- ألوو ، إنتي فين ياهدير ؟
= أنا في الطريق يازينب أهو جاية
- طب مدّي بقاا ..دكتور حازم قالب عليكي المستشفي وعايزك ضروري
= حزومي حبيبي عايزني !! ..لأ دا أنا آجي بسرعة بقاا
- أنا كنت رافضة الخطوبة دي عشان حزومي وحبيبي دي ، جتك القرف مابتعرفيش تحبي ..الحب بيقلب معاكي سهوكة
= بضحك : وانتي مالك ياست انتي ؟! أنا عاجباه وانا كدة ..دا انتي ست غريبة جدا
- اتفلقوا ..المهم مدّي بقاا عشان هو عايزك وكل شوية يسأل عليكي
= تمام ..أنا جاية أهو
"" كنت بمد بسرعة عشان أوصل للمستشفي مادام حازم عايزني ..حازم مدير المستشفي اللي أنا بشتغل فيها وخطيبي كمان ، حُب عُمري ..كنا مع بعض في الكلية كان أكبر مني بسنتين ، عرفنا بعض في موقف غريب ..في خناقة .. ، وبعد كدة كان بيحاول يقرب مني ويعرفني ..لكن أنا كنت بصده دايما ..وقعدنا حوالي ٣ سنين مابنشوفش بعض خالص ، ولا حتي حاول يكلمني تاني ..لحد ماخلص جامعة واتفاجئت إنه اتقدملي ، اتفاجئت إنه لسة فاكرني أصلا ..وطلع أصلا مش ناسيني وصبر لحد ماخلص كلية واشتغل وجه اتقدملي ..كبر في نظري بصراحة ، وقتها كنت أنا في سنة الإمتياز ..وهو اشتغل في المستشفي بتاعة باباه وبعد كام شهر باباه تعب وساب المستشفي وبقاا حازم هو المدير ..ولما خلصت أشتغلت معاه في المستشفي ، المهم اتخطبنا ..وحبينا بعض أكتر ، وفرحنا كمان ٣ شهور ،، وصلت المستشفي وروحت علي مكتبه علي طول وخبطت ..ولما أذنلي بالدخول دخلت ..""
- بإبتسامة : صباح الخير
= صباح النور ..أخيرا جيتي ، اتأخرتي ليه كدة
- دا هي نص ساعة بس اللي اتأخرتها مش قصة
= ااه والمفروض أعدي دا عادي كدة ؟
- المفروض
= المفروض عند المكوجي ياحلوة ، أصل أنا ناقص يقولوا في المستشفي عشان خطيبته بيعدلها ومش بيقولها حاجة
- بضحك : ماهو دا فعلاً اللي بيحصل ..كل مرة تقولي كدة وكل مرة تعديلي عشان خطيبتك
= بضحك : طيب ياستي ..المهم أنا عايزك ضروري
- عايزني في ايه ؟!
= طبعا انتي عارفة إن فيه عجز في الأطباء عندنا ..والحالات اللي عندنا كتيرة ، فاأنا وزعت علي الدكاترة هنا حالات زيادة ..والأسبوع اللي جاي فيه دكاترة جديدة هيجوا المستشفي ..فانتوا المفروض هتستلموا من انهاردة الشغل اللي هما هيستلموه علي ماالدكاترة الجديدة تيجي ..يعني الأسبوع دا هيبقي مُتعب عليكوا شوية ..أنا وزعت علي الدكاترة الحالات ..وفاضل انتي ، عندك ٣ حالات مرضي زيادة و....
- بصدمة مقاطعةً : ايييه ؟! ..تلاتة ؟؟؟! ، حرام عليك ياحازم ، دا كتير أوووي مش كفاية اللي معايا
= ماهو كتير علي الكُل مش عليكي انتي لوحدك
- بضعف : يارب أنا ايه اللي خلاني آجي أشتغل في المستشفي دي
= قال يعني انتي كنتِ طايلة شغل تاني غير هنا ..مااتخلينا ساكتين
- بضحك : رخم اووي
= المهم دلوقتي .. الملفات بتاعة المرضي أنا سيبتهوملك مع زينب ، روحي خوديهم منها واقريهم وابدأي شغلك يادكتورة يلا
- تمام يادكتور ..عن اذنك
= اتفضلي
"" خرجت من عنده وروحت لزينب ..لقيتها قاعدة وبتقرأ في الملفات بتاعتي ..""
