طوبى الجزء الاول

الجزء السابع والخمسين

#طوبى "جنة طوبى"
#جمان_فريد
#الجزء_السابع_والخمسين"مخبأ منحة محنه"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
☕☕☕☕☕☕☕☕☕☕☕☕☕☕☕☕☕
🍃 ‏إنّ الأمُور إذَا إلتَوت وتعقدت ،
نزلَ القضَاءُ مِنَ الفضاءِ وحلها،
فاصبِر لها، فلعلهَا، ولعلهَا،
ولعلّ مَن خلقَ الفضاء يحُلّها🍃
🍀🍀🍀🍀🍀🍀🍀🍀🍀
بعد يومين..
السبت...
3فبراير..سنة 2018..
درست سيارة أجره قدام فتحة الشارع..
انفتح الباب ونزل منها سكره..
ومشي ع رجليه وخش للشارع..
ملامح الكآبه باديه ع وجهه بس هو يحاول يظهر العكس..
اصلا عاش عمره وهو يخفي في حزنه وضعفه عن عيون الناس..
بس بعد اللي صار لبنته..سنده الوحيد من بعد الله في حياته..
ولى مش قادر يخفي شي ع قد مايحاول..
وهو ماشي..
فات من قدام الورشه اللي يخدم فيها بلال..
لما شافه..استأذن من صاحب الورشه ومشاله..
قعد ينادي عليه..
"عمي لطفي"..
لطفي وقف والتفتله..
قدمله وهو يقول:كيف حالك اليوم؟
ابتسم برضا وقال؛الحمد لله ع كل حال..
بلال؛لماذا مشيت بالسيارة وروحت بدونها؟خاربه؟
حرك راسه بالنفي بعدين قال؛بعتها..
بدت ع وجهه بلال ملامح الاسف برغم الابتسامه المرسومه ع وجهه وقال:تمنيت لو كان في يدي حيله..وعندي ماأساعدكم بيه فضلكم عليا من بعد الله كبير..
لطفي بإبتسامه؛ساد انك فكرت في الحاجه هادي يابلال..وبعدين ياولدي مافيه حد ليه فضل عليك كان ربي..
بلال بإبتسامة ألم:فرج الله عنكم..
هز لطفي راسه وقال؛آمين..السلام عليكم..
ومشي كمل الطريق للحوش وبلال واقف يشوفله وهو موجوع ع حال هالعيله اللي يشوف فيها بنظرة بشريه قاصره انها ماتستحقش اللي يصير معاها..
🍃ولطفي ماشي لحوشه فات من قدام محل الحلاق فراس التونسي اللي كان عنده زبون وقتها..
شافه وهو فايت بعدين قال؛والله مايستاهلوا اللي يصير فيهم العيله هادي..
الزبون:صدقت..الله غالب..
هز راسه وقال؛الله غالب..
🍃وفي منطقه بعيده عن شارع القهوة..
المنطقه اللي تسكن فيها اصغر بنات لطفي..
كانت في الفيلا..
تحديدا في دار النوم..
مقعمزة قدام الزيانه المحطوط عليها شنطة ذهبها..
وهي تراجي في راجلها امتى يروح..
سمعت صوت الباب الخارجي..
تنهدت وقال؛يارب..
ضمت ايديها ع بعضها وقعدت بصمت تستنى امتى يخش عليها..
وبعد مرور بضع دقائق..
خش الجالي للدار وهو يقول؛حبيبي..شن جو.
وجهت نفسها ليه وقالت؛الحمد لله..
هو حول البالطوا متاعه وعيونه عليها..
وجهها أصفر..تحت عيونه هالات سود ومنفخات..
لابسه توته ورافعه شعرها فوق..مش لابسه حتى خراص"حلق" في وذانها..
مش نفسها طوبى اللي ديما تكون زي مايقولوا ..
"ع سنقة عشرة"..
لبس ومكياج..وشعر مسرح بطريقه حلوة..
ضايقه شكلها هدا اللي مش متعود عليه..
طوبى:جالي..
جاها وقف قدامها وهو يشوف للي فوق الزيانه:نعم؟
خدت نفس وقالت:الذهب هدا ليا اني ولا؟
شبحلها وقال؛اكيد..
طوبى:يعني نقدر نتصرف فيه كيف مانبي..
هز راسه وقال:أكيد..
طوبى:نبي نعطيه لبوي..
شبحلها شويه بعدين قال؛اني نعطيه ضعف حق ذهبك كله..
ناضت وقفت وهي تقول:بارك الله فيك..لكن انت تعرف بوي كويس مش حيقبله..
عقد الجالي حواجبه وهو يشوف للذهب.
ركزت عليه وقالت؛لو مش راضي خلاص انسى..
حرك راسه بالنفي وقال:لانهائي..قتلك بكري هدا ذهبك انتي وليك حرية التصرف فيه..ضيق عيونه وقال..درتي غدي؟
طوبى:ايه..
الجالي؛تمام انزلي وتيه جعان جعان..
شدت يده وقالت؛صحيت جالي..
هو قال:شن صحيت هادي!؟ اني راجلك راهو..وبعدين اني مادرت شي..
ابتسمت بإمتنان وهي تشوفله..
وهو باس جبينها وقال:هي انزلي حبيبي بسرعه نبدل ونلحقك..
طوبى:حاضر..
ومشت طلعت من حداه وهو معاه بعيونه..
تبدلت ملامح وجهه للضيق..
ومشي للدولاب بيطلع حوايجه وهو معصب لأنه لأول مرة مايلقاش حوايجه واتيات ومحطوطات ع السرير يراجو فيه..
☘☘☘☘☘
وفي المصحه..
كان خوه الكبير مقعمز ع كرسي في جناحه حدا الروشن وهو يشوف برا..
او يشوف في الفراغ وسرحان.
فجأه..
دق الباب دقه وحده وانفتح وخش عليه واحد من خوته..
عمر بقلق:مهدي..
شبحله..
وصل فيه وباس ع راسه بعدين قال؛اقسم بالله ماسمعت الا اليوم بعد ماروحت..اني مش عارفه الحركة البايخه اللي يديروا فيها خوتك صارت حاجه مفروض يخبروني عليها ان شاء الله نكون في أخر الدنيا..معقوله خوي يمرض ويخش مستشفى واني اخر من يعلم..
المهدي؛ماتكبرهاش انت التاني مافيا شي...
عمر؛كيف مافيك شي دارولك قسطرة مرة تانيه..
المهدي؛وبيديروها مرة تالته ورابعه هدا الطبيعي متاع حالتي والعمليه عاديه بنج موضعي ولافي فتح ولاجرح...ماعانيتش زي ماهي عانت...
عمر قعمز ع الكرسي اللي مقابله وقال:قالوا خشت غيبوبه..
المهدي شاف للروشن وقال:ياريت حالي من حالها..
عمر:استغفر ربك ياراجل شن الدوة هادي!؟..
تنهد وقال:استغفر الله...
عمر:ربي يفرج عليها وعلى ماليها..المهم انت لازم تطلع برا تشوف وضعك الدكتور قال عندك مشكلة في كهرباء القلب..
المهدي:خلاص اهو السبب معروف علاش نطلع برا نبهدل ونتبهدل..
عمر:بش تتأكد من السبب مرات يطلع التشخيص غلط وتطلع عندك مشكة تانيه لاقدر الله..
تنهد المهدي وقعد ساكت..
عمر:مهدي انت عندك عيله..عند صغار مازال يبوك..
وهو يسمع في كلام بدون مايشوفله وتأثر بيه..
حبه كأب مايعادلاش أي حب...أي شي يعنيهم يوقف عنده هلبه..
وفي نفسه قال..
"ماعشت الا على خاطرهم"
☘☘☘☘☘
"تفضلي اختي"
هي طلعت كيسة وحطت فيها الفلوس اللي حصلتهم من بيعة ذهبها..
بعدين لفتهم كويس ودستهم في الشنطه..
ومشت بتطلع وهي تقول:السلام عليكم..
🍃طلعت وركبت سيارتها..
بعدين دارت اتصال...
ايوه وعليكم السلام..وينكم؟!....خلاص اني جاية في الطريق..
سكرت..
وحطت تليفونها قدامها بعدين شغلت سيارتها وتحركت متوجهه للمصحه....
🍃بعد ماقطعت مسافه لاباس بيها..
وصلت غادي..
ونزلت بشنطتها للمصحه..خشت..
لقتهم قدامها يراجوا فيها..
مشتلهم سلمت عليهم..بعدين مشوا مع بعض...
🍃🍃🍃🍃🍃
"تقدروا تخشوا"
فتحت الممرضه الباب..
وهما التلاته خشوا ورا بعض..
لما شافوها باالحاله اللي هي فيها..
دموعهم سالت...
وقلوبهم اعتصرت بألم...
ومر قدامهم شريط ذكريات..لأخر العمر مش حينسوها..
قدمت وحده فيهم والتانيات لحقوها..
قعمزت ع كرسي قريب عليها..
والتانيه قعمزت ع كرسي من الجهة التانيه..
والاخيره قعمزت مقابلتها ع السرير..
عائشه بنبرة باكيه؛سدرة..سدرة..سدرة نوضي بالله عليك..
وفايزة ونسرين يبكوا بصمت..
وهي تقول؛استغفر الله ياربي..اني لتوا مش مستوعبه..كيف راقده هكي وماتقدرش تنوض..سدرة..سدرة..
