ف الحلقه السابقه :_
احمد : طيب عن اذنك يا حاج
طاهر : خد هنا ياض
احمد : نعم
طاهر : خد يوميتك
احمد : لا مش عاوز . ماشتغلتش عشان اخدها ... ( بيسيبه ويمشى )
............. ( الثانيه ) ❤
( ع القهوه بعد العصر )
مصطفى : انت فين يالا ؟ قلبنا عليك المكان .. مش ناوى تشتريلك محمول كده تخليه معاك بدل ماحنا دايخين وراك كده
احمد : اعمل بيه ايه يا عم .. المهم عملتو ايه النهارده
حسن : لوز اللوز الامتحان جاى ف مستوى الطالب الغبى ... كلم يا على
على : يلا يابن الكلب يا واطي انا غبي ؟ دانت اكبر حلوف
مصطفى : هههههههههههههه عليا الطلبات انتو الاتنين جوز حلاليف
احمد : طب عليا النعمه انتو التلاته بهايم ههههههههه
مصطفى : هههههههههه انت ايه مخلص الماده ولا ايه ماتقوم تذاكر يالا
احمد : مذاكر ياعم وبعدين الفيزيا لعبتى اساسا .. ماشوفتش الواد سيف ؟
مصطفى : كان هنا من شويه .. عاوزه ف ايه ؟
احمد : مافيش اهو نشوفه هبب ايه هو كمان
مصطفى : لا تمام تمام ده واد دوقرم بيقول حل كويس يابنى الامتحان سهل والله
احمد : اه ابوه هيدخله شرطه عقبال عندكو
طارق : مسا الفل يا شباب ... بقولك ايه يا ابو حميد ثوانى كده
مصطفى : مسا الفل يا طروق ماتقعد تشرب شاى
طارق : حبيبى ... دقيقه بسس يا احمد
احمد : عن اذنكو يا شباب
...
احمد : ايه يا معلم
طارق : بقولك ايه انت فاضي
احمد : اه فاضي فيه حاجه
طارق : طب فيه 5 متر رمل و 20 شكاره اسمنت عاوزين نطلعهم . جاي ولا ايه ؟
احمد : طبعا جاى . انت رايح امتى ؟
طارق : انا والله قولت اعدى ع القهوه اشوفك لو ماكنتش شوفتك كنت همشي
احمد : طيب خدنى وراك ع المكنه ..... صاصاااا ! ساعه وراجع
مصطفى : ماشى يا كبير
..............
( البنات بعد العصر )
منه : مش مصدقه ان الامتحان جاى سهل اوى السنادى اول مره
سلمى : اه جدا ...
ساره : الحمد لله .... ناويين تدخلو ايه يا بنات
منه : انا وسلمى هندخل تجاره ومتفقين على كده عشان هنكمل شركات ابويا وابوها ونعرف نكمل الثروه دى
سلمى : بالظبط .. ومتفقه مع بابا حتى لو جبت اعلى من كده
مروه : نظريا انا نفسي ادخل صيدله علميا هدخل معاكو تجاره لان مجموعى مش هيجيب اكتر من كده هههههههههههه
منه : المهم كل واحده على بيتها بقا تروح تجهز نفسها عشان هندخل سينما ونشبرق على نفسنا شويه بدل عكننه الامتحانات والسنه دى كلها .... اعوذ بالله دى كانت سنه كبيسه ... بقولك ايه اتصلى ع البت فريده بردو تعمل حسابها . عاوزينها خروجه مسخره ههههههههههههههه
سلمى : طيب يلا .. على 7 كده نخرج
منه : اشطا .. يلا
.................
