اسكربتات هالة أحمد

{2}

- أيوة يازينب
= ايه ياصديقي  ، انت فين ؟
- أنا لسة راكبة المترو أهو
= اشطا ، قبل ماتوصلي عندي بمحطتين كدة رني عليا أقوم ألبس
- ااه ماطبعا لازم تقولي كدة ، مانتي بيتك جمب الجامعة مش احنا اللي بنصحي من النجمة ونقعد ساعتين و...
= مقاطعةً : بت بت ، بس يابت مش هتسمعيني الإسطوانة دي كل يوم ، سبيني بقا عشان ألحق أنام شوية
- غوري
= سلام

"" شوية ورنيت علي زينب وجهزت ووصلت ليها ومشينا سوا للجامعة ..كان جمب الجامعة مكتبات كتير وكان فيه محل بتاع خطاط *بيخطف عيني كل مابشوفه وبشوف جمال الخط علي اللوحات والجُمل اللي مكتوبة عليها* ..""

- هدير ..هدير ، انتي ياسُكر
= ايه يارخمة ايه ماتسبيني
- مش فاهمة المحل دا بيلخبطك كل مابتشوفيه ليه ؟
= عاجبني أوووي
- هو مين ؟!
= المحل ياتافهة ، الخط تحفة والجمل اللي بتكتت جميلة أووي ..كله حلو كله حلو ، انا بستني اعدي من هنا عشان اشوف الجُملة الجديدة اللي بيبقي حاطتها علي باب المحل ..شوفتي كاتب ايه ؟..

وَإِنْ سَأَلُونِي عَنْكِ بِمَا أُجِيبْ
بِالوَجَعِ أَمْ بِالوَلَعِ يَا حَبِيبْ ..💛

- طب خدي بالك ، لان انتي كمان شكلك عاجبة المحل
= باستغراب : قصدك ايه ؟
- قصدي عبد الرحمن ..الخطاط صاحب المحل ، كل ماتعدي من هنا مابيشيلش عينه من عليكي
= ايه دا ؟؟؟!! ...ايه اللي انتي بتقوليه دا ؟!!
- بقول اللي بشوفه
= طب اسكتي ، اسكتي وماتتكلميش تاني وياريت كمان ماتشوفيش
- هو ايه أصله دا ..
= اسكتي بقاا ومدّي شوية عشان مانتأخرش عالمحاضرة
- هنجيب امتياز اصلنا ..كله رايح

"" دخلنا المحاضرة ..وكان عقلي مشغول بكلام زينب الله يسامحها ..هتخليني آخد بالي وأفكر في حاجات الواحد في غِني عنها ، بعد ماخلصنا المحاضرات كلها كنا مروحين واحنا بنعدي من قدام المحل بصيت كالعادة عليه ..بس مش عشان أشوف الخط وأشوف الجُمل ..لأ ..عشان أشوف اللي بتقول عليه زينب ، كان فعلا باصللي ، اتكسفت ونزلت عيني بسرعة وكملنا مشي ..""

- اتأكدي ؟!
= بتوتر : هااا ..ات ..اتأكدت من ايه ؟!
- عليا أنا برده ..يابت ؟!!
= يوووه ..ماخلاص بقاا يازينب مااتعصبينيش
- خلاص خلاص انتي حرة ..خليكي قاعدة في أرابيزي كتير
= بضحك : أرابيزك ..طب يلا ياختي امشي وبطلي تفكير في التفاهات دي يمكن تفلحي

"" هو ممكن يكون واخد باله مني بجد ؟ وكاتب الجُمل دي ليه بقاا وهو العاشق الولعان وأنا ..أنا ..أنا حمارة أصلا ايه انا بفكر فيه دة ، جرا ايه ياهدير كلمتين قالتهوملك زينب الهبلة دي يقلبوا تفكيرك كدة ، اهدي ياماما اهدي كدة وشوفي مذاكراتك يلاا ..""

- هدير ..انتي يابنتي ؟
= هاا ..ايه ياماما بتقولي حاجة
- اللي واكل عقلك يتهني به
= ....
- كنت عايزاكي في موضوع كدة
= اتفضلي ياست الكل
- فاكرة العريس اللي جه لكِ من فترة كدة وانتي رفضتيه ، اللي جالك مرتين ورا بعض دا ..والنبي نسيت اسمه ، كان اسمه ..اسمه....
= هاا يعني ياماما ماله
- فاكراه يعني
= أيوة
- جه لأبوكي امبارح تاني و...
= مقاطعةً : مرفوض
- يابنتي انا ...
= مقاطعةً : مرفوووض ..مش وقته الموضوع دة لما ابقي اخلص تعليمي كدة وافضي دماغي هابقي اقعد ونتكلم و نتخطب ونتجوز وكله كله ..عن اذنك بقاا هدخل أنام ، عندي كليه الصبح