အခန်း-၁၅၂
အဘွားတော်က ဆက်လက်၍ ပြောသည်။
"လွန်ခဲ့တဲ့ နှစ်သန်းနဲ့ချီတုန်းက ကောင်းကင်မင်းကြီး ကျန်းဝူမင် လက်ထက်မှာ ကောင်းကင်နန်းတော်ရဲ့ အင်အားတစ်စုက ချီလုံတွေနဲ့ ပတ်သတ်ပြီးတော့ ပြင်းထန်တဲ့ အငြိုးအတေးထားမှုတွေ ရှိခဲ့တယ်။ အဲဒီတုန်းက အဲဒီအင်အားစုကို ကြိုးကိုင်တာက ကောင်းကင်ပိုးကြိုးနီနက္ခနဲ့ မွေးဖွားလာတဲ့ ကောင်းကင်ဧကရီဖြစ်တယ်"
ကောင်းကင်ဧကရီက ထိုင်နေရာမှ ထရပ်လိုက်ပြီးနောက် သွေးပုလင်းငယ်ကို လက်ထဲတွင် မြှုပ်မတတ် ဆုပ်ကိုင်ထားလိုက်သည်။
"အဲဒီတုန်းက ကောင်းကင်ဧကရီရဲ့ အင်အားစုနဲ့ ထိပ်တိုက်တွေ့ခဲ့တဲ့ ချီလုံတွေက အမျိုးပြုတ်လုနီးပါး အားလုံး အသတ်ခံခဲ့ရတယ်။ နောက်ဆုံးမှာ သူတို့က မြေအောက်ကမ္ဘာကို သွားတဲ့ လမ်းခရီးမှာ ရှိတဲ့ မိစ္ဆာနယ်မြေထဲကို ပြေးဝင်ခဲ့ရတယ်"
"မိစ္ဆာနယ်မြေထဲမှာ သတ်မှတ်ချက် မျိုးနွယ်ငါးခု ရှိပြီးတော့ မြို့တော်ခြောက်ခု ရှိတယ်။ ဒါပေမဲ့ မြေအောက်ကမ္ဘာနဲ့ ကောင်းကင်က မသေမျိုးတွေမှာ ခြားနားတဲ့ စည်းမျဉ်းတွေ ရှိတယ်။ ဒါကြောင့် မိစ္ဆာနယ်မြေထဲကို ပြေးဝင်သွားတဲ့ မျိုးနွယ်မှန်သမျှကို ကောင်းကင်ကနေ နယ်နိမိတ်စည်းကနေ အပြင်ကို ထွက်ခွင့် မပြုတော့ဘူး"
ဟူအာ နားမလည်နိုင် ဖြစ်မိသည်။
"ဟူအာ နားမလည်နိုင်ပါဘူး အဘွားတော် ဒီသွေးက ဟူအာအတွက် အရေးကြီးပါတယ်။ ပြီးတော့ ဒါက ဟူအာ လိုက်ရှာနေတဲ့သူရဲ့ သွေးပါ ဟူအာ ပြန်ယူသွားပါရစေ"
ကောင်းကင်ဧကရီ၏ လက်များက သွေးပုလင်းကို ဆုပ်ကိုင်ထားရာတွင် ပို၍ တင်းကျပ်သွား၏။
"ဒီသွေးက မင်းအတွက် အရေးကြီးမယ်ဆိုတာ ငါ တွေးဆမိပြီးသားပါ။ ဒါပေမဲ့ မင်းသိလား။ သူက အပြစ်သားဖြစ်နိုင်တယ်"
"အပြစ်သား.."
ဟူအာ လက်မခံချင်သလို ဖြစ်မိသည်။ ညောင်အာက ကောင်းကင်တွင် နေထိုင်ခဲ့သူ ဖြစ်သည်။ ထို့အပြင် သူမက နတ်စွမ်းအားသီးသန့်ကိုသာ အသုံးချခဲ့သူလည်း ဖြစ်သေး၏။ သူမက ကောင်းကင်မှ အပြစ်သားဆိုပါက ယခင်ကတည်းက အဘယ်ကြောင့် မဖမ်းဆီးသနည်း။
"သူမရဲ့ နတ်စွမ်းအားက သန့်စင်ပါတယ်"
ဟူအာ အလိုလို အယူခံဝင်လိုက်မိသည်။
ကောင်းကင်ဧကရီက ခေါင်းညိတ်သည်။
"သူမကသာ မြေအောက်ကမ္ဘာကနေ အပေါ်ကို ခိုးဝင်လာခဲ့တယ်ဆိုရင် ဒါက ကောင်းကင်ကို ဆန့်ကျင်နေတာပဲ။ သေချာပေါက် ကောင်းကင်ရဲ့အမြင်ကနေ အကြာကြီး ကွယ်မနေနိုင်ဘူး။ နှစ်တစ်သိန်းအတွင်းမှာ သူမရဲ့ ပုံစံအမှန်က ပေါ်လာလိမ့်မယ်။ အကောင်းဆုံးကတော့ မင်း သူမနဲ့ မပတ်သတ်တာပဲ"
"ကောင်းကင်ကနေ မိစ္ဆာတွေကို ရှင်သန်ဖို့ ခွင့်မပြုထားတာမျိုး မရှိဘူး မဟုတ်လား။ အဘွားတော်က ဘာလို့.."
