وريث آل نصران

وريث آل نصران (اقتباس)

#وريث_آل_نصران
#اقتباس لحد ما نرجع نستكملها الأسبوع الجاي بإذن الله،
يلا بسم الله 💖😂

_ عيسى لسه بيجيلك؟
كان يجلس على المقعد المقابل للمكتب بأريحية شديدة وهو يسأل هذا السؤال بينما من انتظر منه الرد في قمة ضجره يطالعه بنظرات متوترة ساخطة، في ناحية آخرى مر "عيسى" أسفل عيادة "نور" شعر بأنه في حاجة ملحة لجلسة هنا قبل أن يغادر إلى حيث قرر، ولكن الوقت متأخر للغاية، نوى أن يهاتف نور أولا ولكن قطع ذلك اتصال هاتفي أتاه، رقم مجهول ولكنه على يقين من كونها هي، فتح المكالمة وحل الصمت، يسمع تنهيداتها، قال هو أولا:
أنا عارف إنك "ملك"... صدقيني يا " ملك" كده
وقبل أن يكمل سمعها تقول بقهر:
متقولش حاجة، أنت حتى متستاهلش إني أسمع منك حاجة
نزلت دموعها وتابعت بألم:
أنت اديتني ضهرك ونسيت كل المرات اللي أنا رفضت أعمل فيها كده معاك،
تضاعف وجعها ووجعه وهتفت بانهيار:
أنت حتى متستاهلش إني ألومك يا "عيسى".
أغلقت الهاتف ومزقت فؤاده مع إغلاقها، وقبل أن يزيد وقع كلماتها من حزنه، قرر الصعود إلى " نور" بدون حتى اتصال، إن وجد المكان مغلق سيرحل ولم يكن يعلم بما يحاك في الأعلى، حيث "نور" يجلس مقابل "ثروت" بضيق جلي ويرد على سؤاله "عيسى لسه بيجيلك" بجملة:
لا مبيجيش.
اعتدل ثروت في جلسته وهو يسأل بابتسامة ماكرة:
مبيجيش ولا بتكدب.
أخرج "نور" انفعاله أخيرا إلى النور وهو يسأل باستهجان:
هو حضرتك عايز مني تاني إيه؟... مش كفاية اللي أنا عملته؟، أنا خونت مهنتي والمريض بتاعي ونقلتلك أسراره

_ وطي صوتك ده واهدى.
لم تكن جملة لتهدئته بل كانت جملة تحذيرية من ثروت دعمها بنظرات متوعدة ثم أضاف:
محدش ضربك على إيدك
رد عليه "نور" بانزعاج:
أنا عمري ما كنت هعمل كده لولا الفيديو اللي معاك، بتخيرني بين مستقبلي اللي عايز تمسحه بجرة قلم وبين حاجة أنت عايزها، أنا أسف بس كل اللي عندي بخصوص عيسى خلص وأنا قولته لحضرتك قبل كده

سأله ببرود:
قولتلي إيه؟
فعلق "نور" على جوابه وقد طفح كيله:
قولت لحضرتك إنه متشخص IDE، عنده مشاكل أسرية، ومشاكل سببها المرحوم جوز بنت حضرتك، وإني مش هخالف مهنتي أكتر من كده وأديله أي أدوية من اللي حضرتك اقترحتها علشان عارف أثرها عليه كويس، أنا عيسى المريض بتاعي وهدفي علاجه، على الأقل أبقى قدمت حاجة صح بعد اللي عملته معاه.

_ مجنون يعني.
قال هذا "ثروت" ببساطة جعلت "نور" ينفر من حديثه ويرد:
وهي "بيري" بنت حضرتك بقت مجنونة علشان بتجيلي هنا؟... اللي حضرتك بتقوله ده غلط.

استنكر "ثروت" القول على ابنته وصحح له من وجهة نظره:
بيري اتعرضت لصدمة أثرت عليها نفسيا فبتساعدها تسترد ثقتها بنفسها، أنت هتقارنها بالمختل ده...أنت بنفسك قايلي إن أقل نوبة من اللي بتجيله تخليه يفقد أي ذرة عقل، وفي الاخر تقولي مش مجنون، يبقى كده بقى أنت اللي مجنون.

كانت العيادة فارغة لا يوجد بها سواهما حتى المساعد انصرف ولم يتوقعا أبدا دخوله عليهما، لم يخطر ببالهما حدوث هذا السيناريو، دلف بابتسامة وطالع "نور" أولا وقال:
ازيك يا دكتور "نور"... يارب تكون صحتك كويسة
ثم استدار لثروت وهلل مرحبًا:
معالي الوزير أهلا أهلا، آخر حد كنت أتوقع أشوفه هنا، لا وجاي لوحدك ومن غير حرس
ثم التقط الموضوع على الطاولة وأضاف بسخرية:
ولابس كاب على أساس كده محدش هيعرفك يعني.

حاول " نور" التفاهم معه حين قال:
عيسى ممكن تقعد وتسمعني.
هز "عيسى" رأسه نافيًا وهو يردف:
لا انسى، أنا عندي سؤال بس
طالعه "ثروت" ببرود و"نور" بقلق وسأل هو:
قولت لمعالي الوزير المختل المجنون لما بتجيله النوبة بيعمل إيه؟
طالعا بعضهما فقال "عيسى" بضحك:
يبقى مقولتش، حلو... ثروت باشا
نادى عليه ثم ختم:
المختل المجنون "عيسى نصران" هيوريك حالا مشهد تمثيلي لل IDE لايڤ .
أنهى حديثه ثم جذب المقعد وقذفه باتجاه ثروت مما جعل الأخير يطالعه بذهول وقد اختفى الاستهتار من وجهه وتيقن من أن الواقف أمامه ينوي كارثة الآن... نوى أن يثبت أنه ملك الأفعال المفاجأة مرة جديدة تضاف لمراته التي لا تُحصى.

مشهد من أهم مشاهد الفصول الجاية ده، ادعولي بقى إن درجاتي تكون كويسة ويسهلها عليا كده، وللمرة المية والله الناس اللي بتستنى رغم التأخير دول على دماغي وشكرا ليهم، واللي قرر يستناها pdf برضو والله شكرا جدا ليه، واللي وقفها خالص باحترام برضو أنا محترماه، وأنا من بداية ما بقيت أتعثر في التنزيل قولت لو حد متضايق ممكن فضلا يستناها pdf كاملة، لكن أنا لو واحد بس مستنيني أنزل هنزل، ومش هقوله استناها اكملها كلها، وآخر حاجة معلش الناس اللي بتكتب على الجروبات إن الرواية ١٧٠ فصل، الرواية تلات أجزاء يا جماعة يعني سلسلة وهما مكملوش ١٣٠ فصل، ١٧٠ ده معرفش اللي قاله كان بناءا على إيه، العدد المكتوب على واتباد ده مش عدد الفصول، ده متضاف ليهم الاقتباسات وكل المرات اللي نزلت حاجة غير الفصل فيها، علشان كده مبحبش انزل أي حاجة هنا بس مقدرش علشان اللي بيتابعوني، ادعولي علشان الامتحانات ضغطتني جامد ومشروع التخرج كمان ادعوا يتسهل كده، وتصبحوا على خير 💙