اسكربتات هالة أحمد

{66}

'' صاحب عمري 2 ..💛! ''

'' زيـاد ..''

'' الواحد بيكره نفسه جدًا لما يحس إنه تقيل علي اللي حواليه في كل حاجة ، مش كل الإبتلاءات هيّنة ..''

- إسراء أنا حضرتلك الفطار وحطيتهولك علي السُفرة برا وغطيته ، وقت ماتحبي تفطري إفطري
= ماشي
- وعملتلك اللبن وسخّنته تحبي أجيبهولك دلوقتي تشربيه ولا تستني شوية ؟
= لا مش عايزة دلوقتي
- خلاص هسيبهولك جمب الفطار ، لو بِرد إستني سيّدة لما تيجي وهي تسخنهولك
= طيب
- عايزة حاجة قبل ما أروح الشغل ؟
= شكرًا
- تمام مع السلامة

'' وسابها ونِزل ..زياد بيحاول يساعدها ويسعِدها بشتّي الطرق ، أي سِت في الدنيا تتمني إنها تصحي في يوم تلاقي جوزها محضرلها الفطار ، لكن هي جوزها بيعملّها الفطار كل يوم ، عمره ماقصّر يوم ، بقاله سنتين علي الحال دا ..ودي أكتر حاجة بتخليها تكرهه ، أكتر حاجة بتخليها مش طايقاه لإنه بيحسسها بعجزها كل يوم ، هي اللي المفروض تقوم تحضرله الفطار مش هو ، هي اللي المفروض تقوم بواجبات بيتها مش سيّدة الشغالة ، هي زهقت ..وتعبت جدًا ..''
'' شوية وجت سيّدة عسان تنضف البيت وطلبت منها إسراء تشيل الفطار ، فِضلت طول اليوم قاعدة في الأوضة مابتتحركش غير عشان تتوضي وتصلي وبس ..''

'' زياد كان شايف إنها مش مبسوطة ..بقالهم سنتين من يوم ماتجوّزوا وهما علي الحال دا ، مُصرة إسراء ماتتخطّاش الحادثة ..مُصرة تحسسه إنه المذنب الوحيد ، وهو ما أنكرش إنه مذنب ومُستعد يكفّر عن ذنبه عمره كله بس هي ترضي ، ماكنش عارف يشتغل من كتر تفكيره في أي حل ممكن يبسط إسراء ..بس اللي كان مهوّن عليه شوية إنه هيقابل صحابه بالليل ، عالأقل يفك شوية ..''

'' أكيد في مشاكل كتير بتحصلّنا مالهاش علاقة بصحابنا ولا حتي وجودهم في المشاكل دي بيفرق ، ولا حتي بنحتاج نحكيلهم عن المشاكل دي أصلًا ..ولكن إصرار صاحبي إنه يكون جمبي حتي لو في موقف مش محتاجه فيه بيتقدّر ..ااه عدم وجوده ممكن مايفرقش ، بس أكيد وجوده هيخليني أحسن ..''

- خالد : والله أنا مش كداب مانا مش عارفك إمبارح يازياد
= زياد : ياحبيبي والله أنا كويس
- خناقة صح ؟ ..مع إسراء ؟ ..مش عايز أعرف تفاصيل كتير بس أتطمن إنها مش حاجة تانية
= بتنهيدة : يعني ..حاجة زي كدة لكن مش خناقة
- حلو ! ..في إيه بقا ؟

'' بصله زياد ومانطقش ..وبعد كدة ضحكوا هما الاتنين ، طبطب خالد علي إيد زياد وقاله ..''

- معلش ، أكيد اللي حصل لسة مأثّر عليها دي مش حاجة سهلة يعني ..وإن شاء الله كل حاجة هترجع أحسن كتير صدقني

'' قبل مايرد زياد دخل أحمد عليهم وقعد معاهم وقال ..''

- أحمد : إزيكوا ..معلش إتأخرت عليكوا
- خالد : لا ولا اتأخرت ولا حاجة ..يدوبك بس كانوا هيقفلوا علينا الكافيه واحنا مستنيين حضرتك
- أحمد بضحك : معلش ..هاا طمنوني عاملين إيه ؟
= زياد : تمام الحمد لله ، إنتَ أخبارك إيه ؟
- أحمد : بخير الحمد لله ..أمال فين عمرو وكريم ؟ ماجوش برده ؟
- خالد : لأ ..إنتَ عارف الشركة بتاعتهم وشغلهم واخدهم
- أحمد : ربنا معاهم يارب ويعينهم
- يارب