فايزة ببكي؛مهما ديريلها مش حتفيق..لو شن ديري..
نسرين؛ياربي..كنت نسمع عن الغيبوبه ونشوف فيها فالمسلسلات..ماتوقعتش يجيني يوم ونشوف حد نحبه فيها..
ضحكت فايزة من بين دموعها وقالت؛تتفكروا لما كنا نتلاقوا في حوشهم ونحطوا ع كاسندرا..تتفكروا كيف كانت تعلق ع المسلسل والابطال..
نسرين بضحكه:كانت تحب تتفرج ع السوريين بس..قوس قزح والفصول الأربعه..لن اعيش في جلباب ابي..
عائشه؛حارة المحروسه..
فايزة ونسرين بضحكه:ايييه..
فايزة:قداش كانت تكره صابرين وتشمتت فيها بعد ماضحك عليها مصطفى فهمي..
عائشه بضحكه:كان نوصل فيها نمرجها نمرسها..
مع بعض قالوا..نمسح عليها كندرتي..
بعدين ضحكوا..
ضحك في عزها تخفت..شبحولها وقلوبهم مقطعها الألم..
عائشه:تتفكروا لما نسيت واجب الجغرافيا ودرت مناحه من خوفي من ابلته وقتها..هي كتباته عني...
فايزة؛تكتب وتهزب فيك..
عائشه:ماخلت ماحطت..
نسرين؛ديما هكي..تتفكروا لما لقوا عندي شريط وائل كفوري وكليت طريحه ودارولي استدعاء ولي امر..بعد ماعطتني ع راسي مش معاي لأمي وهي كلمتها وحلفتها ماديريلي شي ولاتقول لبوي..تصدقوا امي كانت تتحشم منها ماتردلهاش في طلب..
فايزة؛زي امي الله يرحمها..اني زمان متاع فلايط وياما ساعدتني سدرة وتوسطلي ودرقت عليا..
ضحكت عائشه وقالت؛تتفكروا في عركتها مع نجوى بنت السعداوي..
نسرين:حيي هديكا العركه قريب قتلت البنت..
فايزة؛خلت وجهها خباش وقطعت شعرها وروحت نجوى لأمها تبكي وتغرد..
عائشه:خاالتي وردة الله يرحمها جت لأمي بش تمشي معاها تستسمح من مرت السعداوي قداش كانت متحشمه..
فايزة بضحكه؛ولاد الشارع كانوا يخافوا منها سدرة..
نسرين:الهراوة..
ضحكوا مع بعض..بعدين قعدوا يشبحولها..
فايزة بألم؛سدره كنتي حرفه صرفه تخوفي ياما درتي فيا بالذات ع خاطر المكياج واللبس انتي من جهة وعويشه من تركينه..
نسرين بوجع:ديما تقولي ياريتني بليده زيك يابليده..تتفكري..
عائشه وهي بتبكي؛كنتي تقوليلي حني خوات اني اختك وانتي اختي معاش تقولي ماعنديش خوات..
وياريتني كنت نستاهل تكوني اختي..اللي درته فيك لتوا مش قادرة نسامح روحي عليه..آذيتك هلبه وانتي قلتي انسيني..ونهار احتجت لقيتك قدامي اول وحده لوحتي كل شي وراك ولاكأنه صار..سدرة..
مكموده بالهم ياسدره..كنت بندير زي كل مرة نلجألك بعد ربي بش تساعديني..تخففي عني وتسنديني زي مايديروا الخوات لبعض..لكن ربي قدر شي تاني مافيش عليه اعتراض..
الحاجه الوحيده اللي نقدر نديرها اني نحط راسها ع كتفك زي زمان لما كنا نرقدوا حدا بعض..
وحطت راسها ع كتف سدره وقعدت تبكي...
وهني فايزة ونسرين عزمهم طاح..انهاروا بالبكي..
وهي وسطهم....
في سباتها العميق الطويل..في فضائها الخالي من الحياة..
تسمع فيهم شن يقولوا..لكن ماتقدرش تتفاعل معاهم ولاتقدر ترد عليهم...
☘☘☘☘☘
الساعه 5:00عصرا..
قدام قهوة الزعيم...
كان ربيع واقف ع نضال والزوز يتكلموا عن شخص..
ربيع؛شكله روح لبلاده..
نضال؛شكله لكن مفتاح الشقه ماسلماش..
ربيع؛جديات!؟
نضال؛والله ماسلمه..محمود قال ريته وهو راكب بشنطته سيارته وتحرك طول..
ربيع؛مرات نساه في الشقه وهو طالع معذور يانضال اليوم هداكا مافي حد كان بعقله يوم نتمنى ننساه ونطلع من راسي..
نضال بضيق:ياريت..
تنهد بحزن وقاله؛المهدي امتى يطلع
نضال:مش طالعها لين يسافروا بسدره..
ربيع؛ع كيفه هو؟
نضال؛ايه ع كيفه مصحه بالفلوس يدفعلهم يخلوه دكتور معاهم..
ربيع:اما خوك هدا عجيب ياراجل عمري ماعرفت يحب هكي في حياتي..قصدي حني الرجاله معروفين الحب عندنا عنده تاريخ صلاحيه يفوتها تمتله..
نضال؛هداكا انت ياغالي تكلم ع روحك بس..
ضحك ربيع وقال:ولاد شنيبه الحبيبه..
نضال:صقع عليك..حبنا حب سلاطين ياباشا..
ربيع وهو مضيق عيونه؛سلاطين هادي مثنى سلاطه صح..
نضال؛قصدك انت هكي! برا اخدم ع راسك وخليني نخدم ع راسي..
وربيع يضحك عليه..
🍃ومقابلهم..
قدام حوش الواعر درست سيارة الجالي..
نزلوا هو وطوبى..ومشوا مع بعض وخشوا للحوش..
🍃🍃🍃🍃🍃
"هادم اللي قدرت نجيبهم"
مطيره:من راجلك؟
طوبى:لاصرفت ذهبي..
صفيه:علاش يابنتي!
طوبى:شن علاش ياخالتي! فداها الدنيا كلها سدرة..
فردوس:اهم شي راجلك راضي..
طوبى؛قالي ذهبك وانتي حرة فيه ديري بيه اللي تبيه..
مطيره؛مادام هو راضي خلاص..
تنهدت غرفه وحطت ظرف فلوس وقالت:هدا اللي قدرت عليه..
مطيره:مش مشكله المهم يعاون..
فردوس بألم واحراج؛لو نعرف الدبله متاعي دير شي راني صرفتها..حقها مايفوتش 200 دينار...الله غالب ظروفي كسرتني ماخلتنيش ندير شي لوخيتي اللي ياما دارت ع خاطري اني وصغاري..وقعدت تبكي..
طوبى قعدت تمسح ع ظهرها وهي تقول:فردوس حبيبتي خلاص مافي حد لايم عليك..
مطيره:عارفينك لو عندك ماتقصريش سدرة تبي الدعاء اكثر من اي حاجه تانيه..
مسحت دموعها ووجهها وهي تقول؛يارب ردلنا وخيتي يارب..
كلهم قالوا:آمين..
فايزة اللي كانت موجوده معاهم وتسمع فيهم لين كملوا..
فتحت شنطتها وطلعت كيسةالفلوس وحطتها ع الطاوله..
شبحوله كلهم..
ومطيره قالت:هدا شنو بنتي؟
فايزة؛هدا حق سدرة عليا ومانبي حد يقولي لا ومايجيش ومن هالكلام اللي داراته سدرة معاي ماداروشي معايا خوتي..وزي ماقالت طوبى سدرة فداها الدنيا..
ابتسمت طوبى بألم..
ومطيره وهي تمسح في دموعها قالت؛فيك الخير يافايزة..
فايزة؛ماتقوليش الكلام بالله عليك اني زي غرفه وطوبى درت واجبي بس..
ابتسمت طوبى من بين دموعها وهي تشوفلها..
اريج بضيق:الله ياخد قلة الحيله اللي خلتنا نتفرجوا..
آلاء وجعها هلبه كلام اختها..
وتأثرت بيه امها وقعدت تبكي..
طوبى بضيق:تي غير علاش تقولي هكي يااريج ربي يهديك..
وقعدوا يهدوا في فردوس ويسكتوا فيه..
🍃وفي المربوعه..
كان لطفي مع بوه وولاد خوه ونساباته..
الجالي؛اي شي تبيه اني حاضر عمي..
لطفي؛بارك الله فيك ولدي بارك الله فيك..
ناض وهو يقول؛توا نبيكم تسامحوني.بنمشي وراي مشاوير ضروريه..
حسين قعد يشبحله بعدم تقبل من فوق لتحت..
والحاج علي يشوفله..
لطفي؛خود راحتك ولدي خوك راحتك..
الجالي:هي السلام عليكم..
كلهم ردوا عليه بأصوات متقطعه؛وعليكم السلام..
بعد ماطلع..
ناض عبد الرؤوف وفي يده شنطه متوسطه الحجم حطها قدام لطفي..
لطفي:شني هدا عبد الرؤوف..اني قلت مانبي منكم شي..
عبد الرؤوف:فاهم عليك عمي  انت ماتبيش تاخد من النسابه واني نشوف في روحي ولدكم مش نسيبكم واللي نديره معاكم واجب مش فضل ولاجميل..
لطفي:لكن اني أمنت المبلغ اللي محتاجه ماعندي ماندير بيهم هادم..
