( بعد مرور اسبوع )
يوم الجمعه كـ العاده مجتمعه العايله في الميلس بوجود بو خليفه و ام خليفه ، الكل مندمج في السوالف و الضحك ، من عادات و تقاليد كل جمعه لازم الكل يكون موجود على الغدا ووقت المقيال هذا شي اجباري ، يقيلون على السوني او الالعاب الي موجوده في السده الي تحت التلفزيون ، لكن في الفتره الأخيره تعلموا يلعبون شطرنج ، شاف ام خليفه ياسر بنظره تقوله فيها ( تعال اقعد بدالي ) ، قام ياسر وقعد عدال يدته ؛
ياسر : هلا
ام خليفه : ماتستحي
ياسر : شو سويت ؟
ام خليفه : ليش مايبي حرمتك تتغدا عندنا
ياسر : تبييني اييبها؟
ام خليفه : هيه يلا قم قبل لا يحطون الغدا
ياسر : ان شاء الله
***
قامت روضه متأخر على الساعه 12 ، نزلت تحت على اساس انها بتلقى راشد ، فتحت التلفون بتدق عليه و تسأل لكن انتبهت انه كاتب لها في الواتس انه يتغدا في بيت اهله ؛
روضه : تولهت على يوم الجمعه و اليلسه معاهم
راشد : انزين تعالي غيري جو
روضه : احس لا مابا
راشد : و ليش لا ؟
روضه : اخاف ، ما اريد اسمع شي
راشد : ما بتسمعين شي ، و الي بيقول شي بيشوف
روضه : شو تحس ؟
راشد : قومي بدلي و تعدلي و انا الحين بييج
روضه : راشد
راشد : قومي بدلي ما ابا اسمع شي ثاني
روضه : يخي ما اقدر والله مابتحمل الي بسمعه
راشد : ما بتسمعين شي
***
قام راشد و قعد عدال يده يقوله انه بيروح اييب روضه و ما يباها تسمع كلام يزعلها او يضايقها في موضوع الحمل ، و رد عليه يدا ( ولا يهمك روضه في ويهي و امانتي و الي بيقولها شي او يضايقها انا برد عليه ) ، طلع راشد من الميلس و هو مرتاح و مطمن و واثق من يده ، من طلع راشد و سكر الباب وراه ؛
بو خليفه : طالبكم طلبه
كلهم : تم
بو خليفه : راشد رايح اييب روضه ، و هي في ويهي والله الي بيزعلها ولا بيقول لها كلام يضايقها بيشوف
خليفه ( بو هزاع ) : اميه طلبتج لا تفتحين موضوع الحمل ولا تيبين طاريه
ام خليفه : دريت انه الرمسه اليه
بو خليفه : لا الرمسه للكل
شيخه : و اخيراً و الله اننا تولهنا
