( في المستشفى )
دخل بو خليفه قسم رقم 10 وهو يتحمد لسالم بالسلامه ويغني على سلامته و الي في الغرفه يرد عليهم ويرحب ، فتحوا باب الغرفه و الصدمه ان المرقده بنت صغيره فالعمر وعدالها امها وابوها قاعدين على الكرسي ؛
بو خليفه : السموحه شكلنا مغلطين
الريال : ردت علينا الروح بـ هالدخله ، الله يطول بعمرك ذكرتنيه بالغالي رحمة الله عليه
بو خليفه : الله يرحمه ، عسى ماشر
الريال : والله البنت فيها الرسطان وهني تتعالج
بو خليفه : ياقلبيه عليها ، الله يقومها بالسلامه ويشفيها ويعافيها
الريال : اميين ، يايين تزورون حد ؟
بو خليفه : هيه عنديه هني واحد من الاحفاد منفتق بطنه وتوه ظاهر من العمليات بنطمن عليه
الريال : مايشوف شر
بو خليفه : يلا عيل السموحه
الريال : فنيال قهوه
بو خليفه : لا لا مشكور
***
وهم في طريقهم لغرفة سالم طلع بوخليفه تلفونه وعطاه راشد وطلب منه يدق على امه ، طلب بو خليفه من ام راشد انها تروح وتاخذ للبنت الصغيره ذهب من سالم الشعيبي وتطرشه يرتبنه مع ورد ويطرشونه المستشفى ، سوت ام راشد الي طلبه عمها منها ،،، قبل لا يدخلون القسم تأكدوا انه قسم سالم ودخلوا وهم يغنون له على سلامته ؛
سالم : يا مرحبا حي هالصوت
راشد : لمرحب لا هان
بو خليفه الحمدالله على السلامه ، عيل هاي فطوم الي فاتقه بطنك
سالم : لا لتلومونها
بو خليفه : نسوي سوالف
سالم : لا هي حساسه لو درت بتتلوم
***
( في بيت ام خليفه )
كانن البنات ملتمات ، الي قاعدات عدال بعض ويحشن ، والي في المطبخ يخبصن ، والي قاعدات يلعبن سجن ، دخل عليهن ياسر ماسك ولد صغير ، لفن كلهن يطالعنه مستغربات ، انتبه ياسر انه لفت انتباههن وارتبك ، قعد في نص الصاله وقعد الولد فوقه ؛
ياسر : اقولكن ساعدنيه
نوره : شو مهبب بعد ؟
ياسر : هذا طلع ولديه
ساره : شو ؟ كيف يعني ولدك ؟
ياسر : مادري ، الحين شسوي ؟ كيف اقول لاميه وابويه ؟
فطيم : اممم عادي سهله انت ريال وشايل عيبك
ساره : شو ريال شايل عيبه ؟ تستهبلين هذي جريمه ، لازم يتعاقب عليها