................
(ف الحلقات السابقه )
سلمى : تصدقى بالله ! لو كاميليا دى ولا الزفت حاتم ده لهم علاقه بالحكايه دى
لاهتكون نار وجحيم ع الكل
انا ماشوفتش من احمد حاجه وحشه عشان شويه كلاب محسوبين عليا ومحسوبين قرايبى يكسروا بخاطره
وانا اللى يكسر بخاطراحمد هيزعل .. وهنجيب ناس تزعل
قومى إلبسي هنروح مشوار
ساره : بدرى كده الساعه 6
سلمى : ( بتبرقلها ) بقولك قومى مش هقدر استنى
ساره : انا قومت خلاص
....................... ( الخامسه ) ❤
( بيت كاميليا الساعه 6 و 20 دقيقه صباحا )
ام كاميليا : ايه ده ؟ سلمى ! خير يا حبيبتى فيه ايه ؟
سلمى : ههههههههههههه ازي حضرتك يا طنط ايه ده هى الهانم ماقالتلكيش ولا ايه
ام كاميليا : قالتلى ايه خير يا سوسو فيه ايه ؟
سلمى : دى كاميليا متفقه معايا اننا هنروح الساحل النهارده هى ماديتكيش خبر ولا ايه .. جاتلى امبارح واتفقنا نروح مع البنات نقضى اليوم ده هناك وبرن عليها مابتردش قولت يمكن راحت عليها نومه وجايه عشان اصحيها انا بنفسي
ام كاميليا : حرام عليكى يا سلمى خضتينى ههههههههههههه تعالى يا حبيبتى اقعدى
سلمى : لا مافيش وقت .. انا هدخل اصحيها
ام كاميليا : ماشي يا روحى وهصحى البنت تعملكوا فطار قبل ما تنزلوا ...
سلمى : لا انا فطرت . اعمليلها هى عشان هتحتاج فعلا تتغذى . عن اذنك داخلالها
................
( سلمى بتقرب من سرير كاميليا وهى نايمه وبتقعد جنبها وبتبدا تصحيها وهى بتزقها من راسها )
كاميليا : فيه ايه يا مامى سيبينى شويه لسا بدرى
سلمى : قومى يا روح امك قومى .. اصحي كده وفوقى
كاميليا : ( بتفتح عينيها مخضوضه وبتبص لسلمى ) سلمى ؟!
سلمى : لا مش سلمى .. انا عزرائيل اللى هياخد روحك
كاميليا : فيه ايه يا سلمى . الساعه كام
سلمى : الساعه 6 ونص الصبح
كاميليا : فيه ايه يا سلمى خضتينى ... ايه اللى حصل .. اول مره تعمليها يعنى
سلمى : لا ماهى اخر مره لانك هتطلعى فوق
كاميليا : فوق فين ؟
سلمى : فوووووووق . بقولك ايه .. صحصحيلى كده ( بتجيب كوباية ميه من جنبها وبترشها على وش كاميليا ) اصحى يا ماما اصحى . دانت هيطلع عين امك ..
كاميليا : تف تف تف بالراحه بالراحه الميه جاى ف عينى ... بالرااااااااااااااحه
سلمى : ( بتمسحلها وشها ببجامه مركونه جنب السريره ) صحصحتى ؟
كاميليا : خلاص يا سلمى فيه ايه ؟
سلمى : مين بقا يا حلوه اللى وزك وزقك عليا انا والشله بتاعتى امبارح ..
كاميليا : وزنى ؟ ايه يا وزنى دى يعنى ايه يعنى
سلمى : لا ماحنا مش هنلف وندور حوالين بعض ( بتمسك شعرها ) انطقى بدل وكتاب الله ما هحدفك م الشباك ده .. مين اللى زقك عليا ..وكلمتى احمد امبارح قولتيله ايه ؟
كاميليا : انا مش فاهمه يا سلمى انتى بتتكلمى عن ايه ؟
سلمى : ( بتملى كوباية ميه تانيه وبتطسها ف وشها ) اظن كده فوقتى اكتر .. انطقى يا كاميليا وحياة امك ماحد هيلحقك منى ... انطقى اخلصى روحك هتطلع ف ايدى
كاميليا : طيب اهدى بس ونتكلم بهداوة
( ام كاميليا بتخبط الباب عليهم : ايه يا بنات مش هتيجوا تفطروا )
سلمى : ( بتكتم نفس كاميليا بإيديها ) جايين وراك اهو يا طنط . بصحى القتيله دى بس
..
