اسكربتات هالة أحمد

{55}

'' أول مرة بتفرق في كل شئ '' ♥

ليالي الشِتا الحزينة ، والقهوة المظبوطة في الكافيه ..
الأيام المملة ، والكلمات اللي بقت شبه بعضها .. قطعت الورقة من الدفتر وطبقتها في إيدي ورميتها ، حطيت إيدي علي راسي وغمضت عنيا ، روح الكاتب اللي جوايا بقت محروقة ..وماشي علي نفس النمط الممل .
الكاتب جاف المشاعر .. بصيت للدفتر من تاني وكتبت ..

أول مرة بتفرق في كل شئ ..

والحقيقة لما كتبتها ماكنتش فاهم يعني إيه أول مرة بتفرق في كل شئ ، غمضت عنيا من تاني .. ولما سمعت صوت ضحكة خفيفة ..رقيقة ..فتحتها ، ودورت علي مصدر الضحكة ، ولما لقيتها .. لقيت حرفياً كل شئ ..
الحقيقة إن دي أول مرة أحس بإنبهار ، وفوقان لمشاعر جوايا ماعرفتش إنها موجودة غير دلوقتي .
المنظر كان يستدعي إني أفضل مبهور ، وبتلقائية إيدي اللي كانت علي راسي بقت علي خدي .
خليني أقول إنها مجرد بنت ! ، بس مش مجرد بنت !..ضحكتها حلوة ..لقيت نفسي ببتسم لما لقيتها بتضحك ، فيه تفاصيل صغيرة أوقات بتلعب بينا وإتخلينا مهما نحاول نهرب منها مانقدرش نهرب ! ، زي رموش عنيها الكحيلة اللي كل ماترمش ..تخربش في قلبي ، أوقات كتير بنحب نكون ضُعفا ونحب حالة الضعف تطوّل ، زي ماجت عنيها في عنيا وخدت بالها إني بابصلها .
خليني أقول إن الكاتب جاف المشاعر مرتبك .! ، وإن عنده حاجة ..حاجة جواه ماتنفعش تتوصف بالجفاء أبدا .
بحرص شديد رفعت عيني وبصتلها .! ، مع أول رشفة من فنجان القهوة ، عنيا أُغرمت بيها !.

- أنا آسف يافندم عالقهوة !

بصيت للجرسون بإستغراب وقولتله ..

= مالها القهوة ؟

بإستغراب أكبر قال ..

- القهوة سادة يافندم ! ، وحضرتك بتشربها مظبوط ..أنا آسف أنا غلطت ونزلتهالك سادة
= بإبتسامة : تصدق ! ، ولا أخدت بالي ..

إبتسمت لما عرفت إن السُكر كان النظرة لعنيها ، وإن كل حاجة غلط تتصلح فوراً ..لما تبقي دايما بتضحك .
مسكت القلم وكتبت ..
أول مرة بتفرق في كل شئ ، الدنيا في لحظة بتتبدل ..إنت بتتبدل ، يمكن تكتشف في نفسك حاجات غريبة أول مرة تكتشفها وتحس بيها ، حاجات غريبة بس حلوة ..حاجات تخليك متيم ! ، وتحب إنها تتعاد تاني ..تحب تشوفها من تاني ..تشوف ضحكتها وتشرب عنيك منها السعادة ، ويمكن يكون قلبك كمان أُغرم بالخربشة ..حتي القهوة اللي عِشت تشربها مظبوط ، هتحب تشربها دايما سادة ! ..هتحب أكيد .!♥

- إزيك ؟

رفعت عنيا وشوفتها ! ، مع صدمتي بوقوفها قدامي ، إلا إني كنت قادر أحكم إن صوتها فيه غرام ..

= أهلاً وسهلاً
- أنا معجبة بكل اللي حضرتك بتكتبه ، إنت بجد عظيم

العظمة الحقيقة في إني بكتب هي اللي جابتها قدامي دلوقتي ، شعور اللُطف اللي أنا حاسه دلوقتي هو شعور كإنه أول مرة يتقالي إني بعرف أكتب . كإنه أول مرة أكتشف إني كاتب وإني فجأة بقيت عظيم ، عشان هي شافتني عظيم . كل حاجة إتحولت فجأة لأول مرة عشانها ، عشانها هي .
أول مرة أحب الشِتا ، وأحب القهوة السادة .
أول مرة وأول لحظة أبقي فخور بكوني كاتب ، وإكتشافي لنفسي لأول مرة إني مش ممل .
أول مرة أحب ضعفي .
أول مرة أحب ضعفي ليها ، لعنيها ولصوتها ولضحكتها وروموشها ، ليها كلها .
أول مرة حقيقي بتفرق في كل شئ .! ♥

#هالة_أحمد