( بالليل ف شقة احمد )
احمد : اوعو تكونو اتعشيتو
ام احمد : لا يا قلبي مستنيينك . جبت ايه كده ؟
احمد : أكلة كفته انما ايه ولتر بيبسي اهو عشان عارف العيال دى بتحبه ههههههههههه
ندى : الله ع الريحه
احمد : هاتى اطباق وكوبايات يا سالى وتعالى يلا نتعشى
سالى : هوا
ام احمد : يديك طولة العمر .. زى ماكان ابوك بيعمل
احمد : ربنا يرحمه يامه .. بتتفرجو على ايه ؟
ام احمد : انا عارفه لاختك القرده دى . كل يوم نلاقيها جايبالنا فيلم اجنبى مانعرفوش وقاعده مرابطه قدامه .. دى بتفضحنا وتفتحلنا المناحه بتاعتها لو حد قلب
احمد : انتى يا زبله يا صغيره انتى لما انتى لسا مطلعتيش م البيضه وعارفه كل الافلام الاجنبي دى كلها اللى انا معرفهاش . اومال لما تكبرى شويه هتعملى ايه
سالى : اعمل ايه ياعم .الروايه ملك ل بيدج هو وهى بس نبطل نتفرج يعنى وبعدين بحب اتفرج عليهم
احمد : طيب فين الكوبايات
سالى : ايه ده هو انا ماجيبتهاش
احمد : قومى يا جزمه هاتيهم لاحسن هقفل التليفزيون ده
سالى : ههههههههه خلاص يا عم
........
ام احمد : رايح فين دلوقتى
احمد : نازل اقعد مع العيال شويه ع القهوه
ام احمد : يابنى مش هتذاكر . اخر امتحان ليك بكره
احمد : هههههههههه ساعه مش هتأخر يامه ماتقلقيش .. وبعدين الفيزيا دى لعبتنا يا ست الكل
ام احمد : ربنا يكرمك يابنى ويرزقك برزقنا ورزق اخواتك ويوقفلك ولاد الحلال ف حياتك يا احمد يابن قلبي
...............
( البنات وهما خارجين م السينما )
ساره : ايه الفيلم القذر ده هههههههههههههه كله بوس بوس مافيش احضان خالص
منه : هههههههههه يلا يا سافله
مروه : ههههههههههههه امممممممممواح . دنا كنت هبوس الواد اللى كان جنبي من كتر سفالة الفيلم .. بس فيلم جبار .. قصته حلوه اوى بعيدا عن ان الواد والبت الابطال مزز
منه : حقا يا بت يا مروه .... ولا ايه رايك يا فريده
فريده : الفيلم كان يجنن بجد ايه الرومانسيه دى ... اقطع دراعى ان كان فيه حد فاهم يعنى ايه رومانسيه بالشكل ده ف البلد كلها ... صح يا سلمى ؟
سلمى : هاه ؟
ساره : سيبو سلمى ف حالها . دى حالتها حاله ... سلمى تعشق الافلام والقصص والروايات الرومانسيه بطريقه غبيه ... عشان كده مش بعيد ان اللى هتحبه ويحبها يكون بطل من ضمن ابطال الروايات بتاعتها دى .. كائن مش موجود ف الوجود
فريده : ههههههههههههههه عندك حق يا بت يا ساره
سلمى : ومين قالك بقا انه مش موجود ؟
انا بدور عليه ف وشوش الناس اللى ف الشوارع يمكن المحه ولو صدفه
منه : تلمحى مين ؟
سلمى : بطل الروايه بتاعتى
منه : هههههههههههه طب اوصفيهولنا كده
سلمى : جدع ف زمن الجدعنه مابقتش موجوده فيه
شهم وفيه نخوه ولاد البلد . دمه حامى واتحامى وراه من كل الدنيا
وامممممممم شكله بقا يكون واد حليوه كده لما يسبلى بعنيه اتوه واسرح لبعيد
منه : ههههههههههههههه وعيونه عاوزااها لونها ايه اخضر ولا ازرق ؟
سلمى : تؤتؤتؤ عاوزاها عسلى . حاجه معسله كده تجيب قلبى الارض
طويل طبعا عشان مش معقول هيكون ف طولى او اقصر منى دنا اروح فيها
والاهم من ده كله يخطفنى من حياتى ومن دنيتى ولما اشوفه قلبى يتخلع من مكانه
منه : وانتى وحياة ابوك فاكره نفسك هتلاقي البطل بتاعك ده فين ؟
سلمى : هلاقيه والله ... ماهو مش بعد كل الاحلام دى كلها ومالقيهوش ده حتى مايبقاش صح هههههههههههههههههههه
فريده : أحلام ايه ؟
منه : سلمى يا ستى رسمت رسمه ل وش واحد عندها ولما سالناها وش مين ده قالت ده وش حلمت بيه ورسمته عشان افضل فاكراه
فريده : ههههههههههههههه ايه الافلام دى يا بت . ادى اخرة الفرجه على الافلام الهابطه بتاعتك
سلمى : ههههههههههههههههههه اه يا جزمه ... طب وحياة امى بكره ييجى ويخطفنى واغيظكو يا كلاب .. واللى هتفكر بس تبصله بصه واحده بعنيها هاكلها
فريده : مش عاوزه منك حاجه
منه : والله يا سلمى عشان اكون امينه معاك .. لو طلع واد حلو كده احتمال اطمع فيه هههههههههههههههههههه
.................
