မြေခွေးလေးရဲ့ ချစ်ခြင်း ဒဏ္ဍာရီ

part82

unicode
အခန်း ၈၂

သူ့လက်အတွင်း တောက်ပနေသော အပြာရောင်အငွေ့ဖြင့် နတ်စွမ်းအားက ပြင်းထန်ပြီး ထက်သန်လွန်းသည်။ သူ လက်ကို ဝှေ့ယမ်းလိုက်သည်တွင် လေပြည်ညင်းက တိခနဲ တန့်ရပ်သွား၏။ ရင်းအာ၏ အပြစ်ဆိုတာက တိုးတိုးသဲ့သဲ့လေး ထွက်ပေါ်လာပြန်သည်။
“ငါ့သား.. မင်းက ငါ့သား.. ဘာလို့ မင်းက စောစော မပြောရတာလဲ၊ မင်း ဘယ်လို တောင်မှ အမေ့ကို ပစ်ထားနိုင်ရတာလဲ”
“ကျွန်တော်လည်း မရှင်းလင်းသေးဘူး”
အခြေအနေက အတော်လေး ရှုပ်ထွေးနေသော အနေအထားတွင် ရှိနေသည်။ ကောင်းကင်မင်းကြီးက မိန့်ကြားလာ၏။
“အမှောင်ကိုးပါးကို ကျော်ဖြတ်တာမှာ မင်းက လေးပါးမြောက်မှာ ချိုးဖျက်ပြီး ထွက်လာတယ်၊ မင်းက အတော်လေး သတ္တိကောင်းပါလား”
“ဒီကလေးက စိတ်မရှည်တတ်လို့ပါ၊ အဘိုးတော်ကပဲ ကျေးဇူးပြုပြီးတော့ ခွင့်လွှတ်ပေးပါအုံး”
“ကောင်းပြီ အမှောင်တိုက်တံခါးကို ချိုးဖျက်ပြီး မထွက်လာရဘူးဆိုတဲ့ စည်းမျဉ်းမရှိမှတော့ ငါက သူ့ကို အပြစ်တင်ပြီးတော့ ဘာလုပ်မှာလဲ၊ ယီမင် မင်းက သားကောင်းတစ်ယောက်ကို ရထားတာပဲ၊ ကြည့်ရတာ မင်းတို့လည်း ကိစ္စလေးတွေ ရှိမယ် ထင်တယ်၊ မင်းတို့ဖာသာ ဖြေရှင်းနိုင်ဖို့ မျှော်လင့်ပါတယ်”
ကောင်းကင်မင်းကြီးက ထိုနေရာမှ ထွက်ခွာသွားပြီးနောက် တခြားသော နတ်မင်းများကလည်း အလျိုလျို ထွက်ခွာသွားကြလေသည်။
ထိုနေရာတစ်ခုလုံးမှ နတ်မင်းများအားလုံး ထွက်ခွာသွားပြီးသည်နှင့် ကျန်ရစ်ခဲ့သူက သုံးဦးသာ ရှိတော့သည်။ မင်တက်နေသော ကျိုးရင်းနတ်ဘုရားမ၊ ခင်ပွန်းသည် အိမ်ရှေ့စံတလီယီမင်၊ နောက်ဆုံး တစ်ဦးက ယခုလေးတင်မှ အမှောင်ကိုးပါးတိုက်တံခါးကို ကျိုးပဲ့စေလိုက်သော ပိုင်ဟုန်ဟူ..။
မိသားစု သုံးဦးက မည်သူမျှ စကားစမဆိုဘဲ တိတ်ဆိတ်နေ၏။ အိမ်ရှေ့မင်းသားက ဇနီးသည်၏ ခန္ဓာကိုယ်ကို ထွေးပိုက်ထားပြီး သားဖြစ်သူကို ကြည့်နေသည်။ လက်ရှိအရေးကိစ္စမှာ ဆိုရလျှင် အိမ်ရှေ့မင်းသား၏ မိသားစုအရေး အိမ်တွင်းရေးဟု ဆိုနိုင်ပေသည်။ ထို့ကြောင့် ဝင်ပါလိုသူ မည်သူမျှ မရှိပေ။ ဝင်ပါ၍လည်း မရနိုင်ပေ။
“ဟူအာ.. မင်းက ငါတို့ရဲ့ သားပဲ”
ပထမဆုံး ငြိမ်သက်နေမှုကို အိမ်ရှေ့မင်းသားက စကားတစ်ခွန်းဖြင့် ဖြိုခွဲပစ်လိုက်သည်။ ပြီးနောက် လိုအပ်သည်ကို ဆက်တိုက်ဆိုသလို ပြောလိုက်၏။
“မင်းလက်ခံချင်တာ ဖြစ်စေ လက်မခံချင်ဘူး ဖြစ်စေ ဒါကို မင်း ငြင်းလို့ မရဘူး”
“ကျွန်တော်..”
