اسكربتات هالة أحمد

{21}

- هاا يازينب عرفتي معاد الورشة هتبقي امتي ؟
= ااه عرفت ..هتبقي بكرة
- بكرة ؟! علطول كدة ؟!
= أيوة هما أعلنوا علي صفحتهم علي الفيس بوك
- خلاص تمام إبقي عدي عليا ونمشي سوا
= تمام ياجميل ..سلام
- مع السلامة

"" أخيرا ..هنزل ورشة كتابة ، أكتر حاجة بحبها في حياتي القراءة والكتابة ، القراية خلتني أعرف حاجات كتير وأعيشها ، فتحت مُخي ..غذت روحي ، كنت بهرب من الدنيا للقراية ، ويمكن أكتر حاجة بعرف أعملها في حياتي هي إني بعرف أقرأ ..أما الكتابة بقاا فأنا مش قد كدة فيها ، بس نفسي أبقي بعرف أكتب وأعرف أقول اللي بحسه بشكل كويس ويوصل للناس وإني أقدر أحس إحساسهم وأعبر عنه بكتاباتي وكمان أقدر أعالج مشاكلهم بالكتابة ..عايزة أوصل للناس الإحساس اللي بيوصلي لما بقرأ ، *أصل الكتابة هي وسيلة الجارح ودوا المجروح*  ، حلوة الجُملة مش كدة ؟! معبرة الحقيقة ، قريتها الجُملة دي في كتاب قبل كدة ..بس مش فاكرة الكتاب إسمه إيه ؟ مانا قريت كتير هافتكر إيه ولا إيه ..المهم أنا عايزة أتحسن في الكتابة عشان كدة قررت آخد ورشة كتابة ، كنت عايزة آخد وأنا بدرس ..بس ماما وبابا رفضوا ، شافوا إنها هتعطلني عن مذاكرتي كتير فاعشان كدة استنيت لما خلصت دراسة وقررت أروح الورشة وزينب صاحبتي لما عرفت قررت تيجي معايا ، مش حُبا في الكتابة لأ ..هي حجة عشان تخرج من البيت وأنا كمان كنت حابة تكون معايا ..""
"" تاني يوم كنت جاهزة قبل المعاد أصلا ، وكنت متحمسة جدا جدا وكنت عمال أرن علي زينب عشان تيجي بسرعة ونروح الورشة لحد ماجت ..""

- فيه إيه ياهدير ؟! إيه ياحبيبتي مالك ؟! نازلة رن رن رن إيه في إيه ؟!
= إتأخرنا
- إتأخرنا إيه يامجنونة لسة بدري ، دا فاضل ساعة وإحنا هنوصل في نص ساعة
= برده متأخرين وبعدين إنتي عارفة أنا الورشة دي كنت بتمناها من إمتي أصلا ونفسي جدا أتعلم الكتابة بسرعة وأبقي شاعرة بقاا ويقولوا الشاعرة راحت والشاعرة جت
- وأنا ذنبي أنا إيه بس عشان أتمرمط المرمطة دي
= مش إنتي عايزة تخرجي من البيت براحتك ، إستحملي بقاا
- صح ، أنا أستاهل التف في بوقي
= يععع يامقرفااااااااه ..إمشي قدامي يلا
- أُف ! ..حاضر

"" وصلنا المكان اللي فيه الورشة ، أنا كنت حاسة بلمعة عيوني ..كنت فرحانة جدا جدا ، كان فيه ناس كتير وكنت شايفة المكان والجو مبهج أووي علي عكس زينب تماماً كانت مكشرة ومش حابة الجو خالص ..""

- يييييييييي ، مبسوطة أوووووي
= طيب
- إيه قلة الذوق في الرد دي بقولك مبسوطة
= أقولك ايه يعني ؟!
- قوليلي يارب دايما مبسوطة ، قوليلي أي حاجة حلوة بدل البوز اللي شبه فردة الجزمة اللي انتي فردهولنا في وشك دة
= طيب
- ياساتر علي رخمتك دا ان .... آآآآآه

"" قاطعني إن فيه حد زقني لدرجة إني كنت هقع بس زينب لحقتني ..""

- بغضب : مش تفتح يابني آدم
= أنا آسف والله ، بس صاحبي بيهزر معايا زقني فاجت فيكي والله أنا بعتذر جدا
- طب ياريت تفتح إنت وصاحبك بعد كدة ، لإن دي قلة أدب
= أنا بعتذر والله أنا ....
- صاحبه مقاطعاً : إنت بتعتذر علي إيه ..إنتي يابنتي مش عارفة بتتكلمي مع مين ؟؟
= لا مااعرفش ياأمور ومااحبش أعرف
- لأ لازم تعرفي عشان تشوفي نفسك بتتكلمي مع مين وبتتكلمي بتقولي إيه ؟ ..دا الكاتب عبدالرحمن حسن
= يعني عبدالرحمن الأبنودي ياخي ..بلا قرف ، يلا يازينب