السلام عليكم وجمعة مباركة عليكم .. اول شي شكرا ع التعليقات الحلوة ع الرواية ككل و ع حلقة امس بالذات
ثاني شي حابة نعتذر امس ما رديت عليكم و لا قدرت نضيف حلق ثانية الضي هرب من الساعة ثمانية و نص للساعة 12 رقدت 😅اخر شي اليوم والله طالعة عندي مناسبة و ح نروح متاخر لهذا الحلقة نزلتها توا احسن و اعذروني حتى اليوم حلقة وحدة
تحياتي ليكم جميعا ❤️❤️❤️❤️
مارية علي الخمسي
*************************
المنجي استغرب ضحكتها و هو طالع ينشف في شعره من الحمام (اكرمكم الله) : تي شني في؟
اسماء تمروح ع وجهها و لفت ايديها ع رقبته : في ان العصفورة خلاص تمتلها كل شي توقعته الا الغباء اللي داره الهاشمي
المنجي يتامل في تفاصيلها و دايب فيها : اممم و شنو دار اللي ما يتسمى
اسماء بدلع : خطب بنت ولد عمهم و ناوي يقرا الفاتحة غدوا و طبعا انت عارف ان طلع مكلم بوه علي زوبا قبل ع اساس بياخذها هي بعد فضيحة البرنامج لكن توا خلاص قرر يتزوج غيرها بعد الملعوب اللي درته انا بكل تواضع يعني الست زوبا مش ح تقدر تعبش غادي و لا هو ح يخليها اصلا بس تعرف انت المفاجاة وين
المنجي لف ايديه عليها: وين؟!
اسماء تنهدت : ان اللي خطبها هادي نقدر نخليها زي الخاتم في صبعي من اليوم نقدر نلعب بيهم زي ما نبي يا باشا
المنجي : و انت في اللعب عاد شيطانة و ما يغلبك حد
اسماء تصنعت المسكنة و قلبت فمها: انا معقولة هادي نظرتك ليا
المنجي : انت ناوية تقتليني راك يا مراة
اسماء : بعيد السو عليك يا باشا
و نخلوهم و نمشوا بعيد عنهم شويا لاوس اللي مقعمز قدام نهى : هيا كان بتروحي لحوشك نوضي و الا خليك طول عمرك اهني
نهى بغرور: بس المعاملة تختلف و تسمع الكلام و سيرة الكلبة هاديكا معش نبي نسمعها
اوس بمسايرة : خلاص ماهو اتفقت مع بوك نتمله موضوعها و نجيبها اهني و يتصرف هو معاها خلاص
نهى تنهدت براحة: معناها استنى نمشي نجيب شنطتي و نجي
اوس حط ايده ع فمه و بالثانية اشرلها للباب بمعنى تفضلي
و هي كانت تمشي و كلها ثقة انها ملكت اوس للابد و ح يمشي ع العجين ما يلخبطوش
اوس: 💦💦💦 توا يبانلك انت و بوك و زوبا و الله الا ما ناخذها و نهرب بيها و طلع جواز سفر زوبا من جيبه لان خنبه من بوه و ابتسم
نزيهة تراقب في بنتها كيف فرحانة و تخبط ع رجلها : وووه ع طياح السعد خليه يتمرمط وراك شني مروحة معاه طول يجيك من اهني تروحي من اهني
أنت تقرأ
حجر صوان
العاطفيةرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا