اسكربتات هالة أحمد

{9}

- هاا ياجماعة عايزين تروحوا مصيف فين السنادي ؟!
= نروح الساحل يابابا
- ساحل ايه وبتاع ايه لأ
= الله !! أمال بتسألنا ليه ؟!
- مش بسألك إنت بسأل هدير بنتي حبيبتي
= وأنا ايه ؟! لقيط مثلا ..مش ابنك أنا كمان ؟!
- ياخي انت هتفضل قرفني وانت عازب وانت متجوز ؟! ..انا مش جوزتك وعملتلك اللي انت عايزه اهو ..مالكش حاجة تانية عندي خلاص علي كدة ..كل اللي ليك عندي آخدته
= خلاص خلاص ..إِلْحُوء عليا إني عايز اصيف معاكوا
- إلحوء عليك !!!!

"" قعدنا نضحك ونهزر مع بعض ..بابا وحازم بيحبوا دايما يناكفوا في بعض وعاملين زي ناقر ونقير ، بس هما صُحاب جدا جدا ، حازم أخويا متجوز زينب صاحبتي ، كانوا بيحبوا بعض من زمان من أيام مازينب كانت بتيجي تاخد معايا درس في البيت ..واتجوزوا من شهرين ، اظن مافيش احلي من إن صاحبتي تكون معايا في نفس البيت ..""

- ها يا حبيبتي ماقولتيش عايزة تصيفي فين ؟!

"" ابتسمت ابتسامة صافية ، وانا وحازم وزينب قولنا في نفس واحد ..""

= إسكندرية 💛
حازم : بلد المحبوب طبعا
زينب بغناء : وعلي بلد المحبوب وديني ..زاد...
هدير مقاطعةً : إتلمي يازينب

"" بصلي بابا بخبث كدة وقالي ..""

- وياتري أنهي محبوب فيهم ؟! البحر ولا سي روميو ؟!
= بخجل : ايه يابابا اللي انت بتقولوا دا ؟! ..أكيد طبعا البحر

"" بصينا لبعض كلنا وقعدنا نضحك ..""

- خلاص جهزوا نفسكوا هنتحرك الفجر
= بفرحة : حبيبي يابابا ياحبيبي

"" جريت دخلت أوضتي وكنت بجهز هدومي ..وشوية زينب جت وقعدنا نرتب الحاجات مع بعض ونجهز هدوم حازم وبابا ..كنت بعِد الساعات اللي هبقي فيها في اسكندرية ..بلد المحبوب ، إسكندرية هي بلد المحبوب ، بلد البحر ..وماأدراكم مابحر إسكندرية بالنسبالي ..عشقت بحرها من صغري ، وعُمري ماروحت أصيف غير هناك أصلا ..وبابا كان بيراضيني دايما ونروح نصيف هناك ، كان عايز يعوضني عن ماما ..لأنها إتوفت من وانا عندي سنتين تقريبا وحازم كان عنده 10 سنين ..عشان كدة بابا كان بيجي علي حازم أوقات كتير عشاني ، كنت بسمعه بيقولوا دايما علي الاقل انت شوفت مامتك وعشت الاحساس دة هي لأ ..بس كان بيراضيه دايما ، كان بيخليه يطلع مصيف مع صُحابه في المكان اللي يختاره ..أنا بقاا مخطوبة ، لكريم ..كريم دا محبوبي التاني بعض البحر ، لأ هو الأول ..عشان كدة حازم كان بيتريق عليا ويقول بلد المحبوب ، كريم ابن صاحب بابا وهو عايش في اسكندرية ..كل سنة لما كنا بنروح المصيف كنا لازم نزورهم ونقعد معاهم ..من هنا عرفت كريم وحبيته وهو كمان ..اتخطبنا من ست شهور تقريبا ، وبقالي شهرين ماشوفتهوش بسبب شغله وبسبب بُعد المسافة بين إسكندرية والقاهرة ..ماكنتش مصدقة إن في خلال ساعات هشوفه ، ماقولتلهوش إننا جايين إسكندرية ، كنت عايزة أعملهاله مفاجأة الحقيقة ..جهزنا كلنا وركبنا العريبة وكنا منطلقين للإسكندرية ..بابا اللي كان بيسوق وأنا قاعدة جمبه وحازم وزينب ورا ..طول الطريق كنت ساندة علي شباك العربية وبتخيل لما كريم يشوفني ردة فعله هيبقي إزاي ..كنت مبسوطة أووي بصراحة ، بس فجأة !!!!! ماحستش غير بخبطة جامدة في دماغي في شباك العربية ..خبطة جامدة جدااااا ، وبعدها ماحستش بحاجة نهاائي ..معرفش قعدت قد إييه ..بس فوقت وفتحت عنيا ماكنتش شايفة حاجة ماكنتش سامعة غير صريخ بابا وحازم وزينب وبينادوا بإسمي وبينادوا علي دكتور يلحقني ..مااقدرتش أقاوم الوجع وغمضت عنيا من تاني وروحت في عالم تاني خااالص ، ..فوقت بعد مدة بس دماغي كانت بتوجعني ..فضلت أحاول أفتح عنيا ..وسمعت صوت حازم بيقول ..""