قام راشد عشان هزاع و روضه ياخذون راحتهم في الكلام. ، لكن قبل لا يطلع راشد قال حق هزاع " عقل اختك " و طلع ، استغرب هزاع ؛
هزاع : عقل اختك ؟ ليش شو مسويه ؟
روضه : قلت له تزوج و طلقني مادري ليش كبر الموضوع
هزاع : روضه مايصير جي يدتيه في صوب و امه في صوب و انتي بعد تزيدينه
روضه : بعد هو ما يصير يضحي بـ نفسه عشانه
هزاع : الي يسويه بإرادته و كيفه ، المهم كينا من موضوعكم الحين طمنيني عنج
روضه : مثل ما تشوف قدامك ، ماشي يديد
هزاع : ليش ؟ ترا مافي شي في الدنيا يستاهل نزل عليه
روضه : هزاااع انت هب حاس فيني
هزاع : لا والله حاس و مقدر و متفهم ، بس مافي شي يخليج تبعدين عن خوانج و الناس هب كلهم واحد روضه والله العظيم اننا ضايعين بدونج والله ما اكذب عليج ترا فراقج صعب علينا ولا قدرنا نتخطى
روضه : اشوف بعدك عايش
هزاع : لكن تعرفين بالي صار لي من بعدج ؟
روضه : شو بيصير ؟
هزاع : تذكرين السر الي قلت لج عنه و كنتي تساعديني فيه ؟
روضه : هيه
هزاع : بسببه خسرت كل ما وراي و قدامي و دخلت في قضايا مالها اول ولا تالي و هالشي محد يدري به
روضه : آسفه لك
هزاع : كم مره ينتج محتاج و رديتيني ، ينتج هب في اية فلوس ينتج لان ضاقت علي الدنيا و اعرف ان محد غيرج بيفتحها لي ، و احمد الي محد يفهم له غيرج انا ما اعرف شو الي بينج و بينه بس كم مره ياج مكسور و ضايق و رديتيه ، و فيصل نفس الشي ماله داعي اقولج شو الي يصير معاه وصل لين باب غرفتج و لا سمعتيه ، قلبج قسى علينا كلنا إلا على فطيم لان و زين انه لان نحن الشباب بالنسبه لج عادي بنقدر نلقى حد غيرج اما اختج لا ، و مع الاسف للحين جروحنا ما طابت و نحتاج يا روضه ، لو لنا صدق قدر عندج طلبت لا تقطعين علينا الطريق ، بدا فيصل فيه و قطعتيه و انا ببدا الحين و خليج طالبج طلبه لا تقطعين الطين عليناوالله العظيم اننا نحتاج لـ. وجودج بيننا والله ما اكذب عليج
كان كلام هزاع يلامس قلب روضه و هي تسمع كل كلمه يقولها و تقول في بالها ( ليش يا روضه ) قاطعت روضه هزاع
روضه : أنا آسفه و ادري ان آسفه ما بتفيد الحين بس صدقني بحاول
هزاع : زين عيل انا كل يوم بعد الدوام بيي اتغدا عندج
روضه : والله يا مرحبا بينور البيت
هزاع : طاح الحطب ؟
روضه : طاح
هزاع : زين عيل ، قومي بنطلع نتقهوى
روضه : اكره الزحمه مابا اشوف ناس
هزاع : بوديج مكان فاضي والله مافيه زحمه
روضه : زين عاد هب الحين خلها العصر
هزاع : تمام ، بعزم خواني بس
روضه : خل الحساب عليه
هزاع : لا والله
روضه : زين نتفاهم عقب
***
طلع هزاع و كتب في القروب الخاص فيهم ( امه و ابوه و اخوانه ) انه عازمهم على كوب قهوه العصر ، و طبعاً الي احتج بـ الشغل و الي هب متفوق ، لكن هزاع قال لهم الي ما بيي يفوته نص عمره ، الساعه 5 كلهم في الكوفي يتريون هزاع ؛
فيصل : لا والله إلا بيروح علينا نص عمرنا و نحن نتريا
خليفه ( بو هزاع ) : و شو مستوي عليك انتظر
( دخل هزاع بدون روضه ، لان روضه قالت له انه ها بتي مع راشد )
أحمد : تفضل هزاع ليش جامعنا
وقف هزاع يشوفهم و هو يقول في باله "لا يا روضه دخيلج لا تسوينها فيني " لكن صدمته روضه و دخلت الكوفي و من فرحت أحمد و فيصل بشوفتها قاموا يركضون صوبها ؛
راشد : بس فجوها عفصتوها
أحمد : انت شو تبا ؟
روضه : والله تولهت عليكم
فيصل : عيل نحن شو نقول ؟
أحمد : مافي كلمة توصف عن شوقنا لج
روضه : لا توبه توبه حياكم عندي في اي وقت
( راحوا أحمد و فيصل يحبون راس هزاع الي لين راسها و ردها لهم )
***
بعد ما تقهوو و استانسوا قعدوا يسولفون لين ما اذن المغرب ،،، في الميلس ،،، دخلت ام خليفه و شافت المخدات على الارض و الميلس فاضي مافيه حد ، دقت على العامله اتي و تنظف الميلس ، دقايق و دخل زايد ؛
زايد : شو مستوي ؟
ام خليفه : مادري الي عايشين هني يهال ولا شو مادري
***
دخل سالم و هو متلثم بالسفره ( الغتره ) و العصبيه عنده واصله حدها ، و شوي يدخل مطر و هو ميت ضحك قعد عدال يدته و يسولف عليها بـ الحرب الي صارت في الميلس ، الي صار كـ التالي " دخل مطر و شاف سالم بلبس الجيش منسدح رشه بـ طرمبتين ماي مثلج و قام سالم و تضاربوا دخل عليهم مايد يفججهم و لكن ما قدر و سحب عمره و طلع راح اييب لهم عمه سعيد الي هو ابوهم ، دخل عليهم ابوهم و قعد يصارخ عليهم و هم عادي الحياه حلوه طلع اييب مكينة الحلاقه و رد لهم و قرعهم ".
زايد : مبزره
مطر : سوا فيني خير والله كنت بروح احلق لكن و فر عليه
ام خليفه : و راحت كشة سالم
زايد : احدهن كم خصله
سالم : اونها تتطنز عليه ، والله هب مقهور إلا لان كان الرقده خطييره
زايد : قلنا دخل التجنيد بيعقل
سالم : المينون بيبقى طول عمره مينون
مطر : الحين شدخل مينون ؟ كنت ملان ابا استهبل شوي
سالم : تدري اني مداوم من الفجر هب وقت استهبالك
***
طلع سالم و هو معصب و راح المستشفى مسوي عمره تعبان و طلب منهم يعطونه مغذي فيه منوم و يحطونه في غرفه بروحه ، لكن دخلوا على الدكتور اول و فعلاً تغمس شخصية المريض الي من كم يوم ما رقد و فعلاً كتب له الدكتور مغذي و منوم ، طلع سالم. من غرفة الدكتور و هو مستانس محد يزعجه و بيرقد و بياخذ اجازه باجر ، سواها و رقد لين اليوم الثاني .
***
يتبع ،،،
انتظر تفاعلكم و رايكم و توقعاتكم للبارت الياي ❤️🔥.