اسكربتات هالة أحمد

{38}

'' النصيب غلاب ..💛! ''

- زينب !
= نعم ياهدير ..
- أنا عايزة أتجوز
= إيه ؟
- جوزوني ..عايزة أتجوز بقا
= ماتتجوزي ياستي أنا ماسكة فيكي ..شوفيلك أي حد معدي كدة حبيه وإتجوزيه وأنا هوافق عادي
- أنا قولت عايزة أحب ؟ ، أنا جبت سيرة الحُب دلوقتي ؟ أنا قولت عايزة أتجوز مش أحب
= ياسلام ؟ عايزة تتجوزي علي طول كدة من غير ماتحبي ياهدير ؟
- أيوة
= وإشمعني بقا ؟
- ياستي أنا مش قد الحب وعذابه وقرفه دا وأي حب قبل الجواز مش مضمون لكن الحب بعد الجواز لما يجي مافيش مفر منه مش هتوجع طول ماهو معايا
= بإستغراب : دا إيه التفكير الغريب المُمل دا ، وإنتي إيش عرفك إنك هتحبي جوزك بعد ماتتجوزوا مايمكن ماتحبيهوش
- لا مانا مش هبلة برده ، أكيد في الخطوبة هيبان إني بحبه أو هحبه وكدة
= لأ ناصحة يابت ويتخاف منك
- طبعا أمال إنتي فاكرة إيه
= اممم ، طب غوري يابت من هنا ، إمشي ماتقعديش جمبي
- أنا كدة كدة ماشية ، هروح أودي بابا للدكتور ..الدور عليا المرادي ، يلا سلام
= سلام

" هو ذلك المرض اللعين ، إن أصابك فلا مفر ، يتسلل لقلبك ببطئ شديد حتي لا تشعر وتستفيق له ، ثم يظل يُلاطف قلبك ويُداعبه حتي يسترخي تماماً ..وبعد ذلك يسير في إتجاه من إتجاهين ، إما أن يظل يلاطف قلبك ماحييت ..إنْ مرض قلبك يداويه وإن غضب يهدئه ، إن أصاب فؤادك أي مكروه يقوم بحمايته دائماً وأبدا ، وإما في لحظة إسترخاء وهدوء ينقض علي قلبك يعتصره حتي يختنق وينزف ..وروحك تحاول الإفلات والنجاة ولكن لا نجاة ولا مفر ، وأنت ومامُقدر لك ..هذا هو الحُب ياصديقي ..فاحذر !..
هي دي قناعتي عن الحب ، بحاول أتفادي أي موقف أي حاجة ممكن توصلني للحب من غير ضمانات ، أنا مش قد الوجع مش قد العذاب هيقتلني فيها لو حبيت واتوجعت في الآخر ..سيبكوا من دا كله بقا دلوقتي أنا راحة آخد بابا لدكتور العيون ..بابا قعيد مش بيقدر يمشي نتيجة حادثة عملها من حوالي 25 سنة ، عشان كدة في المشواير اللي زي دي يانا اللي باخده للدكتور ياماما ..وأنا وهي عاملينها بالدور والمرادي الدور عليا ، وصلنا العيادة أنا وبابا وقعدنا نتكلم ونضحك مع بعض ونفتكر حاجات كنت بعملها زمان وأنا طفلة ونضحك عليها ، أنا بحب اللحظات اللي بتجمعني مع بابا دايما ، أنا بتمني إني لو هحب يكون اللي بحبه زي بابا بالظبط ..شوية وخرج الدكتور وكان معاه بنت وبيضحكوا ، تقريبا يعرفها دا كان باين من كلامهم مع بعض لما قالها .."

- سلميلي علي باباكي كتير ياسلمي ، قوليله إن الدكتور حازم زعلان منك جدا عشان بقالك فترة مش بتسأل عليه
= بضحك : حاضر يادكتور هقوله ..بس حقيقي بابا مش بيجي البيت كتير عشان الشغل وكدة ، ولما بيجي بيدخل أوضة عبدالرحمن يحاول يتكلم معاه ..بس زي ماحضرتك عارف مافيش فايدة
- هو لسة برده رافض يتكلم
= بتنهيدة حزن : من وقت ماعمل حادثة من 6 شهور واتشل ومابقاش قادر يمشي وهو رافض الكلام تماما وحتي رافض ينزل الشركة ، كمان موضوع خطيبته اللي سابته بعد الحادثة خلي حالته النفسية في النازل أكتر ..وجبناله دكاترة نفسيين كتير إنه حتي يتكلم أو يقول حاجة ويسكت مثلا ..مافيش
- ربنا يهون عليه ، وإن شاء الله هيرجع أحسن من الأول
= يارب ..بس اليومين دول بابا بيحاول يدور علي دكتور نفسي يكون شاطر وموثوق فيه ، يمكن يقدر يعالج عبدالرحمن