سلمى : انطقى يا بنت الجزمه انا مش فاضيه ل أمك
كاميليا : طيب هقول هقول . شيلى ايدك من على رقبتى . هتخنق بجد
سلمى : ها اخلصى
كاميليا : حا ... حاااااتم
سلمى : حاتم ؟ ها وقالك ايه تانى
كاميليا : مافيش ؟ هو قالى انه عاوز يقربلك وانه شايف حد تانى قريب منك وده اللى باعدك عنه ومش عاوزه تفكرى فيه بسبب الواد ده
سلمى : اه ! تقومى جايالى الجامعه كأنها صدفه .. وتقعدى مع احمد كأنها صدفه بردو عشان تقوليله كلام زى السم .... ( بتقرب منها بصغه تهديد ) قولتيله ايه يا كاميليا ؟
كاميليا : قولت كلام وخلاص يا سلمى
سلمى : قولتيله ايه يا كاميليا . ايه الكلام اللى ممكن يخلى واحد زى ده يتكسر بالشكل ده ويقولى مش عاوز اعرفك ولا اشوفك تانى
كاميليا : ( بتبدا عينيها تخونها وشبه هتبكى ) اتاخرى يا سلمى وانا هحكيلك قولتله ايه
سلمى : ( بتسيبها وبتقعد على السرير مكانها )
كاميليا : ( بتقوم تلم شعرها وبتظبط هدومها وبتمسح بالفوطه وشها ) عاوزه تعرفى انا قولتله ايه يا سلمى ؟
سلمى : ياريت !
كاميليا : قولتله اقذر كلام ممكن واحده بنت تقوله لواحد
ومن ساعتها وانا كارهه نفسي وكارهه حاتم ..
ماخبيش عليك الموضوع بالنسبالى كان تسليه وكان اوفر حلو حاتم قالى هيغيرلى عربيتى لو الموضوع تم .. مع انى مش محتاجه ل حاتم ولا محتاجه ل غيره وممكن اغير عربيتى الصبح لو عايزه بس تقدرى تقولى تحدى كده
غرور وتباهى وتعالى وحاجه اخر قرف وحاجه بنت كلب اوى
حاتم كلمنى وقالى انه عاوز يوصل ل سلمى بس فيه شله كده ملمومه عليها مخلياها مش بتفكر ف اى حاجه غيرها وفيهم واحد سلمى متعلقه بيه معرفش كصاحب ولا كحاجه تانيه
قولتله طيب هو ابن ناس يعنى ومبسوط قالى لا ده على قده خالص وأغلب م الغلب وممكن افعصه ف ثانيه بس عاوز الموضوع على هداوه وبشغل نضيف وعاوز هو اللى يقول ل سلمى مع السلامه .. قولتله خلاص تبقي تجرحه ف كرامته . هما نوعية الناس دى كده .. يقبلوا الفقر ولا يقبلوا ان حد ييجى على كرامتهم ... وسيب الموضوع ده عليا يا حاتم وانا هخلصهولك
وفعلا ...
وانا داخله الجامعه .. الواد اللى تبع حاتم شاورلى على احمد وشلته وقالى هو ده . وسابنى ومشي
لقيته بنى ادم طيب جدااا كل اللى حواليه حابينه وبيهزروا معاه
غير انه شكله مايوحيش انه غلبان ابدا .. واد حلو وطويل وعضلات وعيون
ولما صحابه عملوا فيه مقلب وزقوه عليا . كل اللى كان همه انه يشوفنى انا حصلى حاجه او هدومى اتوسخت او حاجه ..
