Falling for the Billionairess (Published by Bookware)

Day 7 - Later that Night

A/N: Hinanap ko 'yung scene kung saan sinulat kong biyuda si Tita Vera pero I think I accidentally deleted it when I edited this part. The second half of Ash and Meredith's conversation was supposed to be by the pool but I changed my mind and took that out. I must have taken out the part where Meredith told Ash about how Tita Vera was a widow along with it. Edited and added the lines. Nalimutan ko na kung paano ko ipinaliwanag :"> so I just had Mere mention it here. Thank you @CIRUSTRALUBUS for pointing it out :)

BUONG dinner magaan ang mood ko. Masaya ako. Ang sarap ng pagkain so masaya ang tiyan ko. Katabi at kakwentuhan ko si Meredith kaya masaya ang puso ko (naks!). At masaya ring ka-kwentuhan sina Tita Vera at Ninong Ernest at isinusumpa ko may namamagitan talaga sa kanila.

Lumapit ang parents ni Meredith sa table namin mayamaya. Tumayo ako nang ipakilala ako ni Meredith sa kanila bilang si "my friend, Ash".

Oo na, friend na naman pero alalahanin, mas mabuti na ang friend kaysa assistant. Mas mataas ang level ng friend sa assistant.

Ang kisig na lalaki pala si Mr. Balajadia. Nakita ko naman na siya sa mga pictures pero iba pala kapag live and in person. Puti na ang buhok niya pero imbis na magmukhang matanda, parang mas nakadagdag pa 'yun sa appeal niya. Ampogi talaga eh. Saka ang tangkad. Maganda rin si Mrs. Balajadia. Kamuha siya nina Meredith at Tita Vera na kapatid pala niya.

"It's a pleasure to meet you, hijo," sabi ni Mr. Balajadia na malaki ang ngiti. Magaan ang aura niya at mukhang mabait naman. Nakipagkamay siya sa 'kin at kahit pa na-starstruck ako, di ko naman ipinahiya ang boss ko. "Are you enjoying yourself?" tanong niya.

"Yes, sir," sabi ko. "Ang sarap po ng pagkain." Binalingan ko ang asawa niya. Ang sweet kasi magka-holding hands sila. "Sabi po ni Meredith kayo raw po ang nagluto. The food is even better than those served in a five-star restaurant. So my stomach and I thank you."

Tumawa ang mommy ni Meredith. "And my charmed heart and I thank you," sabi niya. "'Wag kang mahiya, hijo ha. Kumain ka lang. Nothing makes me happier than people who enjoy their food."

"Ay, sure po, ma'am. Pag-alis ko mamaya, XL na po 'tong suot kong long-sleeves."

Tumawa ulit ang mommy ni Meredith. "Meredith was right. You are a charmer." Then, tinapik niya ako sa pisngi, which, in my world, is a seal of approval.

Kinamusta ng daddy niya si Kuya Lex. Sabihin na kasi nating si Kuya Lex ang... sino ba'ng sikat na teen na artista ngayon? Basta siya 'yun, 'yung batang magaling sa ginagawa niya at sumisikat nang todo-todo. Yeah, si Kuya Lex 'yung equivalent n'un sa business world. Sinabi kong okay naman siya at busy sa kung anu-anong pinagkakaabalahan.

"So gagaya ka ba kay Ernest?" pabirong tanong ni Mr. Balajadia. "Sa 'min ka na rin ba magtatrabaho?"

Tumawa ako kahit biglang nahiya. Malamang alam niyang empleyado niya ako di ba? Sana hindi sila nagtataka na imbitado ako ni Meredith at ipinakilala ako bilang kaibigan kahit pa alipin lang naman ako sa kompanya. "Depende po kay Ma'am Meredith 'yun," sabi ko, sinusulyapan ang katabi kong nakatayo na rin.

Hinawakan niya ako sa braso. "He's doing great, Daddy," sabi niya. "'Pag masubukan mong maging assistant si Ash, baka di ka na mag-alala kung saan kukuha ng kapalit ni Ate Helga 'pag nag-retire siya next year."

"Aba, good! 'Pag balik ni Sheri, sa 'kin mo na lang pagtrabahuhin si Ash."

"Naku," natatawa kong saad. "Baka mabura ko lahat ng files ng department n'yo, Sir!"

"At laging maling kape ang dadalhin niya sa inyo tuwing umaga," dagdag ng boss ko.

Nagkatinginan kami bago sabay na tumawa.