ဖုန်းကျော့ကျွင်း၏ အော်သံက ရုတ်ခြည်းဆန်ကာ အလောသုံးဆယ်နိုင်လှသည်။ တခြားအချိန်ဖြစ်ပါက စုန့်ချီသည် ဘာမှမတွေးနိုင်ဘဲ တစ်ခဏမဆိုင်း ထွက်ပြေးမိလောက်ပေမည်။ သို့သော် ယခုအချိန်တွင်တော့ သူ့ခြေထောက်များက မြေကြီးပေါ်တွင် သံနှင့်စိုက်မိထားသလို မရွေ့နိုင်တော့ပေ။ သူ မည်မျှကြိုးစား၍ ရွေ့ကြည့်ပါသော်လည်း တုတ်တုတ်ပင်လှုပ်မလာပေ။
ဖုန်းကျော့ကျွင်းသည် သူ့လက်မောင်းကို ဖမ်းကိုင်ပြီး လှည့်ပြေးပါသော်လည်း စုန့်ချီမှာမူ တရွတ်တိုက်ဆွဲပြီးသာ ပါလာသည်။ ဖုန်းကျော့ကျွင်းက သူ့အား သင်္ကာမကင်းစွာလှည့်ကြည့်လိုက်သည်။
"ဘာလုပ်နေတာလဲလို့ "
"အဲ့ကလေး......."
စုန့်ချီသည် အရှေ့မှကလေးငယ်ကို မျက်ခုံးအစ နှုတ်ခမ်းအဆုံး စူးပြီးကြည့်နေသည်။ သူသည် ခြေဆုံးခေါင်းဆုံးအပြန်ပြန်၊ အလှန်လှန်ကြည့်ပြီးနောက်တွင် သေမတတ် လန့်ဖျပ်သွားတော့သည်။
ဤကလေးသည် ရွှေရောင်မျက်လုံးများမှလွဲ၍ သူ့ညီဝမ်းကွဲငယ်စဉ်ကနှင့် တစ်ထေရာတည်းတူလေသည်။
ဘယ်လိုဖြစ်ပြီး သူ့ညီနဲ့ သည်လိုနေရာမှာ လာဆုံရတာတုန်း?
"မင်း သူ့ကိုသိတာလား "
ဖုန်းကျော့ကျွင်းက ခပ်တိုးတိုးမေးလာသည်။
စုန့်ချီ ခေါင်းငြိမ့်လိုက်သည်။
"ကျွန်တော် လူသားဘဝတုန်းက လျန်ရန့်ပေလို့ခေါ်တဲ့ ညီဝမ်းကွဲရှိခဲ့ဖူးတယ်။ ဒီကလေးက သူနဲ့တအားတူတယ်။ ဒီကလေးက ကျွန်တော့်ညီရဲ့ အတိတ်ဘဝလို့တော့ လာမပြောနဲ့နော် "
"ဘာကို အတိတ်ဘဝလဲ?! ဒီကလေးက..နတ်ဘုရားသခင် ရန့်ပေ.နဂါးပြာမျိုးဆက်စစ်စစ်.ပြီးတော့ နတ်ဘုရားဧကရာဇ်ရဲ့ အဖေဘက်ကတော်တဲ့ တူအရင်းခေါက်ခေါက်ကွ ။ ဒီနေရာမှာ ဆက်နေလို့ မသင့်တော့ဘူး။ မြန်နိုင်သမျှ မြန်မြန်ပြေးဖို့ အကြံပေးနေတာ "
ဖုန်းကျော့ကျွင်း၏ စကားများက ရိုးရှင်းကာ နားလည်လွယ်ပါသော်ငြား ရန့်ပေ၏သရုပ်မှန်ကို လုံးစေ့ပတ်စေ့သိလိုက်ရသည်။
YOU ARE READING
FOX DEMON CULTIVATION MANUAL
Romance[FDCM] 【2nd book of a Trilogy】 It's just a fan translation. I don't own anything of this story. Full credit to original author Feng Ge Qie Xing & English translator Lianyin. - အင်္ဂလိပ်ဘာသာပြန်ဆိုသူထံမှ ခွင့်ပြုချက်ရရှိထားပြီး -