( ع القهوه )
مصطفى : هلا بالغالي .. تشيش ؟
احمد : ايوه منا نازل عشان اشيش
حسن : الواد طارق خدك وروحتو فين
احمد : كان عنده شغلانه كده وروحت معاه
على : شغل ايه . قصدك ؟
احمد : اه قصدى
مصطفى : انت بتتكلم بجد ؟
احمد : اه بتكلم بجد . عيب ولا حرام ؟ وبعدين دى مش اول مره . دى عاشر مره تقريبا ههههههههههههههههههه
على : بتطلع رمل واسمنت وطوب معاه
احمد : اه
مصطفى : كنتو شغالين ف انهى دور النهارده
احمد : والله يا مصطفى الشقه كانت ف الدور الرابع ههههههههههههههه الواحد ضهره كان هيتقطم
حسن : ( بيبص لاحمد بانبهار )
احمد : كريييييم ! حجر شيشه والنبى يا كريم
كريم : عيونى يا حبيبنا
مصطفى : بس جسمك اتقسم يابن الجزمه وبقيت متدور ومحلو ف نفسك كده من الشيل والحط ... لو كنت بتروح الجيم 10 سنين ماكنش جسمك هيبقى بالفجر ده هههههههههههههههههههه طلعلك سكس بكس ولا لسا
احمد : من بدرى ههههههههههههههههههه تلاعبنى ريست ؟
مصطفى : ريست مين يا عمنا بمنظر دراعك دانت لو سلمت عليا دراعى هيتخلع ف ايدك
احمد : ههههههههههههههههههه عيال سيس وطريه . انشفوا شويه
على : طول عمرى اقول انى لو كنت بنت كنت اتجوزت الواد حمو هههههههههههههههههه
احمد : يلا يا شواذ يا ولاد الكلب
على : ههههههههههههههههههههههههههههههه
مصطفى : هههههههههههههههههههههههههههههههههه
حسن : ههههههههههههههههههههههه يخربيت فقرك ..اه صحيح نسيت اقولك .. البت مياده النهارده كانت منهاره بسببك
احمد : بسببى انا ؟ وانا مالى
حسن : ههههههههههه فين احمد طب هيخلص امتحانه امتى طب معرفش ايه طب سلمولى عليه طب يعنى ايه مش هنشوفه تانى ولا ايه . هو كده خلاص زمالة الثانوى مش هتتكرر تانى ولا ايه كانت هتعيط والله وانا اقولها ياستى اهدى ابقى تعاليله بكره بعد الامتحان شوفيه وقالتلى ماشى . اعمل حسابك هتلاقيها قدام المدرسه بكره وانت خارج
احمد : دانت عيل واااطى يا اخى
حسن : واطى ايه بس البنات كلها هتلاقيها كلها قدام المدرسه بكره ... صحيح مين اللى بيقعد جنبك م البنات ف الامتحان
احمد : البت ايمان على يمينى ف الصف الوسطانى وكل شويه الاقيها باصالى وتقولى والنبى يا احمد السؤال الاول والنبى يا احمد السؤال التانى هههههههههههههههههه والبت اسراء قدامى لزق قفاها بيغرينى يا اخى ببقى عاوز الطشلها وانا قاعد . خصوصا لما ترجع براسها لورا كده وتقولى على صوتك ياواد انت مش سامعه بتقول ايه ههههههههههههههههه اقسم بالله مناظر ف اللجنه بتاعتى تهلك م الضحك
مصطفى : يا اخى ربع حظك مع البنات بس وهتبقى جبرت معايا . ايه كمية البنات دى ياض والغريبه انهم مش عاجبينك جاتك ستين نيله .. دى اقل واحده فيهم تهلك
احمد : ههههههههههههه ان جيت للحق هما شوية بنات عسل ومزز بس انا مش ببصلهم ع الشكل ده يابنى ..
