خش للحوش بحال غير اللي طلع بيه من خمس سنين متبهدل ع الاخر القاه مسكر قعمز في الجنان و حاضن نفسه و يرجف من البرد و الجوع من غربة سنين تبهدل فيها من جراء افتراء من اخته في حق صديق عمره
لو كلف نفسه و ساله ممكن الموضوع حساس بس علاقتهم كانت علاقة اخوة لدرجة انهم يباتوا حتى عند بعض امهاتهم امهات بعض يعني اخواتهم اخوات بعض .. كيف ممكن للخو ان يطعن في شرف خوه اللي معتبره عين من عيونه
بس وقتها انعمت بصيرته و سمع لاخته و في نظره وقتها انتقملها و ردلها اعتبارها لما افشى اسرار صديقه لعدوه اللذوذ
رجعت بيه ذاكرته لهذاكا اليوم المشؤوم
كان يومها ادم حاس بالانتصار ان قدم المقترح المسروق اللي يخص عمر للدكتور
عمر اللي قريب هبل كيف تعبه ضاع ع الفاضي فتش اللاب خش ع سلة المحذوفات شغله كله مش موجود و طبعا ابدا ما شك و لو للحظة ان ادم هو اللي سرقه
جي للاكاديمية محبط و ما عنده اي رغبة يستمر في الدراسة .. بس لان شخص كويس و ياما ساعد طلبة ماديا و معنويا ربي اراد ان يكافأه
الدكتور اللي يقري فيهم وقتها كان محتفظ بنسخة لاول مسودة خاصة بشغل عمر لان ارسلها ليه في ايميل
قارنها بشغل ادم و قدر يعرف الاسلوب لمني بس طبعا يبي دليل دامغ
شاف عمر مقعمز و واضخ مهموم ناداه و الاخير خبره باللي صار معاه
في المحاضرة
الدكتور عرض شغل عمر اللي قدمه ادم و طلب من ادم يشرحه للطلبة
بس ادم كان يقرا فقط
و عمر كان مصدوم و الدمعة في عينه احقر شعور هي سرقة مجهودك و عصارة افكارك و نسبها لشخص ثاني
الدكتور بدي يسال فيه بس اجاباته كانت ناقصة و غير واضحة و لا مطابقة للكلام الموجود
فقام الدكتور بتوجيه الاسئلة لعمر اللي كان يشرح بدون ما يشوف لشاشة العرض لان قاعد يحكي في تعب شهور اذا ما بالغنا و قلنا سنين
و بعد مواجهة من اسئلة الدكتور المحترف و الخبير قدر بسهولة يخلي ادم يعترف ان خذي شغل عمر
و لان الدكتور من النوع الصارم دار فيه تقرير و ع طول تم فصله
و عمر كانت فرحته لا توصف ان مجهوده ما ضاعش
بس اول ما طلع استلم وابل من تهديدات ادم بالانتقام
لكن عمر لان انسان ما عنده في اللف و الدوران ما اهتم لكلامه وقتها ما كان يحساب ان دناءة البشر قد تصل لمستويات من الانحطاط قد لا يتصورها عقل بشري نقي زيه
المهم ادم وصلتله معلومة ان علي صديق عمر بدي يتجنب فيه و واضح في سوء تفاهم بينهم و من هنا بدت حكاية جديدة اجتمعت فيها حقارتهم لتحطيم انسان خلوق و طالب علم ما ذنبه شي الا ان حافظ ع حقه و مجهوده العلمي
YOU ARE READING
حجر صوان
Romanceرواية # اجتماعية وطنية و رومانسية و فيها دراما تحكي ع قصة بدايتها في فترة الأحداث فيها اقتباسات هلبة من الواقع ع فكرة و حتى بعض القصص للاسف صارت في ليبيا