- صباح الخير
= صباح النور ..أخيرا شرفتي
- مشرفة من بدري ياختي ..بس روحت لحازم الاول وعرفت بموضوع الحالات دي ، ماقولتليش ليه انه عايزني في كدة وانتي بتكلميني ؟؟ عالاقل كنت رجعت بيتنا وماجيتش
= كنت عايزة انكد عليكي بصراحة ..عشان تفرحي بحزومك حبيبك كويس
- طيب ياختي ..المهم قريتي الملفات دي ولا ايه ؟؟
= أيوة ، خلصت لف علي المرضي بتوعي وعندي وقت فاضي قولت اقراهم ..تحبي اختصرلك الطريق واقولك اللي طلعت بيه من الملفات ؟
- بتنهيدة : يااريت
= بصي ياستي ، ال....
"" قاطع كلام زينب صوت صريخ جامد من برااا وعالي جدا ، وصوت ممرضات بينادوا عليا أنا ...""
- ايه دا ؟! ايه الصوت دا في ايه ؟!
= معرفش ، تعالي نطلع نشوف في ايه يلاا بسرعة
"" خرجنا نجري نشوف الصوت دا جاي منين ..لحد ماوصلنا لمصدر الصوت ، كان صوت مريض عمال يصرخ وعايز يخرج من المستشفي وبيقطع المحاليل من ايده والممرضة بتحاول تهديه ومعاها ممرض كمان بيحاول يمسكه ..كان بيقاومهم رغم انه متجبس وحالته باين عليها مش كويسة ..""
- ايه دا فيه اييه ؟!
الممرضة : إلحقيني يادكتورة ، المريض دا عايز يخرج من المستشفي وهو بالشكل دا ومش كويس خالص
- ومين الدكتور بتاعه ؟!
زينب : الحالة دي بتاعتك انتي ..من الحالات الجديدة
المريض بغضب : سيبووني..سيبووني أنا عايز أخرج سيبووووني
- اهدي ..هتخرج بس لما تتعالج
= بغضب : إنتي مين انتي عشان تمنعيني ؟! أنا هخرج ودلوقتي
- بحزم : أنا الدكتورة المشرفة عليك ومش هتخرج من هنا غير بإذني أنا
= سيبوووني ..أنا هخرج ، أنا مش عايز أقعد هنا في المستشفي دي خرجوووني من هنااا
- زينب هاتيلي حقنة مهدئة حالاً
= مش هااخد حااجة ..أنا عايز أخرج من هنااا ..مش عايز أقعد في المستشفي دي ..خرجوني ودوني مستشفي تانية حتي بس مش عايز أقعد هنا ..خرجوووني
"" جابتلي زينب الحقنة والممرضين مسكوه كويس ووديته الحقنة ..وهِدي خالص ، وبعد كدة طلعنا وسيبناه ..""
- ياساتر إيه دا ؟! ..ياربي أنا هستحمله كدة إزاي ؟!
= يعني هي أول مرة !! ..أهو ، دا شغلنا
- طب بما إنك قريتي الملفات ..قوليلي دا جاي في ايه
= دا ياستي دكتور زينا ..عمل حادثة عربية من حوالي أسبوع ، كان لسة راجع من السفر مابقلهوش يومين وعمل حادثة وجالنا هنا ..عنده كسور في رجليه الاتنين وايده الشمال مكسورة وكدمات في وشه وباقي جسمه ..ودخل في غيبوبة ولسة فايق منها دلوقتي لما صرخ
- امممممم ، طب بما انه دكتور المفروض يكون عارف إنه لو خرج هيبقي مش كويس وهيتأذّي أكتر
= احساس المريض مش بيحس بيه الطبيب ، غير لما يكون الطبيب هو المريض ويحس بوجع المرضي ..ماحدش عارف هو حصله ايه وعايز يخرج ليه وايه المشاكل اللي حصلتله وايه اللي يخليه يسوق بسرعة كبيرة كدة فايعمل حادثة ، وزي مانتي قولتي ..هو دكتور وأكيد فاهم ..
- بتنهيدة : تمام ..أنا هروح أشوف شغلي أنا بقاا وأتصل علي أهله عشان أبلغهم إنه فاق
= أووك
"" مشينا كل واحد كان رايح يشوف شغله ، لكن افتكرت حاجة فارجعت أسأل زينب عليها ..""
- زينب
= أيوة
- الدكتور المريض دا اسمه ايه ؟!
= عبدالرحمن ..دكتور عبدالرحمن حسن
- أوووك
"" روحت اتصلت بأهله وبلغتهم إنه فاق وجم بسرعة المستشفي ..، الممرضة اللي كانت معاه في الأوضة روحت سألتها ايه اللي حصل خلاه يصرخ وبالشكل دا ..وقالتلي إنه لما فاق من الغيبوبة قعد يسأل إيه اللي حصله والممرضة جاوبته وسألها هو في مستشفي ايه ؟! ولما قالتله قعد يصرخ وكان عايز يخرج من المستشفي ..شغلني جدا إنه ليه مش عايز يقعد في المستشفي دي ..كنت عايزة أعرف ...روحت أشوف شغلي وأشوف الحالات الجديدة اللي اتكلفت بيها ، وبعد شوية جت ممرضة وقالتلي إن عبدالرحمن فاق ..بس كان هادي ، روحتله الأوضة بتاعته وأهله كانوا موجودين وبيتطمنوا عليه وفرحانين إنه فاق ..بكل هدوء رميت السلام عليهم وهو أول ماشافني ملامحه اتغيرت وكان متضايق ..مااهتمتش وشوفت شغلي .. ""
- ضغطك واطي و.....