بصوا يا عيال
حبك لوليفتك بينبع من حاجتين
اولا اصلك وتربيتك اللى اتربيت عليها وخوفك على بنات الناس اللى هما ف الاصل بناتك واخواتك . لذلك انا لما باجى اتعامل مع اى بنت بتعامل معاها على الاساس ده ... اساس الجدعنه والصحوبيه وانى ممكن افديها برقبتى لو حسيت انها ف ضيقه . وعلى فكره ده هيحطنى ف صعوبات كتير ف حياتى مع الجنس اللطيف ههههههههه
نيجى بقا لتانى نقطه وأهمها
الحب يا عيال عامل زي المقص
طول ماهو الحدين بتوع المقص مربوطين مع بعض طول ماهو هيبقى شغال و100 فل وعشره . لكن لو العلاقه اتهزت او كل حد منهم قرر انه ياخد جنب لوحده او يتعامل مع التانى على انه اقل منه يبقى كده العلاقه كلها هتفشل
ماتسلمش قلبك لحد بسهوله
بس لما تحب ... علم الدنيا كلها يعنى ايه حب
افترى ف حبك
اعشق بضمير
طقطق ضلوع قلبها من ضمة حضنك لحضنها
احتويها يابنى انت وهو وماتخليهاش تتحوج لحد ولا حتى تتحوج لاهلها
انت تبقى أهلها وحبيبها واخوها وصاحبها
ضرورى جدا تبقى صاحب حبيبتك
ومش اى صاحب ... لا . الصاحب اللى ف اول العلاقه . اللى هو كنت بتلبس حلو وبتهتم بنفسك وبلسانك معاها عشان تشدها لشخصيتك ..
بكره انت وهو كل واحد فيكو هيحب وهيتحب
ودى وصيه من صاحب كان جدع معاكو العمر كله وانتو عارفين انا مابصاحبش غير الجدعان اللى زيي ....
لا تهينها .. ولا تزعلها .. ولا تكسر بخاطرها
كسر الخواطر لعنه . وجبرانها رحمات
ماتحوجهاش لمخلوق
املى فراغها واملى حياتها عبير فرح
انا مقتنع تماما ان فيه واحده عايشه معانا ف الدنيا دى هقابلها ف يوم من الايام فين وامتى وازاى ؟ معرفش .. ودى هتبقى المهلكه بتاعتى وكفى
على : كلامك على راسي يا سيد الناس بس هو سؤال واحد بس
احمد : هتلاقيه سؤال اهبل زيك .. اخلص اسال
على : هى مين عبير دى ؟
احمد : قوم اقفل باب القهوه يا حسن وهات السلبه من تحت الباترينه عشان فيه كلب هنا هيتعلق
مصطفى : ههههههههههههههه ههههههههههههههههههه هههههههههههههههههه هههههههههههههههه انا كان مالى ياربي ومال العيال دى
......................
الي اللقاء في الحلقه القادمه
كاتب الروايه هو احمد سعد و تم نشر الروايه مسبقا علي بيدج هو و هي و بيدج stories and novels
لينك الكاتب
https://www.facebook.com/profile.php?id=100010381862587
لينك بيدج/ هو و هي
https://www.facebook.com/howa.weheyaa/
لينك بيدج/ stories and novels
https://www.facebook.com/StoriesAndNovels2020