اسكربتات هالة أحمد

{3}

"" إنهاردة آخر يوم في الإمتحانات ..أنا الطالبة الوحيدة في العالم اللي بتزعل لما بتخلص الإمتحانات ..بس أنا سببي مُختلف ، خلصت إمتحاني وروحت لمحل الورد اللي بحبه ، لعمو حسن ..""

- عمو حسن ، ياعمو حسن ..إنت فين ؟
= أنا هنا ياهدير في المحل ..تعالي إدخلي
- إزيك ياراجل ياطيب
= الحمد لله ..إنتي عاملة إيه ؟ وأخبار إمتحاناتك إيه ؟
- بحزن : خلصت إنهاردة ..مافيش إمتحانات تاني خلاص
= بضحك : غريبة إنتِ برده ..أول مرة أشوف واحدة زعلانة إنها خلصت إمتحانات
- ماأنت عارف اللي فيها ياعمو
= مش مهم أنا أعرف ، المهم المُعيد بتاعك دا يعرف
- مش هشوفه تاني
= ليه يعني ..هاتشوفيه ..لسة قدامك سنة كمان في الكلية
- وبعد السنة ماتخلص ؟
= مين عارف ، يمكن تكوني في بيته
- ياارب بقااا يااارب ، تعرف ياعمو ..أنا ساعات بندم إني بحب ..دا بيوجع ..الحُب دا الإدمان الوحيد اللي مالوش علاج ..
= الحُب دا الجبر الوحيد اللي مايتكسرش
- ااه دا بس لما يكون الطرف التاني بيحس ولا بيفهم ..مش عبد الرحمن دا إبنك ؟
= بضحك : للأسف
- بس حمار ومتخلف وطلع مابيفهمش ..مش عارفة مش طالع زيك ليه كدة
= خلاص ماتسيبك منه وأنا موجود
- ياريته كان ينفع بس إنت صغير عليا ياعمو حسن

"" عمو حسن ..البركة اللي في حياتي وصاحبي الوحيد ..صاحب محل ورد ..أنا بحب الورد ..أكتر حاجة بحبها في حياتي الورد ..اللي بيحبني بيجيبلي ورد ..واللي مزعلني بيجبلي ورد ..وعشان بحب الورد حبيت عمو حسن كنت بروحله كتير واشتري ورد منه كل يوم ..لحد مابقينا صحاب ..وطبعا زي ماحبيت عمو حسن وعشقت ورد عمو حسن غِرقت في ابن عمو حسن ..عبد الرحمن ولإن عمو حسن صاحبي وكل ماببقي زعلانة أو فرحانة بروحله واشكيله عِرف إني بحب إبنه ..ماكنتش مكسوفة وأنا بقوله أنا بحب إبنه ..كنت فرحانة ..فرحت أكتر لما أصلاً عرفت إن عبد الرحمن إبنه ..عمو حسن دا حتة سكرة أصلاً ..مايتعوضش ..""

- خلاص براحتك ..إنتِ اللي خسرانة
= عمو حسن ..إنت متأكد إن عبد الرحمن إبنك ؟!
- بضحك : أكيد مش هكون لاقيه علي باب جامع يعني
= أمال مش شبهك ليه بس ،  تعرف ياعمو ؟! ..أحياناً بحس إن إبنك دا مافيش زيه في الدنيا لما بيضحك..أنا بفرح لما بشوفه ..نظرة مني له كفيلة تفرحني ..كفيلة تصغر الدنيا في عيني ..دنيا ايه ؟ كفيلة تخليني أبيع الدنيا باللي فيها ..بس لما بيقلب علي الوش التاني ببقي نفسي أتف في وشه وأطلع أجري ..هو بيكشر ليه ياعمو حسن ؟ بقاا فيه واحدة قمر زيي تحبه وهو يكشر ؟! والله يابخته بحبي
- بضحك : يابنتي اتقلي عليه مش كدة ؟
= قال يعني التقل بيحرك فيه جفن ..كله زي بعضه ..هو هياخد باله مني إمتي بقاا أني زهجت
- هياخد ، هياخد باله ياهدير قريب ..قلبه هيجيبه زي ماجابك ووقعك علي وشك ..عبد الرحمن ابن حلال وراجل عيبه بس إنه مابيحبش يظهر مشاعره لحد ..كتوم كدة بس لما بيظهر بيغرق اللي قدامه بحبه ..عامل زيي
= زيك إزاي ؟؟!
- أصل أنا لما حبيت مامته ..كنت كتوم كدة وماحدش يعرف ولا حد عرف ..حتي هي ..ولما اعترفتلها قالتلي إنه ماكنش باين علياا وإنها كانت بتحبني ولما مالقتش مني قبول فقدت الأمل ..بس أنا بقاا ماسيبتهاش تفقد الأمل جتلها زاحف واتجوزتها بقاا وكانت أحلي وردة اشتريتها
= امممممممم ، وأنا أقول الواد طالع لمين ؟دا عيب متفشي عندكوا في العيلة
- بضحك : مش أووي كدة
= طب قولي عرفتها فين وإزاي ؟!
- ياستي والدها كان بيبع ورد ..وهي كانت بتقف معاه في المحل ..المحل بتاعها كان تحت الشركة بتاعتي ..كنت لما أطلع ولا أنزل أشوفها ..بتخطف قلبي لما بشوفها ..أحلي منظر لما بشوفها وسط الورود وماسكة ورد وبتشمه ..أحلي مافي الورد هي
= ياعيني ياعيني ياعمو حسن ..وبعدين اعترفتلها ازاي ؟
- لما الشوق جابني علي وشي ..خليت عيل صغير في الشارع يبعتلها ورقة ..كنت كاتبتلها فيها

