اسكربتات هالة أحمد

{51}

'' حبيبة أمها ..💛! ''

'' غياب الأم مابيتعوضش ، بيُترك فينا شرخ كبير مالوش علاج ..مهما شوفت وحضرت غياب ناس عزيزة علي قلبك عمره ماهيساوي نقطة في بحر من عذاب فقدان الأم وغيابها ، مهما كان سنك ..مهما كان كمية الناس اللي حواليك ، أول ماتفقد أمك هتحس إنك يتيم ..ووحيد ! ''

- عمر تليفونك بيرن إنت مش شايفه ولا إيه ؟

'' بصيت لموبايلي لقيته بيرن فعلاً ..الظاهر إنه علي وضع الصامت ، بصيت علي إسم اللي بيتصل لقيتها حبيبة ! ، إستغربت جداً ..بصيت لسامح وقولتله ..''

= دي حبيبة !
- بصدمة : حبيبة ؟ ، غريبة أوي ..طب إيه هترد ؟
= طبعاً هرد

'' قومت ووقفت بعيد ورديت ..''

= ألو ؟
- أيوة ياعمر ..إزيك
= الحمد لله بخير ، إزيك إنتِ عاملة إيه ؟
- مش كويسة ، مش كويسة خالص

'' وقعدت تعيط ، إتخضيت جداً ..''

= في إيه ياحبيبة بتعيطي ليه ؟
- ببكاء : مافيش حاجة
= يعني إيه مافيش ؟ أمال العياط دا بدون سبب ؟
- ببكاء : سيبني أعيط وبس ..سيبني وماتسألنيش
= ...

'' قعدِت تعيط وصوتها كل مادي بيعلي في العياط ، منهارة كلياً ..فضلت ساكت ! ، عياطها كان بيقطع في قلبي وأنا مش عارف هي بتعيط بسبب إيه وليه دا كله ؟ ..حوالي ربع ساعة وهي عالحال دا لحد ماهديت وقفلت السكة ، رجعت قعدت مع سامح وأنا متضايق ومحتار ..''

- إيه ياعمر ؟ ، إيه اللي حصل خلاها ترن عليك ؟
= مش عارف ، ماقلتش حاجة
- بإستغراب : أمال دا كله بتتكلمه في إيه ؟
= ولا حاجة ، كانت بتعيط بس
- بتعجب : ...
= معلش ياسامح أنا هامشي
- طب إنت كويس ؟
= بحزن : لأ

'' وسيبته ومشيت ..
حبيبة هتبقي مش كويسة وأنا هبقي كويس ؟ حاجة مش منطقية بالمرة ، حبيبة عمري هي ..اللي مكمل عشانها لحد دلوقتي وعشان عارف إن في نهاية الطريق هلاقيها ، كنا سوا في الكلية ..حبينا بعض من بعيد لبعيد ، وللأسف وِقعنا في الذنب وكلمنا بعض وإرتبطنا ، كل واحد فينا كان عارف إن دا غلط بس مكملين بدافع الحب وإن نية كل واحد فينا إنه مش بيضحك علي التاني ومكملين عشان بنحب بعض وهنتجوز ، بس كان سبب مش مُقنع لا بالنسبالي ولا بالنسبالها ..فيه مية سبب ممكن يتوجد في لحظة يمنعنا إننا نتجوز ، مادام بدأنا مشوار الحب بطريقة حرام ..إزاي في آخر الطريق هنلاقي الحلال ؟ ، حتي لو بأي سبب هنلاقي الحلال بس لا هيبقي فيه بركة ولا هيبقي فيه مشوار نكمله سوا ..وبفضل الله ماحدش فينا كان راضي عن التصرف دا ، حبيبة اللي بدأت الكلام إننا لازم نبعد ..كانت أغرب جملة سمعتها من حبيبة لما قالت '' لازم نبعد عشان نقرب من بعض أكتر ..'' ، كنت متفق معاها مع كل كلمة بتقولها ، وكنت مبسوط منها ..حسيت إني عرفت أختار اللي هتكمل معايا حياتي ، وافقتها علي قرارها اللي هو في نفس الوقت قراري ومُقتنع بيه جداً ..وعاهدنا بعض إننا مش هنتكلم تاني أبداً ، أنا هشتغل ولما أبقي جاهز هاجي أتقدم ، وهي هتستناني ..
فات سنة كاملة ماكلمناش بعض فيها ، ولا حتي كنا بنشوف بعض صدفة ..علي قد ما كانت وحشاني علي قد ماكنت بموّت نفسي في الشغل عشانها وعشان أتقدملها في أقرب وقت ..وعلي قد مانا مصدوم إنها كلمتني دلوقتي ، ومكلماني عشان تعيط بس ! ..طب إيه اللي حصل ؟ ، روّحت البيت ، كنت بدور علي أمي ولقيتها واقفة في المطبخ ..''