= مقاطعاً : أنا عارف ..أنا عارف حالتي كويس ، وقادر أكتشف إني ضغطي واطي وإن نبضي ماكنش منتظم وانتظم لما فوقت من الغيبوبة ..أنا قادر أعرف حالتي كويس
"" ماكنتش عاجباني طريقة كلامه خااالص ..بس كنت بدوس علي نفسي ، في النهاية دا شغلي ..""
- بتنهيدة : ومادامك يادكتور عارف حالتك كويس ، عارف برده إن ماكنش ينفع اللي عملته دا ؟! وخروجك من المستشفي خطر عليك خصوصا إنك لسة ...
= مقاطعاً : قولتلك أنا قادر أعرف اللي عندي كويس ..وأنا عايز أخرج من هنا انهاردة ..أنا مش عايز أقعد في المستشفي دي ، أنا عايز أتنقل من هنا وأروح المستشفي بتاعتي
- ماينفعش تخرج ، ومش هاتخرج من هنا غير لما أنا أكتبلك علي خروج ..ودا مش هيحصل غير لما تتعالج بالكامل
= بغضب : ايه اللي انت....
- مقاطعةً : بص ، تتضايق تعلي صوتك تعمل اللي تعمله ..برده مش هتخرج ، عن اذنك بقاا ورايا شغل
"" سيبته بسرعة قبل مايعلي صوته تاني ..لكن هو اتكلم ..""
= خلاص مادام مافيهاش خروج ..يبقي تجبيلي دكتور يكون مُشرف عليا غيرك انتي
- بصدمة : نعممممم !!
= اللي انتي سمعتيه ..أنا مش عايزك تشرفي عليا ، مش طايقك
"" اتصدمت من أسلوبه الغير محترم دا ..واستغربت انه رافضني أعالجه ، ليه هو أنا عاملتله ايه ..لكن مش أنا اللي انسحب بسهولة كدة ..""
- المفروض اني ماسكة حالتك احتياطي علي مايجوا الدكاترة الجديدة الاسبوع اللي جاي وحد فيهم يستلم حالتك ، لكن بعد اللي انت قولته دا ..ماحدش هايستلم حالتك غيري ..واعتبرها عِند ، وياأنا ياانت تصدق بقاا !!
"" قبل مايتكلم مشيت بسرعة من قدامه ..وفعلا روحت لحازم وكان سهل اقنعه اني انا اللي آخد الحالة دي ..رغم اني متضايقة منه جدا جدا ومن اسلوبه ومنه كله ..بس هو عِند بقاا ..""
- هموت واعرف مش طايقنا ليه ..لا طايق المستشفي ولا طايقني
= ....
- مابترديش عليا ليه يابت انتي ؟!
= هرد أقولك ايه ؟! ..انا شايفة ان الموضوع مش مستاهل دا كله اصلا ..يعني فكك
- لا بقاا يستاهل ..ولازم اعرف ..وهاعرف
= بتنهيدة : طيب
"" الحالة دي كانت شاغلة تفكيري جدا ..جدا بصراحة ، وكنت عايزة اتكلم معاه واعرف اللي عايزة اعرفه ..بس هو تقريبا كان بيقرأ أفكاري ..لاني لما دخلته اليوم اللي بعده ، اتغيرت ملامحه واتضايق ..وكان ساكت !! ، ولما سألته عن نفسه حتي مارديش يُرد عليا ..كان باصص الناحبة التانية علي ماخلصت كشف عليه وبس كدة ..خرجت من عنده وأنا حقيقي متضايقة اني زي مادخلت زي ماخرجت ، وقعدنا علي كدة اسبوع ، مابيتكلمش معايا خالص ..ولا حتي بيبصلي ، لحد مافي يوم دخلت الاوضة بتاعته لقيته نايم ..بس لفت نظري الكراسة اللي عالترابيزة جمبه ..كان كاتب فيها حاجة بخط كبير ..مسكت الكراسة وقريتها ..""
_ كُنت أظن أن القُربَ يُحييني ، والنّظرة إليها تَكفيني حتي وَلو بِدونِ كلام
_ لكنّ القُربَ لم يُحييني .. ولم يَشفيني .. ولم يزيدني القربَ إلا وجعاً وآلام ..💛
"" استغربت !!..دا بيحب ؟!! ، ياعيني دا متعذب أووي ، بصراحة يستاهل ..ماهو أسلوبه زبالة بصراحة ، مين دي اللي تستحمله بأسلوبه دا ولا حتي ...""
