ وماله ؟ وجراله ايه ؟
حقى ولا مش حقى ... ردى عليا يا ساره حقى ولا مش حقى
ساره : حقك يا حبيبتى .. اهدى بس ياسلمى انتى مالك بتتنفضى كده ليه يخربيت كده . اهدى يا ماما .. اطلعى ع البيت بس وقفى هنا شويه ننزل نشرب حاجه تهدى اعصابك مش هينفع تدخلى البيت كده
سلمى : لا مش مروحه . انا رايحاله البيت
ساره : بيت ايه يا سلمى والنبى . مصطفى هناك قاعد مع العيال مستنيينه وهو مش هناك . انتى مش هتعملى اى حاجه غير انك هتقلقى مامته واخواته عليه . عشان خاطرى بلاش والنبى والنبى لو بتحبيه
سلمى : ( بتعيط ) طب وبعدين .. هعمل ايه انا
ساره : تعالى بس نروح البيت . هروح معاكى النهارده وربنا يلطف . ان شاء الله هيبقى كويس
سلمى : قلبى واكلنى اوى والله مش عارفه ليه . حاسه انه ف ضيقه او فيه حاجه خانقاه
ساره : ان شاء الله خير
.................
( ع القهوه )
على : وبعدين يا جماعه .. الساعه داخله على 10 والواد لا حس ولا خبر . أول مره يعملها . ومش موجود ف اى مكان من الاماكن اللى بيروحها
مصطفى : ( سرحان وساكت )
مالك : صحيح هنعمل ايه ..... استنو الواد احمد 2 بيرن
احمد 2 : ايه يا مالك . احمد ظهر ولا ايه
مالك : لسا احنا ع القهوه اهو انت فين انت وعماد
احمد 2 : والله يا حب احنا جنبكو اهو داخلين عليكو . خمس دقايق هنكون عندك
مالك : طيب مستنيينك
حسن : طيب اخر مره كان يوم كله ضحك وزقططه . حصل ايه لكل ده وماكانش فيه حاجه تدل يعنى ان فيه عكننه . فيه ايه يا جماعه . انا دماغى لفت
مصطفى : ( مسهم وساكت )
مالك : ماتنطق يا بغل انت كمان ساكت ليه . مانت السر بتاعه واكيد عارف هيكون فين
مصطفى : بصوا ! هو مكان واحد اللى ممكن يكون موجود فيه ... ( بيقوم وبيسيبهم )
.................
( اوضة سلمى الساعه 12 ونص بالليل )
ساره : سوسو 1 قومى يا حبيبتى كلى السندويتش ده انتى ماكلتيش م الصبح
سلمى : ماليش نفس يا ساره
ساره : طب قومى افردى جسمك شويه انتى من ساعة ماجيتى وانتى نايمه النومه الحزينه دى ... انا هطفى التكييف وافتح باب البلكونه شويه
سلمى : لا خليه
ساره : بس يابت اقعدى ساكته ( بتبص على البحر بتلاقى احمد قاعد ع الصخر ف نفس المكان اللى كان قاعد فيه مع سلمى المره اللى فاتت ووشه للبحر وبيشرب سجاير )
احيييييييييييييييه ! والمصحف هو . سللللللمى .... يا سلممممممممممى إلحقى
..................
الي اللقاء في الحلقه القادمه

كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels

لينك الكاتب
https://www.facebook.com/profile.php?id=100010381862587

لينك بيدج/ هو و هي
https://www.facebook.com/howa.weheyaa/

لينك بيدج/ stories and novels
https://www.facebook.com/StoriesAndNovels2020