قولت بينى وبين نفسي هو انا هأذيك ازاى بعيونك دى ؟
ولما سلكت نفسي منك وروحت قعدت معاه
لقيته هادى جدا ومسالم جدا وذوق جدااا .. لكن فضلت مكمله ومصممه انى ادوس عليه لأنى ....
سلمى : لأنك ايه ؟
كاميليا : مش هتزعلى ؟
سلمى : قولى يا كاميليا ... صممتى انك تكملى وتقوليله الكلام ده ليه
كاميليا : انا كنت داخله عشان ابعده عنك عشان خاطر حاتم .. لكن بعد اللى حكيتلك عنه ده حبيت ابعده عنك لانى غيرت منك ... قولت اشمعنى انتى تعرفى واحد زي ده
الواحد ممكن يتعلم درس يخليه يغير كل حساباته يا سلمى بسبب معامله من شخص ما مش بسبب موقف .. انا اتعلمت ووالله والله والله كنت هصحى النهارده وهلبس وهجيلك الجامعه اعترفلك بكل اللى قولتهولك ده او كنت هستنى واجيلك البيت لانى كنت قرفانه من ساعتها
سلمى : ( زعلانه وهى بتتكلم ) انتى تعرفى انتى عملتى ايه يا كاميليا بكلامك ده ل احمد ؟
كاميليا : ( بتتكلم بشهقه وحسره ) عملت ايه ؟ ومستعده اصلحه باى طريقه انتى تطلبيها منى حتى لو قولتيلى اروح اتأسفله واعتذرله
سلمى : انتى عليتى الجدار اللى بكسر وبهد فيه بقالى اكتر من 7 شهور ...
روحى ربنا ينتقم منك انتى والكلب اللى حسابه بيتقل معايا يوم بعد يوم
ولولا احترامى لابويا وانى مش عايزه اصغره مع باباه . كان زمانى قليت من حاتم ده قدام الناس كلها . بس هانت .. وحياة امى هانت
كاميليا : انا أسفه يا سلمى والله اسفه
سلمى : يا شيخه غورى ف داهيه ( بتزقها على السرير )
.....................
( ف عربية سلمى )
ساره : ايه كلمتيها ؟
سلمى : اه
ساره : زى ما توقعنا صح ؟
سلمى : بالظبط ... بقولك ايه يا ساره انا عاوزه منك خدمه
ساره : اؤمرى يا حبيبتى
سلمى : تعالى بس ندخل نفطر هنا ونشرب نسكافيه يفوقنى . عشان انا جاتلى فكره
ساره : يلا بينا
.............
( ف أحد المطاعم المُطله على البحر ف الدور التانى )
ساره : هتعملى ايه بقي ناويه على ايه
سلمى : بصى ! عاوزاك تركزى معايا ف كل كلمه هقولهالك وحياة ابوك .. وتكلمى مامتك انك هتباتى وتقعدى معايا الاسبوع الجاى كله
ساره : فهمينى بس الاول ناويه على ايه
سلمى : انا ناويه اخبط خبطه عمرى كله ... وساعتها هخلى احمد ينطق بالكلمه اللى هموت واسمعها منه من ساعة ما عرفته ... يا هيقولها يا هيحدفنى ف البحر ههههههههههه
ساره : لا بقا يعنى ايه
سلمى : بصى يا ستى ... هو ف نص كلامه اللى قالهولى اننا اخوات وهكون أخ ليكى وسند وامان والكلام ده
ساره : ايوه منا قولتلك انه مالوش معنى الكلام ده لانه من ورا قلبه ..
سلمى : منا فاهمه يابنت الغبيه ... انا بقا فعلا هتعامل معاه على الاساس ده انه اخويا .. بس مش اخويا حبيبى اللى كنا دايما بنقولها ل بعض .. لا .. هتبقي رسمى بجد وبحق وبحقيقى هتعامل معاه على انه اخويا ...
