- بإبتسامة : هاا يادكتور أنا عندي إيه ؟!
= والله ياهدير مش عارف أقولك إيه ؟"" إختفت إبتسامتي بعد الجُملة دي ..""
- لأ قول ياعبدالرحمن ..مش هيحصلي أكتر من اللي حصل
"" كان باين عليه التوتر مش عارف يقولّي إيه ، وأنا من توتره عرفت إنها حاجة خطر ..""
= بتوتر : التحاليل بتقول إنِّك ..إنِّك عندك ..عندك ..
- ايه ياعبدالرحمن ، انطق
= عندك لوكيميا"" إتصدمت !! ، بل صُعقت !!! ..عندي كانسر ؟!!! ..لوكيمياا ؟!!! ..سرطان في الدم !!! ..""
= بس ..بس ماتقلقيش ، المرض لسه في الأول ..ممكن نعالجه بالكيماوي ، وإن شاء الله هتبقي كويسة
"" إفتكرت بابا ، ياريته كان معايا دلوقتي ..ياااريت ، كان هيكون في ضهري دلوقتي ، بس أنا ضهري إنكسر ..من وقت مااتوفي وأنا مش كويسة ...مش كويسة وجالي كانسر ، طب المفروض أعمل إيه ؟! ..دا هو اللي كان فاضيلي في الدنيا ، أعمل إيه ؟! ..إيه دا ؟!!! ..طب مش يمكن تكون دي فرصتي ؟! فرصتي إني أروحله ..""
- الحمد لله
= هتتعالجي منه ان شاء الله
- مش هتعالج !!"" بصلي وصدمة مالية عنيه ..""
= بصدمة : نعم ؟!!!! ، يعني إيه مش هتتعالجي ؟؟ ..يابنتي المرض لسة في الأول ، الكيماوي ممكن ...
- مقاطعةً : عبدالرحمن !! .. مش هتعالج
= هو ايه اللي مش هتعالج دي ..انتي فاكرة ان دا قرارك لوحدك واللي انتي عايزاه هيتنفذ ولا ايه ؟
- أنا عايزة أموت"" الصدمة كانت بتزيد في عنيه أكتر ..كنت حاسة ان في لحظة ممكن يقوم يضربني ..""
- مش عايزة أعيش في الدنيا دي لوحدي ..أنا بكره الحياة أووي ، ماليش فيها حد كلهم ماتوا ..بابا اللي كان كل أهلي مات ، يبقي أعيش ليه ولمين ؟! ..ماليش حد ، ماليش صحاب ، ماليش غيرك ..بس إنت هتمشي زي اللي مشيوا ، إنت مش مُجبر تكمل مع واحدة عندها كانسر ، ولا أهلك هيوافقوا تكمل ..الحياة اللي أنا عايشاها دي بيحصل فيها كل حاجة تإذيني وتوجعني ..وأنا اكتفيت وجع ، أنا كارهاها ومش حابة فيها حاجة تخليني أقاوح المرض وأكمل ..مش يمكن المرض دا فرصة ؟ ، إني أموت أنا كمان وأخلص من الدنيا اللي كلها أذية ؟ ..المرض فرصتي إني أموت ..وأنا بابا واحشني وعايزة أشوفه
= وانا ياهدير ؟!
- قولتلك إنك مش مُجبر تكمل مع واحدة ميتة"" وقبل مايرد ..قلعت الدبلة وسيبتهاله عالمكتب ومشيت ..وأول ماخرجت من عنده مااقدرتش أمسك دموعي وقعدت أعيط ، وكإنها أول مرة أعيط ..مش عارفة ليه الدنيا بتإذيني بالشكل دا ؟! بتإذيني عشان تاخد مني الشخص اللي بحبه واللي فاضيلي ، مستكترة عليا إني أحب حد ؟ ..مستكترة عليا أعيش مبسوطة ؟ ..انا ماليش صحاب وماليش قرايب ..ماكانش ليا غير بابا من بعد ما ماما إتوفت وهي بتولدني ..كان ليا كل حاجة في الدنيا ، الاب والام والاخ والصاحب والحبيب ..كل حاجة في حياتي ، واتوفي من سنة ..وكإن أهلي كلهم ماتوا مرة واحدة ، كنت حاسة إني مش هقدر أعيش يوم واحد من غيره ، وكرهت الدنيا اكتر ومش عايزة اعيش فيها ..وفجأة ظهر عبدالرحمن ..ظهر يوم وفاة بابا ، كان نفس يوم وفاة باباه ، كل واحد فينا كان قاعد جمب قبر باباه وبيعيط ..وفجأة أغمي عليا ، ولما فوقت لقيت نفسي في المستشفي ..وقتها عرفت إن هو اللي لِحقني ومن هنا إتعرفنا علي بعض وواحدة واحدة حبينا بعض وإتخطبنا ، مش هبالغ لو قولت إن من يوم ماظهر عبدالرحمن وانا حاسة إن بابا موجود وعايش ..كان لياا أب وأخ وصاحب وحبيب ..ومازال والله ، عمل عشاني حاجات كتير واستحملني كتير وساعدني ووقف جمبي كتير ..أنا بحبه أووي ، وعشان بحبه ماكنش ينفع اتقل عليه أكتر من كدة ..ماينفعش أخليه يكمل مع واحدة قررت تموت وأذيه أكتر ، فاكفاية ..أنا أذيته كتير ..كتير أوي ...خرجت من عنده وروحت علي قبر بابا ..وقعدت اعيط عنده واشكيله وجعي ..عارفة ان هو سامعني ، بقيت بطمنه اني شوية وجياله ، مش هتأخر عليه ...الوقت سارقني والدنيا ضلمت ، فاقومت عشان أروح وبدور وشي عشان أمشي لقيت عبدالرحمن قدامي ..""
YOU ARE READING
اسكربتات هالة أحمد
Short Storyبصوا حبيت اعمل حاجة جديدة ف انا هنا هجمع الاسكربتات اللي الكاتبة هالة أحمد كتبتهم و هنزلهم هنا و اشمعنا هالة أحمد ف ده بصراحة لأني بعشق الكتابات بتاعتها جداً و بعشق أسلوبها اوي و بالمناسبة هي كتبت رواية السنة اللي فاتت في معرض الكتاب 2020 اسمها...