( في بيت خليفه ( بو هزاع ) الساعه 6 )
فطيم و روضه في غرفة فطيم قاعدين و قافلين عليهم الباب ، كانت الأجواء حلوه اغاني و ضحك و سوالف و شوية نصايح ، بين ما روضه تعدل فطيم ؛
فطيم : شرايج تنزلين معليه
روضه : لا بس بكون هني في غرفتج
فطيم : خلاص اوك ما اريد اصر عليج
روضه : اسمعي هب تقومين و تقهوين و ها ، خلي سلامي و شيخوه هن الي بيسون كل ها اما انتي خليج قاعده ولا تسوين شي
فطيم : هيه و لان يدتيه تنغز
روضه : ما عليج منها ، و الحين خلصنا يلا انزلي عشان تكونين معاهم في الاستقبال
فطيم : لا اميه قالت انا يوم بدق لج تعالي
روضه : لاا حركات قديمه ، انزلي ما عليج و اذا قالت لج شي قوليلها رويض قالت لي
فطيم : يلا انا اليوم في شورج
روضه : كأنهم ضيوف و اي ضيوف عادي ، انسي انهم يايين يشوفونج و عامليهم كنهم ضيوف يايين يتقهوون و بس
فطيم : ان شاء الله ، شي ثاني ؟
روضه : لا سلامتج و الله يوفقج
فطيم : آمييين
***
الساعه 11 بعد ما راحوا الضيوف و ردت ام خليفه بيتها اركضت فطيم غرفتها و قفلت الباب وراها ، قعدت قدام روضه تسولف عليها بـ اللي صار تحت و كانت مستانسه لان اهل حمد ناس مثقفه و متفهمين و راقيين ؛
فطيم : تصدقين سألوا عنج
روضه : منو الي سأل ؟
فطيم : ام حامد قالت سمعت ان عندكم بنت ثانيه اسمها روضه
روضه : انزين ؟
فطيم : قالت لها اميه ودها تكون موجوده لكن كل انسان و له ظروفه
روضه : اشوى ، انزين طلعي شوفي الطريق راشد يترياني ورا
فطيم : يلا دقايق
( راحت و ردت )
فطيم : محد تحت بس اميه و ابويه
روضه : سلامي و شيخوه ؟
فطيم : كل وحده في قسمها
روضه : و خوانيه