( ميلان )
الساعه 1 الظهر وصلوا الشباب واتجهوا على طول لميدان الدومو انزلوا يتمشون ، اما كان هدفه يدور شيخه ولانه وقت غدا كان كل مايمر على مطعم يفتح عيونه كنهم رادارات ، فقد الأمل احمد انه يلاقيهم وقال اكيد بيتغدون في مكان ثاني غير الدومو ، مروا على مطعم اسمه " MADO " ووقفوا الشباب قدامه اما أحمد كمل طريقه ، انتبه فيصل ان أحمد كمل مشي فصارخ بصوت عالي وناداه ( أحمد تعال نحن نبا نتغدا ) ، كان عمهم عبيد ( بو ساره ) و ساره قاعدين في الطاوله الي عدالهم كلن هم كانوا معطينهم ظهرهم ، قدر عمهم عبيد ( بو ساره ) يميز الصوت فمد ايده وسحب هزاع من ورا ، خاف هزاع وكان بيكفخه لكن قبل ما يكفخه انتبه ان الي سحبه عمه انحنى يحب راس عمه ؛
هزاع : يامرحبا بالعم
عبيد ( بو ساره ) : ياهلا وسهلا
هزاع : هب جي يطيرون قلب الواحد
عبيد ( بو ساره ) : او عاد انت شرطي
هزاع : لا تذكرنيه الاسبوع الياي دوام
عبيد ( بو ساره ) : حياكم تعالوا تغدوا معانا
( طلب عبيد من الويتر يزيد لهم طاوله وكرسيين )
فيصل : ناقصين
ساره : هيه شيخوه ونوروه راحن برادا يشوفن الموجود
فيصل : هيه
عبيد ( بو ساره ) : نادوا الويتر و طلبوا الي تبونه
زايد : عاد انا ايعان
عبيد ( بو ساره ) : و المطعم اكله فنااان
***
دقت شيخه لابوها تسأله هو وين قاعد لانها ماتشوفه ، اما نوره انتبة لوجود عيال عمها في المطعم واستغربت ، اشر عبيد لبنته شيخه و ين نوره وشيخه ويلسن ، يسلت شيخه مقابله زايد و عدال زايد كان قاعد أحمد ، فتحت شيخه تلفونها ودخلت على محادثة أحمد في سناب وهو شافها تكتب وعلى طول كتب ؛
أحمد : صدفه
شيخه : اقنعني انها صدفه
أحمد : انا و الشباب طالعين نتكشت
شيخه : اها ووصلتوا ميلان بالصدفه
أحمده : هيه بالصدفه
شيخه : ما اقتنعت
( كبجر أحمد التغريدة الي تقول كنك وطن لا غبت عنك تغربت ّ و طرشها لشيخه )
شيخه : شو فيها فطيم ؟
أحمد : و شو دخل فطيم الحين ؟
شيخه : التغريده من حسابها
أحمد : وشو علينا من الحساب الحين ، انا اباج تقرين التغريده هب تشوفين الحساب
شيخه : يعني يابك الشوق
أحمد : وانا شو مغربلني غير الشوق
***
( في البلاد )
قام مطر الصبح وراح لشركة يده ، دخل لمكتب يده وطلب له اسبريسو وقعد يتريا يده عباله يده في اجتماع بعد مرور ساعه حس مطر ان يده وايد طول ، طلع بيسأل السكرتيره راح لمكتبها وشافه مقفول ، استغرب وخذ له خمس دقايق يفكر وين ممكن يكونون ، ولأنه غبي واستيعابه بطيء ماحس ابداً ان الكل مش موجود ،،،، في هذا الوقت حست ام خليفه بملل وتمنت لو مطر موجود عندها فقررت تدق عليه وتصارحه انهم مسافرين ،،،، رن تلفون مطر فالواتس ، استغرب انه يدته تدق عليه من الواتس اب ورد عليها على طول ؛
مطر : يا مرحبا وياحي من ذكرني
ام خليفه : وبصوته امسيت انا اليوم طرباني
مطر : وين العرب لاحس ولا خبر
ام خليفه : هني في قصر ايفيان
مطر : افا وانا اخر من يدري
ام خليفه : اسمح لنا يعني ظروف
مطر : ادري تاخذون اجازه منيه
ام خليفه : والله اني داقه مشتاقه لك
مطر : حولي لي فلوس و تلاقيني عندج باجر
ام خليفه : طرش رقم حسابك في الواتس اب وفالك طيب
مطر : ماتقصرين عساج ذخر ، خلاص انا اليوم برتب الشنطه
ام خليفه : عيل بطرش لك مايد المطار باجر
مطر : لا مايحتاي بأجر لي سياره
ام خليفه : تمام على راحتك
***
نرجع للشباب الي في ميلان ، بعد الغدا دخلوا الشباب ديور يشوفون شو اليديد خذولهم كلهم جواتي وبعدها اطلعوا من ديور و بيروحون برادا لانه شيخه مدحت لهم القسم الرجالي الي في برادا وانهم منزلين اشياء حلوه ويديده حصريه لـ ميلان فقط ، وهم في طريقم لـ برادا وقفهم هزاع لان سمع صوت لفت انتباهه من بين كل هالضوضاء ، لفت انتباه صوت وحده تقول ( حبيبي هزاع تعال ) وقف ووقف الشباب معاه تم واقف يتلفت ينتظرها تقول اي كلمه ثانيه عشان يشوفها ، بعد مرور دقيقه قالت ( هزاع ماماه لا تسوي هالحركات مره ثانيه ) الصوت ياي من يمينه ، التفت وظلمت الدنيا في عيونه صار يشوفها بروحها وهي نفس الشي وقفت تشوفه ، سرعان مارد للواقع وشافها تدز عربه فيها بنت وشابكه ايدها في ايد ريال و الريال شال الولد الي اسمه هزاع على كتوفه ، خنقته العبره و طبطب زايد على كتفه ؛
فيصل : عيا هاي الي خلتك عزابي
هزاع : اليوم انتهى كل شي
***
دخلوا برادا وراحوا الشباب لقسم الملابس الرجاليه اما هزاع قعد على الكرسي يقول بينه وبين نفسه ، ( خلاص اليوم ينتهي كل شي البنت كملت حياتها و تزوجت ويابت عيال وانا راح من عمري وايد وانا على أمل انا تصير من نصيبي ، خلاص لازم اطلعها من حياتي وانا ابدا حياة يديده بدونها ، لازم اكمل نص ديني وافرح اهلي و الي حولي الي صار لهم سنين يتمنون يشوفون عيالي ويفرحون فيني ، انا من ارد ايفيان بفاتح الأهل كلهم بموضوع الزواج ، هذا احسن حل ) ، عقد زايد عدال هزاع ؛
زايد : عادي اسألك سوأل
هزاع : هيه عادي
زايد : منو هاذي ؟
هزاع : الله يسلمك هذي وحده خالفتها و من شفتها قلبي تعلق فيها
زايد : الله جمعتكم مخالفه ؟
هزاع : هيه وشسمه بعد ما تأكدت من مشاعري اتجاهها
زايد : شو صار ؟
هزاع : بتخليني اكمل ولا شو ؟
زايد : كمل كمل
هزاع : قررت افاتح اميه وابويه في الموضوع واقول لهم ان هذي البنت الي ابا اكمل حياتي معاها
زايد : انزين فاتحتهم ولا لا ؟
هزاع : لا لاني في اليوم الي كنت بفاتحهم في الموضوع اكتشفت انها مخطوبه وبتتزوج
زايد : انزين ماحاولت ترمسها
هزاع : عيب البنت مخطوبه شو ارمسها
زايد : المفروض ماكنت تخليها تروح من ايدك جي هالسهوله
هزاع : يعني لو انت مكاني شو بتسوي
زايد : لا صح الي سويته لان عيب تروح ترمسها بدون علاقه رسميه
هزاع : انا اعرف ان محد يفهمني غيرك
زايد : لاننا عسكريين و مستقيمين الحمدالله
هزاع : هي والله صادق ، المفروض يديه يدخلنا كلنا السلك العسكري
زايد : هو المفروض
فيصل : ليش نحن شو فينا ؟
هزاع : لا فيكم غاريه على هلكم وفيكم وايد اشياء هب مضبوطه
زايد : هزاع سكر الموضوع
فيصل : لا خله يرمس ويقول شو الي هب عاجبه فينا
زايد : بس خلاص سكرنا الموضوع
يتبع ،،،،