اليوم الثاني بعد صلاة الظهر ، ردوا الشباب من المسيد ودخلوا على طول الميلس عند يدتهم ؛
مايد : يدتيه خلهم يحطون الغدا الحين
ام خليفه : بدري
هزاع : نحن واعيين من الصبح
ام راشد : شحقه ، الناس تي البحر حق تستريح وترتاح
راشد : واعيين من الصبح رايحين انصيد لكم سمج
ام خليفه : ومتى عطيتوه السمج
محمد : انا مسلمنه السمج وقلت اباه بعد الصلاه يكون جاهز
مايد : لو سمحتن حريم وبنات شباب بييوون يتغدون
هزاع : يعني اطلعوا بدون مطرود
ام خليفه : و عاد منو الشباب
محمد : يدوه رياييل يايين
ام خليفه : يلا طلعنا بنروح صالتيه
مايد : إلا احمد وين ؟
ام خليفه : انا بروح اشوفه
فطيم : انزين حامد من الشباب الي بيوون؟
ياسر : عزمناه ، عاد ماندري بيي ولا لا
***
طلعت ام خليفه ومعاها روضه ، بيشوفون أحمد وشيخه وصلوا للشاليه الي هم فيه ودقت ام خليفه الباب الين ماطاحت يدها ولا فتحوا لها الباب ودقت روضه لين ماتعبت ولا فتحوا الباب ؛
روضه : يدتيه انتي متأكده انهم هني
ام خليفه : هيه متأكده ، بخلي الطباخ اييب السبير
***
دقت ام خليفه على الطباخ اييب لها السبير ويابه بها ، ضربت الباب دخلت المفتاح وفتحته ، دخلوا الصاله شوي شوي وروضه فاتحه تلفونها تصور ، ام خليفه تقول لروضه ( اش لا توعينهم ) ، وقفت ام خليفه قدامهم توايق فيهم ودارت عليهم توايق ، قربت ويهها عند ويوهم ، وقالت بصوت عالي ؛
ام خليفه ( بصوت عالي ) : لا والله
( من الخوف قاموا وضربوا في راس بعض )
أحمد : يدتيه شو فيج خوفتينا
ام خليفه : لين متى بتمون راقدين ؟
أحمد : انتي بندي التلفون لا اكسره
ام خليفه : شو هالحركات ؟ درينا انكم تحبون بعض لكن اخطبها تزوجها عقب سو هالحركات
شيخه : زين بتيوزينا ؟ كم انحن عليكم ؟
روضه : انا ماسويت هالحركات مع راشد
أحمد : هذاك وينه ووين الرومنسيه
ام خليفه : خلني بخلص من زايد وشمسه عقب بفضى لكم
أحمد : ليش خلنا كلنا مره وحده
ام خليفه : هيه وافتك
احمد : زين اطلعوا وخلونا بروحنا
ام خليفه : لا شيخوه بتطلع معايه
أحمد : انزين ماشبعت منها
ام خليفه : زين حبها
( حبها في خدها )
ام خليفه : قلت حبها ماقلت اشفطها
روضه : ها جي يحب
ام خليفه : يلا قومي جدامي ، وانت الشباب في الميلس
***
في الميلس ،،، قاعدين يتغدون الشباب ، دخل حامد وسلم من بعيد شاف انه مافي مكان قعد على الكراسي و صب له قهوى ، دخل أحمد وسلم على حامد ، صب حامد على أحمد قهوى ، خذ احمد الفنيال من يد حامد وتم يطالعه مستغرب ؛
أحمد : منو الريال ؟
حامد : حامد أحمد ين عيسى الفلاني
أحمد : والنعم ، من هل دبي اذا انا مش غلطان
حامد : هي نعم من هل دبي ، وانت منو؟
أحمد : أحمد خليفه سالم
أحمد : راعي البيت عيل
أحمد : هي نعم ، ماتشوفني مستغرب وانت تصب عليه لقهوه
حامد : اسمح لي ماشفتك هذاك اليوم يوم ييت
أحمد : يمكن كنت مشغول ولا نحن دوم فالبيت نادراً مانطلع
***
بعد ماخلصوا شباب غدا طلعوا ، إلا راشد و مايد وياسر واحد وحامد ، دخلوا البنات وحريم عمامهم مع ام خليفه عشان يتغدون ، استحى حامد وقام بيطلع لكن وقفته ام خليفه وخلته يقعد معاها ؛
راشد : يدتيه ترا حامد ماتغدا
ام خليفه : افا ، فطيم اغرفي صحنين وييبيهن
فطيم : ليش ميود ويسور ماعندهم ريول ؟
ام خليفه : هب حقهم حقيه انا حامد
فطيم : هيه اذا انتم بغرف لكم
راشد : عيال البطه السوده
مايد : دوم نحن منسايين ومحد مهتم فينا
عاشه : افا ، صدقه عبد المجيد يوم قال ( مابين بعينك على كثر ماجاك )
مايد : يا ارض انشقي وابلعيني
***
بعد الغدا وبعد ماهدا الميلس وخفوا الي فيه ، ياب مايد طاولة سجن عشان يلعبون ، يلسوا راشد ومايد وحامد بيلعبون اما ياسر ياه اتصال وطلع ، قعد مايد يقنع وحده من البنات اتيي تلعب معاهم لكن محد طاع كلهن مستحيات ، التفت ومالقى فطيم ، فتح تلفونه دق عليها وحطها سبيكر ؛
فطيم : هلا ميود من وين طالعه الشمس داق عليه
مايد : لولا الحايه مادقيت
فطيم : خير يارب
مايد : تعالي كملي العدد بنلعب سجن
فطيم : بس شرط لا تاكلونيه
راشد : زين بس تعالي خلصينا
فطيم : يايه
***
دخلت فطيم وقعدت مجابله حامد ؛
فطيم : فريق ولا ؟
مايد : هيه انا ورشود وانتي وحامد
فطيم : تعرف تلعب ولا ؟
حامد ( يغمز لها ) : افا عليج لعيب
فطيم في داخلها ( ااهه محلا ويهه وحلا الغمزه ، انا كيف بتحمل ؟؟)
***
بعد صلاة المغرب كانن البنات قاعدات في الجلسه الي قدام المسبح ، روضه قاعده وقدامها الجوله تسوي ام علي و عدالها نوره تسوي جاي حليب ، اما الباقي على تلفوناتهن ، فطيم اشتغل حس المباحث عندها وبتموت تبا تعرف منو يكون حامد متزوج ولا مخطوب يمكن يحب وفي خاطره وحده ، قعدت تتذكر هل هو ياب اسم اهله ولا قومه و تسأل البنات اذا يعرفن ، ساره لان عندها معارف كثيره شبهته على وحده وقالت انه يمكن يكون اخوها ولا يقرب لهم لانه يشبهم ، كتبت فطيم حق ياسر في سناب تسأله حامد من قوم منو ورد عليها وقال لها اسمه الكامل ووين ساكن ؛
ساره : والله اني عرفت اشبه ، طلع من قوم غايوه ربيعتيه
فطيم : زين سأليها عنه
ساره : تستهبلين ؟ شو اقول ؟
فطيم : عادي قوليلها ، غايه منو حامد احمد عيسى ال......... ، واذا سألت ليش تسألين عنه قوليلها ماشي يدتيه لقته ونزلته عندنا وجي ، يعني ماتعرفين تسحبين كلام ؟
ساره : لا والله ماعرف ، هاج انتي رمسيها
فطيم ؛ هاتي
خذت فطيم تلفون ساره ودخلت على غايه في السناب ؛
فطيم : هلا غايه شحالج
غايه : ياهلا ، الحمدالله بخير ، انتي علومج؟
فطيم : طيبه الحمدالله ، إلا بسألج حد عندكم اسمه حامد ؟
غايه : ياكثرهم بس من صوب خوالي لان يدي اسمه حامد
فطيم : حامد أحمد من قومكم
غايه : ليش تسألين عنه ؟
فطيم : لا ماشي بس من يومين كان عندنا اضن فاتح كوفي اوشي وموصل الطلبيه عاد ويدوه ماخلته يروح
( طرشت غايه صورة حامد حق ساره ، فطيم من الحماس حفظ الصوره وطرشتها لها )
غايه : عيل انتوا الي يسولف عنكم ، يقول عيوز عقدت تسولف عليه وتعشينا عندها وطبخت لها البرقر
فطيم : هيه البرقر الي سواها لنا لذيذه ، انزين شو يكون لج حامد
غايه : ولد خاليه
ردت فطيم التلفون لساره وهي تقول : اففف هاي تكون بنت عمته ، الحين كيف اجذبه
روضه : فطيم عن الينان ، انتي جميله ومايحتاي تسوين شي عشان تجذبينه
فطيم : يخي حبيته
روضه : شو حبيته وانتي ماشفتيه غير مرتين ؟
يتبع ،،،،،