عبد الرؤوف؛خلاص دسهم ولما تحتاجهم اصرفهم مادامهم عندك توا حلالك والله مانك رادهم عليا..
هز علي راسه وهو يشوفله بإبتسامة اعجاب خفيفه..
لطفي؛ماعندي مانقول غير ربي يهديك وخلاص..
ولى قعمز وقال:المهم توا ربي يردلنا نسيبي زي قبل ان شاء الله وتنزاح الغمه..
لطفي بحزن؛آمين..
يوسف شبحله وقال؛قدمت ع اجازة مفتوحه وقبلوها..
لطفي وهو يشوفله؛سامحني ياولدي عطلت حياتك..
يوسف:عمي هادي اختي راهو اختي اختي هادي مش كلام وخلاص..نوقف حياتي كلها ع خاطرها..
حسين؛سدرة بالذات ياعمي مكانتها بروحها مهما نديروا معاها مانوفوهاش حقها..
لطفي شبح للفراغ وقال؛مايقدر حد يوفيها حقها..
☘☘☘☘☘
خشت عليها الدار وقالت..
نجاه؛بنمشي للشقه بعدين شويه..
صابرين؛وانتي ماتصدقي يكلمك يقولك هيا تطلعي تجري..
نجاة بتهكم؛بالله عليك اسكتي صابرين معاش تدوي ع الحاجات هادي.
صابرين:شن قصدك!؟
نجاة؛انتي فاهمه قصدي كويس اللي ماشيه معاه هدا راجلي حلالي..
صابرين؛لو انتي هكي تفكري تمام معناها مافيش فرق بيني وبينك غير انتي موقع معاك عقد..
نجاة بغضب؛ياتافهه اني خايفه عليك خايفه ضيعي روحك من الاول قتلك اعرفي تجيبه للطريق وتخليه يتزوجك مش هو يجيبك للطريق ويدير فيك مايبي وبعدين يلوحك..
صابرين بحده:نجاة الزمي حدودك ماتخلنيش نغلط فيك..
بتهكم ردت تقول؛قصدك انتي مازال ماغلطتيش..!
صابرين؛انتي اللي تستفزي فيا واللي يدق الباب يسمع الجواب..
قعدت تشبحلها وهي مبتسمع بخيبة أمل بعدين قالت؛بتجيك مروة تبات معاكم بصغارها..
ومشت طلعت من حداها وخلتها تحرق وتسحن عليها..
☘☘☘☘
"باهي هو كملهم؟"
طوبى؛قال بالكثير التلات يكمل الاجراءات..تعب هلبه بش حصل التأشيره..
فردوس:بارك الله فيه
طوبى قعدت ساكته وسرحت بتفكيرها..
فردوس:ماتوقعتش خالتي صفيه ديرها وتمشي معاها..
طوبى؛سدرة غير علينا بنتها هادي..
فردوس:فيها الخير...ويوسف حتى هو سيب خدمته بش يسافر معاها..
طوبى بإبتسامة ألم؛زمان تقول عليه توأمي..
بدت نفس الابتسامه ع وجه فردوس ولحقتها دمعه مسحتها طول..
وطوبى خلت دموعها تنزل وهي تتفكر في هلبه مواقف جمعت بين سدرة ويوسف زمان..
ع خشة بوهم عليهم..
شافتله فردوس وهي قلقه عليه وقالت:تبي عشي بوي..
قعمز وقال:مانبي شي..
شبحتله طوبى..ركزت ع ملامحه التعب والارهاق كانوا واضحين عليه..
هو مرر نظره عليهم وقال:قالتلي مطيره خالك كلمك..
طوبى مسحت دموعها وقالت؛ايه وقالي التلات يتم الاجراءات..ومرات يسافروا الخميس..
هز راسه وهو ساكت..
وهما الزوز يشوفوله..
ع خشة مطيرة وفيدها شنطه..
قعمزت جنبه وقالت:هاك خود..
عقد حواجبه بإستغراب وقال؛شنو؟
مطيره:حاجه بسيطه ماتسوى شي..
هو شبحلها شويه بعدين خدي الشنطه وفتحها لقي الفلوس..
شبحلها وقال:من وين؟
فردوس:البنات لموهم بوي .
شبحلها وقال:كيف لموهم مافهمتش؟
مطيره؛شويه من طوبى وشويه من غرفه وشويه من فايزة واني حطيت معاهم..
شبح لطوبى وقال:من وين جبتي الفلوس انتي واختك؟
طوبى من الارتباك كذبت وقالت:من الجالي..
لطفي؛الجالي عرض يعطيني واني ردتيه..كان عطاك يعرض عليا ناخد منه؟
سكتت طوبى وهي تشوف لبوها بضيق واحراج..
لطفي بحده:قولي الحق..
مطيره بقلق:باعت ذهبها..
لطفي بصدمه؛كيف!..
طوبى:شن عندي ندير بيه واختي هدا حالها!؟
لطفي بأنفعال؛اختك عندها من يصرف ع علاجها ويتحمل مسؤوليتها مانيش عاجز لدرجة نخلي بناتي يبيعوا ذهبهم..
شبح لمطيره وقال..رديلهم فلوسهم مش واحد منهم قرش..
هدا عقابها.
طوبى ودموعها تنزل؛شن فيها وين الغلط فاللي درناه!؟
سدرة حرمت روحها من هلبه حاجات ع خاطرنا..ياما صرفت ذهب وباعت وعطت ع اعراس ومناسبات وحاجات عاديه وهي توا في حالتها هادي بين الموت والحياة تبينا نستخسروا فيها ذهب وفلوس!..
فردوس ومطيره كانوا متأثرين بكلامها والدموع مابطلتش نزول..
اما هو كلامها خلاه يهدا شويه..
وهي مكمله تقول بنبرة حزن فيها شي الحزم:معليشي بوي سدرة زي ماهي بنتك اختنا واكثر من هكي بوين خلينا نديرولها كل شي نقدروا عليه ماتخليناش نتفرجوا بس..
هو قال:راجلك عنده علم؟
طوبى:مالاشنو بوي..مانقدرش ندير حاجه زي هادي من وراه هو اللي صرفه..
خدي نفس بعدين قال؛بري دسي في دولابي يامطيره..
خدت مطيره الشنطه وقعدت تسكر فيها وهي تقول:حاضر..
وناضت ومشت طلعت من حداهم..
لطفي:اول واخر مرة تصير حاجه زي هادي..
هزت طوبى راسها وقالت:حاضر..المهم توا بنوض نديرلك وبتتعشى بوي..
لطفي بعدم رغبه؛قلت يابنتي مانبي شي قعمزي وارتاحي..
طوبى بهدوء؛سامحني بوي بنديرلك العشي وبتتعشى سدرة بإذن الله حتفيق ولما تفيق وتولي تلقى حالك باهي..عارفها انت كان لقت العكس شن دير فينا وفيك..
ضحكت فردوس نص ضحكه من بين دموعها..
وهو ابتسم بحسره..بعدين قال؛باهي نوضي..
ابتسمت طوبى في وجهه وناضت وهي تقول:شويه بس..
ومشت طول للكوجينه..
هو شبح لفردوس وقال:صغارك وين؟
فردوس:روحوا..
لطفي:مفروض روحتي معاهم ماعندك علاش قاعده..
فردوس بضيق:مانقدرش بوي..نقعد طول الوقت نخمم فيكم وبالي عندكم..
لطفي:الليله بس اقعدوا باتوا ومن غدوة تروحوا لحياشكم قعادكم هني مايغير شي..
فردوس بضيق:حاضر..
🍃وطوبى وهي فالكوجينه كانت تسمع في كلامه وهي مضايقه ع الآخر..ودموعها ماجفوا..
☘☘☘☘☘
مقعمزة ع سريرها..وحاطه يدها ع بطنها مكان الرحم..
وتقرا في الرقيه..
خشت عليها اختها..
وهي شاده بيرمس سكرت الباب بالمفتاح..
ومشت حطت البريمس في وولعاته..
وخدت طنجرة صغيره كانت جايبتها قبله وحطتها عليه..
كان فيها مية رقية وورق سدر..
كملت نجاح الرقيه وقالت؛رقدت امي؟.
عواطف وهي تشوف للطنجره:ايه..لكن تعرفي نحس فيها مش متحسنه قاعده تشكي..
نجاح؛ماهو ماتهنيش في روحها تراجينا نطلعوا وتبدا تحوس ع الحوش والجنانات..
عواطف:نوقف فوقه بالزبط؟
نجاح؛لما يبدا يطلع البخار طفي الغاز وحطي الطنجره ع السفره واوقفي فوقها اريح هكي..
عواطف:مااصعبه علاج التصفيح الله يسامحك يام..
نجاح:مش صعب بالعكس يبي قوة ايمان ومداومه..
مشت قعمزت ع السرير وقالت؛ترا عاودي اقريلي الطرق متاعه..
نجاح؛اصبري خل نطلع السكرين..
وبدت نجاح طلع في الصورة لين لقتها..
وبدت تقرا...
اول شي واهم شي..
لازم تحافظي على👇
اذكار الصباح والمساء بإنتظام بإنتظام بإنتظام..
اذكار النوم/ اذكار دخول الخلاء والخروج منه ( الحمام)
الحفاظ على الرقية الشرعية
الفاتحة
سورة الإخلاص
المعوذتين
اواخر سورة البقرة
آية الكرسى
سورة الكافرون
آيات إبطال السحر
سورة البقرة...