ساره : وبعدين ؟
سلمى : ههههههههههههههه بعدين هتعرفى كل حاجه .. كملى فطارك بقي عشان نلحق نروح الجامعه
ساره : تفتكرى هيروح الجامعه النهارده
سلمى : هيروح ...
ساره : اشمعنى
سلمى : هههههههههههه بقولك هيروح
ساره : ايوه جبتى التأكيد ده منين
سلمى : هو انا لسا هعرفه يا روح امك ؟ احمد ده رهانى ف الحياه
ساره : طب رهان على رهانك بقي انه مش هييجى ... الكلام بتاع امبارح ده مالحقش يبرد وهيحتاج يبعد شويه
سلمى : لا ! هييجى ...
ساره : ايوه لييييييييييييييييييييه متأكده
سلمى : لانى كنت ماسكه نفسي قدامه امبارح ومعيطتش عشان مكنتش عاوزه ازود عليه الحمل .... هييجى النهارده عشان يتطمن عليا .. ويشوفنى كويسه ولا لا
ساره : يا محنوووو هههههههههههههه طب مش جاى
سلمى : ههههههههههههه يلا يلا قومى نمشي
.....................................
( الساعه 9 صباحا )
المقاول : اللى ينور يا رجاله ... بقولك ايه يا ابو عمو .. تعالى كده عاوزك
احمد : خير يا ريس
المقاول : انت دى شغلانتك اصلا
احمد : ههههههههههههه يا ريس انا اشتغل اى حاجه
المقاول : اشتغلت ف ايه قبل كده
احمد : اشتغلت ف الحديد واشتغلت جرسون واشتغلت ف السياحه واشتغلت كاشير وبطلع رمل وطوب زى مانت شايف ... اشمعنى
المقاول : اصلك خساره يابنى ف الشغلانه اللى تهد دى ... انت قولتلى اشتغلت ف مطاعم ؟
احمد : اه !
المقاول : انت تعرف البيت اللى شغالين فيه ده بتاع مين
احمد : بتاع مين ؟
المقاول : بتاع رجل اعمال كبير شغله كله مطاعم وكافيهات وكازينوهات وعنده سلاسل كتير
احمد : ربنا يفتح عليه
المقاول : ( بيبص ل احمد وساكت )
احمد : خير يا ريس
المقاول : تحب تشتغل ف المطعم
احمد : ياسلام ! أحب اوى ...
المقاول : هكلمهولك ... خد يا سيدى ال 100 جني دى
احمد : هى مش اليوميه 80 بس
المقاول : انت مالك بقي .. وخليك على تليفون . لو جالنا شغل الليله جاى ولا تعبت
احمد : كلمنى حتى لو الفجر
المقاول : تمام .. ف رعاية الله
............
مصطفى : ايه يا فنان ..هتأجز النهارده م الجامعه ولا ايه ؟
احمد : لا هروح .. هخطف خمس دقايق بسرعه ع البيت اخد دش واغير هدومى ورايح .. اسبقونى
مصطفى : خلاص ماشي ماتتأخرش بقا
.................
( الساعه 10 صباحا )
ساره : يعنى الزبون ماجاش يعنى يا سلمى
سلمى : مانتى سامعه العيال عمالين يقولوا احمد جاى احمد جاى
ساره : بس الواد مصطفى شكله راسي ع الليله ...
سلمى : اه ماهو مابيخبوش حاجه عن بعض ... اسكتى احمد جه زى ما قولتلك ماشي
........
( احمد بييجى يقف بعيد وبينادى على مصطفى والشباب يقفوا معاه )
مصطفى : ايه ياسطا اتأخرت ليه
احمد : مش مهم دلوقتى .. البنات كويسين ؟
مصطفى : كويسين ماتيجى تقف معاهم . عيب كده . عمالين يبصوا اصلا مستغربين اللى انت عملته
احمد : استنونى هنا ماتجوش ورايا ... انا هبدا اخليهم يعرفوا انى هبعد واحده واحده
.......
