( بعد مرور يومين )
الساعه 10 الصبح كتب هزاع في قروب العايله ( أحمد مسوي حادث و الحين هو في غرفة العمليات ) ، طبعاً الاغلب كان راقد فقاموا مفجوعين من الخبر الي سمعوه ،،، قبل الحادث ،،، قام الصبح احمد و راح بيستلم سيارته الي دافع فيها دم قلبه و كل ما وراه و قدامه ، استلم السياره يديده توها طالعه من الوكاله لكن صار الي صار و فلت تاير السياره و انجلب ، على طول نقلوه لمستشفى شخ*وط وباشروا بالعمليات اللازمه ،،، في بيت ام خليفه ،،، قامت ام خليفه ولا تدري عن الي صار ولا حتى فتحت تلفونها طلعت للصاله واستغربت ان حد موجود يترياها ولان كانت رايقه دخلت المطبخ تحظر دخلة القهوه بنفسها، كانت مستمتعه ام خليفه بالاجواء القهوه تفور على نار هاديه والبيت هدوء مافيه صوت فجأه دخل مطر يصارخ ؛
مطر : يدتيه ،،، يدتيه
ام خليفه : اصبحنا و اصبح الملك لله ، هذا شيابه من صباح الله خير
مطر : ميري وين يدوه ؟
الخدامه ( ميري ) : ماما ؟
مطر : هي وينها ؟ ، محد داخل غرفه
الخدامه ( ميري ) : ايوا مافي داخل غورفه هيا داخل متبخ
مطر : يدتيه ماتدرين شو استوا
ام خليفه : خير اللهم اجعله خير ، ولا انت الي يشوف ويهك يشوف الخير
مطر : يدتيه شو فيج ؟
ام خليفه : بشر شو عندك ياي من الصبح ، ليت الخدمه تعلمك ما تصارخ
مطر : لا هناك انا الي امسك الطابور و اصارخ
ام خليفه : انزين الحين بتقول شحقه ياي و كل هالصريخ ؟
مطر : مافتحتي تلفونج و شفتي القروب ؟
ام خليفه : لا والله ماتفيجت
مطر : العايله الكريمه كلها فالمستشفى
ام خليفه : يدك فيه شي ؟
مطر : لا بسم الله عليه مافيه شي
ام خليفه : عيل اكيد متسممين من اكل الطباخ اليديد حسيت انا حسيت ان اكله هب نظيف
مطر : لا هب متسممين
ام خليفه : عيل شو بلاهم فالمستشفى ؟
مطر : انتي عطيتيني مجال حق ارمس اقولج شو فيهم ؟
ام خليفه : زين بعطيك المجال حق ترمس قول بلاهم في المستشفى ؟
مطر : احمد خليفه
ام خليفه : الدوده الزايده صح ؟
مطر : دوده زايده و كلهم عنده فالمستشفى ؟
ام خليفه : عيل شو ؟ حادث ؟ ليكون حادث ؟
مطر : هيه مسوي حادث