الطريقه التانيه
#ركزوااا_معاااااى
تجيبى 5أو7  ورقات من السدر
وتطحنيهم بحجرين طاهرين او تفرميهم بالخلاط..
وتحطيهن فى ماء  ، وتقرى على الماء ( سورة الفاتحة / آية الكرسى / المعوذات 3 مرات / الإخلاص 3 مرات / اواخر سورة البقرة / او سورة   او سورة البقرة / سورة الكافرون ) ..
وتشربى من المية تلات مرات تقولى بسم الله وتشربى
بعدها تغتسلى بما تبقى من الماء  وتعممى جسمك كله...
إن شاء الله حتشفى من هذا البلاء والسحر....
الطريقةالأخيرة
تجيبى ورق السدر ( 5\او 7 ورقات )
وتحطيهن فى طنجرة ؛ وتخليها تغلى لحد ماتوصل لدرجة
الغليان....تقعد المية ساخنة بكل ...
ثم تضعى الماء بين رجليكى ويتصاعد البخار على عورتك
ومنطقة الرحم ....
حتى تجدى عرق ( منطقة الرحم تعرق بسبا البخار المتصاعد )
بعد ما الماء يقعد بارد اغتسلى به...
وتحافظي ع ترديد تاج الذكر..والصلاة ع النبي والأفضل الابراهيميه..
شبحتلها وقالت..او تمشي ع الطريقه اللي اني ماشيه بيها راهم كلهم صح...اهم شي خلي عندك ايمان ان ربي هو الشافي هادي اهم حاجه..
تنهدت بعدين شبحت للطنجره لقت البخار بدي يطلع منها..
ناضت طول وطفت تحتها..
بعدين شدت الطنجره من ايديها وحطتها ع السفره..
ونجاح تشوفلها شن دير..
شويه رن تليفونها..
شافت المتصل ردت طول..
نجاح؛السلام عليكم ابله صالحه.....في خير ونعمه الحمد لله شن حالك انتي توا.......دوم ان شاء الله.....ضيقت عيونها وقالت..نسمع فيك.....
شبحتلها عواطف..
وهي ترد ع المتصله..ب"امم"
حست ان في حاجه..
بعد ماطولت وهي تسمع قالت؛خلاص خلاص..المهم انتي خليك حذرة وردي بالك.......بارك الله فيك وربي يحفظك..
تصبحي ع خير..
سكرت وشافت لعواطف لقتها تقيم في الطنجره ومشت حطتها ع الطاوله وولت للبريميس وهي تقول:شن صاير؟
نجاح بإبتسامه تهكم؛ياحنه الجماعه بدوا يحفرولي من توا..
عواطف:توقعت مادام بتشددي وبتمشي بنظام مش حيعجبهم..
نجاح:لكن ع مني..حطيت فيهم ناس تجيبلي معلومات هني وفي مكتب المراقبه بش نسبقهم بخطوه..
عواطف بإندهاش؛مايطلع منك!..
نجاح؛مالا شني حبيبتي الرسول قال..المؤمن كيس فطن..
ابتسمت عواطف وقالت:صحة لإيدك..
وخدت البريمس ومشت طلعت بيه من الدار..
وهي تنهدت بعدين خشت ع سجل المكالمات واتصلت بوحده معاها في الادارة....
☘☘☘☘☘
"زيد بوي"
ناض وهو يقول؛لا الحمد لله خلاص..
ومشي طلع من حداهم وهما الزوز اللي كانوا يسايروا فيه يشبحوله بأسى وهو طالع من الصاله..
بعدين طوبى تنهدت وخدت السفره وناضت بيها ..
وفردوس لمت المفرش وناضت لحقت طوبى للكوجينه..
خشوا للكوجينه وهي مشت طول بتطلع برا تنفض المفرش..
سمعت صوت السفرة طاحت باللي فيها..
التفتت لقت طوبى شاده في الرخامه..
لوحت اللي في يدها وجتها تجري..
شدتها وقالت؛طوبى خيرك..!
طوبى بصوت متعب؛مش عارفه..
ع خشة بوها وعمتها..
لطفي بفجعه؛خيرها!؟
فردوس وهي تقعمز فيها ع الكرسي:شكلها داخت..
مطيرة بإنفعال؛ماهي لاتاكل ولاتشرب..
ومشت بتصبلها طاسة عصير..
لطفي وهو يعارك:تو تغصبي عليا اني ناكل وانتي ماتاكليش!؟
طوبى وهي حاطه راسها ع فردوس:ناكل بابا...
مطيره جتها وهي تقول:تاكلي عينك..هاك اشربي..
لطفي:كمليه كله..مطيره ديريلها ماتاكل توا..
طوبى قعمزت ع حيلها وخدت طاسة العصير وقالت؛ماتخافش بابا دوخه عاديه..
لطفي:هو في دوخه عاديه ودوخه مش عاديه!؟ جديده هادي!
قعدت تشرب في العصير وهي مضايقه..
مطيره شبحت للطفي وقالت:خلاص وخيي برا شوف شن وراك مش مخليتها ترقد لين تاكل..
تنهدت بضيق وهو يشوف لطوبى..بعدين مشي طلع من حداهم..
مطيرة بصوت منخفض:بوك مش ناقص بش يقعد يخمم فيك...
نزلت من عينها دمعه مسحتها وقالت؛عندك حق..
مطيره تنهدت وقالت:فردوس لمي الحوسه..واني تو نديرلك ماتاكلي..
نفدت فردوس اللي قالتلها عليه عمتها..
وطوبى قعدت تشرب في العصير وتمسح في دموعها وهي تنزل...
☘☘☘☘
وفي جنبهم..
في حوش الجد علي الواعر..
كان مقعمز في الصاله وحداه حفيدته يهدرز هو وياها..
اميمه:الحق اني مستغربه في عمي لطفي وهي هني مافارقهاش كل يوم يمشي يشوفها وتوا لما بيسفروها مش ماشي معاها..!
علي:مطمن عليها مع خالها وخوها..اللي قاعدات هني يحتاجوه اكثر من سدره..
اميمه قعدت تفكر في طوبى ووضع طوبى..هزت راسها وقالت:صح..
علي بخوف:ان شاء الله ماطولش بيها هالحاله ان شاء الله قريب تفيق وتولي احسن من قبل..كان صار العكس لاقدر الله..عمك يلحقها..
اميمه ودموعها عبوا عيونها؛لا ان شاء الله..ربي رحيم جدي..
هز راسه وهو يفكر بخوف وقال؛ياالله..
حطت يدها ع ظهره وقعدت طبطب عليه..
وهو قاللها؛حطيلي ع قناة السنة النبويه حطي..
ناضت وهي تقول؛حاضر..ومشت خدت الريموت وحطتلها ع القناة اللي يبيها وعلت الصوت..
شافتله لقاته يشوف للشاشه وهو يتمعن في باحة المسجد النبوي ويسمع في الأحاديث الشريفه..
قاللها؛ماتقدريش تمشي معاي عمره؟
ابتسمت بحزن وقالت:نقدر..
علي بإزدراء؛وهداكا!؟
اميمه:من هداكا!؟ خلاص معاش ليه سلطان عليا مادام نوي الطلاق...اصلا خلاص الفترة هادي يصير الطلاق..
علي:خلاص بعون الله بعد تطلقي نمشوا للعمره..
اميمه بإبتسامه؛ان شاء الله...
وسكتوا..ولما سكتوا سمعوا حديث شريف يقول...
قال صلى الله عليه وسلم : ( مَا عَلَى الأَرْضِ مُسْلِمٌ يَدْعُو اللَّهَ بِدَعْوَةٍ إِلا آتَاهُ أَوْ صَرَفَ عَنْهُ مِنْ السُّوءِ مِثْلَهَا ، مَا لَمْ يَدْعُ بِإِثْمٍ ، أَوْ قَطِيعَةِ رَحِمٍ . فَقَالَ رَجُلٌ مِنْ الْقَوْمِ : إِذًا نُكْثِرُ . قَالَ : اللَّهُ أَكْثَرُ ) رواه الترمذي  وصححه الألباني...
ابتسموا الزوز ابتسامه طالعه من القلب...
ونزلت الرساله من السماء ووصلت عنوانها واستقرت في قلوبهم...
☘☘☘☘☘
لبست بالطوها وربطت حزامه..
وحطت الوشاح ع راسها حط وطلعت تجري للكوجينه..
وين وصلت فيها..
قالت:في بنيه جايتني بتعطيني لوطا هي تحت العمارة بننزلها شويه مش مطوله...
غطت مروة الطنجره وقالت؛قوليلها تركب خير..
صابرين؛مستعجله ماعندهاش وقت والدنيا ليل..ومشت بسرعه..
ومروة رفعت حواجبها تعجبا ونزلتهم وقعدت ضم في الكوجينه..
☘وصابرين نزلت لوطا..
وطلعت من العمارة ولفت حوالين سورها..
لين سيارة سودا عاليه مظلمه تعرفها..مشتلها شويه..
وفتحت الباب الخلفي وركبت؛حبيبي..
هو شد يدها وقال؛تحرك..
صابرين بإبتسامة رجاء:ماتعطلش بيا باهي؟!..
هو هز راسه..
تحركت السيارة وهي تشبحله بعدين قالت..
صابرين بعتب؛هكي تقعد يومين لادورني ولاترد عليا لما نتصل بيك..
مختار:كنت ملخبط هلبه اليومين اللي فاتوا..
صابرين؛خير حبيبي شن صاير؟
تنهد وقال؛تو نحكيلك لكن قبلها بتتعشي معاي..
صابرين بفجعه:لالا..شوف شن لابسه نهاري..
ضحك..بعدين حط يده ع وشاحها وحوله وهو يقول؛في السياره..
ابتسمت وهي تقول:اها كان في السيارة تمام..
وحولت التوكه اللي شاده شعرها وقعدت تساوي فيه..
وهو يشوفلها بإبتسامه خبثها هي تشوف فيه حب..
☘واختها..
في الشقه هي وراجلها قالبينها مرقص..
والجالي يهيج ولاكأنه في شي صاير..اهم شي عنده يفرهد ع روحه ويغير جوه ماهو مايحبش النكد بسلامته..
☘☘☘☘
اما خوه الكبير في المصحه..
كان طالع من جناحه قاصد حجرتها هي..
وخوها الصغير ماشي وراه وهو يقول..
نضال بخوف؛وكان يطب عليك بوها..
المهدي؛مايجيش توا..
نضال بدهشه:ماشيلها قبل انت؟
ماردش عليه..
نضال رجع خاف وهو يقول؛والله كان يشدك جدها يرقدك جنبها..
هو قال؛ياريت..
نضال حرك راسه يمين ويسار بقلة حيلة وقعد ساكت..
وصلوا للمكان اللي فيه حجرتها..
هو مشي طول وقف ع مرش ع الروشن متاع الحجره..
ونضال وقف جنبه..
كانت ع سريرها..بحجابها..حواليها الاجهزة..
وصوت جهاز القلب هو بس المسموع في المكان..
راقده..ع نفس الوضع وبنفس الهيئه ماتغيرتش..
شبح نضال لخوه شاف لمعة الدموع في عينه..
ملامح الحزن ع وجهه كانت تقطع القلب..
زي ملامح وجه الطفل اللي امه خلاته ومشت وهو واقف يشوفلها كيف تبعد عنه خطوة ورا التانيه..
تنهد نضال بحزن ورجع شافلها..
هني نطق المهدي وقال:زعمه تولي؟
نضال؛ان شاء الله..
المهدي؛تقول فيها زي المحبط..
نضال؛مش عارف شن نقولك..بس هلبه خشوا غيبوبه ومعاش ولوا منها..
المهدي؛انت قلت هلبه ماقلتش كلهم..مرات هي تكون من الشويه اللي ولوا منها..
نضال بتمني؛ان شاء الله...
قعدوا ساكتين هما الزوز..
وقعد صوت جهاز القلب..مع دقات قلبه هو..اللي كأنه قاعد مستمر في النبض لأن قلبها هي مستمر في النبض...
شويه قال بنبرة مؤثرة...
يا مَن غَدَوتُ بِهِ في الناسِ مُشتَهِراً
قَلبي عَلَيكَ يُقاسي الهَمَّ وَالفِكَرا..
شبحله نضال بأسف وقال:هيا مهدي..
هو نزل راسه وهزه بعدين مشي..
وهو مشي معاه وقلبه موجوع ع حاله...
☘وبعد دقائق..
جي لطفي..وخشلها..وقعمز حداها..
وطلع مصحف من جيب كبوطه..وفتحه ع سورة يوسف وبدي يقرا ..
وقداش غلبوه دموعه ولما وصل في آية..
¤وابيضت عيناه من الحزن فهو كظيم¤
انهار وقعد يبكي..حط قبضة يده فمه بش مايطلعش صوته..
واهو بوك حداك ياسدرة يبكي..ولأول مرة في حياتك ماتمسحيش دمعته وتهديه وتنسيه حزنه وتقويه زي ماتعود منك..

.....يتبع في التكمله.......#تكملة_الجزء_57

☘وبعيد عنهم..
كانت اختها الصغيره...ع صلايتها..
تقرا في القرآن..وكل ماتقابلها آية
"إن الله على كل شيء قدير"
توقف وتقعد تدعي وتقول..
"يامن على كل شي قدير..يامن نحي العظام وهي رميم ردلنا سدره ياارحم الراحمين"
وترجع تقرا وهي تبكي بصمت..
وقلبها ذوبه الحزن...
☘☘☘☘☘☘
تاني يوم..
مع الساعه 11..
كان عمر ومعاه محمد ولد المهدي في المصحه بش بيطلعوا المهدي..
ماكانش يبي يطلع ولولا الاحراج اللي بيكون فيه مع صغاره وبوه راهو ماطلعش منها لين طلعت هي..
كانوا ماشيين التلاته في صمت..
فجأة..
تلاقوا في واحد من الممرات..
مع اميمه وهي واقفه ع الدكتور تتناقش معاه بخصوص حالة بنت عمها..
لما شافها عمر ولعت في قلبه النار..
المهدي؛كمل طريقك وانت ساكت..
ومحمد يشبحله بضيق...
عض ع جرحه وسمع كلام خوه وكمل معاه الطريق لين فاتوا من حداهم..
اميمه تجاهلتهم تجاهل تام..
قصي؛اسف دكتورة ع فضولي بس نبي نعرف معاش في امل في زواجك؟
اميمه؛نهائي..
قصي وهو يتصنع في الأسف قال:لاحول ولاقوة الابالله..
هي غيرت الموضوع وقالت؛ع العموم هما خلاص حيسفروها يوم الخميس بإذن الله..
قصي:بيني وبينك احسن غادي يهتموا بيها اكثر وان شاء الله تفيق من الغيبوبه في اقرب وقت..
اميمه؛ان شاء الله..سامحني دكتور عطلتك..
نستأذن..
قصي:ولايهمك..اذنك معاك..
اميمه؛السلام عليكم..
هو رد؛وعليكم السلام..
هي مشت وهو معاها بعيونه وكانت ملامح ابتسامة النصر بادي ع وجهه..
🍃اما هي وين جت طالعه من المصحه..
لقت عمر قاعد بسيارته وخوه وولد خوه معاه..
وين شافها..
نزل من السيارة ومشالها..
لما قرب منها هي وقفت في مكانها..
وصل فيها وقال؛مش قادره تصبري لين تطلقي لهالدرجة طلعتي وحده واطيه وتافهه مانبيش نقول كلام اكبر من هكي تربيتي ماتسمحش..المهم نبي نطلق بسرعه معاش نقدر نتحمل وحده زيك تقعد ع ذمتي..
هي ابتسمت ببرود وقالت؛تقدر طلق..
ومشت وخلاته بهدوء..بعد ماردت عليها بكلمتين فيهم برود الدنيا كلها..
برود حرقه هو..وقهره لأبعد حد..
كان يبي يصرخ..يكسر ويخبط ويفش غله في كل شي حواليه..بس هدا كله قعد محبوس في داخله ماقدرش يطلعه.
ومشي بسرعه ولى لسيارته ركبها..
سكر الباب بقوة وشغلها..
والمهدي يشبحله..شاف الدمعه المحبوسه..
حالته هادي ذكراته بنفسه زمان قبل عشرين سنه..
تنهد بألم وقال في نفسه..
"درتها بيدك زي مااني درتها بيدي"
وتحرك عمر بالسيارة وهو يحرق في العجل ومحمد ولد خوه يشوفله بأسف..
☘☘☘☘☘
وفي شارع القهوة...
اللي كانت الحياة فيه ماشيه طبيعي..
في محل  الحلاقه للتونسي اللي كان يضم فيه وهو يتكلم بالتليفون..
فراس:وقتاش؟.........باهي باهي....ايعيشك وبارك الله فيك...
وعليك السلام..
سكر وحط التليفون ع الطاوله..
ومشي بيجيب مكنسه..
بس وقف لما دق باب محله..
التفت وقال بإبتسامه؛خالتي مطيره..
مطيره؛كيف حالك اليوم..
جاها وهو يقول:الحمد لله..شن حالكم انتم ؟
مطيره بإبتسامة حزن:الحمد لله ع كل حال..تفضل ولدي وسامحني ع الايام اللي فاتوا عارف الظروف..
خدي منها السفره وهو يقول:شن تقولي خالتي ربي يهديك والله مانبي حاجه نعرف ندبر اموري..
هي بإيتسامه قالت؛صحتين..
ومشت...
هو بعد ماكان يشوفلها..شاف للسفرة شويه..
بعدين مشي بيها دخلها داخل..
ومن قدام محله فاتت سيارة عمر اللي توجهت لحوش شنيبه..
دخلها للقراج..
بعدين نزل هو وياهم منها وين مشوا للحوش..
لقوا مغليه وعائشه ونسرين ويزن وسدرة يراجو فيه..
وين شافاته سدره جاته تجري...
وهو طبس وضمها وهي ضماته بقوة وقالت؛استاحشتك هلبه بكيت هلبه من خوفي عليك..
المهدي؛حبيبتي..وباس شعرها..
وهما يشوفولهم وكانوا متأثرين..
بعد عمها وشد يدها ومشي لأمه..
وصل فيها ضماته بقوة وقالت:الحمد لله ع سلامتك حبيبي ان شاء الله هدا حد سو ياروحي..
وهو يمسح ع ظهرها ويقول:الله يسلمك..
بعدت عنه وجاته نسرين سلمت عليه..
بعدين عائشه اللي باست راسه وهو باس راسها..
عائشه:حمد لله ع سلامتك..
المهدي:الله يسلمك..
