( براكا )
ارض براكا مصممه على شكل شاليهات ، فيها 10 شاليهات اطلالاتهم على البحر و 10 شاليهات اطلالاتهم على الحديقه و المسبح وفيها ميلس كبير مطل على البحر ، كل شاليه مساحته صغيره مايظم غير غرفة ماستر مع صاله ومطبخ تحضيري.
***
في الميلس بعد الغدا ، الي راح يقيل الظهر والي راح عنده حايه يسويها والي راح يقيل فالمسبح ، مابقوا في الميلس غير (ام خليفه ، راشد ، روضه ، مايد ، أحمد ، شيخه ، فطيم ) ، دخل مطر ومعاه حرمته و رحبت بهم ام خليفه ( مجامله ) ، لفوا راشد وروضه يشوفون بعض ( يتكلمون بعيونهم ) ، حاول مطر يفتح اي موضوع لان انزعج من الهدوء ، بعد 10 دقايق دخل سالم ، مانتبه ان مطر وحرمته موجودين لانه كان لابس نظارات ؛
سالم ( وهو يفسخ النظاره ) : انشويت ، بموت من الحر
( نتبه من قاعد عدال مطر )
سالم : لا انا بموت من الجلطه
ام خليفه : بسم الله عليك
( سالم ياخذ نفس )
ام خليفه : شو فيك
سالم : لا مافيني شي
ام خليفه : زين سلم على مها حرمة مطر
سالم : ها حرمة مطر بعد ؟
( يلس سالم بين روضه وراشد )
سالم ( بصوت واطي ) : انا شو مسوي في حياتيه عشان هاي تنشب لي
راشد : الله يعينك
روضه : هي والله الله يعينك
( دخلت فاطمه ويوم شافت مها تنرفزت )
فاطمه : وهاي شو يابها هني
روضه : فطوم سكتي وتعاي يلسي عدالي
ام خليفه : انتي ترمسين فالتلفون ؟
(استوعبت فاطمه شو قالت )
فاطمه : اقول برايج ، برمسج بعدين
( يلست فاطمه عدال روضه )
فاطمه ( بصوت واطي ) : مقدر اتحملها بزوع
سالم ( بصوت ماينسمع ) : كلنا بنزوع
فاطمه ( بصوت راطي ) : هاي شو تسوي هني ؟
روضه ( بطريقه غريبه ) : اممم هاي حرمة مطر
مطر : يدتيه خلي الطباخ يفتح شاليه من الشاليهات الي محد فيها بنقيل
ام خليفه : ان شاء الله
( دقت ام خليفه على الطباخ عشان يفتح لهم شاليه ، طلع مطر وهو ماسك ايد حرمته وانفجرت فاطمه )
فاطمه : يععع هاي شو يابها مره ثانيه
روضه : فاطمه بس
ام خليفه : منو هاي ؟
سالم : انا برمس هب ساكت
راشد : سالم الحين هي حرمة ولد عمك ، احترمها واستر عليها
سالم : لا والله ؟ يوم هي على ذمته شحقه يتني ؟ ، ولا هي بعد بتسوي عمرها انها ماتعرف ان مطر يكون اخويه
روضه : اكيد ماتعرف ، لو تعرف جان مايت البيت
سالم : لا هي بايعه عمرها ، كان الود ودها مطر يشوفها ذاك اليوم
ام خليفه : يا جماعه فهمونا شو الموضوع ؟
شيخه : هي نبا نفهم ممكن ؟
روضه : هاي الي ماتتسمى تكون حبيبة هذا
شيخه : انزين ؟
سالم : مابيني وبينها شي خلاص
روضه : ومن يومين يتنا في بوظبي الساعه 12 الليل و بكل وقاحه يايه تبا سالم
فاطمه : وماطاعت تروح لين ما نزل لها ، قلنالها سالم راقد قالت عادي بترياه
شيخه : هب جرئه عليها
روضه : قلة ادب ، المهم ربطنا المواضيع في نفس هذاك اليوم كان مطر معترف انه متزوج يعني هي يتنا وهي على ذمة مطر
( ام خليفه تجمع الي يقولونه في مخها )
شيخه : ويايه شو تبا من سالم ؟
فاطمه : تباه يرجع لها
شيخه : كيف يرجع لها وهي على ذمة واحد
سالم : مادري
ام خليفه : معليه ارويكم العصر فيهم
،،،
( العصر )
ام خليفه في الميلس تتريا مطر و حرمته على اعصابها ومعاها الشله ، الساعه 5:30 دخل مطر دون حرمته ؛
ام خليفه : بتطلقها اليوم قبل باجر
مطر : وليش ان شاءالله ؟
ام خليفه : وبعدين انت بتاخذ اي وحده من الشارع ؟
مطر : هي قطو ؟
ام خليفه : هاي انت وين متعرف عليها ؟
سالم : انت تعرف هاي منو اصلاً ؟ تعرف ماضيها؟
مطر : وانا شعليه من ماضيها ؟
ام خليفه : بتيب عيال من وحده لا تعرف اصلها ولا فصلها ؟
سالم ( بعصبيه ) : هاااي قح*ه
مطر : لا تغلط واحترم نفسك
سالم : كيفك لا تصدق
( رن تلفون سالم ، و المتصل مها ، فر سالم التلفون على مطر وقاله يرد بداله لكن مطر رد التلفون لسالم وقاله يرد ويحط سبيكر )
مها ( تتميلح ) : فديتك لا تسكر ، اسمعني
سالم : خير ؟
مها ( تتميلح ) : لو ماعطيتني فرصه والله اسويلك مصيبه
سالم : ليش شو تقدرين تسوين ؟
مها ( تتميلح ) : بقول انك اغتصبتني
سالم : زين وبنروح نسوي تحليل
مها ( تتميلح ) : بزوره
سالم : نحن في بلاد فيها قانون ، ولا تنسين المكالمه مسجله
مها ( تتميلح ) : نزين بيبي والله ما اقدر اعيش بدونك
سالم : برايج
مها ( تتميلح ) : لا تسكر سالم افهم اني احبك
سالم : وانتي افهمي اني احب وخاطب
مها ( تتميلح ) : كذاب هب خاطب
سالم : والله خاطب بنت عميه
مها ( تتميلح ) : لا تكذب وبعدين اي بنت عم بترضى فيك ؟
سالم : وانتي شو يخصج ؟
مها ( تتميلح ) : ماسمعت خبر خطوبه ولا سمعت شي
سالم : انزين اليوم صارت الخطوبه
مها ( تتميلح ) : خطوبتك على منو ؟
سالم : فاطمه بنت عميه
( صار ويه فاطمه احمر من الإحراج ، في خاطرها تقول : اه ليته صدق ) ، سكر التلفون على ويه مها ، وطلع مطر من الميلس معصب ، اما سالم قال لفاطمه انه بيخطبها وطارت من القرحه حست بشعور الفراشات ، بس بعدها قال انه بيخطبها عشان يفتك من مها وبعد فتره بيفسخ الخطوبه ، هني ضاق خاطر فاطمه لكنها سكتت ولا قالت شي .