FOX DEMON CULTIVATION MANUAL

၀၈၄

ထိုကောင်လေးဟာ အိပ်ယာပေါ်တွင်ငုတ်တုတ်ထိုင်ရင်း ပိုးသားဖက်လုံးကိုဖက်ထားလျက် ငိုက်မျဉ်းနေသည်။ သူ့မျက်လုံးလေးများက မှိတ်တော့မလိုလို ၊ ဖွင့်တော့မလိုလိုဖြင့်။ သူ့ပုံစံဟာ နေ့လယ်တိုင်း နန်းတော်ဆောင်ဘေး၌ ခြေကားယားလက်ကားယား တမေ့တမောအိပ်တတ်လေ့ရှိသည့် အပျင်းထူထူ ကြောင်ကတိုးနှစ်ကောင်နှင့်ပင် တူသေးသည်။

စုန့်ချီကို တစ်ချက်ဝင်ကြည့်ပြီးသည့်နောက် ရုန်ပိုင်သည် ခြေကိုခပ်ဖွဖွနင်း၍ ရေချိုးသန့်စင်ရန်အတွက် ရေပူစမ်းသို့ တိုးတိုးတိတ်တိတ် ထွက်ခွာသွား၏။ သူသည် ရေသန့်စင်ပြီးသည့်အခါ အဝတ်အစားသန့်သန့်များလဲဝတ်၍ အိပ်ယာပေါ်တက်လိုက်သည်။ ကနဦးကမူ သူသည် စုန့်ချီကို နှိုးမိသွားမှာ စိုးရိမ်ခဲ့၏။ သို့သော် သူပိုကြည့်မိလေ ဤကောင်လေးကို ပိုထိချင်လာလေဖြစ်ပေ၏။ ဤသို့ဖြင့် သူ၏ဆိုးဆိုးသွမ်းသွမ်းလက်ကလေးက စုန့်ချီ၏ခါးလေးကို ဆုပ်ထွေးလိုက်ကာ ရင်ခွင်ထဲသို့ ဆွေ့ခနဲ သွင်းလိုက်လေတော့၏။

ရုန်ပိုင်သည် သူ့ကို အနောက်မှသိုင်းဖက်ထားရင်း မျက်နှာကို သူ့လည်တိုင်ကြားထဲမြှုပ်နှံထားလျက် အသက်ပြင်းပြင်းရှူရှိုက်လိုက်သည်။ ထို့နောက် သူ့မေးစေ့လေးဆီသို့ ရွေ့လျားသွား၍ ဖွဖွကလေး နမ်းရှိုက်လိုက်ပေသည်။

အမှန်တကယ်တွင်မူ စုန့်ချီသည် နှစ်နှစ်ခြိုက်ခြိုက် အိပ်ပျော်နေခဲ့ခြင်း မဟုတ်ပေ။ နုနုရွရွ အထိအတွေ့တို့ကြောင့် သူ ချက်ချင်းဆိုသလို နိုးလာတော့သည်။ ရုန်ပိ်ုင်ကို မြင်လိုက်သည့်အခိုက်အတန့်တွင် သူ၏ပထမဆုံး တုံ့ပြန်မှုသည်ကား ကိုယ်ကိုတစ်ဖက်သို့လှည့်၍ အကြင်သူ၏လည်တိုင်ကို သိုင်းဖက်လိုက်ခြင်းသာ ဖြစ်လေတော့၏။ သူသည် အကြင်သူနှင့် နှီးနွယ်ရန် လောကြီးမနေဘဲ အမေးပြုလိုက်ပါ၏။ 

" ဒီနေ့ကျ ဘာလို့ ပြန်လာတာ တအားနောက်ကျရတာလဲ"

ရုန်ပိုင်သည် ခေါင်းကိုညွှတ်လိုက်ကာ ပင်ပန်းနွမ်းနယ်နေဟန် ပိတ်တစ်ဝက်၊ ဖွင့်တစ်ဝက် မျက်ဝန်းပြာများဖြင့် သူ့အားငုံ့မိုး၍ ကြည့်လာသည်။ စုန့်ချီ၏ခါးတစ်ဝိုက်မှ သူ့လက်များကမူ ပိုမိုတင်းကြပ်သွားပြီး နှစ်ဦးသား၏ခန္ဓာကိုယ်ချင်းဟာလည်း တစ်ယောက်အပူငွေ့ကိုတစ်ယောက် ခံစားမိသည်အထိ ပူးကပ်သွားကြသည်။