اسكربتات هالة أحمد

{23}

- إيه التأخير دا كله ياست هدير ؟!
= أنا إتأخرت ؟! خالص ..دا أنا نازلة في معادي علي فكرة
- معادِك ؟! إنتي مش قايلالي أجيلك الساعة أربعة وهتكوني جاهزة ؟! الساعة خمسة إلا ربع دلوقتي !!
= ماهو إحنا البنات ماينفعش يتاخد علي كلامنا ، قولتلك أربعة المفروض تيجي علي خمسة كدة ..إنت اللي ملتزم في مواعيدك أعملك إيه !!
- يعني أنا اللي غلطان في الآخر
= أيوة ..ويلا بقاا عشان مانتأخرش ، هتوديني علي فين ؟!
- هنروح مطعم ناكل وبعدين نشوف هنهبب إيه
= بإبتسامة : أحبك وإنت فاهمني ، يلا بينا بسرعة

"" إتحركنا بالعربية ووروحنا المطعم اللي متعودين نروحوا دايما ..""

= عبدالرحمن
- نعم
= فاكر أيام ماحبينا بعض وقررت تيجيلنا البيت وتتقدملي ؟! ولا الأيام الأولانية من الخطوبة ؟!
- الله لايعيدها أيام
= بتقول حاجة ياحبيبي ؟!
- بقول دي أحلي أيام ، أحلي أيام ياحبيبتي
= ااه بحسب ، طب قولي ، هنتجوز إمتي ؟!
- الله أعلم
= عبدالرحمن !! إنجزني أنا هموت وأتجوز
- بضحك : طب خلي فيه شوية حياء طيب ، عالأقل قدامي ..مش لازم توضحي إنك هتموتي وتتجوزيني
= أنا قولت إن أنا هموت وأتجوزك ؟! أنا بقول هموت وأتجوز ، في العموم يعني .. بس بما إنك خطيبي فامافيش غيرك يعني هعمل إيه ؟!
- اممممم ، شفقة يعني ؟!
= حاجة شبه كدة
- خلاص ياستي ولا تزعلي نفسك ..أنا اللي هموت وأتجوزك ، بس لسة شوية علي مالشقة تخلص وبعدين هاجيلكوا البيت ونحدد معاد الفرح
= وناقص عالشقة قد إيه وتخلص
- متهيألي شهر
= حلو !! يبقي إحنا هنتجوز بعد شهرين
- نعممم !!!
= أيوة عندك إعتراض ؟! خلاص أنا حددت ، شوف نفسك فاضي إمتي وتعالي إتفق مع بابا
- بضحك : يابنتي إتقلي مش كدة
= لأ هو كدة !!

"" عبدالرحمن يبقي إبن عمي ، وحُب حياتي  ، اللي يشوفنا وإحنا صغيرين وإحنا دايما ناقر ونقير مايصدقش إننا هنحب بعض ونتخطب ونتجوز ..كل واحد فينا كان بيحب التاني ومخبّي وكنا بنتعامل مع بعض علي أساس إننا مش طايقين بعض وماحدش فينا يهمه التاني ، لحد ماجالي عريس كان بابا موافق عليه وبصراحة ماكنش فيه عيب عشان يترفض ، بس أنا ماكنتش موافقة ..وبابا ماكنش مُتقبل رفضي ..لحد ماإتفاجئنا بعبدالرحمن بيطلب إيدي ومصمم إن هو اللي هيتجوزني مش العريس اللي جاي دا ، فرحت جدا إنه لحقني ..لأن الظاهر كنت هقبل غصب عني بالعريس اللي جاي ، ولما بابا شاف موافقتي علي عبدالرحمن قرر يرفض العريس ، وإتخطبنا أنا وعبدالرحمن ..كان يوم غريب أووي بالنسبالنا يوم الخطوبة دا ..مش متعودين نحب في بعض او نقعد مكسوفين كدة ..لاننا دايما ناقر ونقير ، واستمرت فترة خطوبتنا الأولي علي هذا الأساس ..لحد ماقدرنا نقتنع إننا مخطوبين والعلاقة دي لازم تتغير من ناقر ونقير لإتنين مرتبطين وبيتعاملوا بهذا الشكل وشوية وهيتجوزوا ..عشان نقدر حتي نحب في بعض بدل علاقة سواقين التكاتك اللي كنا بنتعامل بيها دي ..""

= ألو ..إزيك ياعبدالرحمن
- بغضب : إنتي فين ؟! ومش بتردي علي موبايلك ليه ؟!

"" إستغربت غضبه المفاجئ بالنسبالي دة !! ..""