- انتي بتعملي ايه ؟!
"" اتخضيت اووي لما لقيته صحي وشافني وانا ماسكة الكراسة بتاعته وبقرأ اللي فيها ..""
= بتوتر : أنا ..أنا آسفة ، أنا بس ..لفتت نظري الجُملة اللي انت كاتبها ، انا آسفة
"" بصلي بغضب ..كالعادة ، ومانطقش ، كملت شغلي وشوفت حالته انهاردة وانا مرتبكة جداا ..وخلصت بسرعة وخرجت من الاوضة وانا بحمد ربنا انه مااتخانقش ولا قال حاجة ..وعدت شوية أيام كمان ..""
- تشربي نسكافيه ؟!
=ااه ياريت يازينب ، عشان انا مصدعة اوووي
- اووك
"" راحت زينب الكافيتريا وجابت لينا نسكافية ، وهي بتحط النسكافيه علي الترابيزة ..فلتت منها كوباية ووقعت منها علياا ..""
= آآآآآآه ، حرام عليكي يازينب هو أنا ناقصة !!
- انا آسفة اووي والله العظيم مااقصد ، طب قومي بسرعة نروح الحمام
"" خدتني وروحنا الحمام وطبعا هدومي اتبهدلت جدا ..""
= اكمل يومي ازاي انا بهدومي دي ؟! ومافيش ليا هدوم هنا ؟!
- طب تعالي نسأل أي دكتورة هنا ولا ممرضة حتي يمكن حد يكون معاه لبس زيادة وتلبسيه
= يلا
"" روحنا سألنا فعلا لحد مافي دكتورة كان معاها لبس ولبسته ..بس اللبس كان مُلفت عليا وكان ضيق بطريقة انا ماستحملتهاش ..""
= انا مستحيييييل امشي باللبس دا ..يانهاار ابيض !!! ، دا ضيق عليا اووي ..دا دا ..دا لو حازم شافني كدة هيبهدلني ، وكمان انا عُمري مااتعودت ألبس كدة
- خلاص ياهدير معلش ..انتي مضطرة ، عالاقل علي ماهدومك تنشف وبعد كدة البسيها تاني ..وحازم لو شافك قوليله علي اللي حصل هيفهم
"" روحت كملت شغلي وانا متضايقة ومكسوفة من اللبس دا وبحاول أداري نفسي ..بعد شوية لقيت ممرضة بتبلغني ان حازم عايزني ، اتوترت وخوفت من ردة فعله بصراحة ، وروحتله وانا بقدم رجل وبأخر التانية ..ودخلتله ..كان بيديني ملفات لمرضي وشرحلي اللي عايزه مني وبعد كدة قالي أروح أكمل شغلي ..انا اتصدمت انه ماقالش حاجة ..ماعلقش علي اللي لابساه ولا نطق بكلمة ..""
- هو انت مش ملاحظ حاجة غريبة فيا ؟!
= بإستغراب : حاجة ايه ؟!
- أي حاجة
"" بصلي بإستغراب وبعد كدة خد باله ..""
= انتي غيرتي اللبس بتاعك ؟!
- ايوة
= ليه ؟!
- وقع عليه نسكافيه واتبهدل فالبست لبس تاني
= آهاااا ، طب يلا روحي شوفي شغلك
"" اتصدمت أكتر ..مش معقوول يكون ماخدش باله ان اللبس عليا ضيق !! ..هو ..هو مش بيغير عليا ؟!..خرجت من المكتب وانا حقيقي متضايقة ..جدا ، ازاي مش بيغير عليا وعادي عنده اني أمشي باللبس دا !!!؟ ..كنت راحة لعبدالرحمن اشوف حالته ..وانا متضايقة ومش شاغل تفكيري غير ردة فعل حازم ..دخلت عليه الاوضة ..العادي بتاعه انه اول مايشوفني دخلت يتضايق ويبص الناحية التانية لحد ماأخرج ..المرادي لأ ..المرادي بصلي ..وغضبه زاد ، كان باين علي ملامحه ..انا مااهتمتش لاني كنت مشغولة بتفكيري في حاجة تانية ..روحت اقيسله الضغط لكن وقفني بكلامه ..""
- ايه دة ؟! ايه اللي انتي لابساه دا ؟! انتي اتجنينتي ؟!
"" أنا اتصدمت !!!!! ..هو ياخد باله وحازم لأ ؟!!! ..المفروض في موقف زي دا أهزأه لانه مالوش انه يدخل ..بس يمكن ..يمكن كنت عايزة اسمع كلامه واتخيل لو ان حازم اللي بيقوله ..كنت عايزاه يغير عليا ..""