ဟူအာ စကားစပြောရန် ကြိုးစားလိုက်သော်လည်း ထိုကိစ္စများအား အစမှ အဆုံးတိုင် သူ တစ်ခုမှ နားမလည်သလို ခံစားနေရသည်။ တစ်ဘဝလုံး သူ့ကိုယ်သူ နားမလည်လာခဲ့သော ကိစ္စများ ရှိသည့်အနက် ယခုတစ်ကြိမ်က အခက်ခဲဆုံးဟု ခံစားရသည်။
သူ့မိဘများက ပိုင်ဒေသမှ နတ်မြေခွေးများဟု သူ မှတ်ထင်ခဲ့သည်။ ပြီးနောက် ငယ်စဉ်တစ်လျှောက်လုံး မြေနတ်များ၏ နတ်စွမ်းအင် အသုံးချမှုကို အသက်သွင်းနိုင်စွမ်း မရှိခဲ့ပေ။ အသက်သွင်း၍ ရလာသည့် နတ်စွမ်းအင်သည်လည်း မြေနတ်ဒေသမှ နတ်မြေခွေး ပိုင်မျိုးရိုးတို့၏ စွမ်းအားများ မဟုတ်ခဲ့ပေ။
ထိုအခြေအနေကို သူ အကြိမ်ကြိမ် သုံးသပ်ပြီးသည့်တိုင် ယနေ့အထိ နားမလည်နိုင်ခဲ့သည့် အဖြေက သူက အိမ်ရှေ့မင်းသားနှင့် ကျိုးရင်းနတ်ဘုရားမတို့၏ သား ဆိုသည့် အကြောင်းတရားအပေါ်တွင် မူတည်နေပေသည်။
“ကျွန်တော်.. ကျွန်တော် နားလည်ဖို့ အချိန်နည်းနည်း ပေးနိုင်မလား”
သူ့ တောင်းဆိုချက်က လွန်သည်ဟု မဆိုနိုင်ပေ။ သူ အရာအားလုံးကို အချိတ်အဆက်မိမိ နားလည်ဖို့ လိုသေးသည်။
“မင်းမှာ နတ်ဝိညာဉ်ရှစ်ခု ရှိတယ်”
အိမ်ရှေ့မင်းသားက သူ့ကို ပြောပြလာသည်။ ထိုအကြောင်းအရင်းသည်လည်း သူနားမလည်သော အကြောင်းအရင်း ဖြစ်၏။
“ပြီးတော့ မင်းရဲ့ဝိညာဉ်နောက်တစ်ခုကလည်း မင်းလောက်နီးပါး အားကောင်းတယ်”
“မင်း သူ့ကို သိလောက်မယ်လို့ ထင်တယ်၊ သူက..”
“တလီကျိုးဟူ..”
