اسكربتات هالة أحمد

{64}

'' كريم النفس ..💛! ''

'' النية الصالحة لا تُصلح العمل الفاسد ..وطبيعي العمل هيبقي ليه عواقب ، وبالتأكيد هتبقي وخيمة ..''

- يا بابا ريّح نفسك أنا مش هسيب كريم وارجع البيت
= يابني أنا عايزك إنت وكريم ترجعوا البيت
- هو مش هيوافق يرجع وانتَ عارف ، وأنا مش هقدر أسيبه وهو تعبان كدة
= ولو وافق ياسيدي ؟
- لو كريم وافق يبقي أنا تمام موافق

'' خرج كريم من أوضته ، وقال ..''

- كريم : بس أنا مش موافق

'' قرب مننا وقعد جمبي وقال ..''

- كريم : إزيك يا بابا عامل إيه ؟
= بابا : بابا ؟ إنتَ خليت فيها بابا بقا ؟
- كريم بإبتسامة : يا حبيبي إنتَ أكتر من أبويا كمان
= بابا : لو أنا كدة بجد زي مابتقول إرجع البيت ، إرجعوا البيت إنتوا الإتنين ، البيت وِحش من غيركوا
- كريم : أنا مش هينفع أرجع ، هنا بيتي يابابا وبيت أمي وعايز أعيش هنا ، ياريت إسلام يرجع معاك ، وانا ماعنديش مشكلة أعيش لوحدي
- إسلام : لأ ! ، أنا هفضل معاك مش هسيبك
- كريم : يابني أنا كويس والله ماتقلقش عليا
- إسلام : كويس مش كويس أنا عايز أفضل معاك

'' بصيت لبابا وقولتله ..''

- إسلام : بقولك إيه يا بابا ، ماتيجي تعيش معانا هنا أحسن
- كريم : ااه يا بابا صحيح ، تعالي عيش معانا
= بابا : بس ياض منك له ، دا انتوا البيت واخدكوا بالعافية

'' قام وقف وقال ..''

= بابا : عمومًا إنتوا أحرار ، يلا بقا هاسيبكوا واروّح

'' كريم راح يوصل بابا للباب وسمعته وهو بيقولّه ..''

- ماتزعلش من إسلام يا بابا ، أنا هحاول معاه وهخليه يرجع البيت
= بإبتسامة : أنا مش زعلان ، أنا فرحان جدًا ..ربنا يديم حبكوا لبعض وتفضلوا دايمًا كدة في ضهر بعض ، وأنا بقا ربنا يعنّي
- بإبتسامة : ...

'' قفل كريم الباب ورا بابا وبعدين رجعلي وقال ..''

- ممكن أعرف حضرتك لازقلي وقاعد معايا ليه ؟ ، ياأخي أنا مش عايزك تقعد معايا
= مش بمزاجك ، وماتحاولش عشان أنا مش راجع
- ياإسلام أبوك محتاجلك
= إنتَ محتاجلي أكتر
- أنا مش محتاج لحد
= طيب أنا اللي محتاجلك

'' إتنهد بملل وبعدين بصلي وقال ..''

- وجودك جمبي مش هيمنع عني الموت ، مش عايزين نضحك علي بعض
= بضيق : هو انتَ غاوي تضايقني ليه ، مش عايز أسمعك بتتكلم عن الموت تاني ..حتي لو مش همنعه عنك بس علي الأقل هلحقك
- بتنهيدة : طيب

'' وبعدين قام من جمبي وكان خارج ..''

= رايح فين ؟
- عندي كام مشوار كدة هعملهم وارجع
= صدقة برده ؟
- حق وحياتك
= طب آجي معاك ؟
- لأ ، سلام