( بعد صلاة العيد )
في بيت ام خليفة ، كانوا عيالها متجمعين بيتريقون عندها ، نزل محمد من فوق وعيد على عمامه وقربهم على الريوق ، قعدوا فوق طاولة الطعام ، مد يده سيف ( بو ساره ) بياخذ زيتون ؛
خليفه ( بوهزاع ) : رد يدك ،مدها بعد ما الوالد و الوالده يقعدون
سيف ( بو ساره ) : شدعوه ترا زيتونه
( حمد ( بو مايد ) يضحك )
خليفه ( بو هزاع ) : ما اعتقد ان في شي يضحك
سعيد ( بو مطر ) : عنبوه يهال ، حلفت عليكم تقومون تتضاربون
***
بعد الريوق قاموا وراحوا الميلس الخارجي ، دخلوا بو خليفه و ام خليفه وقاموا الشباب وعيدوا عليهم ، وبدت فقرة التصوير الي ماتنتهي ، بعد مرور ساعه قام حمد ( بو راشد ) واستأذن انه بيروح بيسلم على عمه وعمته ؛
حمد ( بو راشد ) : قم روح معايه
راشد : لا ابويه اسمح لي انا بروح لهم العصر
حمد ( بو راشد ) : لا العصر عندنا شغله ثانيه ، اميه برمسج في موضوع من تفضين
ام خليفه : ضروري ولا ؟
خليفه ( بو هزاع ) : هي والله ضروري
حمد ( بو راشد ) : يعني تم يا خليفه ؟
خليفه ( بو هزاع ) : هي نعم تم
حمد ( بو راشد ) : زين عيل نتلاقى على خير ، خلاص عيل اميه بيرمسج خليفه فالموضوع
خليفه ( بو هزاع ) : ولا يهمك انا برمسها
حمد ( بو راشد ) : يلا راشد ؟
راشد : يلا
ذبحها الفضول ام خليفه قامت مسكت يد خليفه و طلعوا برا الميلس عشان يقول لها الموضوع ، طلعت فطيم من البيت وشافت ابوها ويدتها يتصاصرون دارة دوره كامله على الميلس عشان تسمعهم بدون مايحسون فيها ، دخلت ام خليفه الميلس مستانسه تتلفت ؛
ام خليفه : البنات وينهن لين الحين مانزلن ، يت الساعه عشر
هزاع : وين يدتيه توها الساعه ثمان
( فتحت ام خليفه قروب العايله وسجلت فويس )
ام خليفه ( فويس ) : ها بنات ، وينكن ؟ تعرفن الساعه كم الحين ، عنبوه نبا انشوفكن ونكحل عيوننا ، تراهوا ما بيرقبون بيروحون
شيخه : منو هذيل الي ما بيرقبون ؟
ام خليفه ( فويس ) : منو بعد غير الشباب
شيخه : أحمد في الميلس ؟
فطيم ( فويس ) : شيخوه فشلتينا
فيصل : هيه احمد يترياج