جاه يزن خدي يده وباسها وهو يقول:حمد لله ع سلامتك بوي..
مسح المهدي ع شعره وقال:الله يسلمك..
مغليه؛هي خشوا داخل صقع..
عمر وهو يحاول يبان عادي:بندير مكالمه وتونلحقكم..
المهدي قعد يشبحله..
وامه قالت؛باهي غير ماطولش..هي خش مهدي خش..
غير عيونه عنه وكلهم مشوا خشوا داخل..
☘☘☘☘☘
الساعه 7:00مساءا..
في دار بنات شنيبه..
نسرين كانت مقعمزه تتكلم بالتليفون وخديجه مقابلتها..
نسرين؛الساعه قداش؟
"الساعه 11 ان شاء الله"
نسرين هزت راسها وقالت؛خلاص نشوفك الخميس..
"ان شاء الله..نوصيك مرة تانيه خليك قويه وماتستلميش بسرعه مهما صار حتطلقي عاجلا ولا آجلا شويه صبر وقوة نسرين"
نسرين:من غير ماتوصي نبيله..
"كويس..نشوفك..سلام"
نسرين:سلام..
وسكرت منها..
خديجه؛امتى الجلسه..
نسرين؛الساعه 11..
شافتلها شويه وقالت؛متأكده من روحك؟..قصدي متأكده انك معاش تبي صغارك..
دمعوا عيونها وقالت؛هما اللي مايبونيش مش اني..
قالتلها:ماتستاحش.يش فيهم بكل؟
نسرين بإبتسامه ألم؛اكيد نستاحش..بس تعودت ع قلتهم ديما كانوا بعاد عليا..هاه شوفي قداش ليا بعيده عليهم لااتصلوا ولادوروا..
خديجه؛انتي مفروض دوري..
نسرين:ندور ولاماندورش كله واحد.
شافت لبطنها وقالت؛واللي في بطنك شن بيصير بيه..
بلامبالاة مصطنعه؛بعد يربعن بنرفعه لبوه..
انصدمت خديجه..
نسرين؛ماعنده مايدير بيا مع بوه حيعيش احسن من عيشته معاي..
غير خديجه عيونها عنها وشبحت في الفراغ وهي تفكر في حالة اختها..
ونسرين طول غيرت الموضوع وقالت؛ملاحظه معاش بينت خليقتها من هداكا اليوم..
شبحتله وقالت؛حتى خوك معاش بين خليقته..واضح ان خلايقهم في بعض هلبه الايام هادي..
نسرين بضيق:كل مايخطروا قبل يتقطع ع طوبى..
خديجه تنهدت وقعدت ساكته..
نسرين؛مرته تعاني وهو يهيج..
خديجه؛هادوا الرجاله حبيبي مافيش فرق بيناتهم كلهم زي بعض اهم شي عندهم رواحهم وبس..
نسرين بإزدراء:سحيقتهم..بعدين قالت..استغفر الله العظيم..
وخديجه تسمع فيها وهي تفكر في شيء ما...
☘ومرت خوههم اللي يحكوا عنها..
قاعده في حوش بوها بعد ماترجاته تقعد لين يسافروا بسدره..
غارقه في حزنها ع اختها..
حزنها اللي نساها كل شي حواليها حتى نفسها..
🍀🍀🍀🍀🍀🍀
ومرت الأيام..
والحال على ماهو عليه..
لعند يوم الاربعاء..اللي وصلت فيه لأميمه ورقة طلاقها..
لما استملتها..
وهي في المستشفى...
جاهدت بش تحافظ بش تحافظ ع ثباتها وقتها لين طلعت منها..
وركبت سيارتها..
وانهارت ..وبكت  بروحها بكي شديد..
وقلبها كان جرحه ينزف..
🍃زي ماقاعده ينزف جرح قلبه هو ..
اللي ركب الطيارة هداكا اليوم وهرب من البلاد بكل..
وانتهت هكي قصة عمر واميمه القصه اللي كان ناقصها هلبه فصول وممحي منها هلبه سطور..
القصة المبتور فيها الجزء اللي يقدر يحيها...
الأمان...
☘علاقة مافيهاش امان مهما بلغت الحب درجاته بين الطرفين مصيرها للفشل..☘
🍀🍀🍀🍀🍀
يوم الخميس..
الساعه 10:30صباحا..
في مصحة القدس..
كانوا مجموعه من الممرضين يدفوا في باريلا راقده عليها سدرة المنتهى..
ومعاهم اياد اللي كان شاد دموعه بالسيف..
طلعوا بيها للمكان اللي فيه طائرة الاسعاف اللي كانت مجهزة تجهيز تام..
عبد الرؤوف والمحجوب بعلاقاتهم في الدوله قدروا يوفروها..
🍃برا..
كانت عيلتها كلها تستنى فيها..
بوها جدها..عمتها..خالها..خواتها رجالتهم..بنات اختها..
وين شافوهم مطلعين..
قلوبهم بلهفه شافتلها..
كانوا يقربوا..وكل مايقربوا هي تبان عليهم اكثر..
لين جو فايتين من قدامهم..
فردوس ببكي؛ياروحي ياوخيتي ياروحي تروحيلنا تمشي ع رجليك ياربي يارب..
وهما يسمعوا فيها ويبكوا..
بوها قال برجاء:بالله شويه..شويه بس..
وقفوله..
هو قدملها وكان يفتح في عيونه ع وسعهم بس ماينزلوش دموعه..
وصل فيها..قعد يشبحلها..يتأمل في تفاصيل وجهها وكأنها يبي يملي عيونهم..
وقلبه مليان خوف من ان هادي تكون اخر مرة يشوفها فيها..
طبس ع جبينها وباسه بعمق..
ودموعه غلبوه غلبوه..
بعدين بعد عنها وقال؛نستودعك الله يابنتي نستودعك الله..
هما طول تحركوا بيها من قدامه..وركبوها للطيارة..
طوبى وهي تبكي قالت بصدمه؛مشت خلاص..!
واصوات البكي كانت مسموعه في المكان كله..
لطفي بألم ورجاء ودموعه ينزلوا:امانه عندك يامحجوب بنت اختك وبنتي عندك امانه..
المحجوب وهو يشوفله من ورا نظاراته السود:هادي بنتي حتى اني يالطفي ماتخافش..ومشي ركب...
وشويه وتسكرت الطيارة..
طوبى شدت في فردوس وحطت جبهتها ع كتفها وانهارت بالبكي..
والجالي يشوفلها من ورا نظاراته..
وحداها الاء واريج يبكوا بعبرتهم..
وغرفه تبكي وهي دافنه وجهها في رقبتها عمتها اللي كانت حاضنتها وهي تبكي..
وعيون راجلها عبد الرؤوف ع بوها اللي خاف عليه تصيرله حاجه..
مشت الطيارة شويه وبعدين ارتفعت..
ولطفي يشوفلها..
وهو تزيد ترتفع وترتفع لين ولت بعيده..بعيده هلبه..
هو كأنه هدا وين استوعب كل شي صار..
استوعب انه حقيقه واقعه مش كابوس حيفيق منه في أي لحظه..
التفت شاف لبوه اللي كان يشوفله بحزن وقلق..
بعدين مشاله وين وصل فيه ضمه وقعد يبكي..
وبوه حط يده ع ظهره وقعد يطبطب عليه وهويقول:معليشي ولدي معليشي..شدحيلك يابوي شد حيلك..
وعيون الكل عليهم بما فيهم اياد اللي كان موجوع ومقهور لأبعد حد...
🍃وفي مطار معتيقه..
ودعوا حسين واميمه امهم وخوهم يوسف..
بعدين طلعوا من المطار وكل حد فيهم في قلبه ماالله به عليم من حزن وألم..
🍃وحزن العالم كله استقر في قلب الجارح التعبان..
اللي كان في سيارة خوه نضال لما شاف طايرة الاسعاف طالعه وهي رافعه اغلي من خلق الله ع قلبه..
هدا وين حس بالفراق حق..هدا وين عرف معنى الفراق..
وهدا وين حيحس بعذابه...
🍃🍃🍃🍃🍃
وبعيد عنهم كلهم...
في شقة نجاة المعلول اللي كانت توتي في روحها بش تمشي للخدمه..
شافت اختها مقعمزه قدام التلفزيون قالت؛مالا مافيش خدمه اليوم؟
صابرين؛في لكن بنمشي بعدين..
نجاه؛نقول للمراة ماتجيش..
صابرين؛انتي امتى مروحه؟
نجاه؛مع الواحد..
صابرين:قوليلها ماتجيش..
تنهدت ومشت من حداها..
وصلت حدا الباب لبست كندرتها..
وهي تتصل بالمراة اللي تجي تقعد مع معاذ..
بعد مالبست الكندرة..
فتحت باب الشقه..
انفجعت..
لما شافت خديجه واقفه قدامها وكيف جاية بدق.
ومعاها البنت نفسها..
ابتسمت خديجه وقالت:شورك كنتي تراجي فينا..
ودفتها بروس صباعها وخشت وقال للبنت..تعالي..
🍃سمعت صابرين صوتها..
خافت..
وناضت من مكانها ومشت بس تتأكد..
🍃خديجه ؛سكري الباب..
سكرت نجاة الباب بقوة وبغضب مكتوم..
شافت خديجه صابرين جايه ضحكت وقالت؛ياريتني متمنيه مليون دولار ولاشوفة وجهك اللي يبشر بعام الفقر..
صابرين قعدت تشبح لنجاة وهي خايفه..
ونجاه.تشوف للبنت بريبه والبنت توزع في نظرها عليهم وهي رافعه حاجبها...
تنهدت خديجه بتهكم وقالت؛بلا مقدمات نخشوا في الموضوع طول وانتم عارفينه من قبل مانبدوا فيه..
نجاه ركزت ع خديجه كويس وهي تشوفلها من فوق لتحت بعدين قالت؛انتي شني انتي قوليلي مستحيل تكوني بنادمه انتي شيطانة رجيم..شن هو اللي درتهولك بش ديري فيا هكي!؟ اني وخوك نبوا بعض نحبوا بعض تزوجنا ع سنة الله ورسوله ولادرنا عيب ولاحرام شن الذنب اللي درناه بش ديري فينا هكي!!؟
خديجه بسخريه؛ياروحي عليك ياناري قلبي تقطع..ااخ منك يانجاة اااخ..الجو هدا ديري فيه عليا اني..اشرت ع روحها وقالت ..اني...خديجه..تي اني نعرفك اكتر ماانتي عارفه روحك..

قعدت تشبحلها نجاة بغضب ودموعها في عيونها ومتمنيه لو تحصل فيها فرصه تقتلها وتخلص منها..
خديجه للبنت؛ترا ياحلوة احكيلي منين تعرفي صابرين؟
صابرين قعدت تشبح للبنت..
والبنت شبحتلها وقالت؛كانت تخدم معاي في عياده قبل الاحداث وكنا صحبه هلبه..لدرجة انها طلبت مني مرة نجربلها صاحبها بس بطريقه فيها اجرام شويه..
اني بعدين فهمت انها تبي تنتقم منه ماديريش هكي الا وحده تبي تنتقم..عطتني اللي فيه النصيب ومشتيلها موضوعها..كلمت واحد نعرفه اجر بنيه تمشي للمكان يتريض فيه صاحبها وديرله فضيحه كبيره..وطبعا بش تعرفه البنت تبي صورة وصابرين عطتني صورته شفتها وملامحه رسخوا في عقلي..المهم..صار اللي صار ووصلت اللي تبيه..
خديجه وهي تمرر في نظرها عليهم :وبعدين ياحلوة؟
:فاتت السنين وجي يوم كنت فيه مع قريبتي مصورة توتي في فيديو عرس اني تفرجت عليه وشفت العريس كان هو نفسه اللي في الصورة..وانصدمت لما شفت صابرين ترقص في عرسه..
خديجه وهي تشبح لصابرين:طبعا يااموره القصه فيها هلبه علامات استفهام اني نعرف خوي زمان ماكانش طايق رمامهم من وين لوين بيدير علاقه من وحده زي هادي..هادي تخصصها رجاله كبار ومتزوجين..
وصابرين تشوفلها بحقد..
وكملت خديجه تقول؛وحده فيكم تفهمني اللي صار من فيكم ادبرت المكيده للجالي..؟
قعدوا يشبحوا لبعض...
وهي تمرر في نظرها عليهم...
نجاة غيرت عيونها لخديجه وركزت ع نقطها محدده فيها..
اما صابرين اللي كانت خايفه هلبه وعقلها ملخبط قاعده تشوف لأختها وبس.
نجاه شبحت لخديجه وقالت؛اتقي الله اتقي الله وطلعني من راسك وياسرك كذب وافتراءات حرام عليك..
قلبت عيونها بملل وقالت؛مش طالعه من هني قبل لنفهم شن صار..ولاشن رايكم نجيب الجالي هو يطلع منكم الدوة بطريقته..تعرفيه كويس نجوته اها..!
بلعت نجاه ريقها بخوف وهي تشوفلها..
"هي اللي كادتله"
بملامح صدمه بدت ع وجهها شبحت لأختها..
وبملامح دهشه غير واضحه شبحت خديجه لصابرين..
صابرين؛نجاة كانت تكرهه في الدم ومش طايقاته ومعاش نذكر وقتها شن دارلها بش انتقمت منه قالت تبي تنزل من قيمته قدام ماليه وتخليه يطيح من عينهم..
خديجه وهي مفنصه عيونها بأبتسامه صدمه شافت لنجاة..
اللي كانت في حالة ذهول وهي تشوف لأختها كيف تتكلم..
خديجه؛امان ياربي امان..امان منك يانجاة جديات اني مش عارفه بشن نوصفك..حتى كلمة شيطانه عيب في حقك قدرك كبير في عالم الحق.ارة والخبث..
والبنت تشوفلهم الزوز من فوق لتحت..
خديجه؛ع العموم..اشبحيلي هني انتي..
شبحتلها..
خديجه؛بكل هدوء..بتطلعي من حياة خوي كأنك ماخشتيلها يعني لما يطلقك ماتفكريش ديري شوشره لأنك الوحيده اللي حتخسري كل شي كل شي وترجعي لحوش سكينه وولادها..
نزلوا دموع نجاة وهي تشوفلها بحقد شديد..
خديجه:اني هكي عداني العيب..هيا ياحلوة..
ومشت خديجه بتطلع والبنت وراها..
فتحت باب الشقه وطلعوا هما الزوز بعدين سكراته..
بعد سكراته طلعت من ورا شنطتها اللي كانت شادتها بيدها تليفونها شافت الشاشه بعدين حطاته ع وذنها وقالت..
وهاك سمعت بروحك...
🍃داخل..
طيحت نجاه شنطتها وجت لأختها مندفعه ضربتها كف من قوته قريب طاحت..
وقالتلها بعياط:ياكلبه ياحقيره..كانت تسجل..سجلته اللي قلتيه كلها ياحقيره.
ولما جت بتضربها مرة تانيه شدت يدها ودفتها وهي تقول:وكان سجلت..وكان سمع وعرف في ستين داهيه..انتي مش عارفه روحك في جرة مني قاعده تجري..في جرة واحد مريض نرجسي اناني همه كله نفسه وعنده استعداد يبيعك في أي لحظه..الجالي لو خيروه مش حيفضلك ع طوبى..ولاحيفضلك ع فلوس بوه وع مكانته..انتي في حياة الجالي حاجه زايده حاجه يقدر يستغنى عنها وجودها وعدمه واحد معاش تضحكي ع روحك..عمره ماحبك ولاحيحبك وياريت فهمتي الحاجه هادي بعد ماتزوج وبدي يعامل فيك معاملة العشيقه..لما طوبى تنشغل عنه يجيك يجري ولما يصير العكس ينسى انه يعرفك..لكن انتي ماتبيش تفهمي قاعده تكذبي ع روحك وذلي في روحك من لما حبيتي هالمخلوق الحق.ير وليتي وحده تانيه مش نجاة اختي بكل..
كلام صابرين لأنه كان حقيقي ونجاة بينها وبين نفسها معترفه بيه وجعها هلبه كان سكاكين تنغرس في قلبها كلمه كلمه..
صابرين؛طلعيه من حياتك وفوتيه خلاص صدقيني هكي خيرلك يانجاة والله هكي خير..
بكت نجاة بقلة حيله وكيف جت بتكلم دق باب الشقة بقوة..
الزوز انفجعوا وشبحوله..
نجاة بخوف:هو!..
وصابرين تشوف للباب وهي ترعش..
رجع دق بقوة اكثر..
والزوز يرجفوا من الخوف..
وقف دق..
بعدين سمعوا صوت المفتاح يركب في الباب..
نجاة بنبرة مرتعشه؛حي عليا!..
وانفتح الباب..
وخش هو..
شبحلهم الزوز بنظره جمدت الدم في عروقهم..
طلع المفتاح من الباب وقدم طول لصابرين..
وهي تشوفله بخوف..
جبدها من يدها وقعد يكر فيها لين طلعها من الشقه وسكر الباب..
بعدين التفت لنجاه..
اللي كانت جامده في مكانها من الخوف..
قدملها خطوه خطوه..
وهي بنبرة مرتعشه؛والله زمان..زمان والله..زمان..اصلا وقتها..حتى انت كنت كارهني..جالي..اسمع مني..
وصل فيها..
هي وخرت خطوه وقالت؛والله كله زمان..
اني توا نعطيك روحي ولاتنمس شعرة من راسك..
قدم خطوه وهو يشوفلها بنفس النظرات المخيقه..
وهي وخرت خطوه وقعدت تبكي وتتوسل:جالي بالله عليك سامحني بالله عليك..
وهو يشوفلها ويتفكر في الموقف واللي صار فيه ومن بعده..
كان اسوأ يوم يمر عليه في حياته وقتها..
وتوا خلاه يتفكر ايام الذل والاهانه اللي شافهم لما كان محبوس..
وهي تترجى وتتوسل..وتوخر عنه من خوفها..
لين تلقى ظهرها الحيط..
هو قال بنبرة هاديه مخيفه:اني ديري فيا هكي..اني ياكلبه يالمامه..
وهي ضامه ايديها لبعض وحاطتهم تحت ذقنها وعيونها لوطا تبكي وترعش..
وهو قال؛وربي درتيه فيا يومها نخليك تعيشيه ياوس.خه..
جبد تحفه كانت محطوطه ع الطاوله..ورفع يده فوق ونزلها..
🍃🍃🍃🍃🍃
في قاعة المحكمه اللي كانت مزحمه..
كانت محامية حامد موجوده بس..
ونسرين ومعاهم فايزة ونبيله
فايزة بملامح وجهها الباهته وعيونها التعبانات قالت؛مش حتجي..
نبيله؛قلت من الاول توقعي الحاجه هادي يانسرين..
نسرين بشي من الاحباط؛متوقعه بس كان عندي شويه امل..
نبيله؛مادوري شي ع قولة خوي رؤوف حتطلقي منه صدقيني وفي وقت قصير..
ابتسمت فايزة بمجامله..
ونسرين قال؛يارب..
"نسرين محمد شنيبه"
"حامد مسعود *****"
ناضوا نبيله ونسرين..
نبيله؛تو ينادوا عليك بعدين فايزة..
هزت راسها وهي ساكته..
مشوا مع بعض وقدامهم محامية حامد وخشوا ع القاضي..
🍃🍃🍃🍃🍃
"حامل..حامل..اني حامل"
صرخاتها بالكلمات جمدت الجالي عن الحركه..
اللي سمعه كان نقطة ضعفه..
صح كان متفق هو وياها مايديروش صغار..
بس وين سمعاها قالت حامل تخيل العيل بين ايديه..
نزل يده وهو بشوفلها بعدين قال؛من امتى؟
هي بخوف قالت؛عرفت امس بس بعد ماروحت من الخدمه..
قعد يشبحلها شويه..
بعدين لوح التحفه وجبدها من يدها وقال؛تو نعرف بروحي من امتى..
نجاه وهي ترعش:وين رافعني..!!
الجالي؛لوين مانعرف كان تقولي في الحق ولاتمشي فيه عليا..
نجاه في نفسها..
"رحتي فيها يانجاة"..
فتح الباب وطلع ليها..
وهدا كله وولدها معاذ راقد وولاحس بحاجه...
🍃نزل بيها لوطا..
لقي صابرين واقفه ع باب العمارة وهي مغطيه شعرها ببرنوس التوب متاع التوته..
صابرين بخوف؛وين رافعها!
الجالي:سكري فمك..
ومشي وهو يكر في نجاة لين ركبها سيارته وركب معاها وطلع بالسيارة يجري..
صابرين بخوف؛ياربي شن بيدير فيها ياربي شن بيدير!
بعدين  تفكرت معاذ وقالت؛الولد بروحه فوق..
وركبت تجري..
🍃🍃🍃🍃🍃
"مافيش سبب يدفعها لطلب الطلاق سيدي القاضي عايشه في رفاهيه وكل طلباتها مجابه وموكلي مش منقص عليها اي حاجه نبيها تعطي سبب مقنع وبالأدله والبراهين يدفعها لطلب الطلاق"
شبح القاضي لنبيله وقال:شن ردك ع كلامها؟
نبيله؛سيدي القاضي المراة لو كانت ملكه.وعندها زوج يخون فيها ويهين فيها بقصص مجونه اللي ماتخلصش حتتنازل عن كل شي مقابل حريتها من رجل كهذا..
:اعترض سيدي.
شبحلها..
؛كلامها فيه اتهامات خطيره لو ماعندهاش دليل حنرفعه عليها قضية سب وتشهير..
شبح القاضي لنبيله..
ونسرين تشوف لمحامية حامد وخاطرها تضربها وتجبدها من شعرها..
نبيله؛قدام حضرتك تسجيلات فيديو تبين ان زوج موكلتي يجيب في نساوين لحوشها ويمارس معاهم في الفاحشه..
القاضي:تعرفي كويس ان حني مانعتدوش بتسجيلات الفيديو وغيره كدليل اثباب..
نبيله؛عندي شاهده حضرت تعرضت لمحاوله تحرش من قبل زوج موكلتي..
القاضي؛اسمها..
نبيله؛فايزة الخويلدي..
نادي ع فايزة الخويلدي..
"فايزة الخويلدي"
ناضت فايزة ومشت خشت داخل..
🍃والجالي ونجاه خشوا لعياده..
وهو شاد يدها بس كانوا يمشوا طبيعي بش مايلفتوش الانتباه..
وين وصلوا لقسم النساء والولاده..
دفع كشف مستعجل وخشوا للدكتورة هو ونجاه..
بعد ماسمعت منه طلبت عليها تحاليل..
هو خداها ومشي بيها للمعمل..
🍃الجالي:نبي التحليل يطلع بسرعه..
الفنيه قعدت تشبحله وهي ساكته..
ونجاه قريب يغمى عليها من الخوف..
الجالي طلع فلوس وحطهم ع الطاوله..
هي خدتهم وقال:تمام..ومشت طول سحبت لنجاة..
اللي كانت حاسة ان هادي اخر لحظاتها في الدنيا..
بعد ماسحبت منها طلعوا برا وقعدوا يراجو جنب المعمل..
هي مقعمزة وعيونها في الارض..
وهو واقف مربع ايديه ويشوفلها بنظرات استياء..
🍃🍃🍃🍃🍃
"حاول اكثر من مرة غير هادي جاني حتى لمكان خدمتي وقدام مدرسة بناتي"
محاميه حامد:سيدي هادي صديقتها يعني ممكن جدا تكون متفقه معاها تقول الكلام هدا..
فايزة؛والله العظيم ياحضرت القاضي هدا اللي صار لازدت ولانقصت..
نبيله:سيدي حتى لو كانت صديقتها مش حتجازف مجازفه زي هادي ودخل روحها في شوشرة ومشاكل ممكن ضر سمعتها الموضوع حساس جدا سيدي القاضي..
محامية حامد؛عندها مايثبت ادعائها؟! لو ماعندهاش معناها يكون كلامها محض ادعاء كاذب..
القاضي شبح لفايزة..
وفايزة شبحتله بضيق وغيرت عيونها لنسرين اللي كان بادي ع وجهها الإحباط..
نبيله؛سيدي القاضي موكلتي رافضه رفض قطع انها ترجع لزوجها بأي شكل سواء كان في ادلة ع خيانته ليها او لا..
خش الراجل اللي ينادي ع الباب وقال..سيدي في وحده جت وقالت انها شاهده في القضيه هادي..
هما تفاجئوا..
والقاضي قال:عندكم شاهده تانيه؟
نبيله؛كريمه***** بس توقعناها ماتجيش اليوم لأنها تأخرت..
الراجل؛الشاهده اسمها ليلى حاتم كرازة..
اندهشت نسرين...
شبحتلها نبيله..
نسرين بدهشه؛كنة كريمه..
شبحت نبيله للقاضي وقالت؛هادي شاهده ثالته سيدي..
القاضي؛دخلوها..وانتي تقدري تتفضلي..
مشت فايزة طلعت..
.وخشت ليلى ووقفت مكانها..
🍃🍃🍃🍃🍃
وطلعت نتيجة التحليل..
وجت بيها الفنيه التحالبل للجالي ونجاه..
نجاة لما شافتها حست قلبها بيوقف خلاص..
الجالي:شني دكتورة؟
شبحت لنجاه وقالت؛مبروك مدام انتي حامل..
زادت سرعة نبضات قلبها..
عيونها توسعوا ع الآخر..
وانفتح فمها من قوة الصدمه..
وهو انصعق لما سمع شن قالت..
قعد يشوفلها وهو مصدوم ..
وهي اللي ماقدرتش تستوعب اللي سمعاته..
لما غيرت عيونها ليه وشبحتله..
غمضتهم لأنهافقدت وعيها...
🍃🍃🍃🍃🍃
"هدا اللي صار بالزبط..هو جي لعمتي وهددها بولدها بش ماتشهدش مع نسرين..ومن بعدها عمتي خشت في حالة نفسيه ومرضت هلبه لين خشت المستشفى...امس كنت عندها وهي اللي قالتلي نمشي نشهد في المحكمه بش يرتاح ضميرها"
نبيله؛المعروف عن عن علاقته بعمته انها قويه هلبه شن اللي بيخليها تفتري ع ولد خوها مع العلم ان زوج موكلتي هو توسط لولدها بش طلع قري في الخارج..يعني الأولى انها دس عليه مش تشهد ضده!؟ ولأنها معروف عنها ان حقانيه وكان ليها موقف سابق في محكمه ضد خوها ماقدرتش تتجاهل ضميرها الحي..
القاضي شبح لمحامية حامد وقال:عندك شي ضيفيه؟
المحاميه بأسف:لاياسيدي..
هو هز راسه وقال:اكتبي يابنتي.
وبدت الكاتبه تكتب فالكلام اللي يقول فيه..
ونسرين تسمع فيه بتركيز وهي تبلع في ريقها من التوتر..
لين وصل لأخر كلامه اللي قال فيه..
ونظرا لشهادة الشهود اللي تثبت ادعاء المدعيه وكذلك القرائن  التي اكدت هذه الادعاءات..حكمت المحكمه بتطليق المدعيه نسرين محمد شنيبه من زوجها حامد مسعود*****
نسرين ماصدقتش وذانها قعدت تشبح لنببله وهي مصدومه اللي صار كان غير متوقع بالنسبه ليها..
كانت متوقعه ان القضيه حطول لكن ربي اراد انها تخلص من اول جلسة...
لما جو طالعين من القاعة..
جت فايزة لنسرين وقالت؛طيب فيك حبيبتي اللي افكيتي منه بسرعه..
هي حاولت.ترد عليها بس ماقدرتش حست روحها فشلت مرة وحده وطاحت من طولها..
وفايزة بخوف وصدمه قالت
"نسرين..!"

#مخبأ_منحة_محنه
#طوبى