طق الباب و طقت معاه قلوب الكل و كل طقة ع باب مختلف و يا عالم وقت ينفتح يعم الفرح و الا يقولوا يا ريت لا طقينا و لا انفتح الباب واللي وراه حقينا ...
خلي نفتحوا اول باب
باب حوش خليفة اللي تخلى عليه لان زوجته مش مرتاحة فيه بسبب اهله وًتدخلهم المستمر في حياتهم و بالاحرى بوه
وين خليفة اليوم ؟ في دار الحق بس اكيد الحق و العدل مطلع و عارف و ما يضيع عنده حق
الهاشمي طبعا ما خش للحوش: شوفيها انت يا امي قبل و خليها تستر روحها
الهاشمي حتى مع عدوه طالب الستر و مستحيل يهتكه عكس غيره!!
في احد الطرق الفرعية اللي توصل للساحلي
كانت المعنية بدون ستر تجبد في ملابسها و تحاول تستر روحها و تبكي و تهدد : و الله يوريكم راجلي يا كلااااااب
راجل اختها و خوه : توا احني خذينالك صور نار و لو انت فالحة قولي عليهم لراجلك
اسماء هجمت عليهم و تبي تخبشهم : نقتلك يا حقير يا كلب و نقول لاختي عليك بالك تحساب مازال تشوف لوجهك
راجل اختها : اقتلي كان قدرتي و قوليلها لو صدقت شوفي تيليفونك وشنو باعث منه رسائل و صور نقوللها اختك كانت تبعثلي و تجري وراي انا و خوي بس انا مطنشها و نشوفوا من تصدق
هي قعزت ع الارض و تبكي : علاش درتوا فيا هكي شني درتلك يا حقير
(نست هي شن دارت)
راجل لختها طبس عليها : مش مرة ثانية تزيدي تزني ع اختك مليح اطلقي منه دام ما درتيش صغار واحد فقري و ما يجيش راجل لو كان راجل يدبر في الخدمة و يخبط الحيط يطلع فلوس لكن هو يترقد زي الانتايات !! شفتي الانتاية شن دارت فيك
هي انصعقت وقت عرفت ان سامع كلامها عليه كله : انا
راجل اختها بتهديد: توا تعرفي شني بيصير منوصلك لشيبانيك وًنلوحك عنده و اللي صار تقولي منه حرف صورك و عارك مش لراجلك بس لا ع الفيس تلقيه و وقت نطلب منك عملة تاخذي من عمي الحاج و تعطيني والا ذنبك ع جنبك
خوه: سمعتي و نسخ الصور ماله حد و في فيديو دماااار
انكسرت اسماء و سكتت و رضخت لطلبهم ركبت معاه السيارة من جديد و خوه مشي لسيارته
نرجعوا للهاشمي اللي يستنى في امه تطلع و تقوله ان اسماء سترت روحها
يعني لكم الحكم و التعليق بين قريب وثقت فيه كيف هتك سترها و بين انسان اذاته هو وهله في اعز و اقرب الناس ليه عمه و اللي هو زوجها بس تربيته اصالته دينه يمنعه يدخل لحوشها بدون استئذان و كان ينتظر في امه تعطيه اذن الدخول بعد سترت روحها
بس هنا كانت المفاجاة
ليلى طالعة تضرب في خدها بخفة:ياناعليا يا هشومة الولية مش قاعدة
أنت تقرأ
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