= مش فاهمة !! وانت مالك أصلا ؟!
- بغضب : خلاص اطلعي برا وخلي اللي رايح واللي جاي يتفرج عليكي ، أنا بصراحة مش عايز اتفرج ..ايه دة ؟!! وازاي خطيبك يسكتلك عاللي انتي لابساه دا ؟!! ..اطلعييي برااااا يلاااااا
"" كنت عايزة اسمع الكلام دا من حازم حقيقي ..خرجت من الاوضة وماكشفتش حتي عليه ..وكنت ماشية ومتضايقة ..""
_ وَالذّي نَهْوَاهُ عَلَيهِ هُنّا وَلَمْ يَهْوَانَا
_ وَمَنْ هَوَانَا لَمْ نَهُن عَلَيهِ حَتّي وَلَوْ هَانَ ..💙
"" مرت الأيام ..وفاضل شهر عالفرح ، ماكنتش مبسوطة ..كنت حاسة إنه عادي علي عكس ماكنت متخيلة ، ماكنتش مبسوطة من يوم مااكتشفت ان حازم مش بيغير عليا ..وكمان هو اتغير معايا كتير ، كان كل اهتمامه بس بالشغل ..شغل وبس ..دا قفلني زيادة ..""
- عامل ايه انهاردة ؟!
= كويس الحمد لله
- ياارب دايما
= ..................
- بقولك ايه ؟! ..انا فاضية نص ساعة كدة ، ايه رأيك اجيب لنا اتنين نسكافيه ونقعد نشربهم وحابة اسألك عن كام حاجة كدة ؟!
= لأ
- ياااه بجد مش عارفة أقولك ايه ..هجري اجيب كوبايتين نسكافيه بسرعة واجي
"" خرجت من اوضة عبدالرحمن وروحت الكافيتريا بسرعة جبت لينا كوبايتين نسكافيه وجيت ..لقيته زي ماهو قاعد علي سريره ..بس كان بيصلي ..فرحت لما لقيته بيصلي وان مرضه مامنعهوش من الصلاة ، بس زعلت لاني عمري ماشوفت حازم بيصلي ..تقريبا مابيصليش خالص ..دا وجعني زيادة ..""
- تقبل الله
= منا ومنكم ان شاء الله
- اتفضل النسكافيه ..الحق اشربه قبل مايبرد زيادة
"" خد مني الكوباية وقعدنا نشرب وسكتنا شوية ..""
- انت دكتور ايه ؟!
= أنا جراح
- اممممم ..طبيب جراح يعني ..وقلوب الناس تداويها وكدة ؟!
"" بصلي وسكت ..فاكملت ..""
- طب وياما جراح سهرت الليل تداريها ولا دي إشاعة ؟!!
"" بصينا لبعض شوية وبعد كدة ضحكنا اووي ..اول مرة اشوفه بيضحك ..""
- طب ماانت بتضحك زينا أهو
= طب ما أنا زيكوا ..ايه الغريب فياا يعني ؟!
- والله من يوم ماشوفتك وانت غريب أصلا
= ليه ؟!
- كاره نفسك وكارهني وكاره المستشفي
= انا مش كاره نفسي ولا كاره المستشفي ..
- امال ايه ؟! كارهني أنا ؟! ..
= ...........
- طب ليه بتكرهني ؟! ..أنا ماعملتش ليك أي حاجة تخليك تكرهني ..بالعكس أنا ساعدتك
= ..........
- طب بلاش ترد مش مهم !..عملت حادثة ازاي ؟
= بتنهيدة : كنت سايق بسرعة فجأة دخلت في تريلا
- طب كنت سايق بسرعة ليه ؟؟
"" بصلي بسخرية كدة ..اللي هو مش للدرجادي التدخل دا ..""
- اممم ، طب انت اللي كاتب الجُملة اللي أنا قريتها في الكراسة ؟!
= أيوة
- كاتبها لمين ؟!
= بتنهيدة :...............
- كاتبها لحبيبتك ؟!
= .................
- بتنهيدة : واضح انك مش عايز تتكلم وانا مش هضغط عليك
= واضح فعلا ..
- طيب براحتك هقوم أنا أشوف شغلي
"" قومت وفتحت الباب وكنت هخرج ..لكن رجعت وبصيتله وقولتله ..""
- علي فكرة !! ..أنا فرحي كمان شهر وهتيجي
"" اتصدم !! وبعد كدة ابتسم وهز راسه ..مش عارفة ايه اللي خلاني أقول كدة ..مع إني عايزة أأجل الفرح ومش عايزة أتجوز بعد شهر ..عايزة أعيد نظر في الموضوع دة من تاني ..""
