FOX DEMON CULTIVATION MANUAL

၀၈၄

စုန့်ချီဟာ အတန်ကြာသည်အထိ စောင့်ဆိုင်းနေပါသော်လည်း အဖြေကိုမကြားရသေးပါချေ။ သူသည် ထပ်မံမေးလိုက်တော့မည်ပြုစဉ် ရုန်ပိုင်က ငုံ့၍နမ်းရှိုက်လာပြီး စကားသံများကို ချိပ်ပိတ်လိုက်လေသည်။ သူသည် စုန့်ချီကို အိပ်ယာထက်ဖိကပ်ထားလိုက်ပေ၏။ သူ၏လက်တစ်ဖက်က စုန့်ချီ၏ခါးပေါ်တွင် ရှိနေဆဲဖြစ်ပြီး ကျန်တစ်ဖက်ကမူ အကြင်ကောင်လေး၏လက်ကိုထွေးဆုပ်လျက် ဦးခေါင်းအထက်သို့ မြှောက်တင်ထားသည်။ ထို့နောက်တွင်တော့ သူဟာတစ်ဖက်ကောင်လေး၏လက်တို့ကို အပေါ်မြှောက်ကိုင်လျက်သားဖြင့် သူ့လက်ချောင်းများနှင့် အတူတကွ ယှက်ဖြာဆုပ်ကိုင်လိုက်လေတော့သည်။

စုန့်ချီသည် ရုန်ပိုင်၏စိတ်အခြေအနေကို ရုတ်ခြည်း နားလည်သွားရ၏။ ရုန်ပိုင်ဟာ စိတ်ပျော်ရွှင်မနေကြောင်း စုန့်ချီ အသေအချာကို ခံစားမိနိုင်၏။ အကြင်သူဟာ ဖွင့်ထုတ်မပြောချင်လောက်အောင်ကို စိတ်အခြေအနေ အင်မတန် ဆိုးဝါးနေသည်။ သူသည် စုန့်ချီအား နူးနူးညံ့ညံ့ဖြင့်သာ သိမ်းကျုံးထွေးပိုက်၍ သူ့ခံစားချက်များကို အနမ်းမိုးများအဖြစ် သွန်းဖြိုးရွာချနေပေ၏။

စုန့်ချီကလည်း သူ့အား အတင်းအကြပ် မတိုက်တွန်းပါချေ။ သူသည် အားနေသည့်လက်တစ်ဖက်ကို မြှောက်လိုက်ပြီး ရုန်ပိုင်၏လည်တိုင်ကို သိုင်းဖက်လိုက်သည်။ သူသည် ရုန်ပိုင်၏ရှည်လျားသော ဆံနွယ်ဖြူတို့ကို သပ်ပေးရင်း အနမ်းတို့ကို ဖြည်းညင်းစွာ တုံ့ပြန်မှုပြုသည်၊ နှုတ်ခမ်းလွှာ နှင့် လျှာတို့၏ ပြေးလွှားလှုပ်ရှားမှုတစ်ခုချင်းစီကိုတောင် ထိထိမိမိခံစားမိနိုင်ပါ၏။

ကနဦးက သူသည် ရုန်ပိုင်၏မျက်ဝန်းပြာများနှင့် ဆံနွယ်ဖြူတို့ဟာ ဤကမ္ဘာတွင် တုနှိုင်းမဲ့ အခမ်းနားဆုံးအရာများဟု ထင်ခဲ့မိသည်။ ယခုတွင်မူ သူနားလည်သွားခဲ့ရလေပြီ၊ ဤအရောင်အဆင်းများဟာ ရုန်စန်း၏သွေးမြေခ အသက်သွေးကြွေးများမှ ဖြစ်တည်လာသော အရာများသာဖြစ်ပေ၏။ ရုန်ပိုင် ကိုယ်ကိုယ်၌က ဤအရောင်အဆင်းများကို မုန်းတီးနေပေရော့မည်။

ယောက်ျားပျိုနှစ်ဦးဟာ အိပ်ယာထက်တွင် အချိန်အတော်ကြာ လူးလှိမ့်နေကြပြီးနောက် ရုန်ပိုင်သည် သူ့ကို ခပ်ဖြည်းဖြည်းချင်း လွှတ်ပေးလိုက်သည်။ ရုန်ပိုင်သည် စုန့်ချီ၏လည်တိုင်ဖွေးဖွေးကို နှာဖျားလေးဖြင့် ပွတ်တိုက်ကျီစယ်၍ သွေးကြောလေးများစိမ်းနေသည့်လည်ပင်းသားလေးကို လျှာဖြင့်လျက်လိုက်သည်။