الساعه 8:00 اكتبوا راشد و روضه كتابهم ، قبلها بنص ساعه في ميلس الرياييل ، طلب المأذون انه يروح ويسأل روضه كم سؤال ، طلع معاه ابوها ووداه صوبها كانت روضه قاعده في الميلس ، دخل المأذون وطلب من الكل يطلع حتى ابوها ، بعد ما طلعوا طلب منها الهويه وبعد ما تأكد ان هي روضه سألها ؛
المأذون : هل تقبلين الزواج بـ راشد سيف سالم .........
روضه : نعم اقبل ؟
المأذون : هل انتي مجبوره او مبتزه ؟
روضه : لا
المأذون : اكيد
روضه : هيه اكيد ، اوافق على الزواج من راشد سيف
المأذون : مبروك ، باخذ الهويه عشان البيانات وبييج لج الكتاب
***
طلع المأذون وهوية روضه معاه ، كتب بياناتها و وقعوا وخذ الكتاب عشان يوديه لروضه وتوقع ، قام راشد ؛
راشد : دقيقه يصير انا اودي الكتاب وتوقع وارده ؟
المأذون : هيه يصير
***
خذ راشد الكتاب وراح يركض الميلس ، دخل وشاف يدته والبنات ملتمات عندها عشان يصورنها وهي توقع ؛
راشد : يلا يلا كلكم برا
فطيم : شو برا ؟
راشد : ماشي تصوير يلا برا
شيخه : رشود حرام عليك
راشد : مابعيد الرمسه كلكم برا
ام خليفه : حتى انا ؟
راشد : نحن الطالعين وانتي الداخله
ام خليفه : يلا بنات اطلعن
فطيم : يدوووهه
ام خليفه : قلت اطلعن
( طلعن بنات وركضن صوب الدريشه بس للاسف مسكرين الستاره )
شيخه : اففف شو ها ، حشى هب غيره
فطيم : الله يعينها عليه
( سمعوا صوت تزقريط يدتهم وردوا دخلوا ، وطلع راشد بالكتاب وراح ميلس الرياييل )
ام خليفه : الساعه 8:30 بنزفج حق المعازيم
روضه : لا يدوه استحي ، ترا ملجه هب عرس
ام خليفه : ومن متى تستحين ؟
***
طلعت ام خليفه عند المعازيم ، بعد عشر دقايق رد راشد دق الباب ودخل ، كلهم افتحن تلفوناتهن يصورن وفقت روضه مبتسمه تشوفه ، وهو واقف يتأملها فجأه قال ( واخيراً ) ، قاطعتهم فطيم وقالت ( دعاء ليلة القدر استجاب ) ، مشى راشد صوبها بخطوات ثيله ، من الفرحه يحس انه مايقدر يمشي يتخيل انه في حلم ، وقف قدامها وفتح له يديها وهي حضنته وهو باس راسها مرت خمس دقايق وهم في احضان بعض ، دخلت ام خليفه ؛
ام خليفه : يعل فيني ماتبكيكم ، الله يديم الافراح و السعاده عليكم ولا يغير عليك يارب
راشد و روضه : امين يارب
ام خليفه : منو تبينه يزفج ؟
روضه : يعني لازم ؟
ام خليفه : تبين تنزفين روحج عادي
روضه : اصلا مش متقبله الفكره
فطيم : روضه لا تشوفين المعازيم ، شوفينا نحن ، بوقف البنات على يمينج ويسارج
روضه : اصلا انا مش متوتره و ولا شي ، ابا ابويه يزفنيه
ام خليفه : زين عيل بدق له
( دقت ام خليفه على ولدها ويا عشان يزف بنته ) ، زفوها وعقدت على الكرسي ، ين البنات تصورن معاها و سلمن عليها الي يبن يسلمن ، بعد عشر دقايق دخل راشد ومعاه ابو هزاع وهزاع ، حب راشد راس روضه بعدها وقفوا عدالها يتصورون ؛
روضه : وين فيصل وأحمد ؟
بو هزاع ؛ موجودين في الميلس
روضه : ليش مايو يتصورون معايه
هزاع : الحين بييون
***
دق هزاع على أحمد وقاله اييب معاه فيصل و اييون يتصورون مع روضه ،، سلموا عليها ووقف أحمد يوصي راشد ؛
أحمد : رشود تحط روضه في عيونك ترا مالنا غنى عنها
راشد : لا توصي
فيصل : والله لو تشتكي منك ماتلون إلا نفسك
راشد : تهديدات من اول يوم
هزاع : لا بس ينبهونك ان وراها رياييل
( كلهم يضحكون )
هزاع : انزين لفوا حق الصوره
***
الساعه 9:00 في صالة بيت بو راشد ، قاعدين روضه وراشد ومعاهم شمسه وفطيم ؛
روضه : يعت
راشد : حتى انا ايعان ، تبينا نطلع ؟
روضه : اممم مافيني ابدل
راشد : عيل بطلب ، شو تبين تاكلين ؟
روضه : لا لا ببدل وبنطلع
راشد : اوك بترياج فالسياره
***
اليوم الثاني ، في بيت ام خليفه ملتمين الشباب و البنات ، طلعت ام خليفه من غرفتها معصبه وتتهندق عليهم ، قعدن في الصاله بينهم وسكتتهم ، بعد 10 دقايق صمت ؛
ام خليفه : ليش صاخين مالكم صوت
مطر : انتي مسكتنا
سالم : قلتي ماريد اسمع صوت
ام خليفه: انا اقصد وطوا صوتكم لانه عالي
مطر ( بصوت واطي ) : العيوز خرفت
( سمعته ساره و فلعته بالمخده على راسه )
مطر : حشى شفيج
سالم : ترا كلنا سمعنا شو قلت
ام خليفه : انزين فطيم شو تحريتي عن الموضوع ؟
فطيم : يدوه بتفضحينا
ام خليفه : ماقلت شي ، اصلا مايدرون عن شو نسولف
شمسه : احس اعرف
فطيم : صدقيني ماتعرفين
شمسه : تخططون على ثنينه عقب رشود و رويض
ام خليفه : تتسمعين
شمسه : لا والله ، يدتيه وفطيم يعني ان اجتمعتن شو بتسون
زايد : والله كنت حاس
سالم : سيييم
ام خليفه : وشو بعد سيم ؟
زايد : يعني يحس باحساسي
ام خليفه : وكيف يحس بالي انت تحس فيه
زايد : لا يدوه يعني فكر في الي افكر فيه
ام خليفه : قول جي هب حس وحسيت
مايد : يدوه انا ابا اعرس
حمدان : وانا بعد ابا اعرس
ام خليفه : مالك غير نوره
حمدان : ياحظييي حظاااهه ،،، و انا موافق
شيخه وفطيم : حسييييت
حمدان : في شو حسيتم ؟
فطيم : من هاك اليوم يوم كنا في ليوا حسيت انكم تحبون بعض
حمدان : اوف طلع الحب هب من طرف واحد
شيخه : ترا هب متأكدين
سالم : فطيم و شيخوه اكبر فضيحه
فطيم : شو الي اكبر فضيحه
شيخه : يدوه اخطبي سلامه حق هزاع
هزاع : اييه انتي شو تخربطين ، انا ما افكر في العرس الحين
ساره : متى تفكر تعرس يوم بتوصل الثلاثين
هزاع : مالج حايه
فطيم : يدووه زاشد وشمسه لايقين على بعض حتى اساميهم لايقه
ام خليفه : صح
زايد : الي يسمعج يقول ها متخرج و متوظف وعنده معاش يعيشه ، و انا في نص الشهر ادور فلوس بترول
فطيم : عيل انت ماتنفع للعرس
سالم : شو رايج انا اخطبج
فطيم : اممم والله بيطلع انتاجنا حلو
ام خليفه : بس سكروا موضوع العرس ، ابا بروح البحر في الويك اند
سلامه : يعني كلنا بنروح ؟
ام خليفه : انتي وفاطمه بتروحن معايه وبيودينا محمد
هزاع : يدتيه خلنا نروح الويك اند الي عقب الياي
ام خليفه : لا انا بروح البحر بقعد اسبوع وعقب بروح ليوا اسبوع ، ان الله راد بسافر الشهر الياي
شيخه : زين والله مخطط حلو ، نحن معاج فيه
يتبع ،،،