احمد : صباح الخير يا جماعه ( عينه بتخطف نظرات خاطفه ل سلمى )
منه : صباح الفل ... ايه يابنى روحت وقفت بعيد ليه
احمد : مافيش ! عاوز ابقي لوحدى ...جيت اسلم عليكو بس عشان ماتزعلوش
فريده : نزعل ؟ نزعل من ايه انت بتقول ايه يا عم .. وتسلم علينا ليه انت مسافر ؟
احمد : لا ! .. عن اذنكوا
..................
منه : حد فاهم حاجه ؟ هو فيه ايه يا سلمى ؟
سلمى : انا ؟ هيكون فيه ايه منا واقفه معاكو اهو ... وبعدين اللى ياكل على ضرسه ينفع نفسه
.........
( احمد مع الشباب .. وقاعد على الرصيف ووشه مقابل للبنات اللى قاعدين قصادهم الناحيه التانيه .... وبيبص ل سلمى نظرات خاطفه )
مصطفى : ايه ياعم ايه القعده دى
احمد : مش عارف
مصطفى : مش عارف ايه ؟ بقولك انت قاعد كده ليه
احمد : ( بيبص ع الشباب وبينادى ل مصطفى يقرب عشان يوشوشه )
مصطفى : ايه ؟
احمد : البت شكلها واخده الموضوع بجد
مصطفى : احسسسسسسسسسن . ياكش تربي أهلك .. اسكت دا محدش بيفرح قلبى غيرها والله من اللى بتعمله فيك ... قابل بقي يا وحش ورينى هتصلح القرف اللى عملته ازاى
احمد : على فكره انتو شويه اوساخ .. غور يالا من هنا يالا
........
( ساره وسلمى جنب البنات بس بيتشوشوا )
ساره : الواد متنح ههههههههههههههه نظراته ليك نظرات غريبه اوى
سلمى : ههههههه عامله ازاى النظرات دى
ساره : شوفتى اللى هو مش مصدق اللى شايفه او مذهول او متعكنن .. او ندمان هههههههههه كلهم على بعض ... وخصوصا خصوصا نظرات تأنيب الضمير
سلمى : لا ولسا
.........
( احمد قاعد لسا وحاطط رجل على رجل وعمال يأزأز ف لب وباصص ناحية سلمى بردو بس ف الخباثه )
............
سلمى : بقولك ايه يا ساره . احنا هننفذ دلوقتى
ساره : دلوقتى ؟
سلمى : اه ... احم احم . اسكتى بقي ........ بقولكوا ايه يا بنات انا همشي انا مش قادره مصدعه اوى
منه : مالك يا روحى اجى اوصلك
سلمى : لا مش مستاهله . انا همشي واحده واحده كده جايه معايا يا ساره ؟
ساره : اه ياريت والنبى . سلام يا بنات
سلمى : عن اذنكوا يا بنات
..........
سلمى : عن اذنكوا بقا يا شباب انا وساره ماشيين
مصطفى : ليه مالك
مالك : مالك ياسطا تعبانين ولا ايه
ساره : لا والله اصل صحينا بدرى النهارده وفضلنا نرغى ف هنروح ننام
سلمى : طيب هنسيبكوا بقا احنا يا شباب . عن اذنكوا .. عن اذنك يا مستر احمد
احمد : ( بيشاور بايده ) اهلا وسهلا .. اهلا
....
( سلمى بتعمل انها وساره ماشيين بس بيتكلموا بصوت عالى سيكا . عشان يخلوا احمد لوحده يسمع )
سلمى : زى ما قولتلك يا ساره . 9 بالظبط هنخرج .. المكان حلو اوى .. وهتبقي سهره عسل
...............
( احمد باصص عليهم وعمال يأزأز ف اللب وبيعضعض ف ضوافره ومش فاهم اى حاجه خااااالص )
....
الي اللقاء في الحلقه القادمه
كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels
لينك الكاتب
https://www.facebook.com/profile.php?id=100010381862587
لينك بيدج/ هو و هي
https://www.facebook.com/howa.weheyaa/
لينك بيدج/ stories and novels
https://www.facebook.com/StoriesAndNovels2020