★اقتباس من لا تؤذوني في عائشة الورقي★
_مش عايزة أكمل.
تصرح "عائشة" بذعر جاهدت لتخفيه ويحل محله ثباتها، أما هو فلم يتوقع أن تتراجع الآن، وتحديدا وهما معًا في غرفتهما، ليلة الزفاف.
ابتلعت ريقها بتوتر وأكملت:
خلاص مش عايزة الحاجة اللي كنت عايزاها منك.
لم يبن على وجه "حامي" أي ردة فعل وكأنه بلا مشاعر، فقط سألها باستهزاء بين:
وجاية تفتكري بقى دلوقتي، والليلة دي تحديدا، ده أنتِ غلبتي "سالي" خطيبة أخوكي، على الأقل هي عملتها قبل كتب الكتاب، مش في أوضة النوم.
اقترب منها، ولم تتحرك هي، ظلت ثابتة، وكأنها ترسل له أنها ليست خائفة، على عكس ما يعصف بها، وأكمل هو حديثه ساخرًا:
تخيلي كده يا "عيوش" اسمع كلامك، والعروسة ترجع بيتها تاني يوم فرحها، عارفة هيتقال عليكي إيه؟
تعلم جيدا، ولأنها تعلم صمتت، وتحدتها نظراته وهو يقول بابتسامة:
خلاص خلصت، وقت الاختيار خلص.
_ يعني إيه خلص؟
سألته بحدة، وجاوبها هو ببرود:
يعني أنا قولتلك كتير أوي إنك تقدري ترجعي في قرارك قبل ما تبقي هنا، وكملتي بإرادتك، محدش غصبك، وأنا من ناحيتي عملت اللي عليا للآخر، اتقدمت لأخوكي، واستنيت شهر واتنين المسلسل البايخ ده يخلص، وخيرتك، أظن كل حاجة كانت برغبتك، احنا متفقين إنها عرض وطلب، بس قبل كده كان مسموح إنك تخلعي، لكن بعد ما بإيدك مضيتي في الدفتر
غمز لها وختم:
بقى لا يا "وحش".
ثارت ثورتها، أمام أقواله هذه، وبان هذا في نبرتها:
يعني إيه لا، أنا لو عايزة امشي من هنا همشي.
_ مش هيحصل.
ارتفعا حاجبيها بغير تصديق وهي تسأله:
هتحبسني يعني؟
برزت ابتسامة جانبية على وجهه قبل أن يقول:
والله لو ده الأسلوب اللي بينفع معاكي، مفيش مانع.
تضغط بأظافرها في باطن كفها، تفرغ غضبها هكذا، تحاول الوصول معه إلى حل فهتفت:
أنا خلاص مش عايزة حاجة منك، خليني على ذمتك كام شهر ونتطلق ونقول متفقناش.
ابتسم ساخرًا وهو يرد:
ده بيحصل في الأفلام، وكتب الروايات بس، وبيطلع شهم معاها وينفذ طلبها
زاد من اقترابه منها، حتى أصبح أمامها تماما لا يفصل بينهما شيء، توترت وبشدة من أنفاسه التي تصفع بشرتها، وعيناه التي تتجول على وجهها برفقة يده وهو يكمل:
لكن لما بتنزلي أرض الواقع بقى بتلاقي البشر أوغاد،
وعلشان أعرفك بيا وأكون صادق معاكي
ابتسم ويده تمسح على شفتيها خاتمًا:
فأنا أكبر وغد فيهم.
★***★***★***★***★***★***★***★***★***★
ده اقتباس من أحداث رواية "لا تؤذوني في عائشة" في ثوبها الورقي الجديد، متحمسة جدا تقرأوا الرواية بعد التعديلات
ومتأكدة إنها إن شاء الله هتعجبكم جدا
قولولي رأيكم ومتحمسين ولا لا؟ 😂❤
وبإذن الله في فصل وريث قريب بكتب فيه وهينزل 💙