ဟူအာ ရုတ်တရက် စကားကို ဖြတ်ပြောလိုက်မိသည်။ အိမ်ရှေ့မင်းသားက သူ့ကို စိတ်ဆိုးဟန် မပြပေ။ ထိုအစား နားလည်ရန် မလွယ်သော ကလေးငယ်ကို စိတ်ရှည်စွာ သင်ပြပေးနေသော ဆရာတစ်ဦး၏ ဟန်ပန်ဖြင့်သာ ငေးကြည့်နေ၏။
“ဟုတ်တယ်၊ မင်းတို့ နှစ်ယောက်က မညီမမျှ ဖြစ်နေတယ်၊ မင်းတို့က တစ်ယောက်တည်းပဲ”
ယီမင် နောက်ဆုံးတော့ သူ့သားကို ထိုအကြောင်းအရာကို ပြောပြနိုင်ခဲ့ပြီ ဖြစ်သည်။
“သူ့ရဲ့ နတ်စွမ်းအား ဆက်ခံမှုက ထူးဆန်းနေတယ်၊ ဒါပေမဲ့ သူ့ရဲ့မူလသဏ္ဌာန်က အားကောင်းတယ်၊ သူ့ရဲ့အသက်ဓာတ်က မှန်းဆလို့ မရနိုင်ဘူး၊ ဒါပေမဲ့ မင်းကကျတော့.. မြေနတ်ရဲ့အသက်ဓာတ်နဲ့ ကြီးပြင်းလာရတယ်၊ ဒီနေ့ မင်းရဲ့အသက်ဓာတ်နဲ့ နတ်စွမ်းအား ပြောင်းလဲသွားပေမဲ့ တလီကျိုးဟူမှာလည်း မင်းလောက်နီးပါး အားကောင်း ပြင်းထန်တဲ့ ကောင်းကင်အရှိန်အဝါနဲ့ အသက်ဓာတ်ကို ပိုင်ဆိုင်ထားတယ်”
“ကျွန်တော်တို့က မတူညီဘူးပေါ့”
အိမ်ရှေ့မင်းသားက လက်တစ်ဖက်ဖြင့် သူ့ကို ဝေ့ယမ်းလိုက်သည်။ ပြီးနောက် သက်ပြင်းသဲ့သဲ့ချလိုက်၏။
“မင်းကို ပြုစုစောင့်ရှောက်ခဲ့တဲ့ မိဘတွေကို နှုတ်ဆက်သင့်တယ်၊ မင်းမှာ သူတို့ဆီကနေ ကူးယူထားတဲ့ မြေနတ်နဲ့ သက်ဆိုင်တဲ့ အရာမှန်သမျှ မရှိတော့ဘူး”
အိမ်ရှေ့မင်းသားက သတိပေးစကား ဆိုလာမှ ဟူအာ ကိုယ့်ကိုယ်ကိုယ် ပြန်လည် စမ်းစစ်လိုက်မိ၏။ သူ့ထံတွင် မြေနတ်အရှိန်အဝါနှင့် မြေနတ်၏အသက်ဓာတ် ပြီးနောက် မြေနတ်တစ်ပါး၏ မူလအသွင်အပြင် ဖြစ်သော မြေခွေးဟူသော မူလသဏ္ဌာန်ပင် ပျောက်ကွယ်သွားပြီ ဖြစ်၏။
အားလုံးက ကောင်းကင်နတ်တစ်ပါး၏ အရှိန်အဝါ၊ ကောင်းကင်နတ်တစ်ပါး၏ အသက်ဓာတ် အဖြစ်သို့ ပြောင်းလဲသွားတော့သည်။
“ကျွန်တော့်မှာ မူလသဏ္ဌာန်မရှိဘူး..”
သူ မေးလိုက်တာကို ငိုကြွေးနေသေးသည့် ကျိုးရင်းနတ်ဘုရားမက မဖြေကြားခဲ့ပေ။ အိမ်ရှေ့မင်းသားကပင် ဖြေကြားလာ၏။
“မင်းအမေအရင်းမှာလည်း မူလသဏ္ဌာန်မရှိဘူး..”
အိမ်ရှေ့မင်းသား၏ ဆိုလိုရင်းမှာ ရိုးရှင်းလှပေသည်။ သူ့ထံတွင် မူလသဏ္ဌာန်မရှိပေ။ မူလသဏ္ဌာန်မရှိခြင်း၏ အကျိုးသက်ရောက်မှုမှာ သူ့ထံတွင် အမြုတေ မရှိ၍ဟု ဆိုလိုခြင်းပင် ဖြစ်သည်။
အမြုတေမရှိခြင်းတွင် ကောင်းခြင်း ရှိသလို ဆိုးခြင်းလည်း ရှိနိုင်၏။ ကောင်းခြင်းသည် အမြုတေကြောင့် နတ်ခန္ဓာကိုယ်နှင့် ဝိညာဉ်ကို မထိခိုက်နိုင်ပေ။ ဆိုရလျှင် အမြုတေကြောင့် ထိခိုက်စေနိုင်သော အကြောင်းတရားများကို အလွယ်တကူပင် ကျော်လွှားစေနိုင်သည်။
ဆိုးကျိုးဟု ဆိုရလျှင် အမြုတေမရှိခြင်းကြောင့် အမြုတေနှင့် သက်ဆိုင်သော နတ်စွမ်းအား ပညာရပ်များကို သင်ယူနိုင်ခြင်း မရှိတော့ပေ။ အမြုတေကို အသုံးချနိုင်သော ပညာရပ်များ အားလုံးကို အသုံးပြုနိုင်ခြင်းလည်း မရှိတော့ပေ။
ကောင်းကင်ကို တည်ခဲ့သော ရှေးနတ်မင်းများသည် သဘာဝမှ မွေးဖွားလာခဲ့ခြင်း ဖြစ်ပြီး ကိုယ်ပိုင်အမြုတေအပြင် အမြုတေအများအပြားကို လက်နက်အဖြစ် အသုံးချနိုင်ခဲ့ကြသည်။ ထို့အပြင် သဘာဝမှ မွေးဖွားလာသော နတ်မင်းများ၏ ထိခိုက်မှုက အမြုတေအပေါ်တွင် မူတည်ခြင်း မရှိခဲ့ကြပေ။ အကြောင်းအရင်းမှာ ရှေးနတ်မင်းကိုးပါးသည် အမြုတေကို ဖန်တီးနိုင်သောကြောင့် ဖြစ်၏။
သို့သော် ကိုယ်ပိုင်အမြုတေ မပါရှိဘဲ သဘာဝမှ မွေးဖွားလာခဲ့သည့် တစ်ပါးတည်းသော နတ်မင်းမှာ ကျိုးရှီနတ်မင်း ဖြစ်သည်။ ကိုယ်ပိုင်အမြုတေ မရှိသော်လည်း အမြုတေကို ဖန်တီးနိုင်ခဲ့ပြီး ကျိုးရှီနတ်မင်း၏ ကိုယ်တိုင်ဖန်တီးထားသော အမြုတေသည် တခြားသော နတ်တစ်ပါး၏ အမြုတေကို ဖန်တီးနိုင်စွမ်း ဖျက်ဆီးနိုင်စွမ်းတို့ ရှိပြီး ထိုမျှအထိ စွမ်းအား ကြီးမားလေ၏။
ကံဆိုးလှစွာဖြင့် ကျိုးရှီနတ်မင်း၏ နောက်ပိုင်း ဆက်ခံသူ နတ်မင်းများမှာ ကိုယ်ပိုင်အမြုတေဖြင့် မမွေးဖွားခဲ့သော်လည်း အမြုတေကို ဖန်တီးနိုင်သော နတ်စွမ်းရည်လည်း မပြည့်ဝခဲ့ကြပေ။ ထိုသို့ အမြုတေ ဖန်တီးနိုင်စွမ်းကို သဘာဝလွန်စွမ်းအား၏ ဆက်ခံသူ နတ်ဘုရားမ ကျိုးရင်းပင် မရရှိခဲ့ပေ။
(ဒီနေရာမှာ နည်းနည်း ထပ်ပြောရမယ် ဆိုရင် စိမ့်စမ်းပြာအိုင်အလွမ်းဒဏ္ဍာရီကို ဖတ်ပြီးတဲ့သူတိုင်း နားလည်မှာပါနော်၊ ကျိုးရင်းက တကယ်တမ်းမှာ ပညာရပ် တော်တော်များများကို မတတ်ခဲ့ပါဘူးနော်၊ သူ့မျိုးနွယ်ရဲ့ ဝိညာဉ်ခွဲတဲ့ ပညာရပ်ကလွဲရင် ကျန်တာတွေကို နားလည်ဖို့ကို ခက်ခဲခဲ့တာပါ။ ကျိုးရင်းရဲ့ မူလနတ်စွမ်းအားကိုက စွမ်းအားကြီးမား နေခဲ့တာပါ။)
“တကယ်လို့ မင်း အမြုတေ လိုချင်တယ် ဆိုရင် ကိုယ်တိုင် ကြိုးစားတာကလည်း မနောက်ကျသေးပါဘူး”
အိမ်ရှေ့မင်းသားက သူ့ကို သတိပေးစကား ဆိုလိုက်သည်နှင့် ဆင်တူသည်။ မျိုးရိုးအရ သူက အိမ်ရှေ့မင်းသား တလီယီမင်ဘက်မှ ကြည့်လျှင် သူသည်က ရေတွက်၍ မရနိုင်သော နှောင်းပိုင်းမျိုးဆက် နတ်များတွင် ပါဝင်သည်။ သို့သော် မိခင် ကျိုးရင်းဘက်မှ ကြည့်လျှင် မျိုးရိုးသည် ရှေးပိုင်းမျိုးဆက်တွင် ပါဝင်ကာ ကောင်းကင်တည်သော နတ်မင်းတို့၏ မျိုးဆက်တွင် စတုတ္ထမြောက်မျိုးဆက် ဖြစ်သည်။
“ကျိုးဟူ..”
ယခုတွင်မှ ကျိုးရင်းနတ်ဘုရားမ၏ အသံက ထွက်ပေါ်လာ၏။ သို့သော်.. အိမ်ရှေ့မင်းသားက သူမကို ထိန်းထားလျက် ရှိနေသေး၏။
“မင်းအမေက မင်းကို မမှတ်မိတာကို မင်းက ခွင့်လွတ်ပေးလိုက်ပါ၊ သူမက အဲဒါကို စိတ်ပူပြီးတော့ စိတ်မကောင်း ဖြစ်နေတယ်”
“သူမက သဘာဝလွန် နတ်ဘုရားမ မဟုတ်လား၊ ဘယ်လို ဖြစ်ပြီးတော့ ဒါကို မသိနိုင်ခဲ့တာလဲ ဆိုတာ ကျွန်တော် နားမလည်ဘူး”
သူ မေးလိုက်တာကို အိမ်ရှေ့မင်းသားကပင် ထပ်မံ၍ ဖြေကြားလာ၏။
“ကောင်းကင်တည်ခဲ့တဲ့ နတ်မင်းကိုးပါးထဲက နတ်မင်းတစ်ပါးက အနန္ဒနတ်စွမ်းအား အတတ်ပညာကို ဖန်တီးနိုင်ခဲ့ပြီးတော့ သင်ယူနိုင်ခဲ့တယ်၊ အဲဒီအနန္ဒနတ်စွမ်းအား ပညာရပ်ဆိုတာက အဲဒီနတ်မင်း နတ်သက်ကြွေသွားသည့်တိုင်အောင် သူ့နတ်စွမ်းအားကို ဆက်ခံသူကို မျှဝေနိုင်တယ်၊ ငါ အဲဒီနတ်စွမ်းအားကို ကောင်းကင်အလင်းတန်းအသွင်အဖြစ်နဲ့ ဆက်ခံသူ ဖြစ်ခဲ့ပြီးတော့ မင်းမမွေးလာခင်တုန်းက ငါ မင်းအတွက် တစ်ဝက် ထည့်ပေးထားခဲ့တယ်.. အခု အဲဒါကို ပြန်ယူဖို့ အချိန်ကျပြီ”
ပြောပြီးသည်နှင့် အိမ်ရှေ့စံက သူ့ခန္ဓာကိုယ်မှ အဖြူရောင်အလင်းတန်းငယ်ကို ထုတ်ယူသွားလေသည်။ ပြီးနောက် ဖန်ပုလင်းငယ်အတွင်းသို့ ပြန်လည်ထည့်သွင်းလိုက်ကာ။
“အနန္ဒနတ်စွမ်းအား ပညာရပ်ဆိုတာက နတ်စွမ်းအားတွေရဲ့ အထွတ်အထိပ်နတ်စွမ်းအား ပညာရပ်တစ်ခုပဲ၊ ငါက မင်းအတွက် အဲဒါကို ထည့်သွင်းပေးလိုက်ပြီးတော့ မင်းရဲ့ကောင်းကင်သန္ဓေအိမ် ပျက်စီးသွားပြီးတဲ့ နောက်မှာ သူက မင်းအတွက် အယောင်ဆောင် အသက်ဓာတ်၊ အယောင်ဆောင် အမြုတေနဲ့ အယောင်ဆောင် အရှိန်အဝါကို ဖန်တီးပေးခဲ့တယ်၊ ဘယ်သူမှ ဒါကို မသိနိုင်ခဲ့ဘူး၊ သူ့မှာ အဲလိုစွမ်းအားရှိမှန်း ငါလေ့လာပြီးတာ မကြာသေးဘူး၊ ပြီးတော့ အနန္ဒနတ်စွမ်းအားက မင်းအမေရဲ့အမြင်ကို ပိတ်ပင်ထားနိုင်ခဲ့တယ်၊ ပြီးတော့ မင်းအမေက ကျိုးမျိုးနွယ်နတ်တွေရဲ့ အတတ်ပညာဖြစ်တဲ့ နတ်ဝိညာဉ်ခွဲခြား အသက်သွင်းခြင်း အတတ်ပညာကို မင်းမွေးဖွားလာတာနဲ့ မခက်ခဲရအောင် ဆိုပြီးတော့ ကြိုတင်စီမံထားပေးခဲ့တယ်၊ ကံဆိုးစွာနဲ့ မင်းရဲ့သန္ဓေအိမ်ပြိုကွဲသွာပြီးတဲ့နောက်မှာ အဲဒီနတ်သက်ကယ်ရေခဲဆီကနေ သဘာလွန်နတ်စွမ်းအားက မင်းရဲ့ခန္ဓာကိုယ်မှာ စည်းအဖြစ် ဖြစ်ပေါ်လာခဲ့ပြီးတော့ ငါ့အမြင်ကို ကာထားခဲ့တယ်၊ အဲဒါကြောင့် ငါတို့ နှစ်ယောက်က မင်းရဲ့နတ်ဝိညာဉ်တည်ရှိရာကို အာရုံခံလို့ မရနိုင်ခဲ့ဘူး”
အိမ်ရှေ့စံမင်းသားက တည်ငြိမ်စွာ ရှင်းပြသည်။ ကျိုးရင်းနတ်ဘုရားမက ငိုကြွေးနေရာမှ တည်ငြိမ်သွားပြီ ဖြစ်ကာ သူ့ကို စိုးရိမ်စွာ ကြည့်နေ၏။
“ကျိုးဟူ.. မယ်တော် တောင်းပန်ပါတယ်”
“ကျွန်တော်က တလီကျိုးဟူ မဟုတ်ဘူး”
သူ ချက်ချင်းပင် ငြင်းဆိုလိုက်မိသည်။ တလီကျိုးဟူ ဆိုသော တစ်ယောက်သည် သူ မဟုတ်ဟု သူ ခံစားနေရပြီး တလီကျိုးဟူနှင့် ဆက်နွယ်ပတ်သတ်နေသမျှ မှတ်ဉာဏ်အားလုံးသည်လည်း သူ့ထံတွင် မတည်ရှိနေပေ။ ထို့ကြောင့် သူက သူ့ကိုယ်သူ တလီကျိုးဟူဟု လက်ခံရန် ခက်ခဲနေဆဲ ဖြစ်၏။
“မင်းတို့က အတူတူပဲလေ၊ ဘယ်လို ဖြစ်ပြီးတော့.. ဒီလိုမျိုး..”
သူမက ထပ်မံ၍ မျက်ရည်များ စီးကျလာပြန်၏။ အိမ်ရှေ့မင်းသားက သူ့ဇနီးကို ပွေ့ပိုက်လိုက်ပြီးနောက် သူ့ကို သတိပေးစကား ဆိုလာသည်။
“မင်းအမေ ကိုယ်ဝန်ရှိနေတယ်၊ နေမကောင်းဘူး၊ မင်း သူ့ကို မထိခိုက်စေပါနဲ့”
အိမ်ရှေ့မင်းသားက ဇနီးသည်ကို ပွေ့ချီလိုက်ပြီးနောက် သူ့ကို ပြောလာပြန်၏။
“ပြီးတော့ မင်းအတွက် ကောင်းကင်မှာ နန်းဆောင်တည်လာပြီးသား ဆိုတော့ မင်း အဲဒီမှာ သွားနေနိုင်တယ်၊ နောက်သုံးရက်နေရင် ကျိုးနတ်မျိုးနွယ်တွေဆီကို တရားဝင်သွားနှုတ်ဆက်ဖို့ ပြင်ဆင်ထားပါ၊ မင်းက အငယ်ဆိုတော့ အားလုံးကို လေးစားမှု ပြပေးရမယ်၊ ကျိုးနတ်မျိုးနွယ်က နည်းပါးတယ်၊ ဆစ်ကျီနတ်မင်းက ကျိုးမျိုးနွယ်ရဲ့ အသိအမှတ်ပြု နတ်မင်းတစ်ပါး မဟုတ်ရင်တောင် သူကလည်း မင်းရဲ့အဘိုးလေးပဲ မို့လို့ မင်းဘက်ကပဲ သူ့ကို ဂါရဝတရားရှိပေးရမယ်”
အိမ်ရှေ့မင်းသားက လှည့်ထွက်ဖို့ ပြင်ပြီးနောက် ခြေလှမ်းကို ရပ်တန့်လိုက်သည်။
“မင်း ဖြစ်ချင်သည် ဖြစ်စေ မဖြစ်ချင်သည် ဖြစ်စေ မင်းက ကောင်းကင်အိမ်ရှေ့စံရဲ့သားတော်တစ်ပါး ဖြစ်သွားပြီ၊ ဒီတော့ အဲဒီဂုဏ်ပုဒ်နဲ့အညီ ပြုမူ နေထိုင်သင့်တယ်၊ မင်းက ကောင်းကင်နန်းတော်ရဲ့ မင်းသားငယ်တစ်ပါးပဲ၊ မင်းသားတစ်ပါးဆိုတဲ့ တာဝန်ကို မင်း ယူကို ယူရမှာပဲ၊ မင်း အဆင်သင့် ပြင်ဆင်ထားသင့်တယ်”
အိမ်ရှေ့စံက သူ့ဇနီးသည်ကို ပွေ့ချီကာ ကျောခိုင်း ထွက်သွားသည်အထိ ဟူအာ ငြိမ်သက်စွာ တွေးတောနေမိဆဲ ဖြစ်သည်။ မနေ့ကနှင့် ယနေ့အတွင်း သူသည်က များပြားလှသော တာဝန်များ ပခုံးပေါ်တွင် ရုတ်တရက် ရောက်လာသကဲ့သို့ပင် ခံစားလိုက်ရလေသည်။
***
paid Group/ Paid Docs ရွိပါတယ္။ Bioမွာ ေပးထားတဲ့ လင့္မွာ စုံစမ္းဝယ္ယူနိုင္ပါတယ္။