ကျွန်တော့်ကို ဖိအားလာပေးနေတာလဲ ဆိုသည့် စကားကို ဟူအာ ဆက်မပြောနိုင်ပေ။ သူက အငယ်သားသာ ဖြစ်ပြီး ကောင်းကင်ဧကရီ၏ အဆင့်အတန်းက သူနှင့် အငြင်းပွားလို့ ရသည့် အဆင့်အတန်းမျိုး မဟုတ်ချေ။
"ကောင်းကင်ကနေ မိစ္ဆာတွေရဲ့ ရှင်သန်မှုကို မကန့်သတ်ထားဘူး။ ဒါပေမဲ့ သူတို့က မြေအောက်ကမ္ဘာနဲ့ ပတ်သတ်မှု မရှိရဘူး"
"ဘာလို့လဲ"
"မြေအောက်ကမ္ဘာမှာ တစ်လောကလုံးကို လောင်ကျွမ်းပစ်နိုင်တဲ့ အကြွင်းမဲ့နတ်မီးလျှံတွေ ရှိတယ်။ လက်ရှိမှာ အဲဒီမီးလျှံတွေကို ဘယ်သူက ထိန်းနိုင်မလဲ ဆိုတာ ဘယ်သူမှ မသိနိုင်ဘူး။ ပြီးတော့ မြေအောက်ကမ္ဘာရဲ့ အရှင်သခင်က ကောင်းကင်ကို တည်ခဲ့တဲ့နတ်မင်းတစ်ပါးပဲ။ သူက ကောင်းကင်ကို ထိခိုက်ဖို့ ဘယ်တုန်းကမှ ခွင့်မပြုခဲ့ဖူးဘူး။ ဒါကြောင့် မြေအောက်ကမ္ဘာကနေ ထွက်လာတယ် ဆိုတာက ခိုးထွက်လာတာပဲ။ ဖြစ်နိုင်တာက အရာအားလုံးက မင်းထင်သလို မရိုးရှင်းဘူး"
"သူမက ဘယ်တုန်းကမှ မြေအောက်ကမ္ဘာကို မသွားခဲ့တာလည်း ဖြစ်နိုင်တာပဲလေ"
ဟူအာ ပြောလိုက်တော့ ကောင်းကင်ဧကရီက ခေါင်းညိတ်သည်။ ပြီးနောက် သွေးပုလင်းငယ်ကို လေပေါ်သို့ မြောက်တင်လိုက်၏။
ဟူအာ ထိုသွေးပုလင်းလေးကို ဖမ်းဆုပ်ရန် ပြင်လိုက်သော်လည်း ကောင်းကင်ဧကရီ၏ လက်အတွင်းမှ အနန္တမီးလျှံက ထွက်ပေါ်လာပြီး၊ ထိုသွေးပုလင်းလေးက လောင်ကျွမ်းသွားကာ အမှုန်အစအဖြစ်သို့ ပြောင်းလဲသွားတော့သည်။
"ဒီလို ပစ္စည်းမျိုးကို မင်းဆီမှာ မရှိထားသင့်ဘူး"
ဟူအာ၏ လက်က လေထဲတွင် ကျန်ရစ်နေခဲ့ပြီးနောက် အမှုန်အစတစ်စကိုများ ရနိုင်လေမလားဟူသည့် မျှော်လင့်ချက်တို့ဖြင့် ထိုအမှုန်အစများကို ကယောင်ကတမ်း ဖမ်းဆုပ်နိုင်ရန် ကြိုးစားလိုက်မိသည်။ သို့သော် ထိုအမှုန်အစများက နတ်မီး၏ လောင်ကျွမ်းပြီးနောက် ကျန်ရစ်လာသည့် ပြာများ ဖြစ်လေရာ တစ်ခဏအတွင်း ကွယ်ပျောက်သွားကုန်လေသည်။
ဟူအာ လက်ကို ဖြန့်လိုက်သည်တွင် လက်အတွင်း မည်သည့်အရာကိုမျှ ဖှေးတင်မနေပါလေ။ ဟူအာ လက်သီးကို အသာအယာ ဆုပ်လိုက်ပြီးနောက် အရိုအသေပေး ဂါရဝပြုလိုက်ရုံသာ တတ်နိုင်သည်။
"ဟူအာကို ခွင့်ပြုပါအုံး"
ကောင်းကင်ဧကရီက ဟူအာရှိရာသို့ ခြေတစ်လှမ်းမျှ လှမ်းလာပြီးနောက် ရပ်တန့်သွားကာ စိုးရိမ်သော လေသံဖြင့် သတိပေးစကားဆိုသည်။
"အဘွားတော် ပြောတာကို နားထောင် အဲဒီတစ်ယောက်က မင်းကို ကောင်းတာတွေ ဖြစ်လာစေမှာ မဟုတ်ဘူး"
"သက်သေရှိလား.."
ဟူအာ ပြန်မေးလိုက်တော့ ကောင်းကင်ဧကရီက ဟူအာကို မျက်မှောင်ကြုတ်လျက် ကြည့်လာသည်။
"တစ်ဖက်သတ် စွပ်စွဲချက်တွေပဲ မဟုတ်လား။ တစ်ဖက်သတ် စွပ်စွဲချက်တွေနဲ့ ဘယ်လိုလုပ်ပြီးတော့ ကျွန်တော့်ရဲ့ပစ္စည်းကို ဒီလိုမျိုး ဖျက်ဆီးနိုင်ရတာလဲ"
ကောင်းကင်ဧကရီက ခေါင်းခါယမ်းပြီး ပြောလာသည်။
"အဘွားတော်က မင်းကို ကောင်းစေချင်လို့ပါ။ မင်းရဲ့အဆင့်အတန်းက နတ်မင်းသားတစ်ပါးဆိုတာထက်ကို ပိုပြီးတော့ မြင့်မြတ်တယ်။ တခြားသူတွေက မင်းရဲ့ ရိုးရှင်းတဲ့အတွေးတွေကို သေချာပေါက် အသုံးပြုကြလိမ့်မယ်။ သူတို့က မင်းကို အသုံးပြုဖို့ ပြင်ဆင်ထားပြီးသား ဖြစ်နေလောက်တယ်"
ဟူအာ ဂါရဝပြုထားသည်ကို ဖြေလျော့လိုက်ပြီးနောက် နန်းဆောင်မှ ထွက်သွားရန်သာ ပြင်လိုက်မိသည်။
"အိမ်ရှေ့မင်းသားရဲ့သား၊ ကျိုးရင်းနတ်ဘုရားမရဲ့သား၊ ပြီးတော့ ကောင်းကင်မင်းကြီးရဲ့တော်ဝင်မြစ်တော်၊ အဲဒါတွေကို ကျွန်တော် ရွေးချယ်ခွင့် ရှိလို့လား။ ကျွန်တော် မလိုချင်ဘူးလို့ ပြောလိုက်တာနဲ့ ဒါတွေကို ကျွန်တော်က ငြင်းဆန်နိုင်မှာတဲ့လား။ ကျွန်တော် ရွေးချယ်ခွင့်ရှိတဲ့ အရာသေးသေးလေးတွေကိုတောင်မှ ကျွန်တော်က ရွေးချယ်ဖို့ မတတ်နိုင်ဘူးလား။ အဲဒါဆိုရင် ဘာလို့ မင်းတို့ ကောင်းကင်ကနတ်တွေက ကလေးတွေ မွေးနေကြသေးလဲ။ မင်းတို့က နတ်စွမ်းအားတွေ ကြီးနေကြတာပဲ။ ရေခဲရုပ်ထုတွေ ဒါမှမဟုတ် သစ်သားရုပ်ထုတွေကို ဖန်ဆင်းပြီးတော့ပဲ အသက်သွင်းလိုက်ကြပါတော့လား"
"ဒီကလေး.."
ဟူအာ နန်းဆောင်အပြင်ကို ထွက်လိုက်သည်တွင် ခမည်းတော်က နန်းဆောင်အပြင်၌ ရပ်နေသည်ကို တွေ့လိုက်ရသည်။ ဟူအာ မနှုတ်ဆက်ချင်တော့သည်ဖြစ်ရာ အနားတွင် မမြင်သလိုသာ ဖြတ်သွားလိုက်တော့၏။
ဟူအာ ခမည်းတော်နှင့် အနီးဆုံးသို့ ရောက်လာသည်တွင် ခမည်းတော်က သူ့ကို ပြောလာသည်။
"တောင်းပန်ပါတယ်။ မင်းကို ကောင်းကောင်း မစောင့်ရှောက်နိုင်ခဲ့ဘဲ ပျောက်ဆုံးသွားခဲ့မိတယ်။ မင်းကို ပြန်တွေ့လာပြီးတော့လည်း မင်း တန်ဖိုးထားတာတွေကို ကူညီပေးမဲ့အစား မင်း မနှစ်သက်တာတွေကိုပဲ ဆက်တိုက် လုပ်ခိုင်းနေမိတယ်။ မင်းကပဲ သဘောထားကြီးကြီးနဲ့ ခွင့်လွတ်ပေးပါ"
ဟူအာ ပြောနေသည့် စကားများကို နားမထောင်လိုတော့ဘဲ မိုးကြိုးနီနန်းဆောင်သို့ ပြန်လာခဲ့လိုက်တော့သည်။
"အရှင့်သား ဘာဖြစ်ခဲ့တာလဲ။ တကယ်လို့ ကျွန်မ ကူညီနိုင်တာများ ရှိရင်.."
"အရှင့်သား.."
"ဝုန်း.."
ဟူအာ မိုးကြိုးနီနန်းဆောင်၏ ပင်မခန်းမဆောင်အတွင်းသို့ ဝင်ပြီးသည်နှင့် ခန်းမဆောင်၏ တံခါးကို ပိတ်ချလိုက်သည်။ ဟူအာ၏ စိတ်အတွေးအတွင်း ညောင်အာ၏ အကြောင်းတရားများသာ ပြည့်နှက်နေခဲ့သည်။
ညောင်အာက ဘယ်လို ဖြစ်ပြီးတော့ မြေအောက်ကမ္ဘာကနေ ဖောက်ထွက်လာနိုင်မှာတဲ့လဲ။ ညောင်အာက နတ်စွမ်းအားမြင့်သည်ဟု ဆိုနိုင်သော်လည်း မြေအောက်ကမ္ဘာမှ ဖောက်ထွက်လာနိုင်လောက်သည်အထိတော့ မမြင့်မားပေ။
မြေအောက်ကမ္ဘာမှ ဖောက်ထွက်လာခြင်းသည် မြေအောက်ကမ္ဘာမှ စည်းမျဉ်းကိုရော ကောင်းကင်မှ စည်းမျဉ်းကိုပါ ဖောက်ဖျက်ခြင်း ဖြစ်လေရာ ကောင်းကင်မှ မန္တန်ကိုရော မြေအောက်မှ ချမှတ်ထားသော မန္တန်ကိုပါ လွန်ဆန်ရမည် ဖြစ်သည်။ ထို့သို့သော နတ်က စွမ်းအားကြီးမားမှ ဖြစ်မည်မှာ အသေအချာပင် ဖြစ်၏။
ဟူအာက ညောင်အာနှင့် နှစ်အနည်းငယ်သာ နေထိုင်ခဲ့ဖူးသော်လည်း သူမက ထိုမျှလောက် နတ်စွမ်းအားမမြင့်မားပေ။ ထို့အပြင် ညောင်အာက ဆစ်ကျီနတ်မင်း၏ နန်းဆောင်တွင် နေထိုင်ခဲ့ခြင်း ဖြစ်ပြီး သူမသာ မနေထိုင်သင့်သည့်နတ်တစ်ပါး မှန်ပါက ဆစ်ကျီနတ်မင်းက ဂရုမထားဘဲ ရှိမည် မဟုတ်ပေ။
မည်သည့်အရာက ဘယ်နားကနေ စတင်၍ မှားယွင်းနေမှန်း ဟူအာ နားမလည်နိုင်တော့ပေ။ မည်သည့်နေရာကနေ အစကောက်၍ စုံစမ်းရမည်ကိုလည်း ဟူအာ မသိနိုင်တော့ပေ။
ဟူအာ အမှတ်ရလိုက်မိသည်က အိမ်ရှေ့မင်းသားမှ သူ့ကို နှစ်သိမ့်ပေးခဲ့သော စကားများကိုသာ ဖြစ်လေသည်။ အိမ်ရှေ့မင်းသားထံတွင် အဖြေတစ်ခုခု ရှိလောက်မည် ဖြစ်၏။
@@@@@
Telegram မှာ အပိုင်း ၂၃၀အထိ ရောက်ပါပြီနော်။