الساعه 7 الصبح قام حمدان وعلى طول راح للشركه لانه اليوم يعتبر يوم مراجعة الحسابات بالنسبه لها لازم يراجع حسابات الشركه حق السنه كامله ، دخل لمكتبه وطلب له كوب قهوه عشان يركز ويبدا يشتغل عدل ولا بكل سهوله عادي يسحبونه من منصبه بسبب غلط ضغير ، بدا يراجع الحسابات وفي البدايه كان كل شي في السليم لين مابدا يراجع حسابات كل قسم وشاف قسم التسويق حساباته اضعاف اضعاف الاقسام الثانيه ، عصب حمدان ودق لسكرتيرته عشان تطلب روضه اتيه للمكتب ، مرت خمس دقايق وروضه للحين ماوصلت رجع دق للسكرتيره ؛
حمدان ( بعصبيه ) : وين روضه ؟
السكرتيره : طال عمرك قالتلي انها يايه
حمدان ( بعصبيه ) : دقي واستعجليها الموضوع مهم
السكرتيره : ان شاءلله الحين بدق
***
بعد الاتصال بثلاث دقايق دقت الباب روضه ودخلت ؛
روضه : هلا يقولون تباني ضروري
حمدان ( بعصبيه ) ضرب الملف الي في يده على الطاوله ؛ شوفي الحسابات
روضه : انزين بس انت هد
حمدان : شو هد ؟ و هالمبالغ الي حسرناها ؟
روضه : انزين عمي يدري
حمدان : و عمج شو دخله ؟ منو هني مسؤل عن الماليه ؟
روضه : هو عطاني الصلاحيه
حمدان : مالج اي صلاحيه بدون ماتاخذين شوري ، مايحق لج
روضه : آسفه
حمدان : وين اصرفها ؟ الحين اسف بترد المبالغ الي خسرناها
روضه : شو الي يرضيك ؟
حمدان : الحين تاخذين الملف وتروحين صوب يديه و تطلعيني من الموضوع لان احتمال انطرد برا الشركه
روضه : ان شاءلله
حمدان : الحين تطلعين من المكتب على طول لـ يديه
***
طلعت روضه من مكتب حمدان و راحت لمكتب عاشه على طول ، يلست وقالت لعايشه الي صار معاها وهدتها عاشه وطلبت لها عصير برتقال ؛
عاشه : عادي طول ما الي سويتيه لصالح الشركه يدي مابيقول شي
روضه : انتي مستوعبه ان حسابنا اضعاف اضعاف الاقسام الثانيه
عاشه : توقعت نحن تكون حساباتنا اعلى ، الحمدالله مافيني ادخل في سين و جيم
روضه : اباج تهديني هب تزيدينها علي
عاشه : يعني كم وصلتوا
روضه : تعدينا المفروض
عاشه : لا وايد بالغتم ، روحي صوب يديه فهميه
***
( في البيت تحديداً صالة بيت ام خليفه )
كانت قاعده ام خليفه مع سلامه وشمسه وشيخه تعلمهن كيف يخدمن التلي ، و مطر منسدح على الكرسي يحاول يألف له بيت قصيد لكن كل ما قال شي سكتته ام خليفه وعدت هي من عندها كم بيت ، شاف مطر ان مافي فايده لانه مايعرف ينتقي الكلمات قوم البنات ويلس عدال يدته يتلعم كيف يخدم التلي ولا عرف له ؛
مطر : يدتيه ابا اسوي ها العقوص الي بورق النخله
شيخه : ورق النخله شو ؟ اسمه سعف
مطر : هيه سعف النخله ، ابا اتعلم كيف يعقصونه
ام خليفه : مايعقصونه ، سلامه بتلاقين الخوص في حجرتيه فالكبت الي في غرفة الملابس هاتيه
سلامه : ان شاءالله
***
راحت سلامه تيب الخوص من غرفة يدتها ،،، دخل هزاع على روضه في غرفتها وطلب منها تروح ترمس سلامه في الموضوع ، من الفرحه على طول طلعت تركض لـ بيت يدتها عشان تفاتح سلامه بموضوع الخطبه ، دخلت روضه تدور سلامه وقالولها انها في غرفة يدتها وهي رايحه لسلامه طلعت سلامه من غرفة يدتها ؛
روضه : سلامي ابا ارمسج في موضوع
سلامه : ان شاءالله بس دقيقه بودي عند يدتيه وبييج
( دق هزاع لـ روضه ) ؛
هزاع : ها رمستيها ؟
روضه : لا بعدي اترياها اتي
هزاع : اشوى اني دقيت قبل لا ترمسينها
روضه : ليش ؟
هزاع : اقولج خلاص لا ترمسينها
روضه : ليش ؟
هزاع : بس لا ترمسينها ولا تقولين لها شي
روضه : تستهبل صح ؟ كيف ارقع الموضوع و بعدين لا يكون هونت
هزاع : خلاص روض هب وقته بعدين بفهمج
روضه : اكرهك الحين كيف برقعها
هزاع : حليها بروحج
( رجعت سلامه لـ روضه )
سلامه : هلا رويض
روضه : كنت ابا اسألج
سلامه : اسألي
روضه : تعالي خلينا انبعد شوي
سلامه ( و هم يبعدون ) : خوفتيني شو صاير ؟؟
روضه : لا تخافين ، بس ابا اسألج عن اليوم الي اختفوا فيه شيخوه وشموس تدرين وين كانن؟
سلامه : سمعت و الله اعلم انهن كانن مع حمدان في المستشفى
روضه : من من سمعتي هالكلام ؟
سلامه : الدريول كان يتحلطم هاك اليوم ويشتكي لنا ونحن رايحين المول
روضه : هيه اوك المهم ثنكيو
سلامه : بس ليش تسألين ؟
روضه : ماشي بس في ناس مسوين سالفه
سلامه : هيه
***
رجعت روضه للبيت معصبه و على طول راحت لغرفة هزاع و مالقته غيرت وجهتها و راحت لـ فطيم ، دخلت غرفة فطيم وهي تتحلطم ومقهوره من هزاع و تصرفاته و قراراته الفجائيه ؛
فطيم : انا هب هزاع انا فطيم لو سمحتي
روضه : ادري
فطيم : روحي و تهندقي عنده هب عندي
روضه : ماتبين تعرفين اخوج المحترم شو سوا
فطيم : لا مايهمني و اعرف انه يسولف و ما يفكر يخطب ولا يتزوج
روضه : ااااهههه بيجلطني
***
طلعت من غرفة فطيم وصفقت الباب بقوه وهي طالعه ، نزلت تحت وسمعت صوت هزاع ياي من الميلس راحت للميلس ودخلت دخله قويه فتحت فمها بتتهندق لكن شافته يرمس في التلفون ، خذت نفس و بدت تعد من العشره للواحد وتوقف وتقعد عشان لا تهدا وتقدر تكلمه بكل هدوء ، لكن طولت المكالمه وبدا ينفذ صبرها لين ما انفجر البركان وبدت تتهندق عليه .
يتبع ،،،،،
لا تنسون الـ vote تراني والله استاهل 🥺💞