بعد صلاة العصر ، دخلت فطيم بعباتها غرفة روضه توعيها عشان تروح معاها المول تشتري فستان حق العزيمه ، قامت روضه دخلت الحمام غسلت ويها وطلعت انتبهت ان فطيم قاعده عالكرسي بعباتها ، قالت فطيم لروضه تلبس عباتها وتروح معاها ، لكن روضه ماطاعت وقالت عادي بلبس اي شي من الكبت ؛
فطيم : كل الي فالكبت لبستيه ، قومي بناخذ شي يديد
روضه : فطيم مافيه ادري بنتأخر
فطيم : رووض هب متأخرين
روضه : الكبت مترووس
فطيم : انا قلت حق ابويه ان نحن طالعين و حول فلوس
روضه : ياخي شلي معاج اي حد ، لازم انا ؟
فطيم : لانج انتي بعد بتاخذين شي يديد ، وبس بدون نقاش قومي لبسي عباتج
روضه : زين
***
فالمول ، دخلوا المحل الأول واقنعت فطيم روضه انها تاخذ درس ابيض او وردي فاتح ، شافت روضه درس ابيض ودخلت تقايسه وعجبها و فطيم بعد قعدت تمدح روضه ، حاسبوا و طلعوا ، حست فطيم ان الوقت بدري لازم تماطل ويردون متأخر ؛
فطيم : ابا اتقهوى
روضه : خلينا نشوف لج شي عقب بنتقهوى
فطيم : لا بنتقهوى أول
روضه : زين ، وين تبين ؟
فطيم : امم ها الكوفي الي فوق ماذكر اسمه
***
فالكوفي ، كان المكان زحمه ، اقعدن على طاوله و اطلبن الي يبنه ؛
فطيم : رووض لو يرد يتقدم لج راشد بتوافقين ؟
روضه : هيه ، ليش تسألين ؟
فطيم : تحبينه ؟
روضه : مايخصج
فطيم : زين ، بس ترا واضح
***
بعد ماتقهوت فطيم وعدلت المزاج قاموا وخذوا كم لفه في المحلات على اساس فطيم تدور لها لبس لكن في الحقيقه هي تبا تضيق وقت ، انتبهت روضه ان الساعه صارت ست وفطيم مالقت لها شي ؛
روضه : فطيم تراها الساعه ست ، و يبالنا نص ساعه لين مانوصل البيت
فطيم : انزين
روضه : خلصينا ، هب حلوه نتأخر
فطيم : يوووه دقيقه ، شمسه موصيتني على شي ، بدقلها
( دقت فطيم على شمسها تسألها اذا كل جاهز عشان يردون وقالت لها هيه كل شي جاهز )
***
( في بيت أم خليفه )
كانوا يالسين في الصاله شيخه و مايد و ياسر ، فطيم قاعده اتابع مسلسل في تلفونها اما شيخه تقطع فروت وياسر و زايد ياكلون ؛