يابياعين الورد ، أنا نفسي أشم الورد ..💛

= الله ، وردت عليك ولا لأ ؟
- ردت ..بعتت مع الولد وكتبتلي في ضهر الورقة

ياللي نفسكوا في الورد ، عطر الورد فاح ملي الدُنيا شوق وورد ..💛

- قلبي طار ..وطرت ليها واتقدمتلها علي طول واتجوزنا
وكانت ومازالت في قلبي وفي عنيا أحلي مافي الورد ، ودلوقتي سيبت الشركة لولادي واشتريت محل الورد دة وبقيت بقف فيه علي طول  ..عشان كل ماشوف الورد افتكرها
= ياربي ياعمو حسن ، إنت إنسان عظيم والله ، يابختها بيك ، أمال البتاع دا مش زيك لييييه ؟!
- بضحك : عشان كدة بقولك سيبك منه وتعاليلي ..بس قوليلي بجد ياهدير إنتي بتحبيه ؟!
= أنا واقعة فيه

"" أنا غرقانة فيه ..أنا بحب الورد بس بحب عبد الرحمن أكتر ..هو أجمل ورد ممكن أشمه وأشتريه ..الواحد لما بيحب بيشوف حبيبه أحلي من أي حاجة بيحبها .. ""

- تبقي تطمني ..اللي وقعك فيه قادر يجبر بخاطرك ويجيب قلبه زاحف ليكي ..زي ماجاب أبوه قبله
= ياارب بقاا لاحسن خلاص انا هحمض ..بس أنا واثقة في ربنا هو قادر علي كل شئ انت القوي يارب وطالبة ومايكتر عليك طلبي
- بضحك : والله يابت ياهدير إنتِ نكتة ، والله ماهلاقي لإبني عروسة أحلي ولا أغلي منك
= قوله ، عشان يحس إني نعمة

"" وقعدنا نضحك إحنا الاتنين ..""

- السلام عليكم

"" عبد الرحمن ؟!!! ...هو ؟! ..""

= أهلاً ياعبد الرحمن ازيك ؟
- ازيك انت يابابا عامل ايه ؟
= أنا كويس يابني ..غريبة يعني ايه اللي فكرك بيا وبالمحل دلوقتي ..دا انت مادخلتهوش من سنين
- مافيش ..خلصت مراقبة الإمتحانات إنهاردة وجيت في بالي قولت آجي أقعد معاك شوية ، بس الظاهر معاك ضيوف
= ضيوف إيه ؟ ..دي هدير ..دي صاحبة مكان مش ضيفة
هدير : الله يكرمك ياعمو
- اممممم !! ..هي دي بقاا صاحبتك الجديدة
= بضحك : بس إيه رأيك !! ..أبوك بيقع واقف دايما
هدير بحرج : طب أنا ..أنا هامشي ياعمو عشان اتأخرت .. سلاام
عبد الرحمن : استني استني ..انتي راحة فين ؟
= هامشي ..عشان اتأخرت وماما هتقلق
- لأ استني ..أنا ..أنا كنت بدور عليكي انهاردة بعد اللجنة بس مالقتكيش
= خير حضرتك ..كنت عايزني في حاجة ؟!
- بإرتباك : ااه ..أنا ..أنا يعني ..كنت ..

"" وقعد يتهته كدة ومش عارف يكون جُملة ..وبصيت لعمو حسن لقيته مُبتسم ..وأنا كنت واقفة ومحرجة أووي ..عمو حسن قاطع عبد الرحمن ووداني الورد اللي بحبه وباخده منه كل يوم وأخدته واستأذنت ومشيت ...يووووووه كان نفسي أعرف أووي عبد الرحمن عايز يقولي اييه ؟!...""

- ياطنط ياطنط !

"" كان طفل صغير بينادي عليا ..""
= أيوة ياحبيبي عايز ايه ؟!
- اتفضلي الورقة دي ..عمو اللي واقف في محل الورد دة قالي أوديهالك

"" قلبي وقع ! ..فتحت الورقة ..كان كتبلي ...""

ياللي ماسكين الورد ، أنا قلبي أَوْلَي من الورد ..💛

"" اتصدمت !! ..عبد الرحمن حس يابشر ..طلعت قلمي من الشنطة وكتبت في ضهر الورقة ..""

ياللي شايفين الورد ، قلبك ورد ، وقلبي مليان ورد ..💛

"" ووديت الورقة للولد يوديهاله ..وكملت طريقي ..أول مرة أبقي فرحانة إني خلصت إمتحانات ..بركاتك ياعمو حسن ..""

#حواديت
#هالة_أحمد

'' لا أُحلّل الإقتباس من دون الإسم ..🌻 ''