اسكربتات هالة أحمد

{26}

- برده مش هتيجي معايا يازينب ؟!
= ماقولنا لأ ، وبعدين المجلة مستضيفاكي انتي أروح أنا معاكي ليه ؟! هيبقي شكلي سخيف
- عادي يعني ، هما هيعملوا معايا حوار وإنتي هتبقي قاعدة معانا علي نفس الترابيزة عادي يعني مش موضوع ..أنا بس عايزة حد معايا ، ماكونش لوحدي
= لأ ياستي مش حلوة خالص وبعدين هما مش هيكلوكي يعني
- بتنهيدة : براحتك
= قوليلي صحيح ، مش هما هيستضيفوا معاكي كاتب أو كاتبة كمان ؟!
- ااه
= هيستضيفوا مين ؟!
- معرفش ، ماسألتش
= ليه ياهبلة ؟! يعني راحة تعملي لقاء ماتعرفيش هيبقي مين معاكي ؟!
- عادي يعني وهيفرق معايا في إيه ؟!
= خلاص ياهدير خلاص ..روحي نامي ياحبيبتي عشان ماتتأخريش علي معادك بكرة
- بضحك : ماشي ياحبيبتي ، تصبحي علي خير
= وإنتي من أهله يامغلباني

"" أنا هدير عزت ..كاتبة ، بكتب من حوالي ٣ سنين .. وواحدة واحدة بقيت معروفة ومشهورة ، الكتابة جات معايا صدفة ..يعني بسبب موقف معين ، يعني ماكنتش  غاوية كتابة يعني من وأنا صغيرة ، وماكنتش أعرف إني هتعرف بيها ،، عندي معاد بكرة في كافية تبع مجلة إسمها مجلة الكُتّاب والقراء .. المجلة دي إلكترونية ، وإتصممت من سنة تقريبا ، بينشروا فيها أشعار وقصائد وخواطر وكل ماتحت مُسمي الكتابة ..بيدعموا بيها الكُتّاب الشباب إن كتاباتهم توصل وتتقري بشكل كبير ، وبيعملوا كل شهر لقاء مع إتنين كُتّاب بيختروهم المتابعين وبيحددوا الأسئلة كمان ..والمجلة بتستجيب كنوع من أنواع الإتصال بين الكُتّاب والمتابعين ، وكان إختياري أنا الشهر دة وكاتب أو كاتبة كمان بس معرفش مين ؟! ..""
"" تاني يوم صحيت قبل المعاد بساعتين وفطرت ولبست ووصلت الكافيه علي المعاد مظبوط ، واللي هتعمل معانا الحوار كانت إسمها سلمي وإستقبلتني بشكل كويس ..""

- حقيقي أنا مبسوطة جدا إن أنا قاعدة معاكي والله
= والله أنا اللي مبسوطة جدا إني قاعدة معاكي ، ومبسوطة بنشاط المجلة واللي بتعمله مع الشباب
- لا دا أقل واجب والله ، لو نقدر نعمل أكتر من كدة هنعمل ..معلش حضرتك هنستني الكاتب التاني لحد مايجي ونبدأ الحوار
= بإبتسامة : مافيش مشكلة ، بس هو كاتب يعني مش كاتبة ؟!
- أيوة حضرتك ، هو كاتب ويبقي ...
= مقاطعاً : عبدالرحمن حسن !!

"" رفعت راسي لمصدر الصوت ، خطفت نظرة ليه ..إتصدمت !!! ونزلت عيني بسرعة وبحاول ماأبينش الصدمة !! ، وقفت سلمي ورحبت بيه ..""

- أنا بعتذر جدا علي التأخير
= سلمي : ولا يهم حضرتك ياأستاذ عبدالرحمن ، نقدر نبدأ دلوقتي ؟!
- إتفضلي

"" وبدأت تسجل لينا ، لأنها مش هتقدر تكتب ورانا وتوفيرا للوقت يعني .. بدأت تسألنا عن أعمارنا وعن هوايتنا وبعدين ..""

- حضرتك ياأستاذ عبدالرحمن بدأت تكتب من إمتي ؟!
= عبدالرحمن : من حوالي ٣ سنين
- وحضرتك ياأستاذة هدير ؟!
= هدير : برده من حوالي ٣ سنين
- جميل ..قولولي إنتوا تعرفوا بعض من إمتي ؟! وإزاي قررتوا تكتبوا في وقت واحد ؟!
= هدير : لأ لحظة واحدة ، إحنا مانعرفش بعض أصلاً
- بصدمة : نعممممم ؟!!!
= عبدالرحمن : أيوة ، أنا أول مرة أشوفها وأقابلها هنا ..يعني ااه أكيد بسمع عنها بس حقيقي أول مرة أشوفها دلوقتي