السلام عليكم جميعا
و رمضانكم كريم
حبيت نشارككم بعض تفاصيل و احداث رواية حجر صوان و ياريت اللي عنده اي ملاحظة يتفضل
اولا نحكيلكم ع سبب كتابة الرواية او من وين جتني الفكرة
موقف صار لصديقة ليا تسكن خارج ليبيا مش حابة نكتب اسم مدينتها ع شان الحساسيات اللي ممكن تصير المهم صديقتي كانت مشاركة في مؤتمر دولي ببحث و بحثها فاز مع ان تخصصها صعب و علمي 🧪. كانت تتلقى في الاسئلة و جاوبت بثقة و كسبت احترام الكل و اول ما نزلت من ع الستيج تقدموا منها مجموعة بنات من دول عربية مختلفة يهنوا فيها و يسالوا فيها كيف في ليبيا واصلين للمستوى هذا من العلم و اللغة قالتلي حرفيا مش سعيدة كنت طايرة فووووق من السعادة بس فجاة تدخلت بنت ليبية في الحوار و سبقتها في الاجابة قائلة " هذه من #### ناس سيئين و مجرمين و يقتلوا و يسرقوا ووووو😑
طبعا صديقتي صاحبة البحث من فوق العوالي فوق نزلت لسابع الارض قالت حرفيا عمري ما وجعوني نظرات زي نظراتهم ليا يومها و خاصة هي لا ليها علاقة بالسياسة لا من قريب ولا من بعيد و تحب الكل بمختلف انتماءاتهم
وجعني الموقف و حطيت روحي في مكانها ! و من يومها وانا نفكر نكتب ع الموضوع هذا وان اختلفت الطريقة نكتب بطريقة نلمس فيها المواضيع الحساسة في بلادنا و نحاول نوضح للي غايبة عنه الصورة ان في كل مدينة في الزين و الشين
و في كل توجه فيه الباهي و الكي
وان الخونة مرات تجيك من اقرب الناس ليك مش شرط يكون ع النقيض معاك في التوجه
وان الدعم مرات يجيك من انسان كنت تتوقع ان يتشمت فيك يوم اطيح
هذا الجزء الاول و يارب نكون وصلتله و لهذا احترت اغنية ميلانو (متشافوهاش) كبداية للرواية يعني عمرك ما تحكم ع حد الا لما تعرف شني صاير معاه خلف الكواليس
السبب الثاني هو انتشار ثقافة غريبة بين بناتنا المتزوجات و خاصة السنين الاخيرة و ممكن يكون بسبب المسلسلات و البرامج او الروايات
لاني كنت اي مكان عام و صدفة و بدون قصد سمعت اثنين يتكلموا وحدة تنصح في الثانية كيف اطفش زوجها لانها مازال تحب خطيبها الاول وان الحب يبي تضحية؟!😱
قلت نهار احرف وصلنا اهني احني. ؟! معقولة تصبح قضيتنا الاولى حب ؟! انا من الناس اللي نتفرج ع افلام اجنبية و نقرا في الروايات الانجليزية بس في حاجة اسمها فلتر يعني مش كل شيء فيها يجذبني او بالضرورة نطبقه !! لان مجتمعنا يختلف و ديننا غير حييت نلمس النقطة هذه و بطريقة تحير القاريء يعني وقت يكونوا اثنين في حياة بنت والاثنين ما يتخيروا ع بعض وهي نفسها وقعت في الحيرة بس كيف تصرفت والاهم الهاشمي نفسه كيف تصرف ولا مرة حاول يتواصل معاها و كل ما تخطر في باله يحاول يطردها و يلجا للصلاة ع شان يتقوى بالله. سبحانه .. و هي دارت نفس الشيء لعند وصلوا لنقطة انهم اي محتفظين بذكريات حلوة جمعتهم بس ابدا لا خانوا الله و لا عبده
هذه اهم نقطة ولهذا السبب من البداية كان خط سير الرواية واضح عندي مش لاني مع ونيس لان من منطقة معينة ولا لاني ضد الهاشمي و لا تأثرت بالتعليقات صح قريتها و صح احتفظت بالكثير من القصور الموجود عندي لكن لاعمال قادمة نحاول نصحح ما يمكن تصحيحه من كتابتي لكن الرواية و خط سيرها يشهد عليا ربي من اول ما بديت ما غيرت فيه وفي ناس فعلا اكدتلهم ان النهاية مرضية وهذا بمعنى ان مش ح يكون فيه موت لاحد الشخصيات ع شان البطلة تكمل مع الثاني
نجو لنقطة ثانية وهي الاهم انا حريصة كل الحرص ع قراءة التعليقات وفي روايتي هذه و بناء ع ملاحظات سابقة من قراء وصلتني
و خاصة بعد رواية فتاة المراعي طيبة و رواية الصراط المستقيم
النقد كان اني رجعت طيبة للمعتصم في الرواية و خليت احمد يطلع بصورة سيئة مع ان كان راكب عليها و الاغلب عجبتهم شخصيته وفي رواية الصراط المستقيم كان النقد ع موت سالم وان خديجة تكمل مع ولد عمها اخر نقد اني ديما نتكلم ع لسان البطلة و لو نبي ننجح لازم نكتب بحيادية كان تحدي كبير ليا لاني جربت نكتب هكي في النار والبارود و تراجعت لاني حسيت ما اندمجت في الكتابة
المهم روايتي هذه طورت من اسلوبي بناء ع النقد البناء و خليت البطلة و البطل يكملوا مع اشخاص ثانيين و لسبب سبق شرحته برضو
و عدلت من اسلوبي و تبنيت اسلوب الراوي والقاص ع لساني انا ككاتبة ...
بالنسبة ليا هذه اهم نقاط حبيت نتشاركها معاكم اي شيء ثاني حاضرة لتفسيره
و اخيرا وليس اخرا
نشكر كل من تابع الرواية و من عجباته نهايتها و احداثها و برضوا نشكر كل من لم تعجبه الاحداث والنهاية ومن قلبي نتمنى تسامحوني ع اي تقصير او اساءة بدرت مني بدون قصد و انا مسامحة في اي كلام وصلني و وصل فيا سوى ع الخاص او ع القروب
نحبكم جميعا و فرحانة اني كسبت معرفة ناس من مختلف مناطق ليبيا
و نقدم اعتذاري لاي مدينة ما ذكرتها لاني كتبت في وقت ضيق و عارفين اجواء الاستعداد لرمضان ياريت تعذروني
نتمنالكم رمضان كريم و مليء بالطاعات و ربي يتقبل منا و منكم صالح الاعمال
نحبكم جميعا
مع خالص تحياتي
مارية علي الخمسي ❤️❤️❤️❤️❤️❤️❤️