الساعه 11 اليل دقت شمسه على زايد بعد ما رقدت سلمى ، و طلبت منه يطلع يمشي معاها في الشعبيه وافق و قال لها تييب له جواتي رياضه معاها وهي يايه و هو قدام الدروازه يترياها ، بعد ما تعدوا يرانهم و دخلوا على الشارع الثاني سمعت شمسه صوت بيبي يصيح و زايد يقول لها انها تتوهم و مافي صوت. ،لين ما وصلوا للبيت الي فيه البيبي الي يصيح ؛
شمسه : الحين صدق ما تسمع ؟
زايد : صوت قطاو
شمسه : زايد والله صوت بيبي يصيح طالع من هالبيت
زايد : قطاو قطاو ، خلينا نكمل مشي
***
كملوا مشي و شمسه قلبها عند البيبي الي يصيح بعد خمس دقايق من المشي ماقدرت تتجاهل الصوت وفقت و لفت بترجع للبيت الي طالع منه الصوت ؛
زايد : وين رايحه ؟
شمسه : بروح اشوف البيبي
زايد : يا بنت الحلال قلنا لج قطاو
شمسه : والله هب قطاوه ، اعرف هاي صيحة بيبي
***
دخل زايد يشوف البيت و قال حق شمسه تترياه برا ، و لقى عامله فلبينيه و في يدها بيبي يصيح طلع و زقر شمسه ، دخلت شمسه و شلت البيبي في حضنها ؛
شمسه : مسكين ايعان
زايد : وين ماما بابا ؟
العامله : موت داخل اكسيدانت
زايد : كيف موت
العامله : سياره دوخان
زايد : مافي ارباب ثاني ؟
العامله : انكل مال فارس قول شيل بيبي مشان انا و ودي فلبين
شمسه : شووو ؟
زايد : اصبري خليني افهم ، شو ستوري مال هدا بيبي ؟
العامله : ماما بابا اكسيدانت بعدين موت ، ايجي انكل مال فارس قول شيلي فارس ودي فلبين محد يريد
زايد : بابا مال فارس شو اسم ؟
( راحت العامله تيب له اسم ابو الولد )
زايد : ان لله و ان اليه لراجعون
شمسه : منو ؟
زايد : ابوه دوم عندنا في الميلس و ربيع راشد و مايد الروح بـ الروح ، قصته عجيبه هالريال