"" بعد أسبوع خِلصت دعاوي الفرح بتاعتنا ..وكنت بوزعها علي زمايلي في المستشفي وكنت عاملة حساب عبدالرحمن في دعوة ..خلصت توزيع وروحتله الأوضة خبطت ودخلت ..إتفاجئت إني لاقيته لابس هدومه وماسك عكازه بيتسند عليه وبيلم هدومه في شنطته ..""
- بإستغراب : إيه دا انت رايح فين ؟!
= ماشي
- احنا مش كنا خلصنا من الموضوع دا
= أنا بقيت كويس ولازم أمشي
- بس أنا ماكتبتش ليك علي خروج
"" دور وشه لياا وبصلي وقالي وعيونه كان باين فيها الوجع ..""
= أنا لازم أمشي ..أنا مش قادر أقعد أكتر من كدة
- بإستغراب : ليه ..هو حد ضايقك هنا ؟!
= لأ ..بس عايز أمشي أرجوكي
- مش هينفع تمشي ..لازم تستني هنا عالأقل أسبوع كمان
= أنا استحملت المدة اللي فاتت دي وقعدت هنا عشانك ..عشان انتي طلبتي مني دا ، لكن أكتر من كدة مش هقدر
- بإستغراب : عشاني ؟! يعني ايه عشاني ؟!
= يعني عشانك
- ..مش فاهمة ؟!
"" بصلي شويةة ..وقالي ..""
= ومش هتفهمي ..
- بغضب : يوووووووه ، أنا من ساعة ماشوفتك وانت كُلك علي بعضك كدة ألغاز ..كلامك كله مش مفهوم وكله غلط ، حتي أسلوبك غلط ، وجاي دلوقتي تقولي عشانك وانا مش فاهمة حاجة وعايزني مااسألش ؟! ..فهمني يعني ايه عشاني ؟! .يعني اي....
= بغضب مقاطعاً : عشان بحبك ، عشااان بحححبببك ، أنا تعبت وفاض بياا ..أعمل اييييه ؟! طول عمري في حالي ولا عُمري قربت من بنت ولا عُمري فكرت أحب ولا عمري إتمنيت الحب دا !! ..ويوم ماأقع فيه ..أقع فيكي انتي ؟! ليييه ؟! ..أقع في واحدة مش من نصيبي لييه ؟!
"" كان بينهج وهو بيتكلم !! ..كان يسكت ثواني ياخد نفسه ويكمل تاني ..""
= كنا مع بعض في الكلية ..كنت أكبر منك بأربع سنين ..من يوم مادخلتي الكلية وأنا عيني مابتشوفش غيرك ، خبيتك جوايا وقفلت عليكي وماورتكيش لحد ، خبيتك جوا عنيا ولا لحد لمح طيفك فيها ..وقررت بعد مااخلص دراسة هاجي وأتقدملك ..وفي يوم واحنا في الكلية شوفت حازم بيقرب منك ..وعايز يتكلم معاكي وكان شكلك رافض ..شوية وصوتك بدأ يعلي ..وقتها مااستحملتش وجريت عليه انا واصحابي واتخانقنا معاه ..جيت سألتك وقتها انتي كويسة ؟! ..هزيتي راسك ومشيتي من قدامي ، كان كل يوم بيعدي عليا وانا بشوفك كنت بضعف ليكي ..رغم اني مش كدة ، أنا مش ضعيف قدام حد غير قدامك ..قررت أسافر أكمل دراستي برا عشان أقدر أشوف مستقبلي وماافضلش دايما بفكر فيكي وادور عليكي ..ونسيت انك جوايا ، مهما بعدت انتي معايا ..في سفري كله ياما ليالي عدت عليا ماجاش فيها النوم عشان بفكر فيكي ..كإنه حالف مايجيني وفرحان بعذابي ..أنا تفكيري فيكي كان بيعذبني ..كنت راضي ، واصبّر نفسي وأقول كُلها أيام ويجي اللُقي ..بس لما جه ..جه وانتي لحد تاني مش لياا ، جه وانتي لابسة دبلة الراجل اللي أنا حوشته عنك زمان وماستحملتش أشوفه بيقربلك ..بالله عليكي !! ..أنهي دوا يقدر يداوي الوجع اللي جوايا ..النار اللي جوايا دي اطفيها ازاي ؟! العذاب اللي كل يوم بدوقه ..أخلص منه ازااي ؟؟!! ..لما جيت من السفر سألت عليكي ولما قالولي انك اتخطبتي ..حسيت اني توهت ، روحي ضاعت مش عارف ألاقيها ..ركبت عربيتي وسوقت بأقصي سرعة عندي كنت عايز أنسي ..مش عايز أفكر فيكي كفاية ..انتي بقيتي لراجل تاني ، فجأة تريلا ظهرت قدامي وعملت حادثة ..عملت حادثة عشان آجي المستشفي اللي انتي وخطيبك بتشتغلوا فيها عشان أفتكر دايما انك مش لياا ..عشان مااقدرش زيادة إني أنساكي ..بس أنا أنسي إني أنسي ولا أنساكي ❤ ..عرفتي ليه لما فوقت من الغيبوبة كنت بصرخ ؟!! عرفتي مش عايز أقعد في المستشفي ليه ؟!
"" بص لإيدي لقاا دعوة الفرح اللي كنت جاية اوديهاله ..""
= ودلوقتي جاية وجايبالي دعوة فرحك !! ..مش كفاية وجع فيا بقا ؟! ولا لسة ماستكفتيش ..
_ خبيتك بين ضلوعي وشايفك دايما بالنسبالي فَرْح
_ ولا أفرط في اللي يجي منك حتي لو اللي يجي منك جَرْح ..💜
"" حسيت بدموعي وهي نازلة ..مش عارفة هي نزلت ازاي ؟! بس أنا كنت موجوعة من كلامه ..موجوعة أووي وصِعب عليا اللي أنا عملته فيه من غير قصدي ..سيبته يكمل اللي بيعمله عشان يمشي ..ماهو لازم يمشي ، مااقدرش أمنعه ..بس كنت واقفة معاه ، مش عارفة أنا واقفة ليه ؟ كنت عايزة أتكلم بس برده مالقتش كلام ، كان مديني ضهره ..بس كنت شايفة دموعه ..دقيقة بالظبط ولقيته ماسك دماغه والعكاز وقع من ايده وفجأة أغمي عليه ووقع ..انا اتصدمت !!! ، وقعدت أصرخ وخرجت أدور علي أي دكتور يشوفه ونسيت إن أنا دكتورة !! ..جت زينب ومعاها ممرضين وشالوه حطوه في السرير ..وفوقته زينب وقالتله انه مايقومش من السرير عشان هيدوخ تاني .. وخرجنا من عنده وأنا منهارة من العياط كنت موجوعة عشانه أووي ، أنا عُمري مااتوجعت الوجع دا ..وديت الحالة بتاعته لزينب خليتها هي اللي تكمل إشراف عليه ..مش هينفع اشوفه تاني ولا اتعامل معاه عادي ..حقيقي كان شاغل تفكيري جدا ..حتي بعد ماخرج من المستشفي ومشي ، كنت مفتقداه جدا ..جدا جدا ، حاسة ان فيه حاجة ناقصاني ..حاجة جوايا ناقصة من غيره ..هو أنا حبيته ولا إيه ؟!
"" مشيت بينا الأيام وعدا شهرين ..بس إحساسي بيه هو مامشيش ..حقيقي أنا مش عارفة أعيش من غيره ..بس أنا خلاص مش هستحمل تاني ..مش هينفع !! ""
"" روحتله المستشفي بتاعته وسألت عليه وروحتله مكتبه ..خبطت ولما أذنلي بالدخول دخلت .. ""
- السلام عليكم
"" رفع راسه وبصلي ..ولما شافني اتصدم !!..وقام وقف ..""
= هدير !!!..إنتي ..إنتي ايه اللي جابك هنا ؟!
- ودا رد السلام بتاعك ولا ايه ؟!
= أنا ..أنا آسف ..وعليكِ السلام ، اتفضلي
"" قعدت عالكرسي قدامه ..وبدأت أتكلم ..""
- في الحقيقة أنا سمعت إنكوا عايزين دكاترة هنا في المستشفي فاأنا جاية عشان كدة ؟!
= ليه ؟! وانتي سيبتي الشغل في المستشفي بتاعة جوزك ؟!
"" كنت لسة هتكلم لكن هو سبقني وقال ..""
= صحيح نسيت أباركلك ..ألف مبرووك
"" بصيتله واتوجعت لما شوفت نظرة الوجع اللي شوفتها في عنيه قبل كدة لما اعترفلي بحُبه ..""
- الله يبارك فيك ..وعقبالك
"" هز راسه وبعدين قال ..""
= ماقولتليش سيبتي الشغل هناك ليه ؟!
- عشان مايقولوش ان جوزي هو اللي مشغلني ولو حصل حاجة وعدهالي هيقولوا عشان مراته والكلام دة ..فاقولت اسيب الشغل هناك وادور علي شغل تاني في مستشفي تانية
= امممم ، تمام
- تمام ايه ؟! هتشغلني ولا لأ
= طبعا هشغلك ..تقدري تستلمي شغلك من انهاردة
- بجد ؟! طب كويس أنا جاهزة
= خلاص ..تعالي معايا هوريكي المستشفي وأسلمك حالات
"" كنت فرحانة جدااااا ، قومت معاه وفرجني عالمستشفي وقالي كل حاجة وايه المفروض أعمله وكدة ..وبعد كدة سابني وكان ماشي رايح علي مكتبه ..لكن أنا وقفته ..""
- دكتور عبدالرحمن
= أيوة يادكتورة
- انا وحازم مااتجوزناش ..حصلت مشاكل بينا قبل الفرح بإسبوع عشان هو كان مصمم إني مااشتغلش بعد الجواز ..فاماحصلش نصيب ..وطبعا سيبت المستشفي
"" كان مصدوم ، جدا كمان ..بس شوفت مكان الوجع فرح في عنيه ..""
- عن اذنك
"" أنا كمان كنت فرحانة جدا وكمان إني هاشتغل معاه في مكان واحد دا فرحني أكتر ...عدا أسبوع وماحصلش حاجة جديدة ..كنت مستنياه يجي يتقدم ماجاش ..خبطت علي مكتبه ودخلت ..""
- فيه حاجة يادكتورة هدير
= ااه فيه
- فيه ايه ؟!
= فيه اني جايلي عريس إنهاردة ولازم أروح بدري
- بصدمة : اييييه ؟!
= ااه ..أيوة جايلي عريس ، فيها حاجة دي ؟! ..بيجيلي أنا عرسان ، عايزين يتجوزوني ..وأنا كمان عايزة أتجوز
- ................
= هاعتبر سكوتك دا مواقفة علي الإذن ..يلاا سلاام
"" مشيت خطوتين ..ووقفني هو ..""
- سلاام ايه خدي هنا
= نعم
- يعني ايه جايلك عريس ؟! مش فاهم
= مش فاهم ايه بالظبط ؟! ايه اللي مش مفهوم في الموضوع
- يعني ايييه ؟!! هتتجوزي ؟!!!
= مااتجوز ..فيها ايه لما اتجوز ولا اكونش بايرة ولا ناقصلي ايد ولا رجل ..ايه مشكلتي يعني ..عن اذنك
"" مشيت خطوتين ..ووقفني تاني بس صوته كان عالي ..""
- المرادي بموتك ياهدير ..وفرجيني بقاا هتتجوزي واحد غيري إزاي ،أنا سكتلك مرة مش هسكتلك تاني
"" فرحت اووي اووي ..""
= يعني أعمل ايه يعني أنا دلوقتي
- هترفضي العريس ، وبلغي باباكي إن أنا وأهلي جايين لكوا بكرة
= بفرحة : بجد ؟!!!!
- أيوة ، المهم دلوقتي تروحي ترفضي العريس اللي جايلك انهاردة
= أصلاً مافيش عريس ..أنا كنت بشتغلك
- بصدمة : نعمممم ؟!
= أيوة يعني أعملك إيه ماانت مش راضي تتحرك وواقف في مكانك ..مستني ايه يعني لما اكون لحد غيرك تاني ؟!
- ماشي ياهدير
= بفرحة : .........
"" روحت قولت لبابا إن عبدالرحمن وأهله جايين بكرة ..بصراحة كنت فرحانة جدا جدا جدا ..فرحانة أكتر ماكنت فرحانة بحازم بكتيييييير ، وقتها عرفت إني كنت بحب حُب حازم لياا وإن هو قعد سنين فاكرني ..بس فيه حاجات كانت أهم من الحُب مالقيتهاش عند حازم ولقيتها عند عبدالرحمن ..زي الغيرة مثلا وزي الصلاة ..""
- مبرووك ياست هانم
= بإبتسامة : الله يبارك فيك
- بتنهيدة : أخيرا بقيتي لياا
= نهاية الصبر دايما خير
- ااه وانا صبرت كتير والله
= بإبتسامة : ....
- هو انتي سيبتي حازم عشان رفض إنه يشغلك بعد الجواز ؟!
= أيوة طبعا ، دا عايز يلغيني ويلغي شخصيتي ..أسكتله بقاا وأسيبه يتحكم فيا بالشكل دا ؟! ليه يعني ..؟!
- طب لو أنا قولتلك هتسيبي شغلك ومش هتشتغلي بعد الجواز هتعملي ايه ؟!
"" لعبت في ضوافري وقولتله ..""
= مانت عارف ياعبدالرحمن ..الست مالهاش إلا بيت جوزها وعيالها ..خَدنا ايه من الشغل غير وجع القلب وقلة القيمة
"" بصلي وقعدنا نضحك ..وقتها عِرف إن هو عندي حاجة أكبر مما كان حازم عندي بكتييير مع إني عارفة إنه مش هيقعدني من الشغل ..أصلاً عبدالرحمن عندي أكبر من إنه يتقارن بحد تاني ..""
_ شايفك مالية عيني ، شايلك مابين ملامحي
_ والدمع اللي في عيوني ، دا بس دمع فرْحِي ..🌻
#حواديت
#هالة_أحمد
"" لا أحلّل الإقتباس من